Inná með Pétur Blöndal !

Jón Gunnarsson, þingmaður úr Kópavogi, hefur talað all skýrt  um það, að endurnýja beri í ráðherraflokki ríkisstjórnarinnar. Og að báðir stjórnarflokkarnir eigi þar hlut að máli. Það er fremur óvenjulegt að nýir þingmenn séu að skipta sér svona af málum, sem verið hafa allt að því tabú utan forystunnar. En ég er ánægður, hversu Jón er skorinorður og ófeiminn við að tjá skoðanir sínar.

Úr því að þessu er hreyft, þá spyr ég mig af hverju menn hafi aldrei valið dr. Pétur H. Blöndal sem ráðherra. Þetta er maður með yfirburðaþekkingu á málefnum ríkisins og þegna þess. Góðgjarn maður og djúpvitur að auki. Það hefur verið einstök upplifun að taka þátt í málefnastarfi á landsfundum Sjálfstæðisflokksins og fylgjast með því hvernig Pétur kemur mönnum sífellt á óvart með skarplegum ábendingum og upplýsingum,  sem fólk ekki hugsar alltaf útí.

Pétur hafði þegar skilað drjúgu ævistarfi áður en hann fór í stjórnmálin. Hann er ekki í stjórnmálum  vegna þess að hann skorti lifibrauð og sporslur, heldur af því að hann vill verða þjóðinni að liði.

Ég vona að menn fari að gera sér ljósa hæfni  dr. Péturs til þess að hjálpa til við það endurreisnarstarf sem framundan er. Ég held að þjóðin myndi hafa  gagn af því  að fá Pétur Blöndal til enn áhrifameiri starfa á sviði efnahagsmála þjóðarinnar,  við þær erfiðu aðstæður sem nú ríkja. 

Ég segi óhikað fyrir mig : Inná með Pétur !   

 

Athugasemdir

[Predikarinn - Cacoethes scribendi , 12.12.2008 kl. 23:59]

Sæll kæri Halldór. Ég verð nú bara að taka undir hvert orð hér .

[Ómar Bjarki Smárason, 16.12.2008 kl. 15:56]

Er hann Pétur ekki bara allt of klár fyrir þessa ríkisstjórn? Íslendingum hefur alltaf fundist öruggara að halda aðeins aftur af þeim sem skara fram úr. Það gæti einmitt verð hluti af þeim vandamálum sem við glímum við í dag. Menn þurfa að hafa réttan "pólitískan lit" til þess að flokksráðin gefi samþykki sitt. Kannski fengjust lög frá Alþingi ekki prentuð ef þau eru ekki prentsmiðjueigandanum að skapi.....

[Halldór Jónsson, 17.12.2008 kl. 09:46]

Góður punktur hjá þér Ómar Bjarki, svona í ljósi síðustu atburða á DV

[P.Valdimar Guðjónsson, 28.12.2008 kl. 21:35]

Tek undir þetta með Pétur.  Reyndar komið í ljós síðan þessi færsla fór inn að ekki stendur til að gera nokkrar einustu breytingar á ríkisstjórninni að sinni.

Hann er fj... hreinskilnari kallinn og afskaplega jarðbundinn.    Til dæmis eitt hefur mér alltaf líkað í hans málflutningi.  Það er fyrirvari hans og ímugustur á fyrirbærinu lán.    Bankalán getur verið nauðsynlegur hlutur eins og gefur að skilja.    En mér situr í minni viðtal við Pétur fyrir margt löngu , að mig minnir í einhverju góðærinu.     Hann sagði Íslendinga oftast fagna því, klæða sig í sparifötin og gleðjast þegar þeim "lánast" að fá gott lán í banka.   Auðvitað ætti því að vera öfugt farið.  Fólk ætti að klæða sig í sorgarklæðnað og syrgja þann daginn!

Ég endurtek að þetta var löngu áður en þjóðin fékk sinn stóra rasskell fyrir lánafíkn sumara.

[Baldur Hermannsson, 30.12.2008 kl. 23:47]

Pétur hefur þann kost umfram aðra þingmenn að hann er vel menntaður í stærðfræði, mikill peningamaður og fremur kjarkmikill. Hefði hann verið maður til að afstýra bankahruninu?

[Halldór Jónsson, 1.1.2009 kl. 22:26]

Takk fyrir þetta P.Valdimar og Baldur. Líklega er enginn einn sem ræður úrslitum í löngu ferli. En jákvæð áhrif tel ég að Pétur hefði haft ef hann hefði verið nær ákvarðanatökunum.

Annars heyri ég almenning segja að það vanti það að Geir og Ingibjörg tali við þjóðina reglubundið og skýri frá því hvað sé að  gerjast hverju sinni og skýri svo frá því hvers sé að vænta. Að öðrum kosti fáum við meira af uppákomum eins og við Hótel Borg þar sem grímuklæddir menn með vopn gengu berserksgang og slösuðu lögreglumann.

Mér finnst nauðsynlegt að setja nú þegar í lögreglusamþykkt bann við því að ganga grímuklæddur á almannafæri eða bera vopn.

Það má innrétta nýja tónlistarhúsið eða tóftina að því, sem geymsluhúsnæði fyrir uppþotafólk. Fjöldahandtökur kunna að verða nauðsynlegar á einhverju stigi. Verði lögreglan undir í bardögum er komið byltingarástand. Okkur vantar ekki slíkt og verðum því að búa okkur undir að verjast.