Frestum öllum verkföllum

í 6 mánuði.

Tíminn verði notaður af hörku til að fá botn í kjararingulreiðina sem ríkir.

Allt annað er ábyrgðarleysi sem enginn vill í raun og veru en er komið á sjálfstýringu í anda Freysgoðans til sjálfseyðingar.

Það er þess virði að láta reyna á það hver stjórnar í þjóðfélaginu.

Frestum verkföllunum með lögum.

 

Stærsti flokkur þjóðarinnar

situr oftast hjá í atkvæðagreiðslum á Alþingi.

Jón Þór Ólafsson þingmaður Pírata hefur setið hjá í 66% atkvæðagreiðslna.Hann tekur bara upplýsta afstöðu segir hann. Vel ef hún er þá upplýst.

Verður ekki Alþingi því betra eins og lögreglan þegar það skiptir sér af fæstu? Passar á leiðindamál eins og skattahækkanir, náttúrupassa og svoddann trívíalítet.

Ef maður skiptir sér ekki af málum leysast þau ekki yfirleitt af sjálfu sér? Svo segir Murphy að minnsta kosti. Og er það ekki oft svoleiðis líka?

Er það ekki bara það sem þarf? Leyfa málum að þróast og renna sitt skeið. Vera ekki að æsa sig?

Stærsti flokkur þjóðarinnar veit hvað þarf til.

Einkavæðing fangelsa

á Íslandi er orðin tímabær. Bygging fangelsis á Hólmsheiði sýnir glögglega vanmátt ríkisframkvæmda í fangelsismálum. Kostnaður fer fram úr öllum böndum vegna sérsjónarmiða. Í ríkisfangelsum er erfitt að greina fanga í sundur vegna eðlis afbrota.

Í Bandaríkjunum er verulegur hluti afplánunar fyrir önnur brot en ofbeldisbrot á vegum einkafyrirtækja. Þau láta fanga sína framkvæma hin ýmsu verk fyrir stórfyritæki Bandaríkjanna og greiða þeim yfirleitt lágmarkslaun fyrir. Sem eru ekki svo slæm af ýmsum ástæðum. Um þetta má lesa á Wikipediu og annarsstaðar. 

Bandaríkin eru stærsta fanganýlenda heimssögunnar og hafa stærri hluta þegnanna í fangelsi en nokkur önnur þjóð. Auðvitað fremstir þar sem í öðru. Fylgikvillar eru auðvitað strangir dómar og annað slíkt. Auk sakfellingarþrýstings frá eigendum fangelsa.

En hvað skal gera hjá þjóð sem ekkert getur eins og Íslendingar? Getur ekki borgað umönnunarstéttum kaup, hvað þá getur ekki séð fyrir ellibelgjum og öryrkjum. Getur ekkert á flestum sviðum samfélagsþjónustunnar nema kjaftað og kjaftað niðri á Alþingi.

Má ekki leita leiða til að gera fangelsisrefsingar skilvirkari og ódýrari með einkavæðingu?

Magnaður maður

sem tengist Íslandi í gegn um Fafnir Offshore Steingríms Erlingssonar og fleira stórmennis er hann Pétur Sævík.

 

http://www.sysla.no/2015/04/03/grunderne/har-tatt-storre-sjanser-enn-jeg-liker-a-tenke-pa/

Þarna geta menn lesið um hinn magnða mann Per Sævik í Heröy og Fossnavåg. Leikmannaprédikari, f. 1940, og lærisveinn Hans Nielsen Hauge, leikmannaprédikara, sem á þúsundir áhangenda sem kalla sig "Haugianer-a". Hauge þessi var maður sem ég hafði ekki hugmynd um þar til áðan og lést 1829, aðeins 53 ára, sem stærsti iðnrekandi Noregs með 7000 manns í vinnu eftir að hafa sætt ofsóknum og dvalið mörg ár í fangelsum.

Per Sævik lýsir öllum iðjuhöldum Noregs, síðan meistara hans Hauge leið, sem smáguttum. Sjálfur er hann aðeins með 3000 manns í vinnu hjá Havila Shipping , skipasmíðastöðinni Havyard og ferjuskipafélaginu Fjord 1.

Hann byrjaði með tvær hendur tómar 15 ára á trillu. Stofnaði þrisvar til stórrekstrar á ævinni og missti margt. Tók stærri viðskiptaáhættur en hann kærir sig um að muna. Býr enn í fyrsta húsinu sem hann og kona byggðu fyrir húsnæðismálalán 1970. Hefur setið á Stórþinginu. Bindindis- og bókstafstrúarmður sem reynir að lifa sjálfur eftir eigin prédikunum.Hefur eytt meiri tíma í ketilgalla og klofstígvélum en í jakkafötum. Talinn eiga eina 40 milljarða.  

Skipasmíðastöð hans er að byggja skip númer 2 fyrir Fáfnir Offshore Íslendinga. Hið fyrra er Polarsyssel sem er í þjónustu Sýslumannsins á Svalbarða. Seinna er vistvænt hybrid skip sem gengur mikið til fyrir rafmagni. Bæði eru dynamic positioning skip, eða skip sem halda stöðuhniti í sjó með mörgum tölvustýrðum skrúfum og því líklega þrefalt dýrari en skip af svipaðri stærð. 

Væri nú ekki úr vegi að senda menn til Per Sævik til að tala við hann um nýja Vestmannaeyjaferju. Byggja hana sem vindskip eftir prinsipi Terje Lade þar sem öruggur vindur er alltaf aðra leiðina milli lands og Eyja sem gefur fría ferð. 

Per Sævik er nefnilega magnaður maður.

                            

VINDSKIP

Samkomulagi við Írani fagnað

á Vesturlöndum.

Friðkaup hafa tekist við blóðugu múllana.

Stendur eitthvað um það í þeirra trúarbók að halda skuli samninga við villutrúarmenn?

Styrjöldin sem var við dyrnar núna verður þá ekki fyrr en seinna þegar Merkel og Obama fljúga heim frá sinni München.

Það bíður arftaka þessara tveggja kjörnu leiðtoga að greiða úr stöðunni. Rouhani erkiklerkur glottir út að eyrum svo fullkominn viðsemjandi sem hann er. Hann hefur fengið andrúm og leikið á þetta fólk allt saman.

Allah og Múhameð standa með honum og fólki hans í Iran sem er allt sem hann þarf. Tími reikingskaparins mun renna upp þar sem hinir vantrúuðu munu hljóta makleg málagjöld.

Íslendingar gerðu vel í að hafa hátt viðbúnaðarstig gagnvart einræðisríknu Íran. þaðan getur mörg óværan borist. En stund reikningskaparins fyrir pennafólkið á myndunum mun trúlega renna upp innan sjö ára eða svo. Það er ekki hægt að semja við einræðisöfl. Þau hafa einfaldlega aðrar leikreglur.

Spyrjum samt að leikslokum þegar við fögnum samkomulagi við Íran. 

Ísland úr Nato og herinn burt!

Myndin af Svavari Gestssyni á hvítri ráðherraskyrtunni með bindið í vasanum  dansa um sviðið í Sigtúni klappandi saman lófunum og syngjandi þetta stef hefur greypst í minningu mína.

Hún rifjast upp núna þegar ég var að heyra að að tillaga um úrsögn úr Nato hefði fallið á aðeins 7 atkvæðum á landsfundi Samfylkingarinnar.

Þennan úlf í sauðargæru kratismans sem Samfylkingin er, kýs jafnvel fjórði hver Íslendingur. Þetta er langt yfir því hlutfalli sem íslenskir kommúnistar voru vanir að ná meðal kjósenda.

Hvað er að íslenska kjósandanum? Hvað vill hann í raun og veru?

Vill hann virkilega úr Nato? 

Hvað ertu að kjósa?

þegar þú kýst Samfylkinguna?

Í grein Finns Magnússonar Lögmanns í Morgunblaðinu í dag stendur:

"..Á nýafstöðnum landsfundi Samfylkingarinnar var samþykkt ályktun sem bar yfirskriftina „Náttúran er lífsnauðsyn“.

Umrædd ályktun hefur vakið umtalsverða athygli þar sem hún felur í sér stefnubreytingu hjá Samfylkingunni í umhverfismálum. Í þessari grein verður þessi stefnubreyting gerð að umtalsefni og fjallað um það hvort hún kynni að hafa einhver áhrif í för með sér ef hún yrði síðar ríkjandi stefna íslenskra stjórnvalda varðandi olíuleit.

Í nefndri landsfundarályktun segir m.a.: „Vinnsla jarðefnaeldsneytis á íslensku hafsvæði er í ósamræmi við hagsmuni Íslendinga í loftslagsmálum, skapar hættu á mengunarslysum og umhverfisógn í grennd við fiskimið okkar og verðmæta strandlengju, og mundi skaða ímynd Íslands […].

Samfylkingin telur að mistök hafi verið gerð þegar leit var hleypt af stað á Drekasvæðinu. Nú þarf að vinda ofan af þeirri leit og vinnsluáformum og lýsa því yfir að Íslendingar hyggist ekki nýta hugsanlega jarðefnaorkukosti í lögsögu sinni.“

Ljóst má vera að landsfundarályktunin felur í sér grundvallarstefnubreytingu frá fyrri stefnu Samfylkingarinnar í þessum efnum, en fyrrverandi ráðherrar Samfylkingarinnar leituðust eftir því á sínum tíma að erlendir aðilar hæfu olíuleit á hinu svokallaða Drekasvæði.

Athygli vekur að í ályktuninni kemur fram að „[n]ú þurfi að vinda ofan af þeirri leit og vinnsluáformum“ en ekki er tiltekið hvernig það skuli gert.

Það kann að vera vandkvæðum bundið í framkvæmd þar sem líkur eru á því, að afturköllun fyrri stjórnvaldsákvarðana í andstöðu við réttmætar væntingar þeirra sem leita olíunnar, brjóti gegn íslenskum lögum og valdi þeim er vinna við olíuleit..."

Hverskonar endemis stjórnmálaflokkur er þessi Samfylking? Hvernig geta menn kosið svona skrípaflokk sem segir eitt í dag og framkvæmir og kúvendir svo á morgun sem getur gert alla milliríkjasamninga síðan ómerka og kallað á skaðabætur eins og lögmaðurinn rekur?

Þetta er ekki bjóðandi í stjórnmálum. Jafnvel þó að Jón Gnarr hafi lofað að svíkja öll kosningaloforð sín þá er ástæðulaust fyrir jafnvel Árna Pál að vera formaður í Samfylkingunni. Sigríður Ingibjörg er mun betur að því komin.

Hvað ertu eiginlega að gera á kjörstað og kjósa svona furðuflokk eins og Samfylkinguna?

Lok byssumálsins

eru framundan með fullum sigri sérvitrasta hluta þjóðarainnar.

Í viðtali við Georg Lárusson forstjóra Landhelgisgæslunnar stendur þetta m.a.:

"....Víkur þá talinu næst að byssunum frá norska sjóhernum, sem deilt var um hvort hefðu verið gjöf eða ekki. Niðurstaðan var sú að byssunum yrði skilað og segir Georg það líklegast verða um miðjan maí næstkomandi.

„Ætli við sendum ekki út tilkynningu til fjölmiðla um það og gefum þeim kost á að fylgjast með flutningnum,“ segir hann og brosir. Hvernig sem að málum var staðið þá liggur fyrir að Landhelgisgæslan og lögreglan þurfa að endurnýja sinn vopnabúnað en elstu vopnin eru um 100 ára gömul og flest frá því í síðari heimsstyrjöldinni.

Við erum friðelskandi og herlaus þjóð og ætlum að vera það áfram. En við þurfum að eiga lágmarksbúnað, rétt eins og að á hverjum bóndabæ er að lágmarki til ein kindabyssa. Í þessum efnum höfum við ekki gengið lengra en svo að eiga nokkur vopn sem nágrannar okkar hafa aflagt. Í þessu tilfelli stóð okkur til boða búnaður hjá Norðmönnum sem við hugsuðum til að standa straum af viðhaldi og afföllum á næstu árum.

Í verkefnum okkar erlendis er því ekkert að leyna að við þurfum að hafa vopn og það eru mikil afföll á þeim, þau fara í sjóinn og skemmast við æfingar. Þó að þessi umræddu vopn fari úr landi verðum við ekki í neinni neyðarstöðu en við eigum hins vegar engan afgang og megum ekki við miklum áföllum,“ segir Georg, og bætir við að byssumálið hafi verið merkileg reynsla og Landhelgisgæslan lært mikið af henni.

„Fyrst og fremst kynntumst við því að við Íslendingar höfum ekki neinn þroska til að geta rætt um öryggismál af yfirvegun. Sama gildir um alla umræðu sem tengist varnar- og öryggismálum almennt. Ástæðan er mögulega sú að í okkar huga er það einhverra annarra að sjá um þau mál enda má líka segja að við séum alls ekki fær um að annast varnarmál ein og því erum við í varnarbandalagi með öðrum þjóðum.

Við þurfum eftir sem áður að hugsa um og ræða þessi mál, fylgjast með og huga að okkar eigin vegferð. Við þurfum líkt og heimili landsins að eiga plástur og búnað til fyrstu hjálpar, þó að Landspítalinn sé nálægur.“

"Kellingarnar" í umræðunni á Alþingi og annarsstaðar hafa sem sagt lagt sitt af mörkum til að íslenskir sjómenn eru varnarminni gagnvart glæpagengjum við skyldustörf á Miðjarðarhafi en vera þyrfti. 

Mér finnst sérstök ástæða til að staðnæmast við setningarnar:"Fyrst og fremst kynntumst við því að við Íslendingar höfum ekki neinn þroska til að geta rætt um öryggismál af yfirvegun. Sama gildir um alla umræðu sem tengist varnar- og öryggismálum almennt." Er ekki komið gott af þeim áhrifum sem kjaftavaðli er leyft að hafa áhrif á nauðsynleg störf valdstjórnarinnar hverju sinni? 

Lok byssumálsins eru með þvílíkum endemum.

 

Er þetta hægt?

Starfsmenn undirverktaka á athafnasvæði ALCOA Fjarðaáls samþykktu í gær boðun um vinnustöðvun. Verkfallið verður tvískipt, skv. upplýsingum Afls Starfsgreinafélags. Annars vegar frá hádegi 14. apríl og stendur það til 23.30 sama dag og hins vegar ótímabundið verkfall frá hádegi þann 21. apríl.

Alls voru 375 félagsmenn á kjörskrá, 159 greiddu atkvæði eða 42%. Já sögðu 151, eða 95% greiddra atkvæða, nei sögðu 5, eða 3%, og auðir seðlar voru 2 eða 2%

Í tilkynningu stéttarfélagsins kemur fram að verkfallið taki til fjölda starfa, m.a. við framleiðslu, viðhald, ræstingu, mötuneyti, hafnarvinnu og aðra þjónustu á og við verksmiðjuna svo og störf í vöruskemmu o.fl. Starfsmenn sem fara í verkfall vinna hjá átta undirverktökum ALCOA Fjarðaáls. „Alls hafa í þessari lotu verið haldnir fimm sáttafundir en án árangurs.

Félagið harmar að þurfa að grípa til svo umfangsmikilla aðgerða sem verkfallsboðun er – en þetta er nauðvörn launafólks sem vill fá kjarasamning og réttlátt hlutskipti. Samtök Atvinnulífsins hafa mætt kröfum okkar með fullkomnu tómlæti,“ segir í tilkynningunni."

Þetta er frétt í Morgunblaðinu.

Hafa menn velt því  fyrir sér úr eigin atvinnuþáttöku hvort 60 % vinnufélaganna hafi ekki verið betri starfsmenn heldur 40 %. Jafnframt því að 40 % vinnufélaganna voru yfirleitt neikvæðari en aðrir? Eða kannski 70/30 % eða 80/20 % eða 90/10%.? Muna menn ekki eftir sérlega neikvæðum starfsfélögum sem leið virkilega illa í vinnunni?

Er það óásættanleg krafa í ljósi alvarleika verfallsmála að sú krafa sé gerð að yfirgnæfandi meirihluti allra félagsmanna verði að taka afstöðu?

Er hægt að afgreiða svona mál af svona léttúð?

Vinstri hræsnararnir

á Alþingi mega yfirleitt varla vatni halda þegar þeir vitna um kærleika sinn til aldraðra, öryrkja, einstæðra mæðra og láglaunafólksins. Um samhengið milli orða og gjörða er lítið talað eins og menn komast fljótt að  með því að hlusta á Útvarp Sögu, þar sem Íhaldinu og einhverjum "fjórflokki"  eru sungnar bölbænir af "þjóðinni" seint og snemma.

Einn þáttur í gjörðum mannvina þessa vinstra fólks er að lepja upp allar tilskipanir Evrópusambandsins, gjarnan gera þær meira íþyngjandi en hægt er að komast af með,og velta þeim yfir á almenning. Og syngja svo þjóðsönginn um að "kíkja í pakkann" áður en fullveldið verður fullsvikið og heimta beint lýðræði með þjóðaratkvæði um að halda skuli áfram aðildarviðræðum við það Samband, sem var fyrir sitt leyti og Össurar búið að slíta þeim viðræðum í Brussel.

Svo segir í Staksteinum Morgunblaðsins:

"Sigríður Á. Andersen er fyrsti flutningsmaður frumvarps sem ætlað er að leiðrétta mistök sem gerð voru með lagasetningu fyrir tveimur árum þegar lög um endurnýjanlegt eldsneyti í samgöngum voru samþykkt.

 Í þessum lögum, sem komu til vegna tilskipunar ESB en eru meira íþyngjandi en tilskipunin gerir ráð fyrir, er kveðið á um að lágmarkshlutdeild endurnýjanlegra orkugjafa í eldsneyti í samgöngum verði 5% frá þessu ári.

Í frumvarpi Sigríðar, líkt og í tilskipun ESB, er gert ráð fyrir að þessi 5% mörk taki ekki gildi fyrr en árið 2020, og munar verulega um þennan frest. 

 Í fyrra töpuðust hundruð milljóna króna í erlendum gjaldeyri vegna þarflauss ákvæðis um 3,5% lágmark endurnýjanlegra orkugjafa og að óbreyttum lögum munu tapast nokkrir milljarðar í erlendum gjaldeyri til ársins 2020. 

Við þetta bætist að samkvæmt greinargerð frumvarps Sigríðar var tilskipunin líka innleidd of harkalega hvað varðar þýðingu rafbíla, en með breytingum sem lagðar eru til í frumvarpinu þurfa „aðeins“ 10% bílaflotans að ganga fyrir rafmagni til að uppfylla markmið tilskipunarinnar, en miðað við gildandi lög þyrftu 25% flotans að vera rafbílar. "

Það er ömurlegt til þess að vita að á Alþingi Íslendinga veljist beinlínis fólk sem reynir sífellt að klekkja á áður áminnstum minnihlutahópum með leti sinni og ómennsku í starfi þegar það nennir ekki að kynna sér það sem það er að samþykkja hvað þá að kynna sér afleiðingar afgreiðslunnar. (Og heimtar svo að við föllum fram og sýnum Alþingi virðingu án þess að gera kröfur til þess. Enda er það yfirleitt svo að sé borgað sendisveinakaup fyrir einhver störf þá færðu sendisveina. Hinir fara hugsanlega til Noregs.)

Svo er ástæða hugsanlega til að spyrja um fjárhagslegar tengingar flokka þessa fólks við fyrirtækin sem útvega þetta lífefnaeldsneyti.Þetta er "Big Business" 

Ef hér sæti Alþingi sem setti sér það verkefni að létta óþarfa álögum af fólki í stað þess að þyngja þær, þá myndi margt breytast.

Í stað þess kemur venjulega í hverjum kosningum nýr vinstri hræsnari í stað hins sem hættir.



 

Hvar er eiginlega flokkurinn minn gamli?

em hafði sjálfseignarstefnuna í húsnæðismálum á oddinum í gamla daga. Eign fyrir alla var það sem keppt var að allstaðar seint og snemma.Menn lögðu nótt við dag og fluttu frekar inn á beran steininn heldur en að borga leigu.

Hefur þessi þróun haldið áfram? Hefur sjálft fólkið breyst?

Finnst ekki lengur svoleiðis fólk eins og var í Sjálfstæðisflokknum í gamla daga? Rúllaði sígarettur til að spara og drakk ekkert fínna en Brennsa aða smyglaðan sjénever. Eru landsfundarfulltrúarnir flestir orðnir að vel greiddum bréfaguttum og kvótakóngum? Hafa aðrir bara ráð á að kaupa miða á Landsfundinn? Eða bara nenna ekki meira?

Allt sjálfstætt fólk eins og Bjartur í Sumarhúsum er orðið að leigukrötum eins og menn sáu í Kaupmannahöfn þegar þeir sigldu til náms á síðustu öld. Þar virtust félagslegu úrræðin allsráðandi í húsnæðismálum ungs fólks. Þar kærðu menn nábúana fyrir skattsvik ef þeim fannst þeir lifa grunsamlega flott.

Minnir þetta ekki bara á nútímann hérlendis með alla Alþingismennina sem minna mest á gömlu dönsku kratana.

Hjá Erhardt fyrir sunnan Dybelsmöllen var allt þakið í Bausparkassen sem hjálpuðu fólki til að komast yfir húsnæði. Alveg eins og Sparisjóður Reykjavíkur og Nágrennis á sinni tíð áður en bréfaguttarnir náðu völdunum í honum. Nú er enginn svoleiðis sjóður eftir. Wholstand für Alle  sagði Ludwig. Og líka Masshalten,hafið hóf á ykkur,  ekki skrúfa upp kaupstaxtana eða verðlagið. Þið munið 1929 þegar frímerkið fór í milljón ríkismörk! Viljið þið að bjórinn hækki úr 50 penningum í 60 ? Nei, það látum við ekki gerast!

Nú  er Sjálfstæðisflokkurinn minn í ríkisstjórn með Framsóknarflokknum. Nú sýnist mér aðaláherslan hjá Framsóknarfélagsmálaráðherranum að skaffa fleiri leiguíbúðir, hækka bætur og styrki til leigjenda og heimta sama af sveitarfélögunum. Enginn minnist á eign fyrir alla. Ódýrar lóðir og ódýr hús. Nei, bar nógu flott og nógu dýrt.

Er Sjálfstæðisflokkurinn horfinn frá sínum gömlu hugsjónum? Hugsar hann meira núna um fleiri Seðlabankastjóraembætti, hagsmuni lífeyrissjóðanna sem vilja komast í erlent brask? Bæta við enn einni ríkisstofnun um félagslegar leiguíbúðir? Rétt eins og verið sé að finna upp hjólið aftur? Talar mikið um afnám einhverra gjaldeyrishafta sem ekki trufla nokkurn venjulegan mann. En höftin sýna fram á fáránleika lífeyrissjóðakerfisins sem valsar með ríkisskuldirnar eins og þær leggja sig og eiga ekkert í því fé og tekur því til sín sjöttapart af öllum launum í landinu á meðan ríkissjóður er tómur?

Er Sjálfstæðisflokkurinn orðinn bara fjórðungsflokkur til að vera? Eru allir hugsjónamenn sem voru þar einu sinni útdauðir? Tala þingmennirnir yfirhöfuð nokkuð við flokksmenn? Hugsa bara um sig og sín laun?

Er ekki bara allt þjóðlífið komið í fastar skorður kratískra félagshyggjulausna? Nefndir og ráð og ríkisvæðing. Af hverju láta verkalýðsfélögin ekki BHM og BSRB semja fyrst við ríkið áður en þau fara að reyna á sig? Hvað liggur þeim svona á að fara í verkfall strax?

Allt daglegt tal snýst um hagsmuni bankanna sem eiga víst orðið einhverja 600 milljarða í eigið fé án þess að hafa nokkru sinni orðið gjaldþrota þó að hrunið hafi gengið yfir.

Hver á þá þessa 600 milljarða? Skilanefndirnar? Ríkið? Einhverjir vogunarsjóðir?  Átti Steingrímur J. þá þegar hann gaf þá? Eiga hluthafar ekki neitt í félögum sem hafa ekki orðið gjaldþrota?

Ósköp finnst mér orðið dauft yfir vötnunum þegar ég minnist tíma Ólafs Thors og Bjarna Benediktssonar. Alberts sem byggði Valhöll skuldlausa sem nú er topp veðsett. Fleiri má nefna eins og Ingólf á Hellu, Jónas Haralz og Jóhannes. Þessir menn nenntu að tala við fólkið og hrifu það með sér. Þá voru auðvitað öll efni mun minni en í dag. En samt virtist allt ganga betur.

Hvar er eiginlega gamli flokkurinn minn?

 

Menn fólksins

í Reykjavík eru þeir Dagur Bé og EssBjörn. Framlag þeirra til lausnar á atvinnuvanda unga fólksins er að bjóða fram 1500 sumarstörf á móti 8000 umsóknum.

Hvað annað skyldu þeir hafa hugsað sem úrræði fyrir þetta fólk í borginni? Ætli Dagur Bé sé í S-Kóreu núna til að hugsa? Ef hann færi aðeins lengra þá gæti hann séð hvernig Kimmarnir leystu þetta svo allir eru hamngjusamir. Það er ókeypis hamingjan sem skiptir öllu máli hjá félagshyggjufólkinu. 

Sóley Tómasdóttir er í San Fransico að kynna sér eyðingu bílastæða væntanlega. Því Bandaríkjamenn hafa mun breiðari bílastæði en Evrópubandalagið til að hægt sé að komast út úr bílunum líka þegar maður er kominn í stæðið. Hvert aflagt bílastæði þar losar mun fleiri fermetra en hérlendis. Þessu má breyta hérlendis að bandarískri fyrirmynd. Stækka þau fyrst og leggja þau svo niður.

Ég minnist þess frá árum áður að Kópavogur lagði áherslu á að allir ungir umsækjendur fengju einhverja úrlausn.

Hvað skyldu þau Dagur Bé.,Sóley Tómasdóttir  og EssBjörn gert fyrir unga fólkið í sumar annað en að útvega því sumarstörf? Þetta eru jú menn fólksins fyrir náð Píratans.