"Sjálfstæðisflokkur geri upp?"

Svavar Gestsson, sérlegur samningamaður í Icesave og sendiherra, skrifar lærða grein um hugmyndafræði Sjálfstæðisflokksins í Baugstíðindi dagsins.  Hann leggur út frá Hrafnaþingsþáttum Ingva Hrafns á ÍNN, sem þýðir Íslands Nýjasta Nýtt,  sem Svavar horfir helst aldrei á.

En Svavar veit þó nóg til að skrifa þetta um Ingva Hrafn:

"Eitt af því eru samansúrraðir blótpistlar um allt milli himins og jarðar nema Sjálfstæðisflokkinn; hverju guð forði. Stundum hefur hann í kringum sig menn sem hneigja sig og brosa við honum í annars fátæklegri upptökunni. Undirritaður viðurkennir að hann horfir næstum aldrei á þessa þætti; tekur annað fram yfir á sólardögunum við Breiðafjörð um þessar mundir.

Undirritaður sá hins vegar í þátt sem Ingvi stjórnaði á dögunum þar sem þrír svartklæddir menn sátu og dáðust að honum. Í þættinum veittist Ingvi harkalega að ríkisstjórninni, einkum vinstri grænum, og tókst meira að segja í leiðinni að ávarpa vesaling minn. Átta ráðherrar ríkisstjórnarinnar hafa verið í Alþýðubandalaginu! Úff. Ég hef reyndar lengi haldið því fram að Alþýðubandalagið hafi verið besti flokkur síðustu aldar og staðfestist það með þessu mannvali á ráðherrastólum eins og kunnugt er. En tilefni þessara skrifa er ekki þetta heldur hitt að aftur og aftur kölluðu þeir sem komu fram í þættinum sig frjálshyggjumenn. Ég hélt satt að segja að það væri skammaryrði nú til dags. Og það er reyndar tilefni þessa pistils: Er frjálshyggja ekki skammaryrði á Íslandi? "

Síðan segir Svavar:

 Er í lagi að styðja frjálshyggjuna sem lagði Ísland í rúst fyrir aðeins örfáum misserum? Eins þarf Sjálfstæðisflokkurinn að gera upp við frjálshyggjuna. Í nefndum hrafnaþætti voru tveir alþingismenn; þeir mótmæltu því ekki að Sjálfstæðisflokkurinn byggði enn á frjálshyggjunni. Það leiðir hugann að nauðsyn þess að flokkurinn geri upp við frjálshyggjuna.... "

Restina af greininni er svo pólitísk æfing í gömlum Þjóðviljastíl Svavars  og ekki tekur að elta ólar við það. Mikið lifandis reynir það samt á þolinmæðina að lesa svona innantómar fullyrðingar og blaður eftir fulltíða mann með þvílíka fortíð og Svavar Gestsson.

Í tilefni þessa dags þá verð ég að rifja það upp enn einu sinni hver er stefna Sjálfstæðisflokksins frá 1929:

Fyrri hluti stefnunnar er sá, að flokkurinn ætlar að standa vörð um sjálfstæði landsins. Það fer varla saman í þjónkun Svavars og VG við Evrópusambandsaðildina eða hafið umsóknarferli undir handarjaðri þessara sömu  átta ráherra úr Alþýðubandalaginu hans Svavars.Sjálfstæðismenn ílendast flestir í flokknum eða koma heim aftur eftir sín gönuhlaup. Enn vantar þó nokkra eins og til dæmis Sverri Hermannsson en það er önnur saga.

Seinni hlutinn hljóða svo, að flokkurinn ætli í innanlandsmálum "að vinna að víðsýnni og þjóðlegri umbótastefnu, á grundvelli atvinnufrelsis og einstaklingsfrelsis, með hagsmuni allra stétta fyrir augum." 

Pólitísk kamlelljón eins og Svavar Gestsson, sem hafa langa reynslu í að mála yfir nafn og númer flokksins síns að hætti þeirra sem fiska í gruggugu vatni, eiga sjálfsagt erfitt með að skilja hvernig flokkur getur haft sömu stefnuna svona lengi án þess að breyta henni. Svarið er líklega allt of einfalt til þess að Svavar geti skilið það. Þetta er nefnilega frjálshyggjan í allri sinni dýrð.

AlCapone, var einstaklingshyggjumaður en ekki frjálshyggjumaður þó hann væri mikill áhugamaður um pólitík í sínum heimabæ Chicago. Hann var ekki félagi í Sjálfstæðisflokknum svo vitað sé.

Jón Ásgeir, Pálmi Haraldsson, Sigurður Einarsson, Hreiðar Már, Lárus Welding, Wernersbræður og Finnur Ingólfsson , eru hvorki taldir vera frjálshyggjumenn né hafa þeir verið áberandi í Sjálfstæðisflokknum svo mér sé kunnugt um.  

Einstaklingsfrelsi og atvinnufrelsi sem grunnhugsjón lýðræðis á ekkert skylt við glæpastarfsemi frekar en frjálshyggjan sjálf.  Frjálshyggjumaður veit að hans réttur nær aðeins að sama rétti næsta manns. Þar skilur á milli lýðræðis og einræðis, glæpamanns og heiðarlegs manns. Það er trúlegt að Svavar geti tæplega skilið þetta með sína fortíð og almennan hugsanagang.

Sjálfstæðisflokkurinn  þarf ekkert að gera upp nema  Bjarni vilji skila styrkjunum sem flokkurinn þáði af þeim sem þá töldust flott fyrirtæki og landstólpar en breyttust skyndilega við rannsóknir eftir hrunið. En Samfylkingin ætla ekki að skila neinu af því sem hún fékk frá sömu aðilum.  Einstakir menn skipta aldrei löngu máli fyrir slíka stofnun sem Sjálfstæðisflokkurinn er. Hann er eins og jurt sem sífellt skrýðist nýju laufi á sterkum stofni en fellir gömlu  blöðin þegar þeirra tími er kominn.  Mig minnir nú að Svavar hafi verið skipaður sendiherra af íhaldinu þegar hann féll af sinni kommagrein og fúlsaði ekki við því, enda varla klígjugjarn í pólitík eftir ævistarfið þar.

Sjálfstæðisflokkurinn og frjálshyggja hans mun leiða þjóðina út úr þessu myrkri sem nú grúfir yfir.Öll él birtir upp um síðir og núverandi ríkisstjórn mun hverfa eins og önnur ólykt.

Sjálfstæðisflokkurinn þarf ekkert að gera upp. Hann stendur fyrir sínu og þess sem hann var stofnaður til.

 

Við viljum verðbólgu !

Innanfótar í Baugstíðindum í dag er tilkynning um samræmdar aðgerðir orkufyrirtækjanna um verðhækkanir. Á miðopnu skrifar Franz Árnason hugleiðingar um hvernig eigi að halda á Magmamálinu. Allir eru minna skynsamir en hann sem talsmaður Samorku.

 

Hvað er Samorka? Það er samtök orkufyrirtækja, þeirra sömu og nú eru að hækka rafmagnið samræmt um nær 10 %. Landsvirkjun fyrst og hinir á eftir. Samtaka nú, sameiginleg orka, samorka. Man einhver eftir samtarfsnefnd  olíufélaga? Samtökum fjármálafyrirtækja? Kennarasambandi Íslands? Félagi eldri borgara og Öryrkjabandalaginu?

 

Skyldi almenningi nokkuð koma þetta við? Á hann einhverja kirkjusókn upp í kjaftinn á þessum samtökum eins og Samorku?  Skyldu orkuhækkanirnar nokkuð valda heimilunum útgjaldaaukningu? Geta þau ekki bara hækkað hjá sér tekjurnar eins og Flugumferðarstjórar og slökkviliðsmenn?

 

Þegar ég skrifaði pistil um nauðsyn þess að orkufyrirtækin hagræði frekar en að hækka, þá hefur ekki nokkur maður áhuga á því. Nema einn sem segir að ég sé með gamaldags Framsóknarhugmyndir. Já,  já ég man algera verðstöðvun hjá Óla Jóh, herta verðstöðvun og þar fram eftir götunum. Ég man líka eftir þjóðarsáttinni.

 

Ekkert heyrist frá ríkisstjórninni um þessi mál. Steingrímur steinþegir enda hugsar hann líklega bara um hvað hann sé búinn að spara í vöxtum fyrir að hafa ekki fengið að skrifa undir Icesave. Það má nú gera eitthvað fyrir 60 milljarða. Og Svavar getur þá sallað á Sjálfstæðisflokkinn fyrir að gera ekki upp við frjálshyggjuna? Það má gera stáss að ýmsu.

Ég hlýt að draga þá ályktun að fólkið sé orðið leitt á kyrrstöðunni, vilji  verkföll og verðbólgu. Þá kemur líka fjör í athafnalífið.

 Við viljum verðbólgu !

Frystum verð og laun

Orkufyrirtækin tilkynna að þau ætli bara að hækka einokunartaxta sína um svona 10 %. Þetta er brjálæði við þær aðstæður sem nú ríkja og ekkert annað en samsæri gegn almenningi. Það ætti í raun og væri mátulegt  að handtaka forstjórana og setja þá inn.  Ekkert nema frysting launa og verðlags á við við þær aðstæður sem nú ríkja.

Ríkistjórnin sýndi af sér snöfurleika þegar hún setti lög á Flugumferðarstjórana. Nú á að taka slökkviliðsmennina og alla þá sem voga sér að hreyfa sig. Lög á þá alla.

Það skiptir meginmáli að ná verðbólgunni niður til þess að ná genginu til baka. Með því björgum við líka bönkunum frekar en að fikta við einhverja vexti eins og einhverjum datt í hug.

Orkufyrirtækin geta bara hagrætt hjá sér eins og spítalarnir. Þau hafa ekki einu sinni reynt það heldur lifa í sús og dús og senda almenningi bara reikninginn.

Þetta væri þá eitthvað fyrir þessa ríkisstjórn til að vinna sér til frægðar nokkuð, ekki veitir henni af.

Lög á þetta allt saman. Frystum öll laun og opinber verð ekki seinna en strax.