Svör úr höll Dofrans

við aðfinnslum almannaflugmanna á regulgerðarfylgni Flugmálastjórnar detta manni helst í hug þegar maður les hugleiðingar  Flugmálastjóra vegna vinslita stofnunarinnar við grasrót almannaflugs á Íslandi . Um steinasafnið í heild má lesa  á  www.caa.is

Grípum niður í þessari ritsmíð : 

....".til að viðhalda og auka flugöryggi hér á landi en um það snýst einmitt regluverk í flugi og sá agi sem einkennir flugstarfsemi..."

Hver býr til þetta hugtak flugöryggi? Hvað er það?. Hvað er umferðaröryggi? Hver er hættan afa bílunum sem eru alla daga í akstri á móti almannaflugvél sem aðeins hreyfist í minna en 1% af árinu? Af hverju eru viðhaldskröfurnar mörgþúsundprósent meiri?

....Ágreiningur virðist fyrst og fremst snúast um reglugerð nr. 206/2007 .."

Þetta er rangt, ágreiningurinn er mun djúpstæðari.

".....Reglugerðin sem slík er víðtæk og almenn en gagnrýnin virðist snúast fyrst og fremst að kröfum um viðhaldstjórnun enda er um verulega breytingu á útfærslu þar á frá því sem áður var.
Megin breytingin er sú að eftirlit með framkvæmd viðhalds og staðfesting á lofthæfi loftfara er í raun færð frá Flugmálastjórn til einkaaðila. ..... 

.... samþykktar fyrir flugvélar minni en 2730 kg.

....... Ef um er að ræða flugvélar minni en 1200 kg getur flugvéltæknir með sérstaka heimild frá Flugmálastjórn Íslands (AR-heimild) gert það tvisvar í röð.

.....Það kemur nokkuð á óvart að það skuli gagnrýnt að eftirlit og staðfesting á lofthæfi er færð til einkaaðila og að opnað er fyrir möguleikann á því að eigendur geti annast hluta af viðhaldinu sjálfir. Þó virðist svo vera og talað er um að slíkt sé kostnaðarsamara en áður. .....á 300.000 kr. fyrir loftfar sem hafði verið ágætlega viðhaldið en eitthvað skorti upp á tiltekin gögn. ...
 

...Það hefur verið stefna íslenskra flugmálayfirvalda síðan í upphafi níunda áratugarins að taka þátt í starfi Flugöryggissamtaka Evrópu (JAA)...... og síðan arftaka þeirra Flugöryggisstofnunar Evrópu (EASA) og þar með að taka þátt í þróun reglna og innleiða þær. Þetta hefur verið gert til að efla flugöryggi og ekki síður til að öðlast gagnkvæma viðurkenningu annarra ríkja......

Fram að þeim tíma giltu skírteini flugmanna aðeins á íslensk skráð loftför og skírteini flugvéltækna eingöngu hérlendis.....

.....og var niðurstaða ráðuneyta utanríkis- og innanríkismála að óhjákvæmilegt væri að innleiða reglugerðina.......

.
...Reglugerðin nær eingöngu til loftfara með EASA tegundarskírteini. Fis, söguleg loftför, heimasmíði og nokkur önnur loftför með annars konar tegundarskírteini heyra ekki undir reglugerðina. Þar sem EASA fer með forræðið er ekki að sjá að nein leið sé til að Ísland eitt og sér geti með neinum haldbærum rökum undanskilið EASA-loftför skráð á Íslandi frá reglugerðinni. Loftförum með EASA tegundarskírteini ber að viðhalda samkvæmt reglum EASA. ...

Flugmálastjórn Íslands hefur nýtt alla þá fresti og mögulegar undanþágur sem er að finna í reglugerðum til að gera aðlögun umráðanda þessara loftfara með EASA tegundarskírteini eins hægfara og mögulegt er. Undanþága sem stofnunin veitti síðastliðið vor um að loftför á milli 1000 kg og 1200 kg skyldi meðhöndla eins og loftför undir 1000 kg varð til þess að Eftirlitsstofnun EFTA (ESA) krafði stofnunina skýringa....
 

....Það er því fráleitt að halda því fram að stofnunin fari offari í túlkun reglugerðarinnar... ....Flugmálastjórn Íslands hefur þá skyldu gagnvart almennum borgurum að tryggja að fylgt sé reglugerðum um viðvarandi lofthæfi og borgarar verða að geta treyst eftirlitsstofnunum sínum.
 

.....Stofnuninni er kunnugt um að Flugöryggisstofnun Evrópu mun fljótlega gefa út álit um reglugerð þessa vegna almannaflugs eftir töluverða gagnrýni samtaka í einkaflugi. .....

. Ein af ástæðunum er sú að loftför notuð við kennslu og þjálfun tilheyra almannaflugi og ekki eðlilegt að flugmenn framtíðarinnar alist upp og hljóti þjálfun eftir kröfum sem eru í eðli sínu öðruvísi en í atvinnuflugi....

Flugmálastjórn Íslands getur ekki vikist undan því að framfylgja þeim kröfum sem gerðar eru í umræddri reglugerð og hefur engar heimildir til að veita afgerandi undanþágur.....

.....Einfaldast er líklega fyrir þá sem stunda almannaflug að nýta sér kosti reglugerðarinnar og ljúka aðlögun að henni.  ....Þegar liggja fyrir 87 samþykktar viðhaldsáætlanir sem líklega var erfiðasti hjallinn. Með

.....Þeir sem síðan vilja fá útrás fyrir sköpunargleði sína geta gert það í samræmi við reglugerð um heimasmíði..... ...."

Farið bara eitthvað annað ef þið vilijið ekki falla fram og tilbiðja okkur!

 

"......sameiginleg niðurstaða margra ríkja. Flugöryggisstofnun Evrópu er að kanna hvaða breytingar megi gera til að koma til móts við álit ýmissa samtaka í almannaflugi og Flugmálastjórn hefur þegar tekið í gildi vissar tilslakanir í þessu samhengi fyrir loftför á milli 1000 og 1200 kg.

....
....... það verði ekki til þess að draga úr metnaði sem einkennt hefur flugstarfsemi á Íslandi.  Hvað varðar kröfur um viðhaldsstjórnun gildir eins og annað að leita þarf skynsamlegra lausna sem tryggja flugöryggi en um leið falli þær að því umhverfi sem við á.  Sömu sjónarmið gilda á Íslandi og öðrum ríkjum hvað þetta varðar."

Þarn kemur boðskapurinn úr  hömrunum skýrt í ljós. Ekki minnst einu orði á að almannaflug geti flaggað flugvélum sínum út á N-skráningu og flogið þeim hérlendis eins og allstaðar tíðkast í Evrópu, þar sem allir vita að reglur Evrópusambandsinseru komnar út í móa .   Hann minnist heldur ekki á það að allir gamlir almannaflugmenn munu missa blindflugsréttindi sín þar sem öflun nýrra réttinda er nánast ókleif vegna kostnaðar og tíma skv. Evrópureglum. Innanlandsflugmenn verða að fara til Evrópu og æfa sig í að fljúga hringi um Himmelbjerget í Danmörku til að fá réttindin aftur.

Það eru engar sættir í sjónmáli grasrótarinnar við jarðsækið pappírsgerðarfólkið í Flugmálastjórn og nýjar reglur. Bandarísk  flugfélög fljúga þó ennþá til Evrópu þó ESB reyni að gera öllum utan bandalagsins allt til miska til dæmis með skírteinamál, þar sem það er í eðli sambandsins að vera tollabandalag og útilokunarapparat. Hér á að læsa allt í viðjar ofstjórnar og reglugerða pennaskafta, sem hafa engin tengsli við grunnþáttinn sem er FLUGIÐ sjálft.

Ernir munu  aldrei geta búið í höll Dofrans frekar en Pétur Gautur.

Reykjavíkurflugvöllur og Landsfundur

Sjálfstæðisflokksins munu óhjákvæmilega hittast um helgina.

Það er nokkuð ljóst að landsbyggðin stendur fast með því að Reykjavíkurflugvöllur verði um kyrrt í Vatnsmýrinni og verði ekki skertur frekar en þegar er orðið. Frumvarp Jóns Gunnarssonar, Ragnheiðar Ríkharðsdóttur, Árna Johnsen, Birkir Jóns Jónssonar, Einars K. Guðfinssonar, Eyrúnar Ingibjargar Sigþórsdóttur, Gunnars Braga Sveinssonar, Illuga Gunnarssonar, Kristjáns þórs Júlíussonar, Tryggva Þórs Herbertssonar, Ólafar Nordal og Vigdísar Hauksdóttur hnígur að því að Reykjavíkurflugvöllur verði áfram í NÚVERANDI mynd í Vatnsmýrinni sem innanlandsflugvöllur og NB sem  VARAFLUGVÖLLUR, sem þýðir að hann verði ekki SKERTUR frekar en orðið er.

Það þarf ekki að efa að FRAMBJÓÐENDUR TIL FORMANNS verða að svara þessari spurningu afdráttarlaust:

Styðiið þið þetta frumvarp um REYKJAVÍKURFLUGVÖLL eða styðjið þið það ekki?

Komi svarið ekki öðruvíisi fram skal ég sjálfur  sjá um að krefjast svars á fundinum. 

ÞAð er kunnara en frá  þurfi að segja að í borgarstjórnarflokki Sjálfstæðisflokksins hafa verið uppi deildar meiningar um framtíð Reykjavíkurflugvallar. Nú er tækifærið til að láta skerast í odda með þetta gunvallarmál. Ætlar Reykjavík að verða höfuðborg landsins eða ekki?

 Til hvers á að byggja hátæknisjúkrahús í Vatnsmýrinni ef enginn er flugvöllurinn? Er hægt að halda  því fram að allar flugsamgöngur innanlands með þyrlum í framtíðinni? Núna?

Reykjavíkurflugvöllur hefur átt traustan vin í Landsfundi Sjálfstæðislfokksins til þessa. Vonandi verður ekki breyting á því.

Upplýsingalög gilda ekki

þegar kemur að Steingrími J. Sigfússyni og athöfnum hans á fjármálasviðinu.

Í dag selur hann BYR til vogunarsjóðanna í Íslandsbanka án þess að skýra hið minnsta um hvaða fjárhæðir sé teflt né við hverja er skipt. Handlangari hans Helgi Hjörvar, formaður efnahagss-og viðskiptanefndar svaraði í viðtali á Bylgjunni með Guðlaugi Þór mest með löngu EEEEEHHHH.... þegar hann varð spurður um tölur. Hann annaðhvort veit ekki neitt eða skilur ekki neitt nema hvorutveggja sé. Hann stígur bara dansinn undir púkablístru særingameistarans alvalda í fjármálaráðuneytinu, sem er hafinn yfir lög og rétt. Guðlaugur Þór lýsti því hvernig engin svör berast honum árum saman þó hann sé að leita eftir upplýsingum hjá þessum aðalsmönnum sem yfir lög eru hafnir.

Ef menn ættu ættu einhverntímann að velta fyrir sér framtíðarverkefnum Landsdóms þá er tíminn núna þegar ljóst er að ekki er hið minnsta skeytt um upplýsingalög landsins.

Heimssýn til hjálpar !

ef hún stillir sér upp í anddyri Laugardalshallar í byrjun Landsfundar Sjálfstæðisflokksins og selur merki á 100 kall eða bara gefur það þeim sem ekki eiga 100 kall. Merkið bara táknar Ísland utan ESB.Bara ódýrt, til dæmis íslenskt bréfflagg til að næla í barminn sem allir sjái þegar menn hafa sett það upp.

Fari svo að þeir landsfundarfulltrúar sem eru á móti ESB inngöngu séu í miklum meirihluta þá sparast fundinum mikli orka að fást við þá fáu ESB sinna sem eru í hópi Landsfundarfulltrúa. Þeir eru nefnilega mjög fáir en ekki margir eins og þeir reyna að halda fram í fjölmiðlum núna, sbr grein Guðjóns Sigurbjartssonar í Morgunblaðinu í dag. En hún er sýnishorn af því sem koma skal.

Þeir ESB sinnar skipulögðu innrás á Landsfundinn síðast og reyndu að sveigja umræður að sínu höfði. Þegar svo loks svarf til stáls kom í ljós að þeir voru einangrað örbrot af Landsfundi sem enginn sá eftir þegar einn eða tveir löbbuðu út. Þeir ætla örugglega að reyna upphlaup á þessum fundi sem Heimssýn getur afstýrt á einfaldan máta.

Verum afgerandi strax á Landsfundi. Heimssýn til hjálpar!

Krónan sjálf er saklaus.

Allt tal íslenskra hagspekinga  um aðra mynt en íslenska krónu er barnaskapur í ljósi þess að Íslendingar eru efnahagslegir örvitar og hafa alltaf verið ef frá er talin þjóðarsáttin.

 

Sönnun þessa örvitaskapar eru stéttarfélögin sem leika hér lausum hala til hvaða hryðjuverka sem þeim þóknast. Stjórnvöld lyppast alltaf niður fyrir þessum óaldarlýð. Það eru þau sem eru krónumorðingjarnir. Hvernig liti út í Þýzkalandi ef þeir hefðu akki hlustað á Erhard og stillt sig?

 

Það er lítilmannlegt en skiljanlegt af efnahagslegum örvitum að tala niður til krónunnar.  Verðtryggð er hún besta mynt í heimi. Sú besta til að eiga og sú versta til að skulda. Ef við værum skynsamir þá væru útlánavextir mjög lágir og svo til engin verðbólga. Það er hægt, það sýndi þjóðarsáttin á sinni tíð. Aparnir eru bara komnir aftur til valda.

 

Krónan sjálf er saklaus af öllu.

Er þjóðin að átta sig?

á því að framhald vinstri stjórnarinnar boðar henni engan fögnuð hvað þá að henni sé frelsari fæddur í Steingrími Jóhanni,  í jötu heilagrar Jóhönnu undir verndarvængjum vitringanna og fjárhirðanna í skilanefndunum eilífu?

Reykjavík síðdegis gerði könnun 9.nóvember s.l.. og spurði hvaða flokk menn myndu kjósa það augnablikið. 20 %  svarenda nefndu Lilju Mósesdóttur og hennar óborna flokk, 6 % Guðmund Steingrímsson og Besta flokkinn hans.  En aðeins 9 % nefna nú Samfylkinguna og 4 % Vinstri Græna. Fylgi ríkisstjórnarflokkanna í prósentum er því komið samanlagt niður í sæmilegan kampavínsstyrkleika eða 13%

Þrátt fyrir hraustlegan áróður á Sögustöðinni og samanlagðra Baugsmiðlanna gegn gömlu flokkunum þá nefna nú 42% Sjálfstæðisflokkinn og 16 % Framsóknarflokkinn.  Og sannast þá enn að enginn veit hvað átt hefur fyrr en misst hefur.

Samkvæmt hefðinni tolla félagshyggjumenn ekki saman til lengdar fremur en sletta af kvikasilfri. Því félagshyggjumenn  eru svo miklir einstaklingshyggjumenn að þeir eru óðar komnir í hár saman við minnsta andblæ.  Þeir  renna til og frá og enginn getur staðsett þá nákvæmlega. Að því leyti svipar þeim til elektrónunnar sem margir segja af miklar sögur þó þeir hafi aldrei séð hana sjálfir.  En hún bara er þarna auðvitað eða öllu heldur var þarna, rétt eins  eins og VG var á Akureyri án þess að nokkur viti í rauninni hvað gerðist þar.   

Vinstri menn núna virðast reiðubúnir að flykkja sér um Lilju Mósesdóttur sem er væntanlega eitthvað annað en eitthvað annaðið hjá Steingrími Jóhanni á Bakka. Og svo virðist vaxandi fjöldi treysta Guðmundi Steingrímssyni betur til afreka í Evrópumálunum heldur en Jóhönnu sjálfri og Össuri.

Táknar þetta að þjóðin sé að átta sig á því að hún elti mýrarljós skattahækkana og niðurskurðar í velferðarkerfinu út í ófærur?  Valdi ráðleysi í stað ráðdeildar? Valdi kyrrstöðu í stað kraftaverka?

Er  þjóðin að átta sig á þessu ?

 

 

 

Steypubílar á laugardegi!

á fullri ferð. Ég hélt ég væri orðinn vitlaus, því þetta hef ég eki séð síðan fyrir hrun.

En Ágúst  Friðgeirsson er að byrja á að steypa aðra blokkina í Kópavogi eftir hrun. Hin fyrri er uppsteypt og víst að mestu seld. Ef eitthvað gerist til að hrinda af okkur kreppunni þá gerist það í Kópavogi því það er gott að búa í Kópavogi eins og maðurinn sagði.

Bravó fyrir Gústa og steypubílum á laugardegi í Kópavogi.

Guðlaugur Þór góður

á fjölmennum fundi í Kópavogi þar sem hann skýrði tillögur Framtíðarnefndar Sjálfstæðisflokksins. En þær tillögur hefur formaður Framtíðarnefndar Kristján Þór Júlíusson og margir góðir menn með honum unnið mikið starf og óeigingjarnt við að semja og kynna fyrir flokksmönnum um allt land. 

Þetta eru viðamestu skipulagsbreytingar sem nokkru sinni hafa verið settar fram fyrir Landsfund. Í stuttu máli miða þær allar að því að auka gagnsæi í flokksstarfinu og virkja fleira fólk til starfa en áður hefur verið. Dreifing ákvarðanatöku er aukin, embætti tveggja varaformanna er skilgreint og þeim settar starfsreglur og verkefni.  Kjöri til miðstjórnar er gjörbreytt og kjördæmisráð fá aukið vægi. Sumar tillögurnar voru taldar glannalegar eins og að opna fyrir setu á Landsfundi sem gæti leitt til innrásar þröngra hagsmunahópa og töldu menn að fara þyrfti gætilega í því. Meginstef er það að til þess að taka þátt í starfi flokksin verði menn að vera greiðandi félagsmenn og þar með alvöru félagar en ekki allskyns hlaupalið í prófkjörum flokksins.

Guðlaugur svaraði svo fyrirspurnum fundargesta og voru þær af ýmsum toga og hjó Guðlaugur hvert spjót af skafti sem á hann var skotið. Því aldrei er lognmolla eða hallelúja söngur á þessum fundum Sjálfstæðisflokksins í Kópavogi. Athygli  vakti þegar Guðlaugur skýrði frá athöfnum Árna Páls Árnasonar sem skærrar vonarstjörnu Framsóknarflokksins. En hann þáði þá sem Framsóknarmaður milljónatugi fyrir ráðgjöf til Valgerðar Sverrisdóttur iðnaðarráðherra sem Samfylkingin núna taldi höfuðsök í máli Páls Magnússonar til að geta ekki orðið forstöðumaður í Bankasýslu Ríkisins. 

Guðlaugur ræddi gengistryggðu lánin og benti á hvílik fjarstæða væri í því fólgin að þeir sem frömdu glæpinn, bankarnir sem veittu fjölskydlum og fyrirtækjum ólöglegu gengislánin, ættu núna að ákvarða refsinguna sem lántakendurnir ættu að hljóta samkvæmt hinum vitlausu lögum Árna Páls. Dómar Hæstaréttar væru skýrir þó ýmsir væru að reyna að skjóta sér undan þeim.

 Sturla Jónsson bílstjóri gerði harða hríð að Guðlaugi vegna þess hve lítið miðaði í lánaleiðréttingum og hampaði lærðum ritgerðum sem einhverjir góðir menn höfðu skrifað um málin og farið með niður á þing til að kynna málin.  En Guðlaugur skaut til baka og sagði ekki skrítið að þeir hefðu komið þangað því hann hefði fengið' þá til þess sjálfur að koma sem sýndi að það væri ómaklegt af Sturlu að ásaka sig um að gera ekkert í málum skuldara og heimila.  Benti hann líka á lánareiknir sinn á heimasíðu sinni til áréttingar um að hann væri virkilega að leggja sig fram í þessum málaflokki og bað Sturlu um að sjá sig um hönd.  Skipaðist Sturla allvel við þær upplýsingar Guðlaugs og tók hann í sátt, allavega í bili, því Sturla er sókndjarfur og vel lesinn.

Þessir laugardagsfundir Sjálfstæðismanna eru orðnir fastur liður í starfsemi flokksins og eru fjölsóttir. Flokkurinn er að ná til fólksins og þingmenn eins og Guðlaugur Þór leggja á sig erfiði til að vinna flokknum það gagn sem þeir  mega.

Sjálfstæðisflokkurinn er í mikilli sókn og félagar eru búnir að vinna þrekvirki í að hreinsa loftið og skýra fyrir fólki fyrir hvað hann stendur. En flokkurinn hefur aldrei þurft að breyta grundvallaratriðum í stefnu sinni frá stofnun sinni 1929. En fyrrihluti sjálfstæðisstefnunnar er  "að vinna í innanlandsmálum að víðsýnni og frjálslyndri umbótastefnu, á grundvelli einstaklingsfrelsis og atvinnufrelsis, með hagsmuni allra stétta fyrir augum." Seinni hlutinn felst í nafni flokksins. Þessi flokkur þolir samkeppni við hvern flokk eða flokksbrot sem er.

Guðlaugur Þór og allt okkar lið í Sjálfstæðisflokknum er tilbúið til baráttu fyrir betra Íslandi! Ekki veitir af.

 

Hvað kostar Svíinn á Sólheimajökli?

þegar allar björgunarsveitir eru á fullu að leita hans? Hver borgar svona ævintýri útlendra ferðamanna?

Er það sjálfgefið að menn geti farið til fjalla og á jökla á eigin vegum eins útbúnir og þeim dettur í hug. Geti svo týnst á kostnað þjóðarinnar? Þarf ekki að kyrrsetja þennan Svía ef hann þá finnst eins og skipið Ölmu og krefjast björgunarlauna af sænska ríkinu sem á þennan skattþegn?

Er ekki góð byrjun að skylda alla fjallamenn að kaupa sér ELT-senditæki sem sýnir staðsetningu þeirra í neyð?

Jöklaráp er ekkert einkamál asna.

Kaninn hnerrar,Kínverjinn fær kvef

um leið og afturkippur kemur í USA. Nú þarf Kínverjinn að flytja inn svínakjöt frá Bandaríkjunum og annarsstaðar frá til að róa markaðinn. Því matarverðið í Kína hefur rokið upp um 14 % það sem af er árinu og verðbólga heldur innreið sína í því ríki.Samt er þetta villmannlegt einræðisríki sem drepur hvern þann sem rífur kjaft enda verkföll þar óþekkt svo ekki er því um að kenna. Mannfjölgunin í Kína er víst að stöðvast við 1.4 milljarð. Indverjar hafa 60 % hærri fæðingartíðni en Kínverjar og verða fjölmennastir þjóða um miðja öldina. Íslendingum og Þjóðverjum fækkar heldur og svo er um flestar upplýstari þjóðir. Þeim fjölgar mest sem ekki geta fætt börnin sín né klætt, lesið né skrifað.

Hvaða áhrif hefur það á efnahag heimsins ef þróuðu fólki myndi hætta að fjölga? Að því hlýtur þó að koma af hvaða ástæðum sem það verður. Mannkynið er orðið 7 milljarðar en var um 2 í stríðslok 1945. Kenning Malthusar fer að byrja að bíta eins og fréttir er farnar að berast um. Og einhverstaðar verður barist um brauðið ef þessu heldur áfram. Það væri því mikilvægt verkefni Vesturlanda, að taka sjálfstæðið af Afríkuþjóðum eins og tl dæmis Sómalíu. Stilla þar til friðar með hörku og láta þá fara að yrkja jörðina við Pax Cultura.

Matvælaverð hækkar nú um allan heim og þar auðvitað mest sem minnst er framleitt. Íslendingar ættu því að hætta að flytja út lambakjöt sem er ekki annað en upplástur landgæða.Búa að sínu í hæfilegu magni en ekkert umfram það. Matvæli eru okkar innlenda aðalframleiðsla þannig að okkar horfur ættu ekki að vera sem verstar efnahagslega.

En mannfjöldinn er þvílíkur í Austurlöndum að éti 1 % Kínverja meiri baunir ,þá hækkar verðið á baunum í miðvesturríkjum Bandaríkjanna. Og ef 1 % Kínverja kaupir sér Bjúikk þá hefur Detroit ekki undan.

Bilið milli ríkra og fátækra breikkar í heiminum. Sem betur fer fyrir Íslendinga þannig að takist okkur að halda mannfjöldanum okkar í skefjum kemur meira í hver hlut eftir því sem tímarnir líða.Vð þurfum því að fara varlega í að selja Kínverjum landið eða taka að okkur að sjá fyrir beiningalýð úr Evrópu eins og við erum að gera. Íslendingar geta átt bjarta framtíð ef þeir gætu lært að nota skynsemina meira.En það hafa þeir lítt getað til þessa.

Það er eitthvað að gerast i fjármálum heimsins sem við sjáum ekki fyrir endann á. Líklega erum við búin að ganga bréfagöturnar á enda og förum að læra að bréfakaplar með óefnislegar eignir að baki koma aldrei í stað framleiðslu áþreifanlegra gæða. Bréfaguttar heimsins munu þurfa að færa sig útá akrana og í verksmiðjurnar og fara að vinna arðbær framleiðslustörf eins og í styrjöldum. Mannkynið gengur ekki á lyginni mikið lengur. Það verður bráðum spurt hvað er á bak við bréfsnuddurnar.

Kanarnir eru farnir að hnerra og það þýðir kvef fyrir Kínverja og fleiri.

Þjóðnýtum bankana!

Íslands-og Arion-banka.

Það ber brýna nauðsyn til þess að taka til baka það fullveldisframsal sem Steingrímur J. Sigfússon framdi með því að afhenda "erlendum kröfuhöfum" þessa banka, Í hópi hluthafanna eru vogunarsjóðir og íslenskir útrásarvíkingar sem hafa keypt kröfur annarra á hrakvirði og hafa þau sjónarmið helst að blóðmjólka íslensk heimili og fyrirtæki.

Eigendur þessara banka hafa skiljanlega sáralitlar hugsjónir um að stunda hér bankastarfsemi eins og þjóðin þarfnast heldur að komast úr landi með eins mikið fé og þeir geta náð.

Alþingi þarf að taka hér myndarlega á málum. Þjóðin þarf bankakerfi sem ætlar að vera þáttakandi í uppbyggingu landsins en ekki erlend rukkunarfyrirtæki í þágu misjafnra sauða sem margir hverjir eiga óuppgerðar sakir við okkur sjálf.

Þjóðnýtum Íslands-og Aríon-banka!

Krankleiki Kapítalismans

er mikið til umræðu hérlendis sem erlendis.  Kommar kætast mjög yfir þessu  og segja að nú sjáist loksins að kapítalisminn gangi ekki upp. Allt fjármálakerfi og lánakerfi riði til falls. Það sé búið að lána alltof mikið til þeirra sem aldrei gátu borgað hvort sem var.  Frjálshyggjan sem sögð er hafa stýrt þessu ef ekki nýfrjálshyggjan. Frelsið hafi  þar með dæmt sig úr leik og forræðishyggjan hljóti að taka við.

Sannur kapítalisti  telur jafnvel almenningsklósett vera sósíalisma. Hann er sannfærður um að það sé enginn ókeypis hádegisverður til í heiminum.  Einhver verði að borga að lokum. Kommarnir eru hinsvegar löngu búnir að finna út að allt sé ókeypis sem þeir þurfi ekki að borga sjálfir. Og allt sem þeir fái lánað eigi auðvitað ekki að borgast til baka því peningarnir sem þeir fengu lánaða voru illa fengnir peningar sem þjófar og raæningjar áttu. Ber því  ekki brýna nauðsyn til að afleggja verðtryggingu fjárskuldbindinga?  Bæði innlána og útlána?

Og hvað eru peningar? Ekki smjör og ostur, ekki mjólk eða steypa? Ekki sparisjóðsbók?  Peningur er lán sem maður fær til að kaupa þessa hluti fyrir. Auðvitað á ekki að borga lán til baka af því að mann vantar tekjur til þess. Og af hverju vantar tekjur? Það er búið að hreinsa allt af manni í skatta. Og afhverju er maður að borga skatta? Jú það er til þess að borga velferðina, skólana, ellilífeyri og   almenningsklósett. Framleiðslan stendur ekki lengur undir lífsgæðunum.  Frumorsök ófarnaðarins í heiminum hlýtur þá að vera kapítalisminn? Sú stefna að vera sjálfum sér nógur er hinn mikli misskilningur? Apinn sem tekur af þér oststykki í nafni kærleikans og segist muni skipta milli fátækra bítur í það sjálfur í hvert sinn. Þar er fyrsti kratinn fæddur. Fyrsta sýking kapítalismans.

Það er sósíalisminn sem er undirrót alls ills. Upptaka eignarréttarins hjá einstaklingnum. Ríkisstýrð velferð í stað sjálfviljugrar. Það er krankleiki kapítalismans.