Sunnudagsbíltúr

varð óvæntur hjá okkur hjónunum þegar mér datt allt í einu í hug að skreppa á Selfoss þar sem vinur okkar hann Bjössi Baldurs rekur veitingahúsið SURF & TURF við Austurveginn.

Björn er fyrrum flugstjóri hjá Icelandair og víðar. Hann var þó alltaf með köllun í veitingamennskuna og þar kom að hann sagðist hafa verið orðinn svo leiður á að liggja í hótelherbergjum úti í heimi og teikna hornalínur á loftið í huganum til að reyna að sofna, að hann bara sagði stopp. Hann fór til Eqkvador og var þar í 4 ár og átti þar fjóra veitingastaði. En svo togaði ættjörðin og móðir hans í hann og hann kom heim og opnaði þennan stað á Selfossi og er búinn að reka hann í þó nokkur ár við vaxandi vinsældir.

Við sem sagt dembdum okkur í bílinn og keyrðum austur í bandvitlausum  haglhríðarveðrum með sól og bláum himni á milli. Og það stóð heima, Bjössi var viðstaddur og við fengum dýrðlega fiskrétti sem við vorum sammála um að við fengjum hvergi betri né á betra verði. Við höfðum ekki hitt Bjössa nokkuð lengi og það teygðist úr samræðum eins og gefur að skilja. 

Svo tygjuðum við okkur heim í gegnum öll hríðarveðrin á Hellisheiði. Þetta er aldeilis búin að vera makalaus skítatíð í maí, það hefur snjóað eitthvað á hverjum einasta degi það af er.Oj-bara.

En sunnudagsbíltúr austur á Selfoss í mat á SURF&TURF er ekki sú afleitasta hugmynd sem fólk getur fengið, -það er að segja ef fært verður að jafnaði yfir Hellisheiði síðar í sumar.

Guðmundur Jaki

heitinn var í stórfróðlegum þætti á Hringbraut í fyrradag.

Kynni okkar Guðmundar spönnuðu langt tímabil og voru með ýmsum hætti framan af. Eitt sinn hringdi ég í hann þegar ég var ungur og óreyndur kapítalisti. Þar kom að samræðurnar snérust upp í það að Guðmundur tók mig svoleiðis í nefið og hellti sér yfir mig. Vissi óvænt flestar mínar tiltektir í daglega lífinu, tilraunir mínar til að komast inn  í steypu fyrir  Framkvæmdanefnd Byggingaráætlunar bakdyramegin, sem átti að vera leyndó. Ég fékk þvílíka yfirhalningu frá þessum reynda bardagamanni úr miklum orrustum að það hálfa hefði verið nóg. Hann endaði samtalið  með því að hann sagðist ekki nenna að tala við svona menn eins og mig í vinnutímanum og skellti á.

Ég lá eiginlega steinrotaðar og skjálfandi á eftir. Hafði aldrei lent í þvílíkri orðasennu áður Ég var bálreiður út í Guðmund lengi á eftir.

Svo hittumst við aftur og þá var hann ekkert nema elskulegheitin við mig sem ég auðvitað endurgalt. Eftir þetta vorum við vinir ævilangt og hann eyddi fúslega tíma í að tala við mig og mér þótti ákaflega gaman að fá að ausa úr viskubrunni hans. Þvílíka yfirsýn og reynslu sem þessi maður hafði og skilning og samúð með öllum sem höllum fæti stóðu. Óvænt lét hann Dagsbrún lána Steypustöðinni peninga af því að við byggðum starfsmannaaðstöðu af myndarskap  sem bankanum þótti of fín á þeim tíma. En þessi bygging var mikil endurbót frá hreysunum sem við höfðum fyrir þótt nú sé önnur öld komin og menn farnir að meta umhverfi hins vinnandi manns á annan og betri hátt en áður. Hann var fljótur að meta það sem vel var gert fyrir verkamennina hans.  

Guðmundur rifjaði í þættinum upp það aðstöðuleysi sem verkamönnum var boðið upp á í gamla daga. Drekka kalt kaffi úr mjólkurflöskum. Látnir borða hálffreðið nesti sitt úti á berangri. Hann lofsamaði Svein B. Valfells og Vinnufatagerðina  iðulega í mín eyru fyrir að hafa fært verkamönnum þessa lands gæruúlpuna og vinnuvettlingama sem gerbreytti líðan þeirra úti.En þá voru margir í gömlum sparifötum með trefla, jafnvel vettlingalausir við vinnu hvernig sem viðraði. Öllu þessi breytti Sveinn heitinn sem þekkti vosbúðina sjálfur frá uppvexti sínum á Mýrunum. Þá stóð hann í bæjarlæknum á morgnana til þess að bólgan minnkaði í fótunum svo hann kæmist í skóna sína til að sitja yfir ánum.

Guðmundur rifjaði upp hvernig Verkamannabústaðirnir risu við Hringbraut. Hvernig fólk kom úr sveitunum og stóð í biðröð eftir að fá að komast í bað.Hvernig menn fluttu inn sérstaka potta til þess að hægt væri að nota rafmagnseldavélar í þessum húsum. Hann sagði átakanlega frá örbirgðinni og allsleysinu meðal verkamanna, engar tryggingar, ekkert öryggi.

Þarfur samanburður við blaðurskjóðupólitíkinni sem nú ríkir þegar með  allri nútímatækninni sem hér ríkir er ekki hægt að leysa húsnæðisvanda verkafólks eins og var gert með Framkvæmdanefndinni sem byggði 1000 íbúðir á viðráðanlegum kjörum á 3 % vöxtum til 35 ára sem dekkaði aðeins helming skortsins þá fyrir hálfri öld síðan. 

En þá fyrst hurfu braggarnir, Pólarnir og Höfðaborgin sagði Guðmundur með áherslu og menn fóru að fá skilning á hugtakinu mannsæmandi lífskjör eins og hann lýsti þessu. Merkilegt hefði honum þótt úrræðaleysi samtímans, hálfri öld síðar þegar nokkur þúsund íbúða skortur er óleysanlegur fyrir okkar stjórnmálamenn úr hvaða flokki sem er. Hefur kaliberinn smækkað svona?  hefði ég kannski spurt hann Gvend minn Jaka um núna.

Allt þetta brann á Guðmundi. Þess vegna hafði hann skilning á að mögulegt væri að bæta lífskjörin öðruvísi en með verkföllum og verðbólgu og gerðist liðsmaður þjóðarsáttar með Einari Oddi, vini sínum Gunnari Birgissyni, Ásmundi Stefánssyni og fleiri góðum mönnum sem svínbeygðu marga pólitíkusana að skynsemi með undirritun kjarasamninga 2.febrúar 1990. Þetta var merkasta efnahagslega afrek aldarinnar sem markaði betri tíma sem ekki hafa enn sungið sitt síðasta þótt ræður barnanna á 1. maí síðasta bendi í aðrar áttir.

Guðmundi förlaðist heilsa allt of snemma, áratuga barátta hafði sjálfsagt tekið sinn toll. Við hittumst síðast á planinu fyrir framan Hamraborg 1 og þar áttum við langt og gott samtal í gegn um bílgluggann hans. Hann skeytti engu um óþolinmæði bílstjórans, hann var að tala við mig. Þessu samtali gleymi ég aldrei enda var hann allur skömmu síðar.

Þegar ég hugsa um þetta núna geri ég mér grein fyrir að mér beinlínis þótti vænt um þennan mann mér alveg óskyldan. Hann var svo góður maður og víðsýnn, var fullur af væntumþykju fyrir öllum sem höllum fæti stóðu. Hann beinlínis þroskaði mann með viðtölum og frásögnum.  Maður sem hafði svo mörgu að miðla á sinn sérstaka hátt.Einn mesti neftóbaksmaður allra tíma held ég og er þá séra Jens á Setbergi varla undanskilinn.   

Líkar hans Guðmundar Jaka eru ekki á hverju strái lengur að manni finnst núna þegar ellin sækir á.

Sjömilljarða mýrarljós

finnst mér skýrsla vísindanefndar um loftslagsbreytingar vera.

http://www.vedur.is/loftslag/loftslagsbreytingar/loftslagsskyrsla-2018/

Hún gengur út að sanna með miklum tilvísunum í vísindakenningar og orðskrúði, að styrkur CO2 fari í 560 ppm árið 2050 og að slíkt valdi súrnun almennri sjávar um 0.2. En sjórinn er basískur að ph-meðalgildi 8.2 þegar 7 er tært vatn en 1 er sterkust sýra. Þarna er verið að tala um breytingar í yfirborðssjó um 0.2 í ph-gildi sem hugsanlegt árið 2050.

Allt þetta skeður auðvitað aðeins í efstu lögum sjávarins á grynningum þar sem kóralar geta vaxið. Fyrir neðan eru hin rámu regindjúp sjávar. Hversu örlítið brot þessar kenningar eru að fást við af heildarrúmmáli sjávar er hvergi er á minnst að ölduhreyfingar eru í sjó og uppblöndun.

Allt væri þetta til muna vísindalegra ef tekið væri tillit til jarðsögunnar.

dr.Tim Ball heitir vísindamaður í Winnipeg 

Stutt og skýr grein frá honum um þetta mál:

 

http://drtimball.com/2011/analysis-of-alarmism-ocean-acidification/

 

Hún sýnir glögglega hversu viðfangsefni AlGore hirðarinnar er þröngt og gersamlega án tillits til jarðsögunnar. Enda er bakgrunnur þessa fólks ekki vísindalegur heldur pópúliskur.

 

Á síðustu 600 milljón árum hefur styrkur CO2 verið margfaldur á við það sem nú er. Enda væri jörðin ekki græn án þess þar sem CO2 er byggingarefni lífsins. Það þarf að fara 300 milljón ár aftur í tímann til að finna stakt tímabil sem hefur sama CO2 magn og nú er.

 

 Og þessi styrkur CO2 var ekki bara bara lítillega meiri en nú er heldur svona þúsundfaldur frá núverandi gildum. Menn geta spurt hvað olli og hver losaði þetta? Enda grænkaði jörðin og lífið fór á stjá.

 

Engin gagnrýni, engin andmæli bara samin skýrsla á ríkisins kostnað á grundvelli trúarsannfæringar fremur en vísindalegra raka.

 

40 manns mæta uppi á Veðurstofu í framhaldi að fundi hinna 40.000 fífla sem stóðu að Parísarsamkomulaginu.

Þá var það Donald Trump, einn leiðtoga ríkja heims sem hafði siðferðisþrek til að standa á móti því sem ekki nægilega sönnuðu máli sem Bandaríkin gætu ekki tekið þátt í.

 

Allir hinir samþykktu það án þess að sjá um hvað þetta snýst og sáu allir hversu keisarinn var klæddur hinum dýrðlegasta glitvefnaði vefaranna.

 

 

Þær raddir hafa heyrst að meiri losun CO2 þurfi að eiga sér stað á jörðinni til að lífið geti þróast  áfram en deyi ekki út sem stefni í an losunar. Binding kolefnis í steindum á Hellisheiði og Dover vinnur í öfuga átt en ræktun í rétta átt.

 

Og þar erum við Íslendingar staddir í dag, sem ráðum aðeins yfir brotabroti af útblæstri heimsins af CO2. Eigum öll þessi eldfjöll sem hósta út heimslosuninni fyrirvaralítið þegar svo stendur á.Við ætlum að bera synd heimsins fyrir lönd eins og Kína og Indland sem kæra sig kollótt.

 

Nú eigum skattgreiðendur að borga 7 milljarða fyrir þetta ósannaða mýrarljós IPCC á næstu 4 árum vegna þessarar hrifningar okkar ráðamanna á klæðnaði keisarans. 

 

 

Hafbeit aftur á vatnasvæði Árnesinga?

er líklegri en ekki eftir að Árni Baldursson var kosinn í stjórn Veiðifélags Árnesinga á síðasta aðalfundi 26.04.2018.

En Árni Baldursson og fyrirtæki hans stóðu fyrir risvöxnum laxaseiðasleppingum  í Tungufljóti árin fyrir 2010 eftir að stofnuð hafði verið sérstök Tungufljótsdeild um verkefnið í mikilli andstöðu við marga landeigendur við fljótið. Sérstaklega Bergstaða þar sem bestu og eiginlega einu aðgengilegu veiðistaðina er að finna fyrir neðan Faxa, en lax gengur tregt upp laxastigann í honum af einhverjum orsökum og veiðistnær allur neðan fossins.

Laxveiði varð gríðarleg í Tungufljóti árin eftir sleppingarnar. Veiddust þúsundir laxa ár hvert og veiðileyfi seldust grimmt eins og í Rangánum þar sem Árni er aðili að samskonar hafbeitarrekstri. 

Landeigendur á Bergstöðum voru mjög ósáttir við þessar ráðstafanir Tungufljótsdeildar og meðfylgjandi átroðning og voru skærur milli aðila. Kom þar að eftir málaferli að Árni Baldursson fékk viðurkennt í Hæstarétti að hann ætti ótilgreindar  skaðabótakröfur á hendur Bergstaðafólkinu in solidum vegna truflana sem þeir hefðu valið á veiðileyfasölu hans. Blasir nú jafnvel við að að landeigendur Bergstaða geti misst jörðina til Árna ef Hæstiréttur heldur áfram á markaðri braut. 

Seiðasleppingum var hætt að boði Veiðifélags Árnesinga árið 2010. Síðan þá hefur lítið sem ekkert gengið af laxi í Tungufljót, sem er talið af mörgum vera of kalt fyrir náttúrlegar uppeldisaðstæður fyrir lax. Bleikjustofn hafði verið um aldir í fljótinu en hann hvarf með laxinum þannig að fljótið er  nú næsta dautt eftir þessar rimmur eftir því sem kafarar hafa skimað. 

Í fregnum af aðalfundinum, þar sem samþykkt var veiðibann í net á vatnasvæðinu, segir svo:

" Árni Baldursson var kosinn nýr inn í stjórn veiðifélags Árnesinga.  

Þetta er ein stærsta verndaraðgerð sem gerð hefur verið frá upphafi fyrir laxastofninn á vatnasvæðinu og má ekki seinna vera. Sem dæmi má nefna að laxastofninn í Soginu er kominn að fótum fram en eingöngu veiddust 118 laxar á öllum svæðum árinnar síðasta sumar.  

Leigutakar í Soginu hafa fyrir sitt leiti gert allt sem þeir geta til að bjarga stofninum í ánni með því að takmarka agn og setja sleppiskyldu á allan lax. Ljóst er þó að meira þarf að koma til og mun upptaka neta án vafa hafa jákvæð áhrif á stofninn.

Í heildina eru þetta  gríðarlega góð tíðindi fyrir stangaveiðimenn, landeigendur og leigutaka og ljóst að þetta mun glæða stangaveiði til muna á vatnasvæðinu.

Í framtíðinni mun laxgengd aukast og ljóst er að nýjar laxveiðiperlur leynast víða þar sem áður var veitt að mestu í net."

Ekki er ólíklegt að ný stjórn V.A. muni heimila seiðasleppingar í Tungufljót að nýju af endurnýjuðum þrótti. Ekki spillir ef Árna Baldurssyni og Drífu Hjartardóttur formanns Tungufljótsdeildar hefur tekist að friða Bergstaði frá andstöðu í því sambandi. Í stað verndaraðgerða kemur líklega stórrekstur í formi hafbeitar. 

Hafbeit í Tungufljóti verður því að öllum líkindum tekin upp af endurnýjuðum krafti og mun hafa áhrif um allt vatnasvæði Veiðifélags Árnesinga.

 

 

 

Dr.Patric Moore

var stofnandi Greenpeace samtakanna.

Hann fór úr samtökunum þegar hann sá þau vera yfirtekin af óvísindalegu fólki sem breyttu þeim í pólitísk baráttusamtök fyrir tilfallandi verkefni.

Hann hefur rannsakað áhrif CO2 og hlýnun jarðar og samspil þess við vatnsgufu.

Í fyrirlestri sem hann hélt á vegum Breitbart hrekur hann lið fyrir lið þær kenningar að CO2 útblástur manna sé orsökin fyrir hlýnun jarðar.

Og það sem meira er hann heldur því fram að útblástur manna á CO2 hafi beinlínis bjargað lífinu á jörðinni frá því að verða aldauða í fyllingu tímans.

CO2 sé byggingarefni lífsins og ef það er dregið úr lofthjúpnum eins og gerst hefur með lífverum sem breyta því í steindir á milljónum ára eins og kalkþörungar og skeldýr auk þess að binda það í höfunum og kolalögum jarðar, þá verði vá fyrir dyrum.

Menn geta lesið þennan fyrirlestur hér:

http://www.breitbart.com/london/2015/10/15/greenpeace-founder-lets-celebrate-co2/

Þegar maður hugleiðir að gervivísindamenn og helvítisprédikarar eins og AlGore hafa tryllt heimsbyggðina í þá trú að CO2 útblástur manna sér að steypa jörðinni í glötun, á renna á mann tvær grímur. Fyrir þessa trú eru teknar ómældar fjárhæðir frá hungruðum munnum um víða veröld í að elta þessi mýrarljós ósannaðra tilgáta um hlýnun jarðar af mannavöldum.

Mér finnst dr.Moore koma með þung rök á móti þessum ósönnuðu fullyrðingum. Sérstaklega finnst mér Íslendingar ættu að flýta sér hægt í að leggja píslir á almenning sinn í ljósi þess hversu örlítið við leggjum til heildarútblásturs mannkyns. Og hversu mikið eldfjöllin okkar losa af svokölluðum gróðurhúsalofttegundum þegar þau hrista sig að skurðgröftur í mýrum landsins og áhyggjur Forseta vors eru hlægilegar í því samhengi.

Menn sem vilja rengja dr. Patric Moore verða að geta sýnt fram á vísindalegan bakgrunn sinn  og þekkingu sína í vísindum og þá dugar ekki einhliða einkunnagjöf til sjálfs síns að hætti Smára McCarthy. 

Hildur Björnsdóttir

2. maður á lista Sjálfstæðisflokksins í Reykjavík var á fundi SES í Valhöll í hádeginu í dag.

Ég er ekki viss um hversu margir fundarmanna höfðu heyrt hana né séð fyrr en þarna. En það má segja að Hildur kom þeim sömu skemmtilega á óvart. Það er ekki á hverjum degi að maður kynnist nýjum frambjóðanda sem er fullskapaður pólitikus. Eiginlega eins og Pallas Aþena sem stökk fullsköpuð úr höfði Seifs.

Hildur lögfræðingur og stjórnmálafræðingur flutti mál sitt af festu og öryggi þjálfaðs stjórnmálamanns.Hún greindist með krabbamein á síðasta ári um leið og hún eignaðist barn og á erfiða meðferð að baki.Hljóp maraþon í ár. Hefur búið lengi erlendis og er auk þess glæsileg á velli.

Hún segir um sjálfa sig á Facebook:

" Mér hefur alltaf þótt Dagur B. Eggertsson geðugur maður. Nú kveður við annan tón. Borgarstjórinn fer stórum orðum um framboð Sjálfstæðisflokksins í Reykjavík. Segir okkur tilheyra einhverjum “Morgunblaðsarmi” en hafa á sama tíma tögl og haldir á ritstjórn Fréttablaðsins. Er það ekki svolítil mótsögn – og svolítið alvarlegur atvinnurógur gegn fjölmiðlafólki?

Ekki eingöngu dregur Dagur mig í dilka, hann gerir mér líka upp skoðanir. Segir mig, og aðra frambjóðendur listans, standa fyrir fortíðarþrá. Bætist í hóp frekra karla með kenningar um mínar skoðanir og mitt erindi. Sleppa því að hlusta þegar kona talar – því kona hlýtur almennt að vera handbendi einhverra karla. Viljalaust verkfæri. Skoðanalaus strengjabrúða.

Samfylking býður fram meira af hinu sama - endurunnið fólk með endurunnin loforð. Karlar í forgrunni umræðunnar. Fyrirgefðu Dagur, en hvar geymir þú konurnar á þínum lista?

Að gefnu tilefni. Ég rek mín eigin erindi – og erindi borgarbúa.

Ég er ung kona með framtíðarsýn og ég ætla að gera gagn."

Hún segir einnig í Fréttablaðinu:

" Þær bjuggu í sveit eða fámennum plássum við sjávarsíðuna – íslenskar stórfjölskyldur – þrjár kynslóðir sem saman háðu lífsbaráttuna. Umönnun þeirra minnstu eða bjargarlausu fór fram innan heimilis. Hver reiddi sig á annan og annar reiddi sig á hinn. En lífsmynstur breyttust. Konur vinna nú utan heimilis, börn sækja dagvistun og stofnanir annast aldraða. Samskipti kynslóða breyttust.

Lífaldur fer hækkandi og heilsufar batnandi. Eldra fólk er nú betur á sig komið en áður. Hluti aldraðra þarfnast þjónustu og stuðnings – en þeim heilsuhraustu fjölgar. Það er mikilvægt að styðja við samfélagsþátttöku eldra fólks. Eftir því sem fólk er virkara, upplifir það meiri lífsfyllingu og vellíðan – sem aftur stuðlar að langlífi.

Um þriðjungur fagmenntaðra leikskólakennara hverfur á eftirlaun innan tíu ára. Með breyttu lífeyriskerfi mætti halda faglærðum lengur við kennslu. Afnám lífeyrisskerðinga er mikilvægt baráttumál. Margir telja málið óþarft – lífeyrisþegar séu áhugalausir um störfin. Félag eldri borgara er á öðru máli. Í nýlegri ályktun lýstu félagsmenn sig reiðubúna til að starfa á leikskólum borgarinnar. Margir hefðu fulla starfsgetu og ærinn vilja til að leggja sitt af mörkum.

Læknirinn William H. Thomas þróaði þekkta hugmyndafræði um samspil kynslóða. Hugmyndir hans sögðu samskipti við börn færa öldruðum aukin lífsgæði. Hefur hugmyndafræðin verið innleidd víða erlendis. Þar hafa risið leikskólar samhliða dvalarheimilum. Hefur fyrirkomulagið stuðlað að auknum samskiptum barna og aldraðra. 

Aukið samspil kynslóða leiðir af sér ánægju allra hlutaðeigandi. Það sýnir fjöldi rannsókna. Börn veita öldruðum lífsgleði og létta lund þeirra sem stríða við einsemd. Þeir eldri veita börnum víðsýni og aukna þekkingu. Sameining kynslóða er öllum til sóma. Ungur nemur, gamall temur. 

Við viljum stuðla að auknum samskiptum barna og eldra fólks. Við viljum virkja félagsauð aldraðra í skólastarfi. Við viljum leiða saman kynslóðir í lestri og söng – viðhalda sagnahefð og íslenskri tungu. Við viljum auka lífsgleði og lífsgæði. Við trúum á samvinnu í lífsbaráttunni – samspil og sáttmála kynslóðanna."

 

Hildur talaði um hvað skildi Sjálfstæðisflokkinn frá öðrum flokkum. Það væri Sjálfstæðisstefnan með trúnni á einstaklings-og atvinnufrelsið sem gerði hann sérstakan. Flokkurinn  vildi að allir fengju jöfn tækifæri áður en talað væri um jöfnuð.Í samræmi við þetta legði flokkurinn áherslu á kjörorðið:  Stétt með Stétt.

Sá sem þetta ritar finnst orðið allt of langt síðan að hann hefur heyrt forystumann í Sjálfstæðisflokknum tala með svo skýrum hætti um grunngildi flokksins.Hann er reyndar þeirrar skoðunar að allt of lengi hafi flokkurinn látið andstæðingana skýra út stefnu Sjálfstæðisflokksins og afflytja með öllum ráðum án þess að flokkurinn snerist til varnar með afgerandi hætti. Það komu líka fram  hjá fundarmönnum þær skoðanir að áróður flokksins hafi lengi verið í skötulíki og þar þyrfti að verða breyting á.

Hildur kom inn á almannatengsl flokksins sem væru alls ekki í nógu góðu lagi. Heimasíður og Facebook síður úreltar. Flokkurinn yrði að taka sig saman í andlitinu og láta að sér kveða og fylgjast með. Fékk Hildur kröftugar undirtektir við þessum málflutningi of fékk Valhallarliðið sannarlega að heyra það að það þyrfti að girða sig í brók í P.R- málum flokksins.

Hún fór svo yfir málaflokkana og stefnuskrá flokksins í kosningunum  af skýrleik og kunnáttu án þess að vera með skrifað snifsi með sér og rak hvergi í vörðurnar.

Þessi unga kona er eitt mesta stjórnmálamannsefni sem ritari hefur lengi séð.

Það er sannarlega gaman að vera í Sjálfstæðisflokknum með Hildi Björnsdóttur.

 

 

 

 

Það er snjallt að búa í Kópavogi

segir Sjálfstæðisflokkurinn þar. 

Rekstrarafgangur var 2.2 milljarðar króna og skuldir bæjarins hafa lækkað í 133% af tekjum úr 175% í byrjun kjörtímabilsins.Engin ný lán voru tekin fyrir framkvæmdum sem eru umtalsverðar.

Þetta gerist aðeins í bæjarfélögum þar sem Sjálfstæðisflokkurinn er í meirihluta.Því hefur svo vel tekist til í Kópavogi að 5 fulltrúar Sjálfstæðisflokksins náðu að mynda meirihluta með 1 fulltrúa Bjartrar Framtíðar í júní 2014. Vissulega er erfitt að starfa saman þegar svo mikill stærðarmunur er á flokkunum. En þar sem viljinn er fyrir hendi þar er leið. Samstarfið tókst vel og sýnir hvernig fólk getur unnið saman af skynsemi að einu marki.

En hvernig er ástandið hinu megin við Fossvogslækinn?

Óli Björn Kárason lýsir árangrinum þar í grein í Morgunblaðinu í dag.

Þar fer hann yfir helstu stærðir í reikningum Borgarinnar undir vinstri meirihluta Dags B. Eggertssonar. Meginatriði eru þessi:

"... Það hefur verið bullandi góðæri í efnahagslífinu. Hagvöxtur með því mesta í sögunni. Landsframleiðsla jókst um 3,8% á síðasta ári og hagvöxtur árið á undan var 7,4%. Ríkissjóður hefur verið rekinn með afgangi undanfarin ár og greitt skuldir hressilega niður.

....Tekjur hafa sannarlega hækkað verulega. Heildartekjur voru 28 milljörðum hærri að raunvirði á síðasta ári en fyrir fjórum árum og liðlega 41 milljarði hærri en fyrir átta árum."

Borgarsjóður hefur hinsvegar safnað skuldum, – þær hafa tvöfaldast að raunvirði á átta árum. Sem hlutfall af tekjum hafa skuldir hækkað úr 56% í 85%.

Launakostnaður hefur hækkað um 58% á föstu verðlagi án þess að  þjónusta við Borgarbúa  hafi batnað. Enda stöðugt verið að finna upp nýjar nefndir og ráð til að greina vandamálin í stað þess að leysa þau.

Sé miðað við síðustu fjögur ár munu skuldir hækka um liðlega 22 milljónir króna á hverjum einasta degi með endurkjöri meirihlutans.

Skuldir borgarsjóðs hafa því meira en tvöfaldast að raunvirði á síðustu átta árum. Í lok síðasta árs námu skuldirnar tæpum 99 milljörðum króna.

A-hluti borgarsjóðs hefur notið þess að tekjur hafa hækkað hressilega á síðustu árum. Á síðasta ári voru tekjur 41,4 milljörðum króna hærri á föstu verðlagi en árið 2010, þegar Samfylkingin og Besti flokkurinn tóku við lyklavöldunum í Ráðhúsinu. Þetta er nær 56% raunhækkun.  Þetta er 51% hækkun að teknu tilliti til fólksfjölgunar.

Á síðasta ári voru tekjurnar tæplega 28 milljörðum hærri en 2014, – árið sem Dagur B. Eggertsson varð formlega borgarstjóri.

Lífsgæði íbúanna sem og annarra sem þurfa að reka erindi í höfuðborginni hafa verið skert með því að hefta samgöngur og þrengja að bílaumferð.

Lóðaskortur í höfuðborginni hefur öðru fremur verið drifkraftur mikillar hækkunar á kaupverði íbúða og hækkunar húsaleigu. Þetta hefur svo breiðst út um allt höfuðborgarsvæðið þar sem allstaðar ríkir skortur á byggingalóðum sem ýtir upp verðlagi á fasteignamarkaði bæði við kaup og sölu.

Þegar á allt er litið er greinilegt að það er snjallara að búa í Kópavogi en í Reykjavík hjá vinstri meirihluta Dags B. Eggertssonar.

 

Hjóliðið !

og verið ekki að væla í okkur! Þið eigið að hjóla en ekki nota bíla, skiljið það ekki?

Þannig hugsar meirihluti Borgarstjórnar Reykjavíkur:

" Skrif­stofa eigna og at­vinnuþró­un­ar hjá Reykja­vík­ur­borg tel­ur nýja íbúa í Furu­gerði munu „geta nýtt reiðhjól sem sam­göngu­máta, til jafns við bif­reið, þar sem breyt­ing­ar á Grens­ás­vegi hafa leitt til betra aðgeng­is fyr­ir reiðhjól“.

Til­efnið er gagn­rýni íbúa í Furu­gerði á fyr­ir­hugaða þétt­ingu byggðar við göt­una. Málið varðar áform um að byggja allt að 37 íbúðir á lóðinni Furu­gerði 23 við Bú­staðaveg en þar var lengi gróðrar­stöðin Græna­hlíð. Fram kem­ur í bréfi borg­ar­inn­ar til íbúa að „strangt til tekið [sé] mögu­leiki á að fara upp í allt að 49 íbúðir á þess­um reit­um án þess að breyta aðal­skipu­lagi Reykja­vík­ur“.

Lára Sverr­is­dótt­ir, lög­fræðing­ur og full­trúi íbúa í Furu­gerði, seg­ir ekki hægt að túlka of­an­greint bréf borg­ar­inn­ar á ann­an veg en að þar sé því hótað að byggja 49 íbúðir í stað þeirra 4-6 íbúða sem aðal­skipu­lag ger­ir ráð fyr­ir."

"Vi alene vide" sögðu dönsku arfakóngarnir í dentid. Hjóliðið segir Dagur "BEggert-ti" eins og Friðrik 6-ti á undan honum

 

Til hvers eru Píratar?

Svo skrifar Valur Arnarson á síðu sinni:

"Tilefni þessara skrifa er pistill eftir Fanneyju Birnu Jónsdóttur, sem birtist í Kjarnanum nýverið undir yfirskriftinni:

„Til hvers eru Píratar?“.

Pistil hennar verður svo að setja í samhengi við framkomu þeirra í þinginu á liðnum misserum.

Fanney Birna, sem eitt sinn var talin mikið efni í Sjálfstæðisflokknum, hefur nú snúist á sveif með þeim öflum sem telja Ísland vera ónýtt land sem þarfnist – af einhverjum ástæðum – algjörlega nýja uppbyggingu, með nýja stjórnarskrá og breytt vinnubrögð í stjórnmálunum.

Fanney Birna segir í pistli sínum:

Það er ótrú­legt miðað við þá tækni sem nútíma­sam­fé­lag býr yfir […] að til þurfi sér­stakan flokk […] til að berja fram með látum upp­lýs­ingar og gögn sem er nauð­syn­legt að liggi frammi í lýð­ræð­is­sam­fé­lagi. Stefna Pírata um gagn­sæi gerir flokk­inn ekki síst að því sem hann er. Og verk þeirra til að fylgja þeirri stefnu eftir ekki síð­ur. Haldi þeir áfram að ná þessum málum sínum fram munu þeir hafa náð fram meiri og betri árangri fyrir íslenskt sam­fé­lag en margir þeirra flokka sem starfa á grund­velli ára­tuga langrar stefnu.

Samkvæmt Fanneyju Birnu umverpist tilgangur Pírata í nauðsyn þess að „berja fram með látum upplýsingar og gögn“ sem eigi erindi til almennings.

Hvernig hefur Pírötum svo gengið að uppfylla meintan tilgang sinn ?

Hverju hafa þeir náð fram ?

Þeir reyndu að „berja fram með látum“ upplýsingar úr dómsmálaráðuneytinu um uppreist æru málið. Síðar kom í ljós að þar voru persónugreinanleg gögn sem dómsmálaráðherra bar samkvæmt lögum að leyna. Hamagangur Pírata í því máli skilaði engu fyrir heildarniðustöðu málsins. Áður en barningur þeirra hófst, hafði átt sér stað vinna í dómsmálaráðuneytinu um breytingar á lögum um uppreist æru. Sú vinna hafði ekkert með Pírata að gera og því var engin tilgangur með aðkomu þeirra að málinu.

Síðan kom  skipan dómara í Landsrétt, þar sem Píratar reyndu að koma núverandi dómsmálaráðherra, Sigríði Á. Andersen, fyrir kattarnef. Alþingi samþykkti tillögur Sigríðar um skipan dómara, ásamt því að fella vantrauststillögu Pírata á ráðherra. Ekkert dómsstig hefur lýst þá dómara, sem Sigríður skipaði, vanhæfa til að gegna embætti sínu. Hér eru Píratar því einnig gjaldþrota.

Nú nýverið reyndu Píratar að klekkja á Braga Guðbrandssyni og Ásmundi Daða Einarssyni. Þar voru viðkvæm málefni fjölskyldu rædd á Alþingi á grundvelli falsfrétta frá óáreiðanlegum fjölmiðli úti í bæ – Píratar leiddu þá herferð. Viðkvæmt efni úr forsjárdeilu fólks á svo sannarlega ekki erindi til almennings og ef Píratar bera ekki gæfu til að greina þarna á milli, þá er vera þeirra á Alþingi ekki einungis ónauðsynleg – heldur beinlínis hættuleg hinum almenna borgara.

Þeir eru ófáir klukkutímarnir, sem nú má sennilega telja í vikum, sem Píratar hafa eytt í þras á þinginu í óundirbúnum fyrirspurnartíma – sem nú hefur hlotið heitið; hálftími hálfvitanna. Vera Pírata á þinginu, og tilgang þeirra verður að skoða m.t.t. alls þessa. Fjármunum skattborgara hlýtur að vera betur varið í eitthvað þarfara en þetta."

Framganga Halldóru Mogensen í Velferðarnefnd er með þvílíkum hætti að greinilegt er að hún veldur ekki embætti formanns í nefndinni.Þar innandyra er ekki hægt að ræða neitt í trúnaði né senda póst á milli manna án þess að það rati beint í málgagn Pírata Stundina.

Dellumakerí og dónaskapur þingmann Pírata á fundum Alþingis er líka með ólíkindum. Skemmst er þess að minnast að einhverjir komu fyrir njósnatölvu, líklega ættataðri frá Wikileaks, fyrir í fundarsal Alþingis. Það mál var svæft niður.

Morgunblaðið er reglulega að birta greinar frá Birni Leví á besta stað í blaðinu. Lesendur spyrja sig til hvers blaðið er að þessu? Er það að sanna einhverja sérstaka víðsýni? Af hverju er ekki nóg að þetta sé birt í Stundinni því ekki er þetta til að gleðja lesendur blaðsins sem skilja fæstir upp né niður í skrifum Björns Levís frekar en þeir sem hlusta á hann á Alþingi.

Ég er fyrir mig kominn að þeirri niðurstöðu að Píratar séu óþingtækur flokkur og óhafandi með í stjórnmmálalegum samskiptum og ber að einangra sem mest. Ég reyni að leiða þá hjá mér og forðast orðaskipti við þá eftir föngum.Ég sé ekki að Píratar og tilgangslaust og rætið fimbulfamb þeirra um allt og ekki neitt séu til eins eða neins gagns fyrir land eða þjóð.