Krónan eða Evran.

Þegar menn fara að færa til eignir og flytja tapgreinar yfir í sérstök félög, þá fæ ég á tilfinninguna að það sé verið að undirbúa aflúsun eins og einn gamall og kaldur kunningi minn orðaði það. Man einhver eftir flottu búðinni  Nanoq ?

Af hverju er Glitnir, sem er í eigu Bónusarklansins, að losa peninga allstaðar sem hann getur ? Ekki er hann að lána almenningi  þá, þar sem bankarnir hafa greinilega opinbert samráð um að loka á almenning og fyrirtæki hans.Hvar er Samkeppnisstofnun núna ?

Eigum við almenningur núna að fara að skera bankaséníin í Kaupþingi niður úr snörunni fyrir skattfé landsmanna ? Mér skildist á Ragnari Önundarsyni, sem venjulega veit hvað hann syngur, að kaupendur Búnaðarbankans hefðu varla haft nægilegt siðferðisstig,  til að vera treyst fyrir innlánum almennings. Þeir hefðu tekið sparifé almennings í vogunarbrask og óvíst hvort þeir geti núna skilað spariféinu, sem Ragnar nefndi réttilega "Eyrir Ekkjunnar ". Þeir hafa hinsvegar nægilegt siðferðisstig til að skammta sjálfum sér stjarnfræðileg laun á meðan þeir setja ráðningarbann á þvottakonur og reka fjölda manns.

Til að bæta gráu ofaná svart,  þá talar seðlabankastjórinn um að 30 % verðhrun á fasteignamarkaði sé framundan. Er það til að auka traust manna á Landsbankanum og fasteignafélögunum hans ?  Er þetta til að auka traust manna á að Íslendingar komist í gegnum brimskaflana ? 

Til hvers er ríkisstjórnin með svona sjálfstæða  efnahagsmálastofnun eins og þessa stofnun ? Þurfum við ekki traustan forsætisráðherra, sem talar kjark og þor í landslýðinn og gjaldmiðilinn upp en ekki niður ? Ég hélt að forsætisráðherrann væri yfirmaður efnahagsmála landsins, sem mótaði stefnuna og  kallar  útí bæ  ættu að vera honum liðsmenn ?

Sem betur fer komu inn jöklabréf fyrir 6 milljarða nú nýverið .  Vaxtahækkunin, sem var að mínu mati rétt aðgerð hjá Seðlabankanum, greiðir fyrir frekari útgáfu slíkra bréfa.  Gengishækkun krónunnar er besta lífskjarabót almennings og lyf gegn verðbólgunni.  Þau fyrirtæki sem notuðu tækifærið um leið og dollarinn sló í áttatíukall, að hækka allt vöruverð um 100 %, þurfa að fara undir smásjá almennings þegar gengið styrkist og almenningur á að smiðganga þessi fyrirtæki.

Allt talið um evruupttökuna gengur framaf mér. Íslenzka sparikrónan er besti gjaldmiðill í heimi, sem okkur ber að vernda með ráðum og dáð. Verðtryggingin á spariféinu er besti vinur almennings. Boðskapur þeirra,  sem vilja afnema verðtrygginguna,  talar bara máli þeirra sem tekið hafa of mikil lán og vilja komast hjá því  að borga til baka. Fólk verður að skilja það einhverntíman að lán eða skuldir eru ekki lán heldur ólán. Aðeins eignir gera menn frjálsa. Þessvegna á fólk ekki að taka lán nema að vel athuguðu máli og í brýnni nauðsyn. 

Ég hef bara eina spurningu til þessara evruspekinga :

Ef við skiptum í evrur á morgun eins og spekingarnir  eru að boða, hvert verður þá kennarakaup á Íslandi ?  Verður það hærra eða lægra en í Þýzkalandi ? 

Eða kauptaxtarnir hjá Guðmundi í Rafiðnaðarsambandinu eða hjá BHM ?

 Hvernig fer með íslenzka kjarasamninga yfirleitt ? 

Verður 30 % kauphækkun einstakra stétta  möguleg ?

Bílabullur

Mótmæli bílstjóra hafa staðið nokkra daga. Vegfarendur láta sér í léttu rúmi liggja og segjast styðja mótmæli gegn benzínokri stjórnavalda. Bravó og hósíanna. Allt saman rétt.

 

En þetta er bara Ísland.

 

Og víst er að í Bandaríkjunum kostaði benzinlítrinn 54 kr fyrir gengisfallið en hér 140,-hérumbil pí sinnum dýrari.  Þar kostaði líka vodkalítrinn á sama tíma 357 krónur . En hér í ÁTVR  guðmávitahvað mörgum pí sinnum meira.

 

Og varan í Bónus kostar líka pí sinnum meira en í ValMart. Þetta vita allir en enginn segir neitt af því að Jói er svo góður og gefur úr pokasjóði sínum.

 

Og allir vita líka að það er stórskaði að innlendri kjúklinga og eggjaframleiðslu og myndi mikill gjaldeyrir sparast ef þetta yrði allt saman lagt niður og flutt inn. Og svínakjötið líka. Mikið vinnuafl myndi losna til hagnýtra starfa fyrir þjóðfélagið og bankana.

 

Hverju eru þessir bílstjórar að mótmæla ?

 

Ætli þeir séu í vandræðum með að borga af lúxusbílum sínum vegna minnkandi atvinnu eftir að hafa boðið niður keyrsluna hvor fyrir öðrum allt góðærið á enda og standa nú uppi með tóma kassa og ekkert að gera ?  Hrukku tekjurnar ekki fyrir greiðslu vaxtanna af bílalánunum ?  Voru bílarnir kannske og dýrir fyrir það sem inn kom fyrir keyrsluna ?

 

Mér hefur sýnst í gegnum tíðina að margir amerískir trukkar séu   með minni íburði en þær kerrur sem Íslendingar kaupa mest og  keyra.  Og eru þá ódýrari líka.   En svoleiðis hagfræði skilja fæstir Íslendingar og þá vörubílbílstjórar væntanlega meðtaldir með gljáfægða lúxusana í baksýn. 

 

Væri þeim ekki nær að berjast fyrir þróun rafbíla og minnka eitthvað við sjálfa sig lúxusinn og íburðinn um leið.

  Nú í nýtilkynntri kreppu  finna vörubílstjórar  uppá því að þeir geti grætt meira á keyrslunni ef minna fari í olíuna. Eða þá að þeir geti boðið keyrsluna enn lægra niður ef gyllinæðaaðgerðir og vöðvabólgunuddið, sem menn fá af því að stunda langsetur við bílstýrin, verða greiddar af einhverju öðru en benzíngjaldinu sem ríkissjóður leggur á.  Ætli þeim hugnist betur hækkun þungaskatts  á bílana þeirra, sem margir  segja að borgi hvergi nærri sanngjarnan hluta í vegaslitinu ? Það má alveg breyta gjaldstofninum fyrir þá þannig að þeir geti verið ánægðir með einhverja lækkun á pumpuverðinu.   

Íslenzka ríkið, sem þessir menn tilheyra líka, þarf auðvitað mikla peninga til að reka heilbrigðiskerfið, þar sem rándýrir læknar starfa með öðru láglaunafólki. Það þarf líka að borga hjörð af kennurum til að kenna börnunum okkar að lesa og reikna.  Ekki eru allir ánægðir með árangurinn af þeirri starfsemi. Getum við þá ekki bara lagst þversum á plateoris og krafist þess að börnunum sé kennd margföldunartaflan fyrir lok 10.bekkjar ? .

 

Og  svo væla öryrkjar og gamlingjar allstaðar yfir bágum kjörum sínum. Skelfing að horfa uppá alla þessa eymd og auraleysi allstaðar..

 

Hver á að borga þetta allt ?  Sjúkrahúsþjónustan er ókeypis. Skólarnir eru ókeypis og við hreykjum okkur af því í daglegu tali. 

 

En er þetta svo ? Ekki sagði Milton Friedmann að til væri ókeypis hádegisverður. Hvaðan skyldi ríkið fá alla þessa peninga ?

 

Á sama tíma kvarta bílstjórar  yfir sprungnu gatnakerfi. Það vanti tvöföldun og mislæg gatnamót þar, jarðgöng hér og brú þarna og jafnvel nýjan veg yfir Öxi. Ætli  þessar bílstjórar viti hvernig á að borga þetta allt saman ?  Ætli þeir séu alltaf jafnflinkir við borga og eyða ?

 

Eigum við vínsvelgir kannske að leggjast þversum fyrir dyr áfengisverzlunarinnar svo að enginn komist  á fyllerí fyrr en ríkið lækkar vodkað til jafns við Bandaríkin ? Hvort græðum við  drykkfelldir meira á slíkri vínlækkun en hófsemdarmaðurinn ? Allaveg myndi ríkið  græða  minna. Ættu bindindismenn ekki að greiða sérstakan bindindisskatt til að jafna metin ?

 

Til hvers erum við að kjósa Alþingi til að ráða skattlagningunni og eyðslunni í þessa málaflokka ef einhverjar menn á egóflippi  geta ráðist til atlögu við þjóðfélagið og tekið það í gíslingu vegna þess að þeira hafa aðrar meiningar um hagstjórn  en Geir Haarde og

hans menn ?

 

Kaus ég einhverjar bílabullur til að ráða skattlagningu eldsneytis fremur en  öðrum málum fyrir mig  ?

 

Það horfir illa með lýðveldið okkar  ef svona  skríll,  margnefnt  “Alþingi Götunnar “,   getur tekið  völdin í landinu með samþykki lögreglunnar útaf hverjum tittlingaskít sem þeim dettur í hug hverju sinni.

 

Þorgeir Ljósvetningagoði sagði að við skyldum hafa ein lög í þessu landi,-. annars myndi illa fara. Ég held að hann hafi haft rétt fyrir sér kallinn.  

Þetta er hætt að vera sniðugt. Það á að handtaka þessa menn og láta þá sæta ábyrgð.