Kári í jötunmóð

í Mogga í dag. Afköstin í skurðaðgerðum við gáttatifi ná ekki helmingi af þörf.

Í stað þessa að heimta allt af helfrosnu ríkisvaldinu sem er alltaf eins hverjir sem stjórna finnst mér að svona eldstólpi eins og dr. Kári er ætti að beita sér fyrir því að setja upp prívat klíníkk þar sem þeir sem geta borgað frá afgreiðslu strax. Þá styttist biðlistinn strax um helming.

Svo getur hann boðið einhverjum Visa-raðgreiðslur og einhverjir hlaupa á það. Svo má hafa landssöfnun og happdrætti, 1. viningur aðgerð við gáttatifi. Landspítalasósíallinn klárar þá kannski restina.

Bindum við ekki sem fyrrum vonir við dr.Kára í jötunmóð!

 

Athugasemdir

[Axel Jóhann Hallgrímsson, 10.12.2015 kl. 13:26]

Til hamingju með að vera ekki á þessum biðlista, sem auðveldar þér til muna að hæðast að þessari annars dauðans alvöru.

[Hilmar (IP-tala skráð) 10.12.2015 kl. 14:12]

Nú er Kári orðinn átrúnaðargoð vinstrimanna. Gleymdar eru nú formælingar þeirra vegna "DeCode brasksins" Heyrast nú raddir meðal þeirra, að Kári skuli gerður að forseta, eða forsætisráðherra.

Kári bætist í útvalinn hóp auðmanna sem vinstrimenn hafa velþóknun á. Jón Ólafsson, Jón Ásgeir og nú Kári. Sérdeilis góður hópur velgjörðarmanna íslenskrar alþýðu.

Vinstrimenn eru okkar "Minions", forsöguleg kvikyndi sem leita logandi ljósi að nýju illmenni til að fylgja.

[Elín Sigurðardóttir (IP-tala skráð) 10.12.2015 kl. 15:53]

Mér finnst nú einkavæðingin hafa byrjað með gagnagrunninum hans Kára þannig að mér finnst alltaf soldið skrítið þegar hann fer að tjá sig um ástand heilbrigðismála.  Er hann ekki bara átrúnaðargoð stjórnmálamanna?  Sitja þær ekki saman upp á punt í einhverjum sjóði hjá honum Ingibjörg Pálmadóttir og Guðrún Helgadóttir?

[Ágúst H Bjarnason, 10.12.2015 kl. 16:39]

Sæll frændi.

Kári lýsir ágætlega gáttaflökti og afleiðingum þess. Sjálfur hef ég farið í rafvendingu og tek daglega lyf til að vinna á móti því að hjartað lendi í óreglu, en það er ekkert grín. Þeir sem fara í brennsluaðgerð sem Kári er að hæla ganga margir hverjir alheilir út og kenna sér ekki meins framar. Þessi aðgerð felst í því að vírar eru þræddir upp í hjartað frá nára og taugafrumur sem gengið hafa af göflunum gerðar óvirkar með því að brenna þær með rafstraumi.  Flókin og dýr aðgerð, en það er líka dýrt að þurfa að fara í rafvendingu annað slagið eins og allmargir þurfa. Við rafvendingu er maður svæfður og hjartað stöðvað augnablik með hjartastuðtæki. Virkar oftast, en ekki alltaf. Sumir þufa að fara oft og ítrekað í svona rafvendingu, og flestir þurfa að vera á blóðþynningu því við gáttaflöktið er hætt við að blóðkekkir myndist í hjarta og berist síðan í heilann. Þessi ítrekaða meðferð kostar sitt.    

„Gáttaflökt er algengast þeirra hjartsláttaróreglna sem koma þolendum í hendur heilbrigðiskerfisins. Um það bil 25% Íslendinga fá kast af gáttaflökti einhvern tíma á ævinni og þar af fær stór hundraðshluti endurtekin köst eða óreglan verður viðvarandi. Einn af fylgifiskum gáttaflökts er heilablóðfall og er gáttaflöktið ábyrgt fyrir í það minnsta 30% þeirra. Þess vegna eru þolendur settir á blóðþynningu til þess að fyrirbyggja heilablóðföll og þegar þeir fá kast eru þeir svæfðir og þeim veitt rafstuð til þess að reyna að koma þeim í réttan takt, sem er kallaður sínus og það veit sá einn sem í flökti hefur lent hvað sínusinn er mikil blessun. 

Nýverið hafa læknar á Landspítalanum, undir forystu Sigfúsar Gissurarsonar sem er ungur snillingur, farið að gera flókna brennsluaðgerð til þess að fyrirbyggja köst hjá þeim sem hafa fengið þau. Hann segir mér að á landi hér sé þörf á um það bil 150 slíkum aðgerðum á ári, en hann fær ekki leyfi til þess að gera nema 60. Það er sem sagt biðlisti fyrir þessar brennsluaðgerðir sem lengist um eitthvað minna en 90 á ári vegna þess að einhverjir á listanum deyja af sjúkdómnum eða öðru. Hver aðgerð kostar um 700.000 krónur þannig að hann fær 42 milljónir á ári en þyrfti 105 milljónir til þess að sinna þörfinni. 

Afleiðingin af þessum 63 milljóna króna sparnaði er kostnaður sem er vafalítið margföld sú upphæð í lyfjum þeirra sem ekki þyrftu þau eftir aðgerð og í kostnaði við rafvendingarnar, að maður tali nú ekki um ávinninginn af vellíðan og starfsgetu þeirra sem eru allt í einu komnir í viðvarandi sínus. Sú staðreynd að ákvörðunin um að það megi ekki gera nema 60 brennsluaðgerðir á ári var tekin af skriffinni einhvers staðar í stofnun sem heitir Sjúkratryggingar Íslands breytir ekki því að það er á ábyrgð kjörinna fulltrúa fólksins í landinu að framselja valdið til þess að taka svona ákvarðanir. 

Þetta er ákvörðun sem endanlega kostar þjóð stórfé og einstaklinga þjáningu og jafnvel varanlega fötlun eða lífið. Það væri sjálfsögð betrumbót á heilbrigðiskerfinu að leyfa Sigfúsi að mæta þörfinni fyrir brennsluaðgerðir að fullu þótt henni fylgi skammtímakostnaður.“

[Axel Jóhann Hallgrímsson, 10.12.2015 kl. 17:23]

Við deilum þessu vandamáli Ágúst. Sjálfur hef ég farið í fleiri rafvendingar en ég hef tölu á, ásamt inntöku ótal lyfja. Ég er á þessum fjandans biðlista, veit ekkert hvenær að mér kemur, það er ekki góð viðbót við sjúkdóminn.

http://skagstrendingur.blog.is/blog/skagstrendingur/entry/2161572/

[Helga Kristjánsdóttir, 10.12.2015 kl. 20:27]

Halldór það er mjög óþægilelgt að hafa þennan skramba,en tek bara 3-4 covar þynningu á dag.Ég fór einu sinni til Ugga hjartalæknis  en neitaði að fara í rafvendingu og hef ekki farið til hans síðan.Ég panta alltaf sæti í leikhúsi við gang,því hvað sem loftræsting er mikil er ég oft að kafna af súrefnisleysi.Auðvitað spilar spennan inn í.Blóðtökur á 3 vikna fresti,ég dreg það alltaf en seinast fór það i 3 mánuði.Eg tek ekki pláss frá yngra fólki,af því ég vil ekki fara í neitt af þessu. 

[Erla Magna Alexandersdóttir, 10.12.2015 kl. 23:37]

þEIR SEM ALDREI HAFA ORÐIÐ VEIKIR EÐA VERIÐ MÁNUÐUM OG ÁRUM SAMAN YFIR VEIKUM ÆTTINGJUM VEGNA TRASSASKAPAR OG DAUFDUMBUM STJÓRNMÖNNUM ÆTTU EKKI AÐ TALA UM ÞESSI MÁL.

 kÁRI VEIT HVAÐ HANN ER AÐ TALA UM.

[Halldór Jónsson, 11.12.2015 kl. 03:09]

Mér finnst nú fúlt ef einhver heldur að ég sé að gera grín að Kára eða þolendum sjúkdómsins, Svo var alls ekki. Ég hélt að ég væri að benda á leiðir til þess að fækka í þeim hópi sem þurfa aðgerð. Ef fækkar í hópnum fyrir tilstilli einhvers úrræðis annars en að vera bara á bilistanum., þá hélt ég í einfeldni minni að vandamálið minnkaði í heild? Ég þekki marga sem hafa fengið þetta og mér dytti aldrei í hug að draga raunveruleikann í efa.

Þetta og fleiri vandamál má leysa með einkavæðingu. Sáið heilsugæsluna í Sölum? Er hún ekki að brilléra umfram sósialstöðvarnar? Hvað með alla bæklunarlæknana sem linna fólki kvalir og ég heimsæki reglulega. Ég vildi ekki vera bara með biðlistaúrræðið á Lansanum.

[Axel Jóhann Hallgrímsson, 11.12.2015 kl. 07:17]

Hafi það ekki verið ætlun þín Halldór, að hæðast að aðilum máls, er þessi pistill þinn afskaplega illa ígrundaður og enn verr  heppnaður.

[Elín Sigurðardóttir (IP-tala skráð) 11.12.2015 kl. 07:56]

Þetta er fínn pistill.  Margt til í honum.  Ummælin um verðlaunin minna á heimsmet barnanna okkar í læknadópsáti og sérkennileg Barnamenningarverðlaun Velferðarsjóðsins hans Kára til Jóhannesar Kr. Kristjánssonar fréttamanns - heilar tvær milljónir - til handa ungmennum sem glíma við fíkn og/eða vímuefnavanda.  Skrítið að Kára hafi aldrei dottið í hug að skamma lækna fyrir þessa fíklaframleiðslu sína.  Hvaða áhrif ætli hún hafi á samfélagið?  Er Kári að hæðast að fólki með þessum tveggja milljón króna plástri sínum?   

[Heimir Lárusson Fjeldsted, 11.12.2015 kl. 10:23]

Ég var mánuðum saman á biðlista vegna verkfalla lækna og fleiri heilbrigðisstarfsmanna.

[Elín Sigurðardóttir (IP-tala skráð) 11.12.2015 kl. 10:55]

Einmitt.  Við skulum ekki gleyma því að Ólafur G. Skúlason setti sig upp á móti erlendum hjúkrunarfræðingum og þá sagði enginn neitt.  Þegar Jón Valur Jensson setur sig upp á móti erlendum jarðskjálftafræðingi er hann umsvifalaust sakaður um fordóma.

[Sigrún Jóna Sigurðardóttir, 11.12.2015 kl. 16:14]

Ég vildi að Ísland ætti nokkra tugi Kára.

Og ég tek undir það að þeir sem aldrei hafa orðið veikari af neinu sem er hættulegra an þessi árlega flensa , ættu að fjalla sem minnst um þessi mál.

[Halldór Jónsson, 11.12.2015 kl. 23:05]

Enginn er víst eilífur nema ég sem aldrei verður veikur og fer aldrei á spítala nema stundum í heimsóknir

[Halldór Jónsson, 11.12.2015 kl. 23:06]

Ég undrast alltaf hvílíkir englar starfa á þessum hræðilegu stofnunum

Þetta var vegna Sigrúnar Jónu

[Elle_, 12.12.2015 kl. 13:40]

Ekki veit ég hvort Kári veit mikið eða lítið um þessi mál.  En hvað þýðir þetta og hví mega ekki allir tala um það sem vilja (ALDREI HAFA ORÐIÐ VEIKIR EÐA - - - ÆTTU EKKI AÐ TALA UM ÞESSI MÁL)?  Mega læknar tala um það þó þeir hafi ekki verið veikir eða verið með veika ættingja?