Eru hælisleitendur

bæði hinsegin og ekki, skimaðir fyrir HIV við komuna hingað?

Það er ekki skimað sérstaklega fyrir trúarskoðunum þegar flóttamenn verða valdir handa okkur segir RauðiKrossinn.

RauðaKrossinum er ókunnugt um af hverju Austurríki, Ungverjaland, SaudiArabía, Quatar og UAE taka ekki við flóttamönnum meðan við verðum að gera það.

Er kannski bara ekkert reynt að stýra neinu né skoða neitt í málefnum flóttamanna og hælisleitenda til Íslands?

Hversvegna eiga bankastarfsmenn

að eignast hlut í gamla bankanum mínum Íslandsbanka?

Svo segir í Morgunblaðinu:

"Bankastjóri og framkvæmdastjórar Íslandsbanka, ásamt stjórnarmönnum, hafa farið fram á kaupauka í tengslum við gerð nauðasamnings og mögulega sölu hans.

Samkvæmt heimildum Morgunblaðsins hefur tillaga verið gerð af hálfu hópsins um að hann fái allt að 1% hlut í bankanum. Hluturinn gæti numið allt að tveimur milljörðum króna sé miðað við bókfært eigið fé bankans í árslok 2014. Í tillögunum mun ekki gert ráð fyrir því að almennir starfsmenn fái hlutdeild í samningnum þrátt fyrir að fyrirmyndin að tillögunni sé sótt í samkomulag sem gert var árið 2009 og tryggði starfsmönnum Landsbankans tæplega 1% hlut í bankanum..."

Þetta fólk á stöður sínar að einhverju leyti Steingrími J. Sigfússyni að þakka. Í stað þess að setja búið í gjaldþrot eins og honum bar samkvæmt lögum þá var sagt að hann hefði gefið bankann meira eða minna til einhverra hrægammasjóða. Það er á reiki hvað íslenska ríkið telst eiga núna í bankanum og hvað ekki.

Með samræmdum aðgerðum rakar bankinn fé af Íslendingum, selur ofan af fólki og beitir hverskyns meðölum til að innheimta kröfur sem þessir útlendingar eiga. Borgar neikvæða innlánsvexti og tekur þátt í samráði banka um lágmarkskjör verðtryggðra innistæðna og þjónustugjalda.

Ég átti heiðarlega fenginn hlut í Íslandsbanka áður en utantugthúsmennirnir Jón Ásgeir og Bjarni Ármannsson fengu að handfjatla hann. Mér er sagt að ég eigi ekki neitt í dag. Af hverju fæ ég ekkert af velgengni fasteigna minna, málverka og innréttinga sem Steingrímur J. Sigfússon stal af mér á sinni tíð? Af hverju á eitthvað ótínt starfsfólk að eignast hlut í þessu núna? Hefur það ekki fengið kaup og bónusa fyrir að vinna vinnuna sína? Er ekki hægt að fá nóg af ódýrara fólki til að reka banka? 

Og hversvegna er núverandi  bankastjóri Landsbankans míns ekki rekinn fyrir þá dæmalausu ósvífni og hroka sem hann hefur sýnt yfirboðurum sínum á Alþingi? Hvað höfum við við svona mann að gera sem hefur ekki meiri dómgreind en það að halda að þjóðin sé tilbúin að láta hann byggja yfir bankann fyrir pí sinnum sjömilljarða í Austurhöfninni?

Auðvitað á þjóðin kannski ekki neitt í þessum banka og Alþingsmenn hafa ekki hundsvit á bankarekstri síðan Steingrímur J. hætti að ráða? En til hvers andskotans á að líða þessum dreissugu herrum í stjórnsýslunni að fara fram eins og þeim sýnist án þess að þeim sé rekið utanundir eins og þeim Sverri Hermannssyni strigakjafti á sinni tíð?

Eru Bankastarfsmenn eitthvað merkilegri starfsmenn en aðrir opinberir?

50 flóttamenn

..." að lágmarki 50 kvótaflóttamenn á næstu tveimur árum,“ segir Eygló Harðardóttir félagsmálaráðherra.

Ísland mun taka á móti 50 flóttamönnum á næstu tveimur árum til að létta undir flóttamannastraumnum í suðurhluta Evrópu."

Hvaða röksemdafærsla er þetta?

Hver framleiðir þetta flóttamannavandamál í suðurhluta Evrópu?

Er það ekki Ítalía meðal annars? Í stað þess að láta sjóher sinn halda uppi vörnum gegn því að glæpamönnum haldist uppi að selja fátæku fólki báta til að sigla útí tvísýnu til að láta Íslendinga bjarga sér, þá setja þeir bara fólkið í búðir og væla? Eigum við að leysa vandamálið? Af hverju láta þeir ekki sjóherinn sinn að snúa við öllum bátum sem ætla að sigla út á mannúðina frá Libýu? 

Á þetta fólk eitthvað erindi hingað frá sínu heimalandi? Af hverju leitar það ekki til skyldmennananna í SaudiArabíu, Quatar, Dubai?

Hversvegna er þetta vandmál með sýrlenska flóttamenn? Hafa liðhlaupar úr borgarastríði rétt til að kalla sig flóttamenn? Er ekki borgaraleg skylda að taka  þátt í borgarastríði í eigin landi? Hverjir mynduðu heri norður-og suðurríkjanna í bandaríska borgarastríðinu? Sjálfboðaliðar?

Hefðu menn getað fengið bréf frá Lincoln  forseta um það að í stað þess að fara í herinn í norðurríkjunum gætu menn fengið stöðu flóttamanns til að stinga af til Canada? Og passa til Mexíco frá suðurríkjunum?

Ber ekki Sýrlendingum skylda til að berjast í borgarastríðinu með eða móti Assad?

Eru það hinsvegar ekki hernaðarþjóðirnar í Evrópubandalaginu og Bandaríkjamenn sem alþjóðalögregla sem bera ábyrgð á að leyfa erlenda íhlutun í Sýrlandi? Ber þeim ekki skylda til að hindra slíkt með alvöru raðstöfunum eins og er að renna upp fyrir Cameron?

Af hverju eigum við að taka við afleiðingunum af þessu án þess að vera spurðir? Einhverjir Bjúrókratar  í Brussel ætla bara að hafa þetta svona?

Svo kemur hér Framsóknarráðherra og fullyrðir:

 

"...Í samanburði við önnur ríki sem taka á móti kvótaflóttafólki er Ísland að taka á móti hlutfallslega jafn mörgum og Þýskaland og Frakkland, eða um 0,01 prósenti af mannfjölda í viðkomandi ríki.

Undirbúningur á móttöku flóttafólksins er þegar hafinn í félagsmálaráðuneytinu. Innanríkisráðherrar Evrópusambandsins komust að þeirri niðurstöðu á mánudaginn að taka ætti við um 32 þúsund flóttamönnum og mun Ísland taka við hluta þeirra. Ríki Evrópu byrja að taka á móti flóttamönnum í október.

„Við höfum verið að vinna að því í nánu samstarfi við Flóttamannastofnun Sameinuðu þjóðanna og munum halda áfram að gera það. Núna fram undan er það starf Flóttamannaráðs að undirbúa móttökuna,“ segir hún.

Eygló segir ákvörðunina tekna með fyrirvara um samþykki Alþingis en hún er bjartsýn á að fjármögnun náist. Það eru að lokum sveitarfélög sem taka á móti flóttafólkinu og sjá til þess að það nái fótfestu hér á landi.

„Við höfum fengið ákveðin skilaboð um að það séu ákveðin sveitarfélög tilbúin að taka þátt. Það þarf þá að koma í ljós hvort það gangi ekki allt saman eftir hjá þeim sveitarfélögum sem hafa lýst því yfir að þau hafi áhuga á að taka á móti kvótaflóttamönnum,“ segir Eygló sem býst við áframhaldandi og góðu samstarfi við Rauða krossinn um málið."

Allt þetta segir í Fréttablaðinu.

Svo segir ráðherran í útvarpi  að hún vilji sérvelja fólkið á grundvelli samkynhneigðar, fötlunar og almennrar vesalmennsku? Sem sagt allra annarra eiginleika en þeirra sem atvinnulífið okkar myndi setja sem æskilega? 

 

Hefur þjóðin verið spurð hvort hún vilji þetta? Má einhver vera á móti svona máli? Þorir einhver að játa það að vera á móti þegar talsmaður Rauðakrossins fagnar því að fá verkefni og peninga?

Hef ég verið spurður? Hefur þú verið spurður? Áttum við þátt í að búa til flóttamannavandamálið? Eða erum við höfundar að hentistefnumiðum hælisleitenda sem hingað streyma? Eiga stórþjóðirnar sem orsaka vandamálið með sinni vanrækslu ekki að leysa sinn enda fyrst?

Ætla ég að styðja Rauðakrossinn í pólitískri starfsemi hans framtíðinni?

Bara svo að enginn velkist í vafa með mína afstöðu þá vil ég halda innflutningi flóttamanna og hælisleitenda í lágmarki. Ég tel að ríkjandi afgreiðslumáti sé rangur. Séum við að afsaka hana með alþjóðlegum samningum þá eigum við að hafa kjark til að taka þá samninga upp til endurskoðunar. Og þá er EES og Schengen ekki undanskilið í mínum huga.Humpfrey og hans nótar eiga ekki að ráða svona málum vegna dugleysis okkar þingmanna sem skjóta sér á bak við þá.

 

Vegna  fámennis þjóðarinnar ber okkur skylda til að fara með ýtrustu  gát í að taka við innflytjendum yfirleitt og beita eigin mati á því hverskonar innflytjendur við viljum þar sem menntun og menningarstig koma að.

Ekki bara tölustafir frá ráðherrunni.

Hipp hipp og húrra!

Vinstri virðist vera samheiti á öllum þeim sem telja sig vera mannkærleikamegin í lífinu. Aðeins vinstri menn eru handhafar sannleikans og hugsa meira um annarra hag en sinn eigin af ýmsum ástæðum.Þeir eru líka handhafar sannleikans í listum og bókmenntum, innflytjendamálum og málefnum vændiskvenna.

Þeir eru hinsvegar allir rammvilltir í vinstrinu  sínu og vita ekki hvert skal halda. Enda eru margskonar snákaolíusölumenn þéttraðaðir á veginn og bjóða allrameinabótir hverri ráðvilltri og leitandi félagshyggjusál.

En til þess að flokkast með siðuðu fólki og kærleiksríku verður maður að vera vinstri maður sem bera hag náungans opinberlega meira fyrir brjósti en sínn eigin. Það er bara í verkföllum sem menn hugsa um eigin hag og þá einungis í sjálfsvarnarskyni að því að þeir segja.

Maður horfir á Samfylkinguna engjast um í tilgangsleysi sínu. Eina málið sem hún virkilega barðist fyrir er í þvílíku uppnámi að engu tali tekur. Hinsvegar á hún mikla fjármuni frá styrkjatíð Landsbankans því aldrei skilaði hún neinu eins og Bjarni.

Samfylkingin hefur haft upptöku Evru á heilanum og talið þá mynt hent Íslendingum, óháð risavöxnum taxtaleiðréttingum hérlendis sem hvergi eiga sér samsvörun í öðrum löndum enda Ga-Ga að flestra dómi.

Evran gagnast Þýskalandi ágætlega þar sem kaupgjald er stöðugt. En óstöðugum þjóðum eins og Grikkjum illa. Og líklega eru Íslendingar líkari Grikkjum en Þjóðverjum.Innanlandskostnaður Grikkja er orðinn svo hár að þeir hafa ekki lengur ráð á að búa í landinu sinu.

Útfrymi úr Samfylkingunni er svo dreift um sviðið á Íslandi undir hinum og þessum vörumerkjum sem erfitt er að átta sig á.

Á sölutorgi vinstrimennskunnar er líka annar flokkur með gamlar hefðir.Vinstri Hreyfingin Grænt Framboð. Hún átti að rúma gamla Allaballann sem ekki gat verið með gömlu krötunum í nýjum bræðingsflokki frekar en var frá upphafi Rússagaldurs. Þessi flokkur átti að vera hreinni og tærari en nokkur annar og formaðurinn til margra ára afbragð annarra mann í heiðarleik og manngæsku og tók öllum fram í þeim efnum. Samfylkingunni tókst ekki að hrifsa þennan titil af þeim senda eru Alikratar mörgum í fersku minni.

Flokkurinn þessi VG var einbeittur í þeirri stefnu sinni að framselja aldrei fullveldi ættjarðarinnar til Brüssel. Undir þeim gunnfánum gekk flokkurinn fram og sópaði til sín fylgi 2009. Kjósendur áttu þó eftir að upplifa meiri kúvendingu en gengur og gerist. Svo miklar að formaðurinn treysist ekki til að halda áfram. 

Enda  munu þeir menn ennþá vera meðal vor sem muna efndirnar með Icesave, Forsetann og allt það. Svo að á næsta 100 manna landsfundi var nýr formaður með engilsásjónu sakleysins og síbros kjörinn til að taka við boðun fagnaðarerindisins af þeim manni sem þá hafði svikið stærst og mest af öllu stjórnmálamönnum lýðveldisins Ísland frá 1944.

Flokkurinn er nú um það bil að verða hvítþveginn og stjórntækur í hvað sem er ef formaðurinn verður ekki áður tekinn í dýrlingatölu sem Forseti Íslands, sem liggur víst mjög við. Þá þarf nýja engilsásjónu og nýtt og stærra bros.

Nú geta vinstri menn sameinast um það, að innganga í Evrópubandalagið þurfi allavega að bíða um sinn og engin evra verði tekin upp í bráð.  Spurning er hvað verður um viðreisnarflokkinn hans Benedikts, hvort hann getur tekið sér stöðu með því fólki sem er líklegra til sinnaskipta um einhver grundvallarmál, sem vinstri menn verða ávallt að hafa tiltæk, frekar en að treysta á yfirlýsta andstæðinga ESB til frama?

Verðbólgan okkar er nú að hefjast sem er auðvitað Sjálfstæðisflokknum að kenna. Framsókn haggast ekki þar sem flokksaðildin virðist gjarnan fremur genetísk en málefnaleg.  Allt annað í þjóðfélaginu er í þenslu og það eru veltitímar. Ferðamennskan í hámarki og hótel í hverju húsi. Það er svo bara beðið eftir bakslaginu þegar Ísland verður orðið of dýrt fyrir ferðamenn. Kannski fara þeir þá aftur til Grikklands.

Þetta eru ekki kjöraðstæður fyrir vinstri flokka sem nærast á óhamingju fólks og þjáningum. Því án sorgarinnar væri engin gleði til.

Dagar Samfylkingarinnar eru greinilega taldir sem stjórnmálafloks. Allur hugsjónagrundvöllurinn er hruninn og trúverðugleiki eins atkvæðis formannsins horfinn út í buskann.

Það er aðeins hægt að bjóða flakið fram til þess að renna til einhvers skiptaráðanda sem getur sett kíkinn fyrir  blinda augað og hrópað Land ahoj. Manns sem fólkið treystir. Og þá verður hann að vera fortíðarlaus því annars getur engin treyst honum.  Þar með eru allir gömlu kallarnir úr leik drullugir upp fyrir axlir.

Og hvar er fortíðarleysið helst að finna? Þessi maður kemur þá helst úr flokki Pírata, sem er eins aflið sem getur sameinað vinstri menn. Auðvitað geta Píratar sem stjórnleysingjar ekki verið hægri menn eða tengdir gamla fjórflokknum. Það er því morgunljóst að sameining vinstrimanna liggur þar í gegn hvort sem menn vilja eða ekki.

Hinn nýji flokkur friðsamra sjóræningja er þá það sem fólkið þráir samkvæmt skoðanakönnunum. Það verða ekki vandræði á vinstra vængnum við næstu kosningar nema unga fólkið verði þá farið til útlanda sem það þráir næst mest.

Hipp hipp og húrra!

Dýrðleg peningabrenna

er hið svonefnda loftrýmiseftirlit við Ísland.

Nokkrum  sinnum á ári er það auglýst vel og vandlega að hingað verði sendar svona hálft dúsín af orrustuþotum af þessari eða hinni gerðinni og Nato-flugsveit með. Vonandi les sovéska sendiráðið Moggann svo þeir geti beðið um að fá sendan Björn upp að Íslandi  til að sýna sveitinni. Í þetta sinn ættu þeir að þekkjast frá því í gamla daga gömlu kommarnir, báðir á gömlum flugvélum, Tékkarnir á sænskum hlutleysisþotum Gripen en Rússinn á sínum Tupolev. Svo segir í Mogga:

"Loftrýmisgæsla Atlantshafsbandalagsins við Ísland hefst að nýju fimmtudaginn 23. júlí næstkomandi með komu flugsveitar tékkneska flughersins. Alls munu um 70 liðsmenn taka þátt í verkefninu og til viðbótar starfsmenn frá stjórnstöð NATO í Uedem, Þýskalandi, að því er fram kemur á vef Landhelgisgæslunnar.

Flugsveitin kemur til landsins með fimm JAS-39C orrustuþotur. Gert er ráð fyrir aðflugsæfingum að varaflugvöllum á Akureyri og Egilsstöðum á tímabilinu 25.-29. júlí. Verkefnið verður framkvæmt með sama fyrirkomulagi og fyrri ár og í samræmi við loftrýmisgæsluáætlun NATO fyrir Ísland.

Ráðgert er að þessu verkefni ljúki 27. ágúst en þá kemur til landsins flugsveit danska flughersins. Verkefnið er framkvæmt af Landhelgisgæslu Íslands. "

Það getur vel verið að það sé gaman að þessu tilstandi  öllu og stuðli að samkennd Nato. En mér skilst að grínið sé að talsverðu leyti á okkar kostnað Íslendinga sem helst aldrei viljum borga neitt fyrir öryggismál, sbr. norsku byssurnar.Mér dytti í hug að spyrja t.d.Svandísi í framhaldi af því peningaleysi hvað þetta kosti og hverjir hafi meira gagn af þessu, Nato eða Pútín?

Er einkavæðing?

í aðsigi í heilbrigðismálunum með félagsstofnunum hjúkrunarfólks?

Ef svo er þá er hún ekki núna að koma til fyrir baráttu hægri manna og Friedmanista heldur hinu megin frá. Sósíalista megin.Endimörk kjarabaráttu heilbrigðisstéttanna er að færa okkur einkavæðingartækifæri sem við höfum mörg beðið eftir.

Hugsið ykkur, ef hillir undir að við getum minnkað Landspítalann að einhverju leyti og náð tökum á stjórninni í heilbrigðisgeiranum?

Væntanlega fleiri og þá minni spítalar munu verða til og vinna verkin á grundvelli útboða á þjónustu. Læknar munu skera að einhverju leyti eftir gjaldskrá, þetta kostar venjulegur botnlangi, þetta kostar nýr mjaðmarliður og þetta kostar keisaraskurður.

Hjúkrunarfræðingar fá loks laun sem þeir ákveða fyrir sitt félag. Auðvitað verður ekki einokun á markaðnum og einhverjir munu þurfa að gefa afslátt til að fá vinnu. En þetta á markaðurinn að leysa eins og hjá verkfræðingum.

Einkaréttir á störfum verða ekki eins afgerandi og nú er. Erlend samkeppni kemur hugsanlega til á fleiri sviðum þjóðlífsins en núna er.

Var ekki grunnhugsun Friedmans sú að ríkið greiddi aldrei meira en ákveðið gjald fyrir ákveðna þjónustu, skólagöngu, læknisverk eða þannig áfram. Fólkið hefði val um hvaða skóla það veldi fyrir börnin. Samkeppnissjónarmið kæmi þar til á grundvelli marktækra mælikvarða eins og hugsanlega samræmdra prófa?

Sem sagt þá hugsaði Friedman um hagsmuni heildarinnar sem á að borga. Það væri hvergi frír hádegisverður í boði hjá ríkinu því þegnarnir borgi alltaf á endanum.

Ég verð að segja það fyrir mig, þá skil ég ekki hvernig hægt er að reka stóru ríkisfyrirtækin eins og skólana og sjúkrahúsin og stjórna kostnaði þeirra. Þetta er svo yfirþyrmandi verkefni og viðkvæm  og aflsmunur svo mikill. Við fólkið erum svo ofurseld gíslatöku hundraða starfsgreinafélaga sem vilja ein ráða starfsmati sínu að stjórnunarverkefnið er ofurmannlegt. Þvílíkt afreksfólk höfum við oft fengið í stjórnunarstörf til dæmis hjá Landspítalanum sem hafa getað leyst þessi flóknu verkefni fyrir okkur fólkið.

Þess vegna finnst mér að einkavæðing myndi skila okkur betra þjóðfélagi þar sem  hver einstaklingur fengi fleiri tækifæri til þroska og frama. Og meiri starfsánægju líka. Það er ekki ánægjulegt fyrir okkur að hlusta á umönnunarfólkið okkar, sem mér finnst yfirleitt í návígi líkjast meira englum en mönnum, lýsa þvi hvernig það er þrautpínt og barið áfram og síðan níddur af því skórinn launalega.

Möguleikarnir til breytinga eru víða. Af hverju er til dæmis Flugumferðarstjórn bara rekin af ríkinu? Af hverju rekur ríkið Veðurstofu? RÚV? ÁTVR? Herjólf? Af hverju eru fleiri greinar ekki boðnar út?

Lögregla og her og dómstólar geta hinsvegar aldrei verið boðnir út. Þó seta á Alþingi sé það í raun og veru þar sem þar ríkir samkeppni um sætin en þó ekki launin,-ennþá. 

Er ekki hægt að breyta einhverju  til hins betra? Erum við dæmd til þessa ástands óbreytts?

Er einkavæðing ekki líkleg til að bæta  hag fólksins?

7% í Kína

er hagvöxturinn á síðasta fjórðungi. CCTV segir flóðbylgju fjármagns vera til reiðu til að flæða út í heiminn. Á sama tíma er neðanmáls að Grikki vanti miklu meiri peninga en síðast hafi verið talað um.

Hvað er  Evrópubandalagið að hugsa? Hvað halda þeir að þeir geti náð fram með smáskammtalækningum sem bara kalla fram kvalaóp hjá Grikkjunum. Gæti ekki einhverjum fundist í Kína að það sé kominn tími til að gera einhvern grikk í Grikklandi? Þeir eru ekki ókunnugir í landinu, eiga til dæmis Píreus að miklu leyti.

Ef það er eitthvað sem er eitur í öllum mannlegum aðgerðum þá er það skortur á peningum. Peningar eru bensínið á aflvélinni. Ef tankurinn tæmist drepst á vélinni. Ef leiðslan er treguð hikstar vélin.

Þess vegna eru orð Hamlets það sem gildir í öllum framkvæmdum: "Að vera eða vera ekki." Að byrja ekki á neinu nema það sé hægt að klára það alveg. Ekki eins og íslenskir bankaasnar eða pólitíkusar í þeirri röð hegða sér yfirleitt, að lána eða lofa mönnum til að hefja framkvæmdir og skilja þá svo eftir í forinni. Flörta við sem flesta en flýja af hólmi þegar höktir.

EyKon heitinn orðaði það hinsvegar svo að í framkvæmdum mætti alls ekki vanta peninga. Hálf hjálp fyrir Grikki og peningaskömmtun býður Kínverjana velkomna til Evrópu. Ætli ESB vilji það? 

Hvaða hagvöxtur var annars í ESB á fyrsta fjórðungi? Hann var 7 % í Kína. 

Nú hló Marbendill

þegar hann sér kaupkonuna úr Rangá verða kexbit þegar hún uppgötvar að ferðamaður hefur óbrigðular líkamlegar.

Í Fréttablaðinu stendur:

"

Við leiðsögumenn erum í því að afsaka gerðir stjórnvalda í hvert sinn sem við komum á þessa staði," segir Helgi Jón Davíðsson leiðsögumaður um ástand salernismála á ferðamannastöðum.

 

Menn sem voru að störfum í þjóðgarðinum bentu blaðamanni og ljósmyndara Fréttablaðsins á að sumir ferðamenn gengju örna sinna aftan við Þingvallakirkju og þjóðargrafreitinn þar sem skáldin Jónas Hallgrímsson og Einar Benediktsson hvíla. Það kæmi í hlut starfsmanna þjóðgarðsins á haustin að hreinsa þar upp mannaskít og salernispappír. Og það var einmitt það sem kom á daginn í rjóðrinu við þjóðargrafreitinn; salernispappír og mannaskítur.

 

"Þeim sem ekki fóru á klósettið uppi á Haki er kannski orðið mál þarna niðri," segir Helgi Jón

Davíðsson

.

 

"Fólk sér hús og það sér kirkju og gerir ráð fyrir að það sé einhver þjónusta - þetta er jú þjóðgarður en þá er engin þjónusta - ekki neitt. Það er ekki einu sinni upplýsingaskilti um hvar næsta salerni er," segir Helgi sem gagnrýnir stjórnvöld harðlega fyrir aðgerðaleysi í salernismálum fyrir ferðamenn almennt.

 

"Þetta er vanhelgun og vanvirðing við allt og alla. Svona hagar siðmenntað fólk sér ekki," segir Sigrún Magnúsdóttir, umhverfisráðherra og formaður Þingvallanefndar, um áðurnefnda stöðu við þjóðargrafreitinn.

 

Sigrún segir salerni skammt frá Þingvallakirkju, bæði við gjána Silfru og á Valhallarreitnum en að ef til vill megi bæta merkingar í þjóðgarðinum. Hún gerir athugasemdir við kröfur ferðaþjónustufyrirtækja á hendur stjórnvöldum.

"Það er ekki hægt að gera endalausar kröfur um að ríki eða samfélag borgi fyrir það sem þau hirða svo ágóðann af," segir umhverfisráðherra."

Mikil lifandis ræfildómur er yfir þessum orðum ráðherrans. Maður sem er í spreng á ekki nema buxurnar um að velja eða hlaupa afsíðis ef hann getur.

Það er algerlega til skammar hvernig ferðamannaiðnaðnum líðst að dæla inn rútuförmum af ferðamönnum inn á alla staði án þess að sjá því fyrir klósettum. Það eru klósett í rútunum en fyrirtækin pína verðið svo niður að rútukallarnir opna þau ekki því þeir fá ekki borgað fyrir þrifin.

Sigrún kaupmaður yrði maður að meiri ef hún setti tollhlið á Þingvelli og setti upp klósett strax allstaðar. Ekki hlusta á þessa þjóðrembukommúnista eitt augnablik.

Við leiðsögumenn vitum hvernig ástandið er. Ár eftir ár er ekkert gert nema kjaftað og kjaftað. Það er til lítils að helluleggja Hakið ef fólkið á ekki hundraðkalla til að hægja sér. Hvað þá að geta það ekki heldur eftir gjágönguna. Eða við aðra helgistaði?

Allstaðar sama sveitamennskan  sem hugsaði þannig til ferðamanna í mínu ungdæmi: "Þetta er andskotans nógu gott í kjaftinn á þeim."

Ég held að þessi hugsunarháttur lifi enn góðu lífi þrátt fyrir hástemmdar yfirlýsingar ráðherrans úr Rangá  um annað.

Hótel mömmu kynslóðin

er fyrirbæri sem er orðin staðreynd á Íslandi.

Óli Björn hefur lýst áhyggjum sínum sem Sjálfstæðismanns af þessari þróun. Því deilum við margir þeir eldri sem munum aðra tíma með Óla.

Í grein Óla Bjarnar í Morgunblaðinu í dag koma fram sláandi tölur:

..." Árið 2007 voru 9,5% heimila á lægsta tekjubilinu á almennum leigumarkaði en 2013 leigðu 29% þessara heimila.

Bótafrumvarp húsnæðisráðherrans mun ýta hressilega undir að þessi þróun haldi áfram: Millistéttin og launamenn með lágar tekjur verða leiguliðar og að- eins hinir efnameiri búa í eigin húsnæði.

Andstæðingar bótakerfis húsnæðisráðherra vilja spyrna við fótum og vinna gegn þessari þróun – styrkja séreignarstefnuna og gefa fólki raunverulegt val í húsnæðismálum í stað þvingunar.

.... Uppspretta eignamyndunar almennings hefur fyrst og síðast verið í formi eigin húsnæðis auk lífeyrisréttinda. Stefna ráðherrans mun stífla þessa uppsprettu. Afleiðingin verður sú að launafólk á það á hættu að festast í gildru fátæktar þegar það ætlar setjast í helgan stein að loknu góðu ævistarfi.

..... Ég hef áður bent á að hægt hefði verið að nýta þá gríðarlegu fjármuni sem ríkissjóður hefur varið í húsnæðismál með skynsamlegri hætti en í niðurgreiðslu vaxta eða til að bjarga gjaldþrota samfélagsbanka – Íbúðalánasjóði.

 

 

Þannig hefði ríkið getað stutt við bakið á 40 þúsund fjölskyldum til að kaupa sína fyrstu íbúð með því að leggja þeim til ígildi 20% eigin fjár í 30 milljóna króna íbúð."

Þannig er að verða hægfara breyting á innri gerð íslensks samfélags. Séreignarstefnan eins og við Sjálfstæðismenn börðumst fyrir alla ævi er að holast innan fyrir áhrif kommúnista sem aldrei þekkja efnahagslegar staðreyndir.

Þeir halda að vaxtabætur séu styrkur við greiðendur vaxta í stað þess að þær eru styrkur til bankanna til að halda uppi okurvöxtum án opinberra inngripa. Húsnæðisbætur eru svo annað form sama   misskilningsins sem vinstri sósíalisti í Framsóknarflokki getur ekki heldur skilið.

Gegn þessari þróun þyrftu Sjálfstæðismenn að berjast. En er sá flokkur ekki að verða of huglaus til að berjast og of feitur til að flýja? Unga fólkið trúir frekar á Pírata. Því vaða vinstri flokkarnir og flokksleysurnar áfram gagnrýnislaust og blakta fyrir vindi mælskufroðu sem skilað hefur þessum áþreifanlegu staðreyndum.

Ísland er að verða land leiguliðanna þar sem Hótel Mömmu kynslóðin mun fara með völdin.

Hverju trúum við

þegar verið er að ganga frá nýju samkomulagi við klerkana í Íran að hætta að búa til kjarnabombur. 

Eru þetta ekki sömu mennirnir í leiknum og til þessa hafa brotið alla samninga? Takk elsku Rohani segir aumingja slæðukonan tárvot á torginu. Já, hverju skyldi þetta breyta í lífi þessa undirokaða klerkafólks? Ætli kvenfrelsið muni aukast í Íran?

Fögnuður fólksins í Íran var ekta. En undirtektir forsetaframbjóðanda Rebbanna í Washington var ekki í samhljómi við frambjóðanda Demmana Hillary Clinton. Né heyrðust fagnaðarlæti frá Ísrael.

Já, hverju og hverjum eigum við að trúa?