Okkur vantar leiðtoga !

11.7.2009 | 22:21 skrifaði ég svo:

"Mig vantar  leiðtoga,  sem segir við heiminn hingað og ekki lengra !

 

Þjóð okkar er í nauðum. Fjármálakerfi hennar er hrunið. Við verðum að grípa  til örþrifaráða varðandi fjármálaviðskipti við umheiminn. Þeir sem ekki eru vinir okkar eru óvinir okkar. Við verðum að komast af án þeirra.

 

Við  munum ekkert greiða af erlendum skuldum landsins nema það sem við getum og teljum nauðsynlegt hverju sinni. Við getum ekki greitt erlendar skuldir óreiðumanna, til þess skortir okkur afl. Við getum ekki og viljum ekki veðsetja framtíð hins óborna jóðs.

 

Í hundrað áratugi þraukaði þetta fólk sem nú er hnípið við hið yzta haf. Stundum lá við að náttúruhamfarir, drepsóttir  eða hörmungar af mannavöldum myndi slökkva hin síðasta lífsneista á landinu. Kjarkur þjóðarinnar og lífsvilji lá í dvala um dimmar aldir. En hún braust þó áfram í þeirri trú að á morgni nýrrar aldar myndi hún aftur upp rísa og menningin vaxa í lundi nýrra skóga.

 

Skógarnir hafa margfaldast og innviðir þjóðarinnar hafa styrkst. En þjóðin hefur sundrast og misréttið hefur margfaldast. Fáir menn hafa leikið hina mörgu grátt. Þeir hafa tekið eyri ekkjunnar til sín og sóað honum í fjárhættuspilum um víða veröld. Þeir hafa lagt það land sem  við köllum ættjörð okkar undir og tapað. Nú segjast þeir hafa haft til þess fullt umboð og krefja okkar þjóð um að hún standi upp af staðfestum sínum. Leggi aleigu sína og óborinna kynslóða á spilaborð manna sem fæst okkar þekkja. Þjóð sem ekki vissi hvað undir var  lagt eða hvað spilað var um.  Engum einum þegni þjóðar getur verið heimilt að leggja ættjörð sína undir í eiginhagsmunaskyni. Hvorki hjá okkar þjóð né  með öðrum þjóðum. Sá tími er liðinn að einstakir menn geti selt þjóðir og lönd í þrældóm.

 

Tími er því kominn til þess að við rísum upp og segjum nei. Forfeður okkar komu til þessara stranda í leit að betra lífi og frelsi frá skuldheimtumönnum erlendra ríkismanna. Til lítils höfum við þá farið um aldir ef þau  eiga að verða okkar  örlög, að glata landinu okkar og ættarjörð í fánýtum fjárhættuspilum hinna fáu. Þeir skulu  svara til saka  fyrir okkar æðsta dómstól vegna gjörða sinna, sem eru svik við ættjörðina og þjóð sína um leið og þær eru herfileg svik við ykkur sem þeir hafa skaðað í ranglega okkar nafni.

 

Við þá erlendu ríkismenn, sem nú að okkur sækja segjum við :  

 Í fyllingu tímans skulum við reyna að bæta ykkur á einhvern hátt þær sakir sem þér  nú teljið til skuldar hjá okkar þjóð.   En börnin okkar og framtíð þeirra  ganga fyrir því að við látum af hendi lífsbjargir þeirra til ykkar hér og nú.  Við getum það hvorki né megum.  Meira getum við ekki gert á þessari stundu fyrir ykkur sem við biðjum ykkur að virða.

 

Þjóð okkar er ung og starfsfús. Hendur hennar munu skapa auð á ný sem mun verða okkur öllum til gagns. Hrindið ekki okkur hrasandi til falls þér göfugu  herrar.  Reynist okkur heldur vel í raunum okkar og við heitum ykkur vináttu í staðinn. Því að vinátta okkar sem  kúgaðrar og sigraðrar þjóðar myndi heldur ekki reynast ykkur annað en stundarfró sem fyrr en varði hefði  getað snúist í andhverfu sína..

 

Íslenzk þjóð mun lifa áfram við hið yzta haf. Hún er frjáls og á ein sitt stríð og sín opnu sund.  Fyrr en varir mun henni aftur skína sól úr skýjum,  þó svo að þið teljið hana á þessari stundu ekki tæka í samfélag ykkar.

Það sólskin mun einnig ná til ykkar í fyllingu tímans.  Og þá  munuð þið fagna með okkur,  að lengra var ekki gengið á þessum tíma í að beygja okkur hina sigruðu  í svaðið.

 Hver þjóð verður að fá tækifæri til þess að sjá fyrir sér og börnum sínum fyrst áður en hún getur hugað að hag annarra.

Því miður miklu herrar, við getum ekki annað !  "

Þetta var í júlí s.l.

Hefur okkur eitthvað miðað áfram. Höfum við orðið vör við einhverja leiðtoga sem tala okkar máli við aðrar þjóðir ? Er okkar eini málsvari ein kona sem heitir Eva Joly ?

Það er liðið hálft ár síðan þetta var skrifað. Hefur eitthvað breyst ? Hefur verið slegin skjaldborg um heimilin ? Hefur gengið styrkst ?.Hefur verðbólgan minnkað ? Hefur atvinnuleysi raunverulega minnkað ? Hefur verið ráðist í stóriðju-og orkuframkvæmdir? Hefur eitthvað gerst nema meira japl,jarm og fuður ?

Ráðherra vor fer úr landi til að reyna samninga við erlenda ríkismenn. Hann kemur til baka með fleiri hótanir frá þeim um afarkosti okkur til handa. Hann krefst þess enn að við skrifum undir skuldaklafann. Þá getum við fengið meiri lán til að skulda svo hann geti sukkað áfram í sínum ríkisrekstri og handstýrðrar velferðar.

 Ekkert annað en uppgjöf og niðurlæging virðist komast að hjá leiðtogum okkar. Sendimenn okkar liggja marflatir fyrir keisurum Evrópubandlagsins og biðja um brauðmola. Allt er falt fyrir aðgöngumiða að dýrðinni. Uppgjöf og undirlægjuháttur er sameiginlegt stefnumið ríkisstjórnarflokka Íslands. Við þessar aðstæður er ekki nema von að fólk gefist upp í stórum stíl og fari úr landi. Hver er framtíðin sem þessi ríkisstjórn boðar ? Hvað verður afgangs þegar búið er að borga Icesave ?

Vantar okkur ekki enn leiðtoga til að vísa okkur veginn úr myrkrinu ?         

Athugasemdir

[Auðun Gíslason, 12.1.2010 kl. 22:44]

 

skarfur

12.1.2010 | 20:47

Samningar ríkisstjórnar Geirs H. Haarde fyrir hönd þjóðarinnar 10. október 2008 og 16. nóvember 2008! Þannig hófst samningaferlið!

Samkomulag milli Hollands og Íslands um IceSave

11.10.2008

Að loknum uppbyggilegum viðræðum hafa hollensk og íslensk stjórnvöld náð samkomulagi um lausn mála hollenskra eigenda innstæðna á IceSave-reikningum Landsbankans.

Fjármálaráðherra Hollands, Wouter J. Bos, og fjármálaráðherra Íslands, Árni M. Mathiesen, tilkynntu þetta.

Ráðherrarnir fagna því að lausn hafi fundist á málinu. Wouter J. Bos kvaðst einkum ánægður með að staða hollenskra innstæðueigenda væri nú skýr. Árni M. Mathiesen bætti við að aðalatriðið væri að málið væri nú leyst.

Samkomulagið kveður á um að íslenska ríkið muni bæta hverjum og einum hollenskum innstæðueiganda innstæður að hámarksfjárhæð 20.887 evrur. Hollenska ríkisstjórnin mun veita Íslandi lán til að standa undir þessum greiðslum og hollenski seðlabankinn mun annast afgreiðslu krafna innstæðueigendanna.

Samkomulag næst við Evrópusambandið fyrir hönd Hollendinga og Breta - Greiðir fyrir láni frá Alþjóðagjaldeyrissjóðnum (IMF)

16.11.2008

Mikilvægur áfangi hefur náðst til lausnar deilunnar um innstæðutryggingar vegna íslenskra bankaútibúa á Evrópska efnahagssvæðinu og stöðu sparifjáreigenda í þeim. Viðræður Íslands við nokkur Evrópusambandsríki, sem komust á fyrir tilstilli Frakklands sem nú fer með formennsku í Evrópusambandinu, leiddu til samkomulags um viðmið sem lögð verða til grundvallar frekari samningaviðræðum.

Samkomulagið felur í sér að íslensk stjórnvöld ábyrgjast lágmarkstryggingu þá sem EES-reglur mæla fyrir um til innstæðueigenda í útibúum bankanna erlendis. Endanlegur kostnaður ríkissjóðs vegna þessa mun ráðast af því hvað greiðist upp í innstæðutryggingar af eignum bankanna. Einnig er kveðið á um að Evrópusambandið, undir forystu Frakklands, taki áframhaldandi þátt í að finna lausnir sem gera Íslandi kleift að endurreisa fjármálakerfi og efnahag.

Aðilar eru ásáttir um að hraða fjárhagslegri aðstoð við Ísland, þar með talið samþykkt lánafyrir­greiðslu sem beðið hefur samþykktar stjórnar Alþjóðagjaldeyrissjóðsins (IMF) undanfarnar vikur. Erindi Íslands hjá IMF verður tekið til afgreiðslu hjá sjóðnum miðvikudaginn 19. nóvember.

Umsamin viðmið

1. Ríkisstjórn Íslands hefur átt viðræðufundi með stofnunum Evrópusambandsins og hlutaðeigandi aðildarríkjum þess um skuldbindingar Íslands samkvæmt samningnum um Evrópska efnahagssvæðið að því er tekur til tilskipunar um innstæðutryggingar 94/19/EB. Aðilar komu sér saman um að tilskipunin um innstæðutryggingar hafi verið felld inn í lög­gjöf­ina um Evrópska efnahagssvæðið í samræmi við samninginn um Evrópska efnahags­svæð­ið og gildi því á Íslandi með sama hætti og hún gildir í aðildarríkjum Evrópusambandsins.
2. Viðurkenning allra aðila á þessari lagalegu stöðu greiðir fyrir skjótri niðurstöðu samninga­viðræðna þeirra sem nú standa yfir um fjárhagsaðstoð við Ísland, þ.m.t. við Alþjóða­gjald­eyris­sjóðinn. Þessar samningaviðræður skulu fara fram með samhæfðum og samræmdum hætti og skal þar tekið tillit til hinna erfiðu og fordæmislausu aðstæðna sem Ísland er í og knýjandi nauðsynjar þess að ákveða ráðstafanir sem gera Íslandi kleift að endurreisa fjármála- og efnahagskerfi sitt.
3. Stofnanir Evrópusambandsins og Evrópska efnahagssvæðisins munu taka áframhaldandi þátt í þessu ferli sem fer fram í samráði við þær.

Reykjavík 16. nóvember 2008

Kannski ekki úr vegi, að minna á þessar samninga ríkisstjórnar Geirs. H. Haarde nú þegar ásakanirnar  dynja á núverandi ríkisstjórn.  Svona hófst í raun þessi samningaruna.  Svona var ríkissjóður skuldbundinn í byrjun þessa leiðindamáls!  Nú virðist stór hluti þjóðarinnar telja að Jóhanna og Steingrímur J. eigi sök á hvernig komið er, og þau sæta ásökunum um hin villtustu svik við land og þjóð.  Munið að Icesave-myllan fór af stóð 2006 með vilja og vitund íslenskra yfirvalda!

[Helga Kristjánsdóttir, 13.1.2010 kl. 00:04]

   Halldór, aldeilis góður pistill. Værir fínn leiðtogi,en hætt er við að þrekið snuði,á þessum aldri.

[Halldór Jónsson, 13.1.2010 kl. 00:09]

Mér sýnist þeir yngri detta niður dauðir alveg eins og við eldri. Meira segja eru víst minni líkur á því að 70 ára detti en 60 ára, hann er svo miklu hraustari af náttúrunni, þeas lífslíkurnar til eins árs hækka með aldri. Þetta heyrði ég einu sinni hjá Valdimari Kristinssyni. Hvað sem því líður, fram skal stauta blauta brautu buga þraut uns fjörið deyr eins og kallinn sagði.

[Halldór Jónsson, 13.1.2010 kl. 00:09]

Hvað var Adenauer gamall þegar hann varð kanslari í síðasta sinn ?

[Halldór Jónsson, 13.1.2010 kl. 00:11]

Annars var ég að auglýsa eftir en ekki að bjóða fram hið augljósa ...!!

[Ingibjörg Guðrún Magnúsdóttir, 13.1.2010 kl. 00:22]

já Halldór alvöru mál á ferðinni. Ég held að það vefjist fyrir mörgum að taka svona Leiðtoga hlutverk að sér, það er vanda verk og mikið krefjandi, en ef manneskja er með allar staðreyndir á hreinu sem og tungumál þá ætti það ekki að vera svo agalegt...?

[Jenný Stefanía Jensdóttir, 13.1.2010 kl. 04:25]

Ekki að ég sé að farast úr leti Halldór sæll, heldur er ég enn, (illu heilli) sama sinnis og þarna í sumar þegar þú ákallaðir leiðtoga!

Svo holar dropinn steininn, að hann lokum bregst ...... eða gerist skynsamur.

Sæll Halldór,

Takk fyrir þennan pistil.  Við erum búin að vera í sárri leiðtogaþröng í langan tíma.

Þeir sem nú sitja við stjórnvölinn, eru ekki þar vegna leiðtogahæfileika, miklu fremur vegna þess að þau eru talinn "minnst spillt" af stjórnmálaspillingaflórunni, og þá er ég að tala um einstaklingana, ekki flokkana.

Nú virðist sem þau bæði hafi gefist upp, fyrir hönd íslensku þjóðarinnar.

Jenný Stefanía Jensdóttir, 12.7.2009 kl. 15:33

[Guðrún (IP-tala skráð) 13.1.2010 kl. 11:01]

Takk fyrir mig. Þennan góða pistil ætti að lesa upp í Rúv.-Kastljósi. Sjónvarpi allra landsmanna eða þannig sko. Er þó lítið örugg um að hann kæmist í gegnum þann ;toll;