Inná með Pétur Blöndal !

Jón Gunnarsson, þingmaður úr Kópavogi, hefur talað all skýrt  um það, að endurnýja beri í ráðherraflokki ríkisstjórnarinnar. Og að báðir stjórnarflokkarnir eigi þar hlut að máli. Það er fremur óvenjulegt að nýir þingmenn séu að skipta sér svona af málum, sem verið hafa allt að því tabú utan forystunnar. En ég er ánægður, hversu Jón er skorinorður og ófeiminn við að tjá skoðanir sínar.

Úr því að þessu er hreyft, þá spyr ég mig af hverju menn hafi aldrei valið dr. Pétur H. Blöndal sem ráðherra. Þetta er maður með yfirburðaþekkingu á málefnum ríkisins og þegna þess. Góðgjarn maður og djúpvitur að auki. Það hefur verið einstök upplifun að taka þátt í málefnastarfi á landsfundum Sjálfstæðisflokksins og fylgjast með því hvernig Pétur kemur mönnum sífellt á óvart með skarplegum ábendingum og upplýsingum,  sem fólk ekki hugsar alltaf útí.

Pétur hafði þegar skilað drjúgu ævistarfi áður en hann fór í stjórnmálin. Hann er ekki í stjórnmálum  vegna þess að hann skorti lifibrauð og sporslur, heldur af því að hann vill verða þjóðinni að liði.

Ég vona að menn fari að gera sér ljósa hæfni  dr. Péturs til þess að hjálpa til við það endurreisnarstarf sem framundan er. Ég held að þjóðin myndi hafa  gagn af því  að fá Pétur Blöndal til enn áhrifameiri starfa á sviði efnahagsmála þjóðarinnar,  við þær erfiðu aðstæður sem nú ríkja. 

Ég segi óhikað fyrir mig : Inná með Pétur !   

 

Af hverju handjárn á RÚV ?

RÚV er besti fjölmiðill landsmanna. Fólk vill hlusta á þær rásir. Það vill líka auglýsa þar sem hlustunin er mest. Maður hélt að þarna giltu einföld viðskiptalögmál.

Nei, þá þarf Alþingi endilega að þjónusta einokunarfurstana í afgangi fjölmiðlunarinnar, og reyna að binda hendur fólksins til að auglýsa í RÚV og skrifa arfavitlausar reglur til að stjórna þessu eftir.

Hvað hafa þessir aðilar annað gert í gegnum tíðina en að reyna að sameina, samrenna og einoka í fjölmiðlun landsins ?  Með dyggri hjálp farþegans fína með gylltu krullurnar.

Er þetta ekki bara áframhald á yfirþyrmandi einokun þessara manna í öllu þjóðlífinu. Nú síðast eru nýju bankarnir að hjálpa þeim til að herða enn tökin. Færa þeim fyrri gjaldþrot á silfurfötum svo þeir geti tekið einn snúning enn á okkar auma hálsi.

Vantar okkur meiri eymd ?

Ekki skildi ég mikið í Persson hinum sænska,  sem krafðist þess í fyrirlestri í dag, að íslenzk stjórnvöld gerðu sitt ítrasta til að dýpka kreppuna með samdrætti og niðurskurði á öllum sviðum. Þetta á að vera til að spara útgjöld hins opinbera. 

Mér finnst alveg öfugt um þetta. Mér finnst að stjórnvöld verði að reyna að örva atvinnulífið með peningaprentun í einhverjum mæli, ríkistryggðum skuldabréfum til sveitarfélaga sem lífeyrissjóðir gætu keypt . Auknum handfærakvóta um allt land.   Hönnun framtíðarmannvirkja,  mannfrekt viðhald  opinberra mannvirkja,  bygging fangelsa og rekstur þeirra, eru allt dæmi um nauðsynlegar framkvæmdir, sérstaklega í kreppunni núna. Það hlýtur að vera betri kostur að prenta seðla í þetta heldur en prenta fyrir atvinnuleysisbótasjóð sem verður bara étinn upp til agna án þess að skilja nokkuð eftir. 

Ég gef lítið fyrir þennan Persson og allt hagfræðingaklappið fyrir honum.  Okkar vantar ekki  meiri eymd. Okkur vantar viðspyrnu.

Grímuklæddir mótmælendur ?

Stjórnarskrá Íslands segir svo:

"73. grein

Allir eru frjálsir skoðana sinna og sannfæringar.

Hver maður á rétt á að láta í ljós hugsanir sínar, en ábyrgjast verður hann þær fyrir dómi. Ritskoðun og aðrar sambærilegar tálmanir á tjáningarfrelsi má aldrei í lög leiða.

Tjáningarfrelsi má aðeins setja skorður með lögum í þágu allsherjarreglu eða öryggis ríkisins, til verndar heilsu eða siðgæði manna eða vegna réttinda eða mannorðs annarra, enda teljist þær nauðsynlegar og samrýmist lýðræðishefðum. "

Hvernig getur það samrýmst stjórnarskrá að menn séu grímuklæddir eins og hryðjuverkamenn við mótmæli ?

Mig minnir það að í gamalli lögreglusamþykkt hafi staðið að bannað væri að ganga grímuklæddur á almannafæri. Það stendur ekki lengur í t.d. lögreglusamþykkt Reykjavíkur. Aðeins í sumum lögreglusamþykktum stendur að menn skuli gera grein fyrir sér við lögreglu.

Er eitthvað um þetta í öðrum lögum  sem takmarka rétt grímuklæddra óeirðamanna ?