Hvaða þörf er á þessu?

Ekki furða að vargfuglinn sílamávur hefur stóraukið varp sitt á  tófuslóðum í Kópavogi , þegar  kennarinn úr Garðabæ Guðríður Arnardóttir og Samfylkingarmeirihluti hennar í Kópavogi  lætur drepa þennan frumbyggja landsins með köldu blóði og borgar fyrir með skattpeningum í kindalausum Kópavogi!

Hefur fellt 15 tófur í landi Kópavogs á 12 mánuðum

Evrópusambandsvíxillinn

er kominn til samþykktar til  Alþingis. Þessi aðgöngumiði Íslendinga að Evrópusambandinu er ábektur af þeim Össuri og Steingrími fyrir Íslands hönd. Nú á Alþingi að samþykkja að borga erlendar skuldir óreiðumannanna einn ganginn enn uppá milljarðatugi með vöxtum.  Mikið lifandis hljóta Vinstri Grænir að vera sælir með hann Steingrím sinn sem bisar svona einbeittur við að hjálpa Össuri að lyfta þessum böggum upp á þjóðarklakkinn.

Þó að þjóðin sé búin að segja álit sitt á þessu samningabrölti í þjóðaratkvæðagreiðslu, þó að gamla stjórnarskráin okkar sé í gildi  þar til  kratarnir á stjórnlagaþinginu verða búnir að taka úr henni málskotsrétt Forsetans, þó að Forsetinn hafi varað þá við því að hunza þjóðina,  þá láta þessir kumpánar sér ekki segjast.  Nú má enginn ganga úr skaftinu svo að þingflokkar Vinstri Grænna og Samfylkingar á Alþingi geti samþykkt nýja  Evrópusambandsvíxilinn fyrir jól.

Evrumartröðin

er það sem þjakar nú fyrrum fagurdreymendur Evrópusamstarfsins.

Mestu mistök samstarfsins voru sú firra að sameiginlegur gjaldmiðill gæti þrifist í löndum með gerólíkan hagvöxt. Að frumstæð hagkerfi A-Evrópu, sem töpuðu áratugum í hagvexti vegna ógnarstjórnar sósíalismans gætu starfað á sama markaði og iðnaðarveldin í álfunni án þess að miðstýring hagkerfanna ætti sér stað. Írland, Portúgal og Spánn stefna nú hraðbyri til gjaldþrots með Grikklandi. Íslendingar munu ekki fylgja þessum þjóðum niður fossinn þökk sé krónunni.

Aðeins eitt ríki getur haft einn gjaldmiðil og eigin stjórnmálamenn.  Menn geta velt því fyrir sér hvernig Bandaríkjamenn myndu taka þeirri tillögu að þeir tækju upp evru í stað þess að hafa möguleika á að prenta sína eigin dollara. Líklega væri sú leið að Evrópa tæki upp dollar sársaukaminni fyrir heimsbyggðina, því að Bandaríkin eru ennþá það  heimsveldi sem mestu máli skiptir að haldi fjárhagslegri heilsu.

Það er óopinbert álit þekktra hagfræðinga, að þeir tímar séu liðnir sem hægt sé að gera kröfur um að einstök þjóðríki geti verið gjaldhæf bæði útávið og innávið án þess að þau hafa eigin gjaldmiðil. Það er algerlega útilokað að Ísland hefði bjargast útúr þeirri stöðu í bankamálum sem stjórnmálamenn okkar létu landið komast í á árunum fyrir hrunið, án þess að geta prentað eigin peninga. Það er enn okkar eina leið í myrkrinu.

Þjáningum okkar Íslendinga lýkur ekki fyrr en þjóðin vaknar upp af Evrumartröðinni sem er afleiðing af kvöldvökulestri kratanna og púkablístri um þá Paradísarvist sem landsöludraumarnir muni leiða yfir hana.

Feilskot

ríkisstjórnarinnar er algert. Það leysir engan vanda fyrir ofurskuldsetta að fá niðurfærslu niður í 110 % af óseljanlegri eign.

Það sem vantaði var lyklafrumvarp sem gerir fólki kleyft að labba út úr vonlausu dæmi og skila lyklinum gegn því að vera laus allra mála.

Bankapakkið má ekki til þess hugsa að geta ekki elt fólk út yfir gröf og dauða heldur en að sitja uppi með íbúðirnar. Þjónkun ríkisvaldsins við þrælahaldið er ömurleg. Enn ein flugeldasýning ríkisstjórnarinnar til að friða fólkið sem gnístir tönnum.

Ný stjórnarskrá stöðvar ekki fólksflóttann úr landinu meðan þessi tréhugsun lögfræðinganna fær að ríða húsum óbreytt.

Fjallið yók jóðsótt. Ekkert fæddist. Freturinn var bara feilskot.

Hef ekki traust

á stjórnalagaþinginu. Kjör þess er algerlega ósannfærandi þegar tveir þriðju hluti þjóðarinnar situr heima. Landsbyggðin er útundan. Yfirgnæfandi SilfurEgils-lið og ESB- bullarar er kjörið í 78 hlutkestum. Þetta er þing sem óhjákvæmilega verður mjög ósammála ef ekki óstarfhæft.

Alþingi mun svo að vonum afgreiða tillögurnar út í hafsauga. Enda er Alþingi sá aðili sem alla ábyrgð á að bera á stjórnarskránni, ekki svona skvaldurþing, vitlaust kjörið með vanbúnu fólki. Hver hefur traust á þessari dúsu sem vanmegnug ríkisstjórn tróð uppí fráðvillta þjóð í sárum?

Þau eru súr

sagði refurinn. Ég get ekki neitað því að þessi orð komu mér í huga þegar ég leit yfir liðið sem náði kjöri á Sjtórnlagaþinginu en ég steinlá.

Líklegt finnst mér að uppáhaldsumræðuefni margra í þessum hóp,  Davíð Oddson, Sjálfstæðisflokkurinn  og allt sem honum tengist,  muni fá sína athygli á þinginu.  Mér finnst ólíklegt að eindrægni verði mikil á þinginu til að byrja með.  Það eiga alveg eftir að myndast flokkar meirihluta og minnihluta á þinginu. Mér finnst líklegra en hitt  að nokkur vinstri og „ebésk“ slagsíða verði þar nokkuð áberandi og flokkadrættir eins og annarsstaðar. 

Væntanlega verður þetta þing svo rekið fyrir opnum tjöldum og sjónvarpi eins og Alþingi þannig að fjölmiðlaumræða mun  blandast í þetta allt, RÚV,  DV og Fréttablaðið munu sjá um athugasemdirnar.

 Hugsanlega verður svo útkoman með svo „þorvöldskum“ og "illuguðum" hætti að það líður  einhver tími áður en þjóðin og Alþingi meðtekur það. 

Þangað til læt ég mér nægja vínberin.