Krónan eða Evran.

Þegar menn fara að færa til eignir og flytja tapgreinar yfir í sérstök félög, þá fæ ég á tilfinninguna að það sé verið að undirbúa aflúsun eins og einn gamall og kaldur kunningi minn orðaði það. Man einhver eftir flottu búðinni  Nanoq ?

Af hverju er Glitnir, sem er í eigu Bónusarklansins, að losa peninga allstaðar sem hann getur ? Ekki er hann að lána almenningi  þá, þar sem bankarnir hafa greinilega opinbert samráð um að loka á almenning og fyrirtæki hans.Hvar er Samkeppnisstofnun núna ?

Eigum við almenningur núna að fara að skera bankaséníin í Kaupþingi niður úr snörunni fyrir skattfé landsmanna ? Mér skildist á Ragnari Önundarsyni, sem venjulega veit hvað hann syngur, að kaupendur Búnaðarbankans hefðu varla haft nægilegt siðferðisstig,  til að vera treyst fyrir innlánum almennings. Þeir hefðu tekið sparifé almennings í vogunarbrask og óvíst hvort þeir geti núna skilað spariféinu, sem Ragnar nefndi réttilega "Eyrir Ekkjunnar ". Þeir hafa hinsvegar nægilegt siðferðisstig til að skammta sjálfum sér stjarnfræðileg laun á meðan þeir setja ráðningarbann á þvottakonur og reka fjölda manns.

Til að bæta gráu ofaná svart,  þá talar seðlabankastjórinn um að 30 % verðhrun á fasteignamarkaði sé framundan. Er það til að auka traust manna á Landsbankanum og fasteignafélögunum hans ?  Er þetta til að auka traust manna á að Íslendingar komist í gegnum brimskaflana ? 

Til hvers er ríkisstjórnin með svona sjálfstæða  efnahagsmálastofnun eins og þessa stofnun ? Þurfum við ekki traustan forsætisráðherra, sem talar kjark og þor í landslýðinn og gjaldmiðilinn upp en ekki niður ? Ég hélt að forsætisráðherrann væri yfirmaður efnahagsmála landsins, sem mótaði stefnuna og  kallar  útí bæ  ættu að vera honum liðsmenn ?

Sem betur fer komu inn jöklabréf fyrir 6 milljarða nú nýverið .  Vaxtahækkunin, sem var að mínu mati rétt aðgerð hjá Seðlabankanum, greiðir fyrir frekari útgáfu slíkra bréfa.  Gengishækkun krónunnar er besta lífskjarabót almennings og lyf gegn verðbólgunni.  Þau fyrirtæki sem notuðu tækifærið um leið og dollarinn sló í áttatíukall, að hækka allt vöruverð um 100 %, þurfa að fara undir smásjá almennings þegar gengið styrkist og almenningur á að smiðganga þessi fyrirtæki.

Allt talið um evruupttökuna gengur framaf mér. Íslenzka sparikrónan er besti gjaldmiðill í heimi, sem okkur ber að vernda með ráðum og dáð. Verðtryggingin á spariféinu er besti vinur almennings. Boðskapur þeirra,  sem vilja afnema verðtrygginguna,  talar bara máli þeirra sem tekið hafa of mikil lán og vilja komast hjá því  að borga til baka. Fólk verður að skilja það einhverntíman að lán eða skuldir eru ekki lán heldur ólán. Aðeins eignir gera menn frjálsa. Þessvegna á fólk ekki að taka lán nema að vel athuguðu máli og í brýnni nauðsyn. 

Ég hef bara eina spurningu til þessara evruspekinga :

Ef við skiptum í evrur á morgun eins og spekingarnir  eru að boða, hvert verður þá kennarakaup á Íslandi ?  Verður það hærra eða lægra en í Þýzkalandi ? 

Eða kauptaxtarnir hjá Guðmundi í Rafiðnaðarsambandinu eða hjá BHM ?

 Hvernig fer með íslenzka kjarasamninga yfirleitt ? 

Verður 30 % kauphækkun einstakra stétta  möguleg ?

Athugasemdir

[Jónas Tryggvi Jóhannsson, 12.4.2008 kl. 09:46]

Evruspekingar eru alls ekki á móti verðtryggingunni, því einsog þú bendir á þá verndar hún bæði lánara og skuldara fyrir skammtímaáhrifum verðbólgu. En það er hinsvegar ekki hægt að telja 15,5% stýrivexti til kosta við Íslensku krónuna, því sama þótt það séu háir vextir á peningunum sem maður á, þá er raunveruleikinn sá að almenningur á Íslandi er skuldsettur upp fyrir haus, og þess vegna er mjög alvarlegt að það séu 22% vextir á yfirdráttarheimildum og aðeins lægri á óverðtryggðum lánum til að kaupa bíla eða hvað annað sem fólk þarf peninga fyrir.

.

Laun kennara mun ekki breytast við að taka upp evru, þeir munu bara fá borgaða sömu upphæð í evrum og þeir fá nú í krónum. Það sem mun hinsvegar breytast er að kjarasamningar munu eiga möguleika á því að halda í fyrsta skiptið í áratug, því það er ekki hægt að koma böndum á verðbólguna með litinn flöktandi gjaldmiðil. Með stöðugan gjaldmiðil, og þarmeð stöðugt verð á út og innflutningsvörum, þá munu kaupmenn hætta að hækka verð með lækkandi gengi og lækka það svo ekki með hækkandi gengi - því gengið verður stöðugt.

.

Þú spyrð svo; "Verður 30 % kauphækkun einstakra stétta möguleg?".. og auðvitað verður hún möguleg. Það sem verður ekki mögulegt er að lækka gengi allra um 30% með því að fella gengið eins og hefur verið að gerast upp á síðkastið.

.

Krónunni er haldið uppi með mjög háum vöxtum, og sveiflast því ekki með öðru en spákaupmennsku erlendra aðila. Vextirnir eru að kæla Íslenskt efnahagslíf niður, og ef við þurfum að koma því af stað aftur með vaxtalækkunum, þá munum við ekki geta það því það myndi grafa undan gengi krónunnar og koma af stað verðbólgu aftur. Við erum semsagt orðin fangar erlendra spákaupmanna - í sjálheldu með ónýtan gjaldmiðil.

[Sigurður Þórðarson, 24.4.2008 kl. 15:11]

Kæri bloggvinur: Takk fyrir veturinn og gleðilegt sumar

 "Hægara í  að fara en úr að komast¨"