Leið Íslands í ESB

er boðuð í Fréttblaðinu í dag.

Þar skrifar ein Samfylkingarfrúin um söguna af Möltu. Hvernig þeim var komið alsælum í sambandið með 52 % atkvæða.

Grípum niður í þessari aðferðafræði:

" Nú þegar ljóst er að gert hefur verið formlegt hlé á aðildarviðræðum Íslands og Evrópusambandsins velta margir því fyrir sér hvaða þýðingu það hafi - hvort raunhæft sé að hefja viðræðurnar að nýju ef aðstæður breytast.

Sagan sýnir að það er vel mögulegt að gera hlé á aðildarviðræðum og snúa aftur sterkari til leiks. Fátt ætti að vera því til fyrirstöðu að Ísland geti tekið upp þráðinn í aðildarviðræðum við ESB seinna og í öðru tómi sem hentar bæði Íslendingum og Evrópu betur. Aðildarferli Möltu er gott dæmi um slíkt og vert að skoða þá sögu nánar.

Malta er eins og Ísland eyja á jaðri álfunnar. Þar skipti almenningur sér í tvær nokkuð jafnar fylkingar með og á móti inngöngu í ESB. Saga og menning Möltu hefur verið samofin Evrópu frá örófi alda en þrátt fyrir það var þjóðin ekki tilbúin að taka skrefið til fulls fyrr en árið 2003 þegar innganga var samþykkt með þjóðaratkvæði. Það var síðan í maí 2004 sem Malta gekk formlega inn í sambandið ásamt níu öðrum ríkjum.

Aðildarferli landsins var þyrnum stráð og varði í 14 ár með fjögurra ára hléi. Malta sótti fyrst um aðild að ESB árið 1990 undir stjórn Þjóðernisflokksins og var í aðildarviðræðum við sambandið í sex ár, eða þar til Verkamannaflokkurinn kom til valda árið 1996. Þá var gert formlegt hlé á aðildarviðræðunum því formaður Verkamannaflokksins taldi betra að gera fríverslunarsamning við ESB en að ganga alla leið með aðild. Þetta hlé varði í tvö ár, eða þangað til Þjóðernisflokkurinn komst aftur til valda og fyrsta verk nýrrar ríkisstjórnar var að taka ákvörðun um að endurvekja aðildarviðræðurnar. Árið 2000 hófust formlegar aðildarviðræður aftur milli Möltu og ESB. Aðildarsamningurinn var tilbúinn árið 2003 og var sama ár haldin þjóðaratkvæðagreiðsla eins og kjósendum hafði verið lofað.

Rétt ríflega helmingur maltneskra kjósenda, eða 53%, samþykkti aðildarsamninginn og 47% voru á móti. Stuttu seinna voru haldnar þingkosningar þar sem Þjóðernisflokkurinn, sem barist hafði fyrir inngöngu í ESB frá árinu 1979, hafði betur með naumindum, eða 52% atkvæða. Þegar ljóst var að Maltverjar myndu ganga í ESB féll Verkamannaflokkurinn frá skýrri andstöðu sinni gegn aðild að sambandinu. Þar sem flokkurinn hafði ævinlega lagt áherslu á að skorið yrði úr um aðild að ESB með almennum kosningum átti hann auðveldara með að réttlæta þessa breytingu á afstöðu sinni.

Möltu hefur vegnað vel innan ESB og eru landsmenn almennt sáttir við að eiga aðild að sambandinu. Engar formlegar heimildir eru til um það hvort ráðamenn eða ríkisstjórn Möltu hafi verið aðhlátursefni vegna aðildarferlisins þó að á ýmsu hafi gengið í þeirra ranni. Þvert á móti voru þeir taldir mæta sterkari að samningaborðinu eftir fjögurra ára hlé.

Við getum hæglega nýtt okkur reynslu og sögu Maltverja, sest aftur að samningaborðinu ef svo ber undir og nýtt þannig það mikla og góða starf sem hefur verið unnið við aðildarviðræðurnar. Það er óþarfi að láta hræðslu við viðhorf annarra þjóða koma í veg fyrir að íslenska þjóðin geti kosið um hvort hún vilji áframhald viðræðna eins og henni hefur verið lofað."

Það er ekki um að villast. Kratarnir munu ekki víla fyrir sér að svíkja landið í ESB með snöggu átaki fái þeir bara færi á því. 52 % duga þeim alveg siðferðilega til að ganga konungi á hönd eða gefa Grímsey og selja Nupó Grímsstaði.

Þannig er leið kratanna inn í ESB.

 

Hið rétta andlit

Evrópusambandins kemur nú í ljós gagnvart Færeyingum.

Vesældarleg mótmæli konungsríkisins Danmarkar voru að engu höfð. Afsannar í vetvangi hversu vel er hlustað á smáríkin í sambandinu.

Blöskrar engum að hér skuli vaða upp fólk sem prédikar sí og æ nauðsyn þess að ganga í þetta samband. Nú enn á ný Einar Benediktsson með útilokunaráróður sinn í Morgunblaðinu í dag.Helst á honum að skilja að okkur skorti hervarnir frá ESB.

Ætla menn að trúa því að við séum allstaðar útilokaðir vegna formsatriða? Eða verðum við metnir eftir því sem við erum og höfum að selja það sem aðra vantar? Leggja menn skipulega á tolla til að til að skapa skort í löndum sínum?

Einar ambassador tekur undir þær skoðanir að gjalda beri varhug við réttindum útlendinga til að kapa hér jarðir og fasteignir sem nú er búið að opna á aftur.Enda glöggur maður og víðfróður um heimsmál.

Nú hefur ESB tekið ofan brosgrímu Stefáns Fúla og sýnt sitt rétta andlit. 

 

Orrustan tapaðist

í kvöld og þar með stríðið líka. Geislafræðingar svínbeygðu viðsemjemdur sína. Ráðamenn lyppuðust niður fyrir ofbeldinu. Þorðu ekki að horfa í augun á áskorandanum af landlægum lúffuhætti sem hefur einkennt allar kjaraviðræður frá þjóðarsátt. "Stingið ykkur til sunds þó þið sjáið ekki til lands" voru heilræin eitt sinn.

 Nú er brautin greið til glötunar krónunnar og óðaverðbólgu. Ríkisstjórnin virtist hafa um annað að hugsa. Kannski er henni bara sama.

Skynsemin er útlæg og tilraun Íslendinga til að ná tökum á sínum málum eftir vinstristjórnarárin virðist ætla að fara út um þúfur. 

Hér er ekki mjög björt framtíð nema hugsanlega hjá Guðmundi Steingrímssyni og hans fólki með það skráða vörumerki. Æ fleiri Íslendingar munu hugsa að það sé fullreynt að halda fram fullveldishusgsuninni. Það sé best að fela arftökum Hákonar Gamla forsjá mála búandkarla og leita samræmdra lausna í kauptöxtum sem og atvinnuleysi við þær þjóðir sem við viljum helst bera okkur saman við. Hnípin þjóð í vanda.

Að 50 % ungs fólks fær aldrei á ævinni vinnu í Evrópuríkjum mun ekki breyta neinu. Geislafræðingar sem aðrir hámenntaðir. Nú koma kennarar og aðrir opinberir starfsmenn. Allir nema  þeir sem ekkert hafa að bjóða nema eymd sína og enginn þarf.

Hvað gerði Napóleon til að vinna  orrustur?