Góð tillaga frá Gunnari Inga

um mislæg gatnamót Arnarnesvegar og Breiðholtsbrautar birtist í Kópavogspóstinum í dag.

Mér sýnist að hún sé í stíl við ofanáliggjandi hringkeyrslubrú eins og er á Arnarnesvegi-Reykjanesbraut við Garðabæ-Kópavog sem Skrauta byggði fyrir nokkrum árum. Þau gatnamót svínvirka.

Því miður tekst mér ekki að finna greinina í Kópavogspóstinum á netinu til að endurbirta hana. En þeir sem áhuga hafa ættu að kynna sér grein Gunnar I. Birgissonar í Kópavogspóstinum frá í dag.

Þarna myndu vandamálin leysast í stað þess að vaxa eins og Dagur B. og hans nótar eru að reyna að þvinga í gegn ofan í okkur Kópavogsbúa þvert um geð. Það er mála sannast að orkuskipti í bílaflotanum batna ekkert við ljósastýrð gatnamót á Arnarnesvegi -Breiðholtsbraut heldur bara aukast.

Ég hef áður hvatt til þess að setja upp sjálfvirka gjaldtöku á Arnarnesvegi-Breiðholtsbraut. Sáralítið gjald myndi greiða fyrir framkvæmdina. 

Annað sem mér dettur í hug að minnast á úr því að ég nefni Gunnar Inga. Það er það að hann fyrir aldamótin síðustu  lét steinsteypa nokkra kílómetra af  götum í Kópavogi.

Þær voru gerðar 15 sentímetra þykkar úr innfluttu norsku gæðabergi að hluta.

Reynslan úr Vesturlandsvegi í Kollafirði sýnir hinsvegar að íslenskt berg 38 mm stærstu steinar í steinsteypu hefur dugað þar í meira en hálfa öld án viðhalds. Þar geta menn séð endinguna svart á hvítu og borið saman við það malbik sem þeir þekkja. Íslensk steypa er því vel geranleg í samkeppni við malbik.

 

Eina sem klikkaði í Kópavogi var að undirlagið var úr bögglabergi sem blöðrótt og lint og þolir ekki umferðartitringinn og molnar niður. Þá getur steypan sprungið þar sem hún þolir ekki togspennur.

Auk þess var ekki vélarútlagningu við komið sumstaðar og handsteypa þurfti fleyga sem er ekki nægilega hæðarnákvæmt. En skriðmótavélin sem notuð var lagði hárnákvæmt og rennislétt þar sem henni var við komið.

En það  er annað merkilegt sem blasir við. Þegar ekið er austur Fífuhvammsveg í átt að Smáralind sést að gatan er eiginlega óslitin eftir rúma tvo áratugi. Ég sé  varla hjólför í hellunni og stöku sprungur sem sjást af fyrrgreindum ástæðum sýnast ekki skipta meginmáli.

15 sentímetra steypa eins og þarna er líklegra ódýrari í stofnkostnaði en malbik. Fyrir utan að endast greinilega miklu betur.

Útlagningarvélin er víst enn til uppi í Borgarnesi og allur útbúnaðurinn. Eitthvað af reynslunni er hugsanlega ofar moldu ennþá. Og steyputæknin hefur bara batnað. 

Ég nefni þessa vegasteypusögu svona í framhjáhlaupi. Hún á nú víst  hvergi upp á pallborðið og verður líklega ekki endurvakin.

En tilaga Gunnars Inga um Arnarnesvegamótin er í fullu gildi ef tekst að koma meirihlutanum í Reykjavík frá áður en hann veldur meiri skaða á höfuðborgarsvæðinu öllu en orðið er.

Athugasemdir

[Vagn (IP-tala skráð) 18.11.2020 kl. 12:55]

Þó þú teljir Dag almáttugan og einráðan þá eru þessi gatnamót á hendi vegagerðarinnar en ekki Reykjavíkurborgar. Og svo má spyrja sig hvort þessi mislæga hugmynd gagnist eins vel þegar íbúabyggð hefur þróast í 10 ár og umferðin jafnvel tvöfaldast. Það vill oft gleymast hjá áhugamönnunum sem vilja redda umferðinni eins og hún var í morgun að það þurfi einnig að huga að framtíð.

[Rúnar Már Bragason, 18.11.2020 kl. 16:38]

Hringbrú væri flott þarna en vandamálið er enn til staðar af hendi Reykjavíkurborgar. Þeim er svo illa við afreinina frá Breiðholtsbraut sem er of nærri skíðabrekku við hliðan á og það þarf að vera hjóla og göngustígur yfir brúna. Þeir sem ganga eða hjóla að skíðabrekkunni geta sem sagt ekki farið ca 300 metra í undirgöng sem nú þegar eru þarna.

Klikkunin í Reykjavíkurborg lagast ekki fyrr en meirihlutinn fer.

[GÍSLI HOLGERSSON (IP-tala skráð) 18.11.2020 kl. 17:05]

Athafnamaðurinn Gunnar Ingi Birgisson vann að góðum verkum í Kópavogi og á Alþingi. Ekki má gleyma röddinni. Kópavogsbrúin og tengingar ásamt brautinni að Arnarnesbrúnni virka vel.

Vissulega eigum við að nota íslenska steynsteypu þar, sem langt líf hefur sannað sig í bæjum og borgum ásamt ÍSLENSKU undirlagi. 

Gjaldtaka á leiðum innanbæjar, þótt hún sé lág, er afleit. Nóg er að fást við Hraðamyndavélar og okur sektir.

[Halldór Jónsson, 19.11.2020 kl. 17:37]

Vagninn framsýnn að vanda. Sættir hann sig þá við að gera ekkert næstu 10 ár af því að vandamálið vaxi á þeim tíma? 

Sagði líka ekki Hjálmar spaki  kenndur við holur að það þýddi ekkert að fjölga akreinum því þær fylltust bara af bílum. Og Dagur B. sagði líka að tímar mislægra gatnamóta í Reykjavík væri liðinn svo við gerum þá líklega ekki neitt af ótta við framtíðina.

[Halldór Jónsson, 19.11.2020 kl. 17:39]

Gísli minn, það er margt til í þessu sem þú segir. En mér finnst að menn verði að velja milli þess að ekkert sé gert eða gert strax og borgað fyrir með gjaldi. Eins og Hvalfjarðargöngin. Hvar væri þau núna án gjaldtöku? Hvað finnst Vagninum um það?

[Halldór Jónsson, 19.11.2020 kl. 17:41]

Rúnar, þú mælir satt. Það breytist ekki meðan Dagur og kompaní fer með völdin. Og Vagninn ver það allt í líf og blóð.

[GÍSLI HOLGERSSON (IP-tala skráð) 19.11.2020 kl. 20:53]

Kæri Halldór. Gjald á að taka fyrir stórverkefni eins og HVALFJARÐARGÖNG. Þessu gjaldi fylgir líka mikið ÖRYGGI varðandi slys og eftirlit. Það má setja gjald og lágt gjald fyrir heimamenn í "öll" jarðgöng. SAMMÁLA.