Skuggi hins illa..

getur manni dottið í  hug þegar maður horfir á myndina af Steingrím J. í Mogganum  með fjárlagafrumvarpið undir hendinni. Frumvarpið sem óhjákvæmilega mun stórauka á eymd og atvinnuleysið á landinu.

Er ekki komið nóg af forystu þessa manns?  Af hverju þurfum við að þjást lengur með honum? Þarf ekki að leita annarra leiða en bara hækka skatta og draga saman ne bregða færi fyrir alla atvinnustarfsemi?

Er ekki rétt að fara í kosningar til Alþingis áður en skuggi hins illa leggst yfir þjóðina til langframa?

Kosningar eru óhjákvæmilegar

þegar mörg þúsund manns koma saman til mótmæla setningu Alþingis á Austurvelli. Við getum ekki ætlast til þess af fámennu lögregluliði okkar að það standi í bardögum við borgarana til að vernda það hyski sem nú hersetur Alþingi.  Það hefur sýnt sig ófært til að ráða við þann vanda sem það var kjörið til.   Fólkið fyrir utan segir að tíminn sé liðinn sem því var ætlaður til verka.

Þetta fólk á Austurvelli mun heldur ekki skilja að nú sé rétti tíminn  fyrir dúfnaveislur á kostnað almennings eins og Landsbankinn er að halda í kvöld. Einskonar sigurhátíð bankans með kampavínsfrauði fyrir allar húseignirnar sem hann er búinn að láta slá sér úr hópi mótmælendanna sem stóðu á Austurvelli í gær. Þar var fólk úr millistéttinni sem hefur misst alla þá undirstöðu sem millistéttin á Íslandi hefur byggst á og hét "eign fyrir alla". Þetta bruðl gjaldþrota ríkisfyrirtækis er þvílík blaut tuska í andlit þessa  fólks að engu tali tekur.  Vonandi láta einhverjir óboðnir í sér heyra fyrir utan þetta samkvæmi.   

Hvað eigum við að gera ef stórfjölgar í hópi mótmælenda? Þá fjölgar glæpamönnum líka í hópnum, hættulegu grímuklæddu fólki, sem er til alls víst. Viljum við hætta öllu samfélaginu, lögum þess og reglum, lögregluliðinu og lýðræðinu  fyrir það eitt að núverandi þingmenn og ráðherrar á borð við  Steingrím Jóhann  og Jóhönnu Sigurðardóttur,   haldi áfram að þiggja laun og eftirlaun fyrir að eyða tímanum í ekki neitt sem skiptir þetta mótmælafólk máli? Þetta fólk varðar akkúrat ekkert um Landsdóm eða aðrar maðksmognar klækjabrellur kommúnistanna fyrir innan gluggana.   

Eina ráðið til þess að slá á reiði fólksins, sem allir, líka ónytjungarnir í ríkisstjórninni á þinginu, viðurkenna að sé mikil og skiljanleg, er að fólkið í landinu fái að velja sér nýja fulltrúa á þing. Alþingi en ekki einhverja trúðasamkundu eins og þjóðfund eða ráðgefandi stjórnlagaþing.  Hvort þeir nýju fulltrúar verði hótinu betri en þeir núverandi  veit enginn. Né heldur vitum við hverjir verða kosnir. En það verður nýtt fólk að hluta til og ný hlutföll flokka.  Núverandi hlutföll þingsins eru ófær með öllu til að ná saman um neitt sem máli skiptir. Fólkið er ekki tilbúið að bíða lengur eftir að ráherrarnir hugsi málin og komi einhvertímann með tillögur um skjaldborg til varnar heimilunum. 

Kosningar eru óhjákvæmilegar ef ekki á illa að fara. 

Hugrekki Dorritar

blasti við sjónvarpsáhorefendum þegar hún gekk hnarreist í fremstu röð að Dómkirkjunni og horfðist einbeitt á við  mótmælendurna og grímuklæddan skrílinn sem grýtti eggjum og öðru að þingmönnum. Kjarkurinn skein úr andlitinu, hún deplaði ekki auga og flýtti sér hvergi heldur gaf sér góðan tíma til að bjóða sig fram til viðtöku skeytanna meðan þingliðið skaust inn í kirkjuna að baki henni.

Sama gerðist á leiðinni til baka, Dorrit gekk næst Austurvelli föstum skrefum og brá sér hvergi. Fjær mátti sjá hina minni spámenn hlífa sér sem best þeir máttu. Meðal annars má sjá í lítinn sköllóttann kall skjótast Tjarnarmegin í skjóli Forsetafrúarinnar á forsíðumynd Baugstíðinda í dag.  Hugsanlega  áttu mótmælendur heldur  ekkert sérstakt erindi við manninn þar sem hrunið var ekki honum að kenna og maðurinn norrænn velferðarsinni.

Ég var stoltur af Forsetafrúnni minni, henni er greinilega ekki fisjað saman.

Og Apropos mótmælendur. Hversvegna er ekki rifjað upp að í Lögrelusamþykkt einhvern tímann var lagt bann við því að ganga grímuklæddur á almannafæri. Mér finnst ótækt að líða huglausum svartklæddum lambhúshettumönnum að hlaupa um í röðum kjarkaðra mótmælenda. Þessir mögulegu glæpamenn eru til alls vísir í skjóli grímubúningsins og svona Mökkurkálfar koma óorði á heiðarlegt fólk sem er mætt til að mótmæla í krafti eigin sannfæringar.  

Er summa lastanna konstant?

Ég hitti mann sem þekkir til á fasteignamarkaði. Hann sagði að skilanefndir væru að selja unnvörpum fasteignir á afsláttarprísum til vildarvina sinna. Allt niður í 50.000 kall fermetrann fyrir nýjar eða nýuppgerðar íbúðir.
Einn Ameríkani hefði keypt fjörtíu íbúðir um daginn á slikk. Annar keypti fjórar íbúðir að svo góðum lánakjörum að hann hefur tugþúsindir í afgang af útleigunni þegar öll gjöld og afborganir hafa verið greidd. Það gefur auga leið að verðið hefur ekki verið hátt við þessar aðstæður.

Er að rísa hér upp ný stétt eignafólks sem er að fá eignirnar sem bankarnir eru búnir að láta slá sér í neyð fólksins fyrir k.. og kanel og geta leigt húsnæðisleysingjunum með stórhagnaði? Er þetta hið nýja norræna velferðarsamfélag Steingríms J. Sigfússonar?

Hversu lengi eiga þessar skilanefndir að geta rakað til sín launum sem nema tugþúsundum á tímann og geta svo hugsanlega verið að útdeila gjafapökkum til vina og vandamanna? Hefur einhver eftilit með þessum apparötum sem virðast hafa sjálftöku launa og kostnaðar? Er líklegt að slík apparöt muni einhvern tímann ljúka störfum né klára nokkuð af upphaflega verkefninu? Verði mörg ár til viðbótar í þessum störfum?

Og svo eru það bankarnir og lífeysissjóðirnir. Þeir virðast núna ráða öðruhverju fyrirtæki landsins og reka í samkeppni við þau fáu sem enn hjara á horriminni. Virðast þessi fyrirtæki ekki auglýsa þess meira og flottara sem þau eru vonlausara gjaldþrota? Ryðjast ekki jafnvel þekktir skynsemismenn fram á ritvöllinn til að verja þetta fyrirkomulag ef svo ber undir?

Hvað er orðið af markaðshagkerfinu sem við mörg trúðum á í gamla daga? Var ekki fyrirtækjum sem fóru á hausinn og gátu ekki borgað laun eða virðisaukaskatt ekki einfaldlega lokað? Var þetta ekki svona í því kerfi? Núna virðist ekkert fyrirtæki mega fara á hausinn nema að það sé handvalið til þess að smekk einhverra nafnlausra bankastráka eins og virtist vera í tilviki Sigurplasts? Virtist dómur Hæstaréttar um ógildingu gengisviðmiðunar lána ekki gilda þar og skuldirnar voru töfaldaðar? Almenningur æmti ekki né skræmti og enginn þingmaður né fjölmiðill krafðist rannsóknar. Líklega hefur Jón Ásgeir ekki átt fyrirtækið?

Kemur bara endalaust opinbert fé til þess að halda þessu öllu gangandi af því þeir segi að fólk missi annars vinnuna? Hvað með fólkið sem flytur daglega til útlanda? Er virkilega engum rekstri ofaukið í þessu hagkerfi þar sem þrisvar sinnum fleiri bankastarfsmenn halda úti umfangsminna bankakerfi heldur en gerist í Bandaríkjunum?

Er þetta ekki þessi sósíalismi andskotans eins og einhver skilgreindi það? Geta menn til viðbótar spurt sig hvort ný spilling þrífist á rústum hinnar gömlu? Hvort summa lastanna sé áfram konstant eins og Sveinn heitinn í Völundi sagði stundum á góðri stund?