Við erum að drepast !

Við erum hreinlega að drepast Íslendingar. Atvinnuleysið  vex  óðfluga. Bráðum mæla 14000 manns göturnar.  Jafnvel Mogginn er að fara á hausinn og eftir það stendur Baugur að allri prentmiðlun í landinu. Baugur, Baugur allstaðar. Okurbúllur, einokun og ríkisbankar. Gjaldeyrisskortur, gjaldeyrisleysi, nefndir ráð.  Allir tala um samdrátt, sparnað og annað rugl, sem á ekki við við þessar aðstæður. Við verðum að örva atvinnustigið eða drepast niður. 

Þetta þjóðfélag er eiginlega komið til fjandans allt saman. Það þýðir ekkert að bera á móti því. Hagstjórnarmódelið okkar núna er árgerð 1956. Það er bara SÍS sem vantar á markaðinn.  Og mér finnst núna því miður  eiginlega ekkert ljós í myrkrinu sjáanlegt,  þar sem ekkert heyrist nema talið um samdrátt  ríkis og sveitarfélaga, uppsagnir og algert úrræðaleysi.    

Hvern andskotann ætlum við að gera ?  Öskra í Háskólabíó hjá leikstjóranum og á Austurvelli með Herði Torfa ? Henda eggjum í Alþingishúsið ?  Mér finnst bara ekkert nema snakk um Evrópubandalagið og einhverja evru vera í gangi.  Langhundar frá Jóni Baldvin um heimsku Sjálfstæðisflokksins gagnvart Evrópubandalagsumsókn valda mér aðeins klígju. Það er bullað og bullað um aðgerðir þar sem  það liggur samt fyrir að allt það ferli  tekur mörg ár.    Það gagnar þeim sem þá verða á lífi  eins og séra Jens á Setbergi lýsti einkennum neftóbaksleysisins þegar sást til kaupstaðarfarans uppi á bæjarhólnum.  

Ég veit ekki hvernig ég ætti  sem  Sjálfstæðismaður að ganga út úr Laugardalshöll af landsfundi Sjálfstæðismanna nú í janúar með þá samþykkt , jafnvel naums meirihluta fundarins á bakinu,  að hefja aðildarviðræður við ESB með krötunum og Framsókn ? Líklega best að fara ekki þangað til að sleppa við slíka þolraun.  Ekki get ég verið í  flokki sem stendur ekki undir eigin nafni hvað þá annað. Ég verð þá víst að verða flokksleysingi í fyrsta sinn á ævinni,   því aldrei mun ég kjósa einhverja kratagosa hvað þá kellinguna hans Flosa eins og þar stendur. Hvað þá  þá Þorvald Gylfason, þann arga Ebeson,  Skallagrím og  Jón Baldvin, -nei það er engin von.    Ég sé mig ekki sætta mig við að fara í ESB og afsala auðlindum lands og sjávar til erlends valds.  Mér fannst Ole Rehn tala alveg nógu skýrt fyrir mig. Ég finn ekki neinn  Evrópumann  inni í mér þrátt fyrir langa veru í Þýzkalandi.   Ég er bara Íslendingur með fleiri taugar vestur um haf en austur.  

Það sem okkur vantar núna er sterkur gjaldmiðill sem gengur um heima alla. Dollarinn er stærstur.  Auðvitað verður það erfitt miðað við verkfallasöguna okkar. En við komumst ekki útúr þessum i kreppuvítahring gengisfellinga, verðbólgu og himinhárra stýrivaxta  öðruvísi.  Ég held að við munum hreinlega drepast útaf ef við gerum þetta ekki á næsta ári.Við verðum að reyna á þetta með dollarann sem fyrsta kost.  Aðrar leiðir eru ekki í boði. ESB er lokað og evran er ekki í boði hvað sem kratarnir segja. Dollar er stærri en NOK.  Við stefnum hinsvegar beint í það núna að  lifa  við átthagafjötra til lengri tíma vegna krónunnar,  eins og lögin voru gerð  í gær.

Auðvitað væri gott að losna við jöklabréfin og útlendu kröfurnar fyrst  með ónýtri krónu. Fresta uppgjörinu á Icesave og skipta í dollara áður en skrifað er uppá 800. 000 króna víxil á hvern lifandi Íslending , nema með einhverjum kjörum sem þjóðin getur með raunhæfum hætti borgað af tekjum framtíðarinnar, sem eru annað en skatttekjur ársins 2009.  

Skyldi vera  eitthvað  búið að tala við Kanann um upptöku dollars eða ekki ?   Er þetta allt læst í skipulagt upplýsingaleysi og leynimakk ?  Veit einhver hvort það er rétt að Kanar og Kanadamenn vilji okkur ekki í NAFTA ? Hvað þýðir það og hversvegna ? Ef það er vegna EES þá er tími til að endurskoða það allt.  Enda sýnist vera búið að afnema fjórfrelsið í landinu á borði en ekki  orði, hvað sem þessum EES samningi líður.

Hvenær er næsta virkjun og stóriðja möguleg ?  Af hverju er undirbúningurinn svona skammt kominn ?  Ætlum við að friða þorskinn og síldina við þessar aðstæður  og horfa á útflytjendur ráðstafa gjaldeyrinum framhjá landinu í von um gengisfellingu ?  Meiri kvóta strax til smáplássanna í kringum landið þar sem fáir róa á hverju skipi.   

Mér finnst staðan svo alvarleg að það þýði ekki að halda áfram að blaðra almennt  um ríkidæmi þjóðarinnar,   mannauðinn og mannkostina  . Fasteignir étur maður ekki  við  sulti.  Og mannauðurinn bara fer úr landi og eftir verða bara þeir aumustu þó mannkostamenn séu kannske taldir,  eins og gamalmennin okkar, öryrkjar og minnihlutahópar.   

Er það þetta sem við bíðum núna eftir Íslendingar ? Bíðum við hungurdauðans eða ætlum við að berjast ?

Þó að við sjáum ekki okkar  Roosewelt núna, þá vantar okkur  New Deal ! Stefna Hoovers gengur ekki við þessar aðstæður.   Lífeyrissjóðirnir okkar verða að kaupa ríkistryggð skuldabréf sveitarfélaga og ríkissjóðs. Þetta eru stríðsskuldabréf þjóðar í umsátri.  Það er stríð.

 Peningar verða að renna til mannfrekra framkvæmda í byggingariðnaði til að koma fólkinu af götunum. Ekki eyða í  vélavinnu,  jarðgangnagerð eða vegagerð.  Það er þjóðarvá fyrir dyrum ef við getum ekki startað efnahagsvélinni með eftirspurn eftir iðnaðarmönnum og verkamönnum.   Við erum annars bara að drepast sem þjóð .   Það mega allir reyna að sjá sem vilja sjá.

Það er enginn huggun í því að aðrir séu að drepast í löndunum í kringum okkur. Við verðum að bjarga okkar þjóð fyrst. Svo hinum.

 Reynum að duga frekar en að drepast !

Vaxandi fylgi með upptöku dollars !

Ég verð var við það, að gífurlega vaxandi þungi er í umræðu manna á meðal fyrir því að breyta um mynt og taka upp Bandaríkjadollara, sem mynt á Íslandi. Ekki Evru sem er háð duttlungum Bruxelles-bandalagsins með sínar 27 ósamstíga þjóðir. Engin niðurstaða fæst þaðan fyrr en eftir mörg ár. Við förum heldur aldrei inn þangað sem samstíga þjóð.  Svo ákveðin erum við í því að láta ekki auðlindalögsöguna frá okkur,  hvað sem evrópuspekingarnir hafa hátt . Ole Rehn talaði alveg nógu skýrt fyrir mig. 

Af hverju skiptum við ekki yfir í Bandaríkjadal núna t.d. 15.des. n.k.  Á ca. 95 kr. fyrir hvern dollara, sem ég hef heyrt  talið raunhæft viðmiðunargengi fyrir útflutningsatvinnuvegina.  Öll lán og innistæður breytast í dollara á því gengi.  Útlánsvextir verða Libor plús einhverjir punktar sem Seðlabanki ákveður en ekki viðskiptabankarnir. Innlánsvextir kannske bara verðtryggingarvextir. Kannske verða vextir hugsanlega  5-8 %  á langtímalánum.  Yfirdráttarlán fyrirtækja verða auðvitað dýrari eftir áhættu viðskiptabankanna.  En samráð þeirra verði hindrað með tiltækum ráðum.  

Við verðum samt líklega að greiða eitthvað vaxtaálag vegna langtímalána til að vernda lífeyrissjóðina og íbúðalánasjóð því að dollarinn er verðbólgumynt eins og aðrar.

 Annars er þetta einfalt til að byrja með. Langtum ódýrara fyrir þjóðina, sem þarf ekki öll þessi stóru lán, Og getum líka sagt eitthvað við Gordon Brown sem okkur langar til að segja vegna Icesave. 

Hættan fyrir okkur er fólgin í skæruliðahópunum sem ætla að beygja þjóðfélagið undir sig með ofebeldisaðgerðum í formi gíslatöku og uppsagna. Þar reynir á samvinnu samtaka vinnumarkaðarins.  Við verðum að semja þjóðarsátt til lengri tíma við svona  tímamót djarfra ákvarðana.

Við verðum líka að semja við Seðlabanka Bandaríkjanna um einhverja þrautavörn fyrir Seðlabankann. Skyldu þeir ekki  vilja örugglega gera eitthvað til að útbreiða dollarasvæðið á móti evrusvæðinu ? . Er ekki rétt að kanna þegnskap hins nýja forseta Obama ? 

Kostirnir verða þeir,  að þjóðin er sameinuð í því að eiga sjálf yfirráð yfir auðlindunum, fiskimiðunum, orkunni, náttúrunni, olíunni. 

Kostirnir eru líka þeir , að verðbólguholskeflan,  sem við sitjum núna í kvíðahnipri yfir að muni hellast yfir okkur á næstunni við krónufleytinguna, kemur bara ekki. Vextirnir lækka og viðskiptin örvast og atvinnuleysið lætur undan síga.

Drífum okkur upp og reynum að fara að virkja og koma erlendri fjárfestingu inn í þetta Gósenland til þessarra vinnufúsu handa. Hættum að liggja í hnút og sækja öskursamkomur hjá leikstjórunum á laugardögum. Okkur vantar aukavinnu, alltaf meiri aukavinnu !  Leyfum líka eldra fólki að vinna að vild án skerðinga. Við þurfum allra hendur á loft sem geta.

Tökum svo upp  vegabréfaskyldu  og raunhæft eftirlit með því hverjir koma til landsins og fara.   Lokum  Fríhöfninni,  sem er óþörf með öllu og höfum þar venjulegar búðir. Útlendingar sem fara úr landi geta fengið TaxFree, ekki Íslendingar sem eiga ekkert tilkall til þess. 

Af hverju ekki ? 

LÍÚ-menn í stöðutöku gegn krónunni !

Það er ekki nóg að við höfum gefið sægreifunum fiskimiðin. Nú  nauðpína þeir okkur eigendurna með því að geyma allan gjaldeyrinn erlendis og reyna með því að fella fyrir okkur krónuna. Allir stóru spilararnir í bankahruninu eru líka farnir erlendis og halda sig þar ríkmannlega. Einn ætlar  að kaupa Kaupthing Luxembourg og fær það líklega. Þá þarf ekki lengur að leita að bókhaldi hinna þar.

Sögusagnirnar um milljarðaflutningana á gjaldeyri fyrir hrunið hafa ekki verið bornar til baka. Það er allt í lok lok og lási og allt úr stáli hjá nýju bönkunum þar sem sama fólkið, pólitísku bankaráðin og gömlu bankastjórarnir hræra enn í pappírunum í nafni bankaleyndar. Ekkert gerist nema að þjóðinni blæðir út með krónunni sem útgerðaraðallinn og eigendur jöklabréfanna ætla að rústa fyrir okkur.

Ég held að eina vonin fyrir almenning sé að skipta um gjaldmiðil og taka upp dollar strax. Við getum það nefnilega án þess að þurfa að bíða 5 ár í forgarðinum hjá aulabandalaginu sem ætlar að hirða af okkur alla auðlindastjórnun. Verðbólgan hverfur og vextir lækka. Það þarf bara að passa að bandíttarnir fari ekki með nýju seðlanna í töskum til útlanda svo að hér verði ekki dollaralaust.

Já og þjóðin getur svo tekið til sín kvótaeignina og leigt hana út úr því að handhafarnir eru búnir að fyrirgera réttinum með þessu framferði.     

Eru menn að hugsa um dollara ?

Einhvernvegin held ég , að sumir  ráðamenn og atvinnurekendur séu  farnir að velta upptöku dollara hérlendis mun betur fyrir sér en áður. 

Nú veit ég ekkert hvort einhverjar viðræður við Bandaríkin eða Kanada fara fram um málið. En ótrúlegt þætti mér ef þessar þjóðir vldu ekki báðar eitthvað á sig leggja til þess að aftra okkur frá ESB og koma okkur frekar í NAFTA .

Mér hefur alltaf fundist Íslendingar, með sitt áræði og snarleika í snúningum , séu miklu líkari Ameríkumönnnum en meginlandsbúum Evrópu. Auðvitað komum við frá Evrópu og syngjum þeirra fjárlög.  Við höfum samt yfirleitt allt annan fasa í okkar efnahagslífi heldur en  Evrópa.  Og Ameríkumenn eru líka einnig margir ættaðir úr Evrópu eins og við. 

Og gleymum því ekki að vestanhafs býr jafnfjölmenn íslenzk þjóð og okkar hér á landi og mér  finnst það skipta máli að efla þau tengsli. En mér finnst þetta Evrópubandalag eins og prófessor Þorvaldur Gylfason trúir svo heitt og einlæglega á í Silfri Egils og víðar,  ekki vera mikið á vetur setjandi.27 ósamstæð ríki með jafnmörg flögg og sérþarfir og gersamlega impotent til utanríkismála.  Mig vantar ekkert Rúmena í stjórnun umhverfis , virkjana eða fiskveiða á Íslandi.

 Mér sýnist ESB  miklu fremur standa á miklum brauðfótum og líka það, að það ætlar sér að hremma okkar auðlindir í heilu lagi eins og Ole sagði.  Ég held að ég vilji nú "frekar eiga mínar konur sjálfur"  sagði Ólafur á Oddhóli og gafst vel. Og eitthvað virðist nú samhjálpin vera klén í því selskapi ef maður horfir á Írland og Spán og pólska bændur í kröfugöngum í Bruxelles.

Þessi lausn er mun ódýrari en lánaleiðin mikla og krónufleytingin. Og líka  fljótvirkari til að slá niður verðbólguna og vextina. Mér finnst samt að okkur væri hollt að finna upp einhverja verðtryggingu fyrir lífeyrissjóðina og langtíma inneignir sparifjár,  því það er ekki svo að það sé ekki nóg af verðbólgu í öllum myntum. Við ættum líka að hafa verðbólgureikningsskil fyrir fyrirtæki okkar, til þess að stuðla að langtíma heilbrigði þeirra. Í gamla daga fóru fyrirtæki gjaldþrota þó þau borguðu alltaf tekjuskatt, þar sem hann skynjaði ekki verðbólguna og áhrif hennar á lagerana.

 Við gætum líka jafnhliða gefið út eigin dollara með  einhverjum skilyrðum, svona svipað og Luxarar í samstarfi við Belgi hér í den tíð. Mér finnst þetta afar spennandi hugmynd ef við gætum talið okkur trú um að við ætlum að vera eina þjóð í einu landi til lengri tíma. En velfarnaður peninganna okkar veltur einungis á hegðun okkar sjálfra.

Ekkert af þessu er þó mögulegt nema með víðtæku samráði við stéttarfélögin sem yrðu að sjá sér hag í tafarlausri verðhjöðnun á móti víðtækum kjarasamanburði við önnur lönd. En þó ég sjái kannske ekki alveg til botns í þessu máli, þá er gaman að velta þessu fyrir sér. Ég hef heyrt að gengisvísitala innan við 180 sé talin raunhæfur grunnur við skiptin. Það væri nú eitthvað annað en er í dag.

Mér finnst að þetta sé vert að ræða. Ég veit vel að allt er hættulegt til lengri tíma sem gert er í svona gjaldmiðlabreytingu. En við getum þá bara gefið út krónur aftur seinna eins og Frakkar þegar þer gáfu út assignatinn í stjórnarbyltingunni. Við þyrftum þá kannske að fá okkur gillútínu líka eða eitthvað krassandi meðal til þess að fá tiltrú lýðsins á krónunni þá. En það er óþarfi að sjá allt fyrir og sleppi því frekari vangaveltum.

 

Lesið Féttablaðið á fimmtudag 20.11.08 !!

Að lesa Fréttablaðið í dag er stórkostlegt dæmi um hvernig svonefnd "sjálfstæð ristjórnarstefna"   slíks kaupahéðinsmiðils getur birst manni óvænt í sínu rétta og raunverulega ljósi.

Þar þrumar rithöfundurinn Hallgrímur Helgason  um nauðsyn þess að setja löglega kjörið Alþingi og ríkisstjórn af og kjósa nýja leiðtoga eftir hans hugmyndum en ekki stjórnarskrá landsins. Og prófessor Þorvaldur Gylfason veður enn elginn um Evrópubandalagið og nauðsyn þess að forsetinn reki stjórnina burt og setji á þjóðstjórn. Svo er smágrein um hvernig sá vondi Davíð var að setja útá hinn góða forseta Ólaf Ragnar. Leiðarinn eftir ritstjórann Þorstein Pálsson auðvitað allur um að gera Davíð tortryggilegan og Seðlabankann, þó á prúðmannlegum nótum sé. Hlutabréf í Saks hafi skaða Baug, sjálfsagt vegna verka Davíðs getur maður ímyndað sér.  

Allt blaðið er fyrir mér eisleitur áróður í eina átt.  Grafa skipulega undan trú manna á stjórnvöldum og tala þannig um umboð þeirra að lítið þarf til að hinir æstustu hlaupi útá göturnar og hrópi á byltingu. Og ganga í ESB líka  auðvitað.  Jón Ásgeir er væntanlega ánægður með það þegar svo einbeitt kantata er leikin í Baugstíðindum.  

Og stuðningmenn ríkisstjórnarinnar í Samfylkingunni á Alþingi, jafnvel 2 ráðherrar í ríkisstjórninni, aka undir flautuleik meistara síns samdægurs og halda áfram að grafa undan forsætisráðherra sínum og ríkistjórninni sem þeir þykjast styðja. Maður gæti helst lesið Goðmund á Glæsivöllum til þess að reyna að skilja þann flokk og formann hans.  

 Það er í  raun áhyggjuefni fyrir þjóðina, að nánast öll prentuð fjölmiðlun í landinu skuli vera komin undir stjórn  stærsta skuldakóngsins. Og áhrifin til upplausnar eru miklu meiri en menn gera sér grein fyrir. Göbbels sagði líka, að ef maður endurtæki sömu lygina nógu oft, þá yrði hún að sannleika.

Mér finnst skrifin í  Fréttablaðinu  nú orðið minna um margt á blaðið hans  Hitlers sem hét Völkischer Beobachter. Þar var boðuð hin klára niðurrifsstefna og öskrað á réttlæti og hefnd og ekkert annað.  Stefna þess blaðs varð ofaná og lýðræðið undir. Það er nefnilega hægt að brýna skoðanir fólksins með því að spila alltaf sömu plötuna og nógu oft og hátt til þess að aðrar raddir heyrist ekki. Og verða svo á undan því að fólkið fái tóm til að hugsa að hætti Lincolns. Það er bara búið að loka allt í einu.   

Tökum völdin !   Við einir kunnum með þau að fara !   Það er fyrir mér sá boðskapur sem uppúr stendur eftir fyrstnefndu skríbentana í þessu Fréttablaði dagsins í dag.

Lesið ræðu Davíðs !

Á vef Seðlabankans er hægt að nálgast ræðu Davíðs Oddssonar á Viðskiptaráðsfundinum 18.nóv.

Ég held að öllum sé hollt  að lesa þann texta til að átta sig á og skilja tengslin milli áróðursmaskínu  útrásarvíkinganna , fjármálasnilldar dýru bankastjóranna á háa kaupinu  og afleiðingar synjunar forseta lýðveldisins á fjölmiðlalögunum á sinni tíð og niðurstöðu þjóðarinnar.   Almenningur hefur aldrei fengið réttar upplýsingar og því flotið að feigðarósi.   Leigupennar víkinganna hafa séð um upplýsingagjöfina og skoðanamyndunina. 

Merkilegast er,  að þessi rangupplýsingamaskína gengur á fullu ennþá.  Það er heldur ekkert að breytast í málunum. Enn fá þessir menn  nýja  milljarða í bönkunum til að hefta samkeppni á fjölmiðlamarkaði ofan á þúsundir milljarða skuldir. Og forsetinn nýr saman höndum og veitir þeim sérstök verðlaun sín. 

Það er í rauninni ekkert að gerast nema laugardagseggjakast á tilbúna  óvini bak við steinveggi.  Allir eru  sagðir sekir nema þeir seku .

"Af hverju er litli maðurinn svona heimskur ? " æpti kallinn á kassanum í Stuttgart 1959. Hann svaraði spurningunni sjálfur með því að æpa: " Af því hann er svo heimskur " 

 

Áfram með dollarann !

Það er að aukast umræðan um að taka upp aðra mynt en krónuna. Og það eru æ fleiri sem trúa ekki á ónýta evruna sem hríðfellur gagnvart dollar. Og trúa heldur ekki á það að ESB bara meiki það í gegnum krísuna. 

Ég held að við gætum alveg spurt Kanann hvort við megum taka upp dollar í samvinnu við þá og hvort þeir ekki hjálpi okkur fúslega til þess. Að því fengnu göngum við tafarlaust úr EES og afnemum allar tengingar við ESB í íslenzkum lögum. Verðum sjálfstætt ríki aftur í skjóli USA eins og var í stríðinu.  Ég held að það  sé  hægt að taka upp dollar án þess að ganga í Bandaríkin. En okkur víst sárvantar þetta lán frá IMF

Ég held að þetta ESB sé að liðast í sundur. Þetta er svo sundurlaust og ósamstætt bandalag fyrrum hatursmanna og óvina, að það er vonlaust að þeir geti lafað svona saman á einum gjaldmiðli. Og svo pólitískt steingelt er þetta bandalag, að það þurfti að sækja Kanann til þess að stilla til friðar  í Bosníu í bakgarðinum hjá  ESB.  Kaninn á nefnilega eina þjóð á bak við eitt flagg sem gildir. Evrópa á 27 þjóðir bak við 27 máttlaus flögg og handónýt þegar til stykkisins kemur.

Og ég held að Þjóðverjar muni sprengja Evrópubandalagið í andlitið á  þremur íslenzkum Samfylkingum, sem eru bara annarsvegar bara kratar og hinsvegar kýr, kindur og kratar og svo hugsanlega helmingurinn af gamla Sjálfstæðisflokknum eftir landsfundinn í janúar.

Ég hef hinsvegar engar áhyggjur af því að íslenzkir kjósendur muni nokkru sinni þurfa að greiða atkvæði um Evrópubullið, það verður farið á hausinn áður. Og svo  getum við aldrei uppfyllt Mastricht skilyrðin heldur.

Þegar  kemur aftur krísa  næst-,  þegar þessi er búin og næsta góðæri líka-,  þá getum við alveg gefið út innlenda krónu aftur í neyð.  Alveg eins og Leipzig gaf út postulínspeninga í krassinu  eftir fyrra stríð og flest ríki Þýzkalands önnur gerðu slíkt hið sama. Ég hef séð leðurpeninga frá þessum tíma og held ég trépeninga líka, brauðpeninga frá bökurum og fleiri gerðir. Við í steypubransanum  gáfum  einu sinni út steypukrónur, sem menn keyptu svo grimmt fyrir íslenzkar krónur án nokkurra trygginga nema kvittunarinnar um inneign frá okkur, að við urðum  hræddir  sjálfir  og vísaðum  mönnum í haugum frá.Enda gamaldags uppaldir og ekki Hannesaðir. Þeir hefðu nú ekki hætt svo glatt útrásarvíkingarnir nú til dags. 

Þjóðverjar notuðu til dæmis sígarettur sem peninga í tvö ár eftir stríðið. Pabbi minn sagðist hafa borgað tveimur gömlum mönnum sem báru koffortin hans frá höfninni uppá Reichshof 1947, þrælaburður fyrir gamlingja,  5 sigarettur hvorum. Þeir  vildu helst kyssa hann fyrir svo glaðir urðu þeir. Þegar hann sagði þýzkum viðskiptafélögum frá þessu urðu þeir alveg trítilbrjálaðir og ásökuðu hann um að ætla að kollvarpa efnahag hins unga fjórða ríkis sem var í fæðingu. Hámarkið væri 1 sígaretta fyrir þessa þjónustu. Hitt væri tilræði við ríkið, " Landesverrat" - ávísun á launaskrið og verðbólgu og voru svo vondir að hann varð skíthræddur að hann væri búinn að fyrirgera öllum bísness sínum. Þessu gleymdi hann aldrei.

Kannske eigum við eftir að upplifa svona hræðilega tíma sjálf. En vonum að svo verði ekki og þetta él birti upp um síðir þó ekki sé útlitið beinlínis glæsilegt í heiminum.

Og Geir minn Haarde. Blessaður taktu aukamilljarðinn líka. Það veitir ekkert að því ef þeir vilja taka jöklabréfin út.

 

Gunnar Rögnvaldsson og myntbandalög

Mér barst eftirfarandi bréf frá Gunnari Rögnvaldssyni. Mér finnst ég verði að birta það hér þannig að hans hugsun varðandi myntbandalög fái sem víðustu dreifingu:

"Sæll Halldór og þakkir fyrir góð orð og innlitið.

 

Þegar Seðlabankinn flytur úr landi þá flytst einnig hagstjórnin með til útlanda og stór hluti möguleika þjóðarinnar á að skapa velmegun til handa þegnum sínum. Þetta er kallað nýlendustjórnun. Hagstjórn, sjálfsbjargarviðleitnin, frelsið og sjálfsábyrgð flytst úr landi. En frelsið og sjálfstæðið er stærsta auðlind Íslands.

Þegar myntin er ekki þín þá ertu ofurseldur mynt annarra og hagstjórn annarra. Til dæmis þá væri ríkisgjaldþrot eina leiðin í núverandi ástandi Íslands, þ.e. ef Ísland hefði ekki sína eigin mynt - því þá hefðir þú ekkert gengið til að vinna þig út úr vandamálunum.

Ríki með eigin mynt geta ekki farið á hausinn. Þau fella bara gengið. Einu ríkin sem raunverulega geta orðið gjaldþrota eru ríki í myntbandalögum og ríki með mynt annarra. Þau geta farið á hausinn og munu fara á hausinn og hafa farið á hausinn.

Það hafa víst fáir tekið eftir því en það er búið að loka á fjármögnun til spánskra bankageirans núna - mitt ínni í galdra gjaldmiðlinum henni evru. Það standa núna 1.000.000 tómar fastiegnir á Spáni. Spánverjar bíða, - þeir bíða og vona og geta ekkert gert. Sama með Lettland. 15% verðbólga þar og 4% stýrivextir. Reyndu að geta þér til hvernig þeir ætla að ná þessari verðbólgu niður, lausnarorðið er auðvitað atvinnuleysi og félagslegar hörmungar, hvað annað!

Myntbandalög og mynt annarra tryggir EKKI fjármagn. Það gerir hinsvegar góð og hófsöm hagstjórn. Þetta hefur Seðlabanki Íslands margoft bent á í ræðu og riti. En enginn hlustar.

Haldór - það þýðir ekkert að skipta um áfengistegund eða fá einhvern annan til að halda á flöskunni fyrir sig. Góð hagstjórn er forsenda alls.

Núna er búið að sólunda auðæfum Íslands í holu ofaní jörðina í útlöndum. Er ekki kominn tími til að halda áfram með uppbyggingu landsins? Hvað er eiginlega að mönnum? Eru menn búnir að gleyma gömlum og góðum gildum? Það þarf að framleiða framleiða og selja og selja og byggja upp. Það er svo auðvelt að vera alltaf kaupandi, kaupandi af drasli, það krefst nefnilega engra hæfileika - maður eyðir bara.

Bestu kveðjur

Gunnar Rögnvaldsson, 17.11.2008 kl. 23:06 "

Ég vil þakka Gunnari sérstaklega fyrir þetta skrif til mín. Þó að ég hafi ekki fengið leyfi hjá honum til að pósta þetta hér,  þá vona ég að hann fyrirgefi mér framhleypnina.En  þetta geta líka allir lesið á hans heimasíðu . 

Mér finnst að í þessu svari hans felist mörg rök,  sem við verðum að svara áður en við bara æpum á Evrópusambandið og evruna. Eins og báðir Samfylkingarflokkarnir, annar með kindur,  kýr og krata og hinn bara með krata, gera núna. O g væntanlega bráðum  hálfur Sjálfstæðisflokkurinn líka.

En ég get ekki orða bundist,  þegar maður skoðar þetta í kjölinn. Það verða allir að hugleiða hvað þetta og hitt þýðir.   Eigin mynt er auðvitað alltaf  sú nauðvörn sem hverri þjóð er tiltæk í neyð,  sbr. Þýzkaland eftir Versalasamningana og óðaverðbólgan síðar. Og saga lýðveldisins Íslands.

Maður sér Spán, Lettland , Ítalíu  og Írland engjast núna sundur og saman af evrukvölum.  Þjóðverjar eru stífir á því að þeirra kassi sé ekki fyrir aðra meðlimi bandalagsins heldur þá sjálfa. Þeirra evrur séu betri en hinna.   Ætli við gætum  ekki orðið uppiskroppa með evrur einhverntímann ef við til dæmis tvöfölduðum kaupið hjá þeim verðugu í næstu aflahrotu, sem tæki skyndilega enda eins og núna ?    Ef einhver heldur öðru fram þá svari hann því hversvegna við setjum ekki dollarann bara núna aftur í 60 kall og lækkum vextina í 4 %. Yrði það allra meina bót ?  

Ég vil undirstrika það sem ég hef áður sagt um krónuna, að hún er bara við sjálf og hvernig við förum með hana. Við höfum bókstaflega traðkað á henni alla tíð með óskynsamlegum kjarasamningum í góðærum fyrst og fremst.  Af því að við fórum sjálf svona illa með hana þá rjúkum við upp núna og ætlum að kenna henni um okkar eigin misgerðir og  fíflaskap.  Slík er örvænting okkar og fjallheimska,  að við leitum að öllum öðrum leiðum nema þeirri að horfast í augu við okkur sjálf. Átsandið er ekki mér að kenna heldur öðrum. Þetta segjum við öll þó að við vitum betur innst inni. Önnur mynt er auðvitað fær leið eins og þeir Ársæll og Heiðar hafa bent á. En hún er heldur ekki gallalaus þó að maður sé stundum uppgefinn þegar þjóðargjaldþrot blasir við.

Það verður alltaf stærri sveifla í litlu hagkerfi en stóru. Stórt kerfi dregur þá bestu niður en tosar eitthvað í þá sem verr gengur. Litla kerfið er fljótara að svara áreiti, bæði upp og niður en getur verið mun skilvirkara til hagsældar eins og við þekkjum. Þessvegna er hugsanlegt að Ísland verði fyrr til að rífa sig uppúr hjólfarinu en margir aðrir. Af hverju gengur Spánverjum svona illa núna þrátt fyrir evruna ?  Það er aðeins af því að þeir hafa fengið og mikið af auðfengnu fé túristanna og búið til spennu í kringum það.  Verð á þjónustu gleðipinnanna og meyjanna hefur rokið upp. En  allt fer í klessu um leið og andar á móti. Alveg eins og hjá okkur  í kringum fjármálaútrásina, Kárahnjúkavirkjunina og Fjarðarálið, byggt með flýtiKínverjum að stórum hluta. Alltaf smi gusugangurinn hjá Íslendingum.

 Það hlaut að koma krass eftir svona veizlu.  Spánverjar  þyrftu að fella gengið til að berja ofan í kollinn á liðinu, sem er búið að hækka standardinn hjá sér uppúr þakinu. Þeir bara geta það ekki og nú súpa þeir  beizkara seyðið í framhaldi. Við erum búnir að því svo um munar.

Ég man, þegar  Ludwig Erhard þrumaði alltaf til Þjóðverja frá 1957 -1962  þegar "das Wirtschaftswunder" (þýzka efnahagsundrið) var í fullum gangi. "Masshalten "  - Hófstilling og meinti eyðslu og launakröfur. Það var nefnilega svo mikið af þenslugjöfum í umferð eins og alltaf er þegar vel gengur og mikið aflast að kallinn var sífellt á verði og Adenauer líka. En á þann virðulega gamla mann trúðu Þjóðverjar á þessum tíma miklu heitar en á Hitler á sínum tíma.

Í slíku ástandi mikils hagvaxtar  þarf að hækka skatta eða "kajólera" eða "hrósþvinga"  almenning til sparnaðar sem er auðvitað  betri leið á endanum. Allstaðar voru Bausparkassen, hvetja fólk til eignamyndunar en ekki eyðslu.  Auðvitað laut Erhard í lægra haldi fyrir Hannesönum. Bjórinn kostaði 50 pfenniga þegar ég kom en held ég 1 mark  þegar ég fór og miklu meira núna.  En ég sá þýzka efnahagsundrið innanfrá,   sem var svo stórt að gömlu nasistarnir hristu hausinn og sögðu, þetta getur ekki gengið svona áfrram, þetta hlýtur að enda með ósköpum.  Núna syrgja Þjóðverjar markið sitt gamla og myndu henda evrunni strax ef þeir fengju að greiða atkvæði. En það fá þeir bara ekki frekar en fyrir hjá Hitler fyrir heimstyrjöldina síðari, sem hefði auðvitað verið felld. En það var eitt sem skildi okkur og Þjóðverja að. Þýzk bankahefð krefst þess að vextir séu greiddir í reiðufé á hverjum mánuði- ekki bætt ofana á skuldina NB Engin vaxtagreiðsla-engin framlenging.

Auðvitað veit maður ekki allt og sumt af því sem maður er að hugsa gengur ekki eftir nánari athugun . En mér dettur í hug að sé  hugsanlega hægt að sigrast fljótar á kreppunni  hér núna eftir einhverjum af eftirtöldum leiðum. Sumir liðir eru kannske barnaleg mýrarljós sem standast ekki nánari skoðun, annað myndi virka :

1. Taka stóru lánin og líka þennan milljarð dollara sem þeir tala núna um að sé of mikið.

2. Skammta gjaldeyrir strangt til að byrja með og stýra genginu niður á við til að bremsa verðbólguna. Ná þjóðarsátt um launastopp í 1 ár og passa að opinberir aðilar hækki ekki nema miklu minna en þeir vilja.

3. Kyrrsetja jöklabréfin á háum vöxtum í ríkisbréfum og tilkynna um að ca. 10-20 % geti  verið greidd út  á næstu 5 -10  árum þeim sem um það sækja á hverju ári.  Þeir sem það ekki vilja verði að greiða sérstakt  sólarlagsyfirfærslugjald vegna neyðarástandsins núna.   Vera kann að þetta sé ófær leið vegna EES þannig að aukamilljarðurinn gæti farið í þetta gengisskot, sem þá er óhjákvæmilegur forleikur að endurreisninni. 

4. Taka upp verðtryggingar og lága vexti á öll  lengri lán t.d. sem ná lengra en 1 ár. Og borga auðvitað verðtryggingu á altl sparifé til sama tíma. 

5. Taka aftur upp verðbólgureikningsskil fyrirtækja.

6.  Kreppa  er  huglæg að uppruna . Hún byrjar sem  skortur á trausti og tiltrú á náunganum. Þessi tortryggni fer stigmagnandi og versnar með degi hverjum þangað til að allir eru uppgefnir á að hata.

Sem flestir finni sér vin  til að lána fimm, tíu, fimmtíu, eða hundraðþúsundkall til að lána gegn löggiltum verðtryggðum kreppuvíxli með lágum %u vöxtum til eins árs. Þennan víxil má leggja í bankann sem greiddi hann út til innleggjandans með sérstöku lánsfé úr Seðlabankann, segjum kannske 80 %  til baka strax.  Bankinn innheimti svo kreppuvíxilinn ef lántakandinn þá getur borgað. Sem eigandinn hefur  jú áður valið  að hætta á með persónugreiningu sinni.

 Þúsund manns,  sem lána náunganum fimmtíuþúsund hafa bæði gert góðverk við núverandi aðstæður og örfað  efnahagslíf landsins um 50 milljónir í fyrstu umferð og nærri 200 milljónir ef þeir endurtækju  leikinn nokkrum  sinnum .   Tíuþúsund manns gætu gert mjög mikið fyrir fólkið og efnahagslífið á þennan smáa hátt í stað þess að láta nýju  kommissarana í ríkisbönkunum  bara lána Jóni Ásgeiri sömu peningana í  milljarðaformi  til að hefta samkeppni á fjölmiðlamarkaði.

7. Fyrirtæki gætu á sama hátt valið sér einhvern álitlegan aðila til að taka við láni eftir öðrum reglum en þau nota venjulega. Selja kreppuvíxlana á sama hátt. Leita að  trausti og gera eitthvað til að byggja persónuleg tengsli við valinn nýjan viðskiptavin.  Allt þetta þyrfti kannske aðeins að standa í stuttan tíma eða þar til að lifnað hefði yfir landinu.

Lesendur fyrirgefi mér að ég set þennan spuna svona fram kannske meira  til gamans í fyrstu lotu. En orð eru til alls fyrst og það er svo mikið sagt af óyfirveguðu máli á blogginu að ég bara skelli þessu svona fram og lofa að ég  mun taka öllum skömmum af stóískri ró.

En meginmálið og kvekjan að þessu skrifi er að hvetja menn til að lesa blog Gunnars Rögnvaldsonar og kynna sér hvað hann hefur að segja um ESB og evruna. Það verður enginn verri maður af þeim lestri.

Honum sendi ég bestu kveðjur.

 

Tökum upp dollarann núna strax !

 

Ekki bíða, skiptið út krónunni strax, segir forstöðumaður Centre for European Policy Studies í Brussel... Varar einnig við lántökum ...

 

"Ég er algjörlega sammála meginrökum greinarinnar," segir Daniel Gros um grein þeirra Heiðars Más Guðjónssonar og Ársæls Valfells sem birtist í Fréttablaðinu  laugardaginn 8. nóv. Þar lögðu þeir til að í stað þess að taka sex milljarða króna lán verði gjaldeyrisforði Íslendinga notaður til að taka einhliða upp aðra mynt sem lögmynt hér á landi.

Eyðum ekki tíma í að þvarga við Evrópubandalagið sem er í kúgunarbandalaginu með Hollendingum , Bretum, Luxurum  og Þjóðverjum. Semjum við Bandaríkin strax og tökum upp dollarann með þeirra samkomulagi eins og fleiri  hafa gert. Þetta er rétt sem strákarnir Ársæll og Heiðar segja. Það er tómt brjálæði að fara að skuldsetja þjóðina til frambúðar til að púkka upp á "verkfalla-og gengisfellingakrónuna"  okkar ef annað  er hægt.

Þá er verðum við líka að fara að hegða okkur eins og siðuð þjóð í framtíðinni þegar kemur að alvarlegum hlutum eins og  "kjaramálum ", íslenzkum einokunarmafíum osfrv.   

Af hverju borga strax ?

Af hverju þurfum við að borga öll krónubréfin á einum gjalddaga með hættu á því að krónan verði bráðkvödd ofan á langt heilsuleysi ? Getum við ekki fryst þau og sagt við eigendur : Þið fáið 10 % á þriggja mánað fresti ? Því miður við getum ekki betur.

Fáum við nokkurn frið við Breta nema að taka kúlulán hjá þeim vaxtalaust og óverðbætt til 20-30 ára, í anda Versalasamninganna. og borga 20.800 E á hvern reikning, án tillits til hver á hann.? Verða þetta nema  70- 100.000 krónur á kjaft í tuttugu ár ? Mínus verðbólga og vextir.   Þeir hljóta að ganga að afarkostum okkar sem erum annars á leið í fang Rússa og úr NATO. 

Fúlt er þetta samt.  Ekki rukkaði Íslandsstjórn Nígeríustjórn vegna þess að íslenskir þegnar létu nígeríska glæpamenn plata sig. Hversvegna eru íslenzkir bankaglæpamenn með ríkisábyrgð frekar  en Nígeríumenn ? Myndum við til dæmis  bera ábyrgð á gjaldþroti Baugs í Englandi ?