Að drepa á dreif

raunverulegum vandamálum með flugeldasýningum og þrætubókarlist er aðalsmerki Jóhönnu Sigurðardóttur sem stjórnmálamanns.

Hvenær sem upp kemur nauðsyn þess að taka á aðsteðjandi vandamálum, þá tekst henni að leiða athygli almennings frá þeim með upphrópunum og slagorðum. Þetta hefur einkennt allan stjórnmálaferil hennar frá hruninu. Það er eins og að henni berist sífellt efni í nýjar reyksprengjur og flugelda sem duga henni til að hlaupa frá öllu því sem máli skiptir.

Nú hefur hún Stjórnlagaþingið, íhaldið og Hæstarétt til að tönnlast á þannig að enginn hugsar um vinnudeilur, atvinnuleysi eða skuldavanda heimilanna. Og fólkið fagnar þegar henni tekst að drepa öllu á dreif sem angraði geð. Þvílikir forystuhæfileikar!

Hæstiréttur

gerði óviðeigandi athugasemdir um kosninguna til Stjórnlagaþingsins. Hann var ekki endilega að dæma neitt, Þetta væri ekki dómur heldur væru einhverjir dómarar í Hæstarétti að gera athugsemdir við framkvæmd kosninganna.  Einhverskonar tæknilegt atriði vegna óvenjulegra aðstæðna sem truflaði framkvæmd hins bráðnauðsynlega Stjórnlagaþings. Um nauðsyn nýrrar Stjórnarskrár  væri óþarfi að ræða, hún væri svo greinileg.  Það má því auðvitað ekki láta þetta álit Hæstaréttar trufla sig í því að að þjóðin fái sitt Stjórnlagaþing  sem hún þráir umfram annað. 

Þetta varð sá skilningur sem ég meðtók frá Árna Þór Sigurðssyni, þingflokksformanni Vinstri Grænna,  í Kastljósinu í kvöld.  Það þarf ekki endilega að svara spurningunni um það, hvort þjóðin leggi meiri áherslu á stjórnarskrármálið fremur en atvinnuleysið og skuldamál heimilanna,  því Árni telur það augljóst að svo sé.   Enda hvað getur annað brunnið á þessari þjóð þegar ríkisstjórnin segist þegar hafa  afgreitt atvinnuleysið og skuldavanda heimilanna með skjaldborginni og öðrum ráðstöfunum sínum ? 

Guðmundur Steingrímsson tók undir það með Árna að það yrði að finna leiðir til að vinna úr málunum eftir þessi afskipti Hæstaréttar. Það væru margir leikir í stöðunni til að sneiða hjá þessum athugasemdum Hæstaréttar. Þær hefði auðvitað verið  hægt að gera mun skynsamlegri ef dómararnir hefðu haft vit á að leita álits hjá Guðmundi þó hann deildi ekki við dómarana úr því sem komið væri.  Stjórnlagaþing yrði samt endilega að halda.

Þessi þáttur var Óðni Jónssyni og RÚV til mikils sóma og sýnir vel hversu mikilvægt það er að þjóðin sé upplýst um sannleikann og leiðirnar að markmiðunum.  Kynna fólkinu hinar ýmsu hliðar málsins og kalla til málsvara hinna ýmsu sjónarmiða. Þetta er sérlega áríðandi þegar einhverjir  álitsgjafar eins og Hæstiréttur eru skyndilega að trufla ríkisstjórnina í að halda  Stjórnlagaþing sem þjóðin og Þorvaldur Gylfason þrá heitast.   Ný Stjórnarskrá er það sem þjóðina vantar mest þegar atvinnumálin og skuldir heimilanna eru afgreidd mál hjá ríkisstjórninni.

Forsætisráðherra vor hafði líka lagt á það þunga áherslu í ræðustöl á Alþingi, að íhaldið ynni ljóst og leynt gegn Stjórnlagaþinginu. Þetta yrði ekki liðið. Stjórnlagaþing yrði að halda og láta íhaldið ekki komast upp með það að vera á móti því vegna kvótahagsmuna sinna.

Jóhanna Sigurðardóttir er stærri en svo að hún láti Hæstarétt komast upp með að trufla sig á leiðinni til Brüssel.  Sem betur fer kemur ekki sú stofnun að öðrum aðkallandi málum eins og Sjóvá og Sparisjóði Keflavíkur. Þar verður málum ráðið til lykta af hinum vísustu mönnum, hverjir sem þeir svo eru. Þar er hinsvegar Jóhanna sjálf Hæstiréttur.

61 Samviskulausir

hálaunamenn ætla að svipta þjóðarbúið 15 milljörðum í loðnutekjum. Þessir menn eru sýnishorn af vandamálum íslensks samfélags.  Samviskulausir fantar taka saklaust fólk í gíslingu undir merkjum "kjarabaráttu". Gersamlega án tillits til staðar og tíma.

Hver hópurinn á fætur öðrum stöðvar allt og rífur kjaft, þykist vera að leiðrétta kjörin sín sem hafi dregist aftur úr. Gvendur í Rafiðn geysist nú um landið og galar á uppreisn svo slökkva megi á virkjununum og hvaðeina á leiðinni í Evrópusambandið. Eiki í Kennarasambandinu brýnir busann sinn og segir sveitarfélögin ga-ga að borga honum ekki meira fyrir minna.

Ef þetta lið væri ekki svona illa upplýst um gang sögunnar þá ætti að vera hægt að skýra það út því að svona fengnar kjarabætur greiðast yfirleitt í verðbólgu og gengisfellingum innan árs.  Mánaðarverkfall, sem eru þolmörk lýðsins í hverju sem er,  skilar mínus hvernig sem samningar fara.  En það er auðvitað borin von að tala af skynsemi við þetta lið. Þó hafa raunverulegar kjarabætur komið í gegnum hagræðingu og aukna atvinnu með verðbólgunni en ekki vegna hennar.

Við ræflarnir, aldraðir og atvinnulausir, hinsvegar borgum mest af þessu í gegnum skerðingu bóta og þjónustu. Við erum afgangsstærð sem þessum lýð er skítsama um hvað sem þeir röfla um annað.

En 61 samviskulausir  verða gamlir líka og bíði þeir bara eftir sínum skammti. 

Náttúrufasismi

birtist í enn einu frumvarpi fáránleikans á Alþingi um breytingar á lögum um náttúruvernd.

Kristjana Bergsdóttir skrifar þarfa grein Í Mbl. í dag. Hún segir m.a.

"En gamanlaust þá er þetta hugtak rauði þráðurinn í hrollvekju frumvarpsins sem boðar afnám frelsis einstaklingsins til gróðursetningar og ræktunarstarfa á Íslandi. Það eru boðuð áður óþekkt höft á ræktun í landinu, þar sem miðstýring ráðuneytis og hugmyndafræði um »ágengar framandi lífverur"

Öfl sem vilja eyða opinberu fé í að eyðileggja handaverk þúsundanna, sem eyddu fé og fyrirhöfn í að rækta og bæta landið, eru til of mikilla áhrifa komin í stjórn landsins. Ríkisstjórnin er holdgerfingur niðurrifsaflanna og bandamaður uppblástursins í þjóðlífinu sem nú herjar til viðbótar öðru.

Þetta frumvarp er Náttúrufasismi af verstu gerð. Vonandi klúðrast þessar fyrirætlanir eins og fleira. Ríkisstjórnarinnar verður lengst minnst fyrir það sem landsmenn sluppu við vegna klúðurseiginleika hennar. .

 

Ég stilli mig

um það að gusa á Jóhönnu og ríkisstjórnina útaf stjórnlagaþinginu. Þetta er svo guðsvolað, gersamlega glatað, gríðarlegt gabb að maður er klumsa og kjaftstopp yfir vesaldómnum. Ræfilstuskurnar, þær geta víst bara ekki betur.

Ég stilli mig og held að við ættum bara að gera það sem flest. Þetta er ekki sú auglýsing fyrir þjóðina sem okkur vantaði útávið.  Það er líka ljótt að sparka í vesalinga og hrekkja minnimáttar. Stundum er best að grjóthalda sér saman. 

Ég held að við þyrftum að fá Jóhannes eftirhermu  til að koma í sjónvarpið og flytja okkur stjórnlagaboðskap í gervi Þorvaldar Gylfasonar, sem var kominn með leiðtogahlutverkið á þinginu á tæru fyrir sitt leyti.  Það myndi hjálpa okkur að hlægja hressilega eftir þennan farsa allan saman.

Skál elskurnar, og gleðilega framtíð eins og "Ranka Sótt" hefði kannski orðað það einhverntímann.

 

Sparisjóðina föllnu til MP-Banka

en ekki í fang ríkisbankanna.

 Ríkið leggi fram nauðsynlega víkjandi hluti til MP-banka þannig að hann geti starfað. Bankinn stefni að því að verða almenningshlutafélag á sem breiðustum grunni þar sem engum "kjölfestufjárfesti" verði gert kleift að gleypa allt og stela hinu.

Þeir stofnfjárkaupendur  sem staðgreiddu Glitni kaupin í stofnfjáraukningarsvindlinu fái hlutafé í MP Banka.  Aðrir stofnfjáreigendur fái keypt nýtt hlutafé  í MP-Banka á góðum kjörum. Sparisjóðahugsjónin fái framhaldslíf í banka fólksins, nýjum MP-Banka.

MP-banki er eina bankastofnunin sem ríkið ræður ekki ennþá. Björgum honum frá því aðhljóta þau örlög.   Fáum trúverðugt fólk í stjórnina hjá MP-Banka og gerum hann að banka fólksins.

Alþingismenn taki þetta mál upp ekki seinna en strax.

Einmitt það sem mest liggur á

BSRB fundar með ráðherrum

Forsvarsmenn Bandalags starfsmanna ríkis og bæja funda með Jóhönnu Sigurðardóttur forsætisráðherra og Steingrími J. Sigfússyni fjármálaráðherra í fyrramálið. Þar verður ráðherrum kynntar þær kröfur sem bandalagið leggur áherslu á í komandi kjarasamningum.

Það verður að varðveita og byggja upp skattstofna framtíðarinnar. Eru starfsmenn Pennans, Sementsverksmiðjunnar, Steypustöðvarinnar, BM Vallá, BYR, Sparisjórinn í Keflavík, Landsbankans, Íslandsbanka, Aríon banka, Húsasmiðjunnar, Flugumferðarstjórar, ljósmæður, Kennarasambandið  og Guð veit hvað ekki örugglega farnir að greiða félagsgjöld í BSRB?

Hagfræðikenning Steingríms Jóhanns í hnotskurn:

Hærri skattar á opinbera starfsmenn leysa vanda ríkissjóðs.

Einmitt þessvegna liggur mest á þessu!

Baugspressan

hrósar sér af því að ná til 2/3 landsmanna á móti þeim 1/3 sem Morgunblaðið nær til. Sem væri ekki neitt athugavert við ef ekki væri sú staðreynd, að Mogginn er einkafyrirtæki sem var keypt af eigendunum úr gjaldþroti og gerður út á þeirra kostnað. Fréttablaðið er gjaldþrota apparat sem er gert út af Arion Banka til þess að vera málgagn Samfylkingarinnar og Evrópusambandsins. Margir milljarðar af almannafé liggja í líkhúsi blaðsins og enginn veit hvernig rekstur þess er.

Blaðið stundar einhliða áróðursstarfsemi með allskyns leigupennum. Sem betur fer eru flestir þessir skríbentar svo lélegir að margt fólk ypptir öxlum yfir málflutningnum. Maður verður var við að flestir hafa lesið greinar sem koma í í Mogganum en hending er hvort menn hafa lesið greinar í Fréttablaðinu. Sem gefur manni aftur hugmyndir um hversu mikil áhrif blaðsins eru í raun og veru.

Fréttablaðið segist hafa kannað að meirihluti landsmanna vilji núna samþykkja Icesave lll. Meirihluti VG vilji halda áfram aðildarviðræðum að Evrópusambandinu og raunar meirihluti landsmanna allra. Blaðið reynir að sverta Sjálfstæðisflokkinn við öll tækifæri og gera kjósendur hans tortryggilega á sem flestan hátt. Samt hefur fylgisstreymið til þess flokks aldrei verið meira en núna og segir það líka sína sögu. Sjálfstæðismenn virðast líka forðast að skrifa í Fréttablaðið. Fyrir þær sakir er blaðið mjög einhæft og fyrir mig til dæmis hrútleiðinlegt aflestrar.

Dreifingin er langt í frá sú sem blaðið heldur fram, úti á landi er blaðið selt og selst dræmt, stórir haugar af ódreifðum blöðum liggja hingað og þangað, þannig að mér er nær að halda að útbreiðslan sé mjög orðum aukin.

En Baugspressan styður stjórnina til allra óhappaverka. Það er mergurinn málsins.

Tillögur Sjálfstæðismanna

um leiðir út úr kreppunni hafa legið fyrir um langt skeið.

Eftirfarandi upplýsingar er að finna á síðu Tryggva Þórs Herbertssonar:

„ Frá miðju ári 2008 hafa um 22.500 störf tapast á Íslandi. Um 13.000 einstaklingar eru nú atvinnulausir og tæplega 10.000 hafa horfið af vinnumarkaði – sest í helgan stein, farið á örorkubætur eða einfaldlega flutt úr landi og hafið nýtt líf í öðrum löndum. ........

Tillögur Sjálfstæðisflokksins miða að því að hér á landi verði skapað umhverfi þannig að til verði 22.000 störf á næstu tveim til þrem árum. .....

...Við viljum lækka tekjuskatta einstaklinga um 10 milljarða á næsta ári og draga skattahækkanir ríkistjórnarinnar að fullu til baka árið 2012. Við viljum verja 10 milljörðum til að afnema óhagkvæma skatta 2011 og sömu upphæð 2012. Við viljum hverfa frá áætlunum ríkistjórnarinnar að hækka skatta um 11 milljarða á næsta ári.....  "

Hvernig virkar þetta?

 ...“Hvert nýtt starf þar sem einstaklingur fer af atvinnuleysisbótum og í vinnu bætir afkomu ríkissjóðs að meðaltali um 3 milljónir króna. Tillögur okkar gera ráð fyrir að til verði 12.000 ný störf á næsta ári – um 4.000 við uppbyggingu í orku- og stóriðjugeirunum og um 8.000 í litlum og meðalstórum fyrirtækjum en í slíkum fyrirtækjum vinna lang flestir Íslendingar. ...

Í tillögunum er gert ráð fyrir að tekið verði gjald af fjármálastofnunum fyrir yfirlýsingu um ábyrgð ríkisins á bankainnstæðum. Gjaldið gefur um 5 milljarða. Þá er lagt til að inngreiðslur í séreignarsjóði landsmanna verði skattlagðar. Þetta gefur ríkissjóði um 80 milljarða í auknar tekjur fyrsta árið. Samtals eru þetta því 121 milljarður. .....“

Ekki hefur verið hlustað hið minnsta á þessar tillögur af ríkisstjórnarliðinu. Þar kemst helst ekkert annað að en umsóknarferlið að Evrópusambandinu og innflokkadeilur.

Ég held að margt sé gott í þessum tillögum Sjálfstæðismanna. Hinsvegar hef  ég ekki skilið það ennþá hversvegna skrefið er ekki stigið til fulls með lífeyrissjóðsgjöldin. En það er að inngreiðslur verði skattaðar beint og lífeyrisgreiðslur verði því skattfrjálsar. Maður spyr sig hversvegna stjórnir lífeyrissjóða eiga að fara með þetta fé fremur en opinberir aðilar  og hugsanlega tapa hluta þess eins og dæmin sanna.

Þjóðin viðist samt vera farin að sperra eyrun eitthvað ef marka má skoðanakannanir. Enda virðist fátt framundan  hjá ríkisstjórninni nema meira af því sama. Og það er greinilega ekki að virka.

Icesave lll

er nú fyrir þinginu. Þegar félagi Svavar var úti í löndum að semja fyrir okkur Icesave l sagði Steingrímur í viðtali á z-etunni:

"Ég treysti Svavari Gestssyni og ég veit að hann er að gera góða hluti og ég lofa þér því að það er í sjónmáli að hann landi, og hans fólk, glæsilegri niðurstöðu fyrir okkur. Vonandi mun betri en lengi leit út fyrir að gæti orðið."

Félagi Svavar kom með einhvern pakka sem talinn er hafa numið hálfri þjóðarframleiðslu eða svo.

Ég hlustaði á Tryggva Þór Herbertssson í gær tala um Icesvae lll. Hann sagðist meta hann brúttó á minnir mig 47 milljarða með vöxtum. Ef við seldum vel eignirnar úr Landsbankanum færi kostnaðurinn niður í núll eða mínus. Hann sagðist telja sem bísnessmaður að skynsmalegt gæti verið að ganga að þessu til að ná friði við þjóðirnar. Við gætum lent í tapi fyrir dómi. Hann væri hinsvegar ekki á þingi sem bísnessmaður heldur fulltrúi þjóðarinnar og hann vildi vera viss um vilja þjóðarinnar áður en hann greiddi atkvæði.

Er þetta ekki eitthvað sem baráttumenn eins og Jón Valur og ég verðum að velta fyrir okkur? Jafnvel Davíð líka?

Er kannski rétt að brjóta odd af oflætinu og samþykkja Icesave lll í þjóðaratkvæði ?

Stundarfriður

er nú á áhyggjum stofnfjáraðila Sparisjóðs Norðurlands og BYR-sparisjóðs eftir dóm Héraðsdóms í dag. Niðurstaðan er sú að lán Glitnis til stofnfjárkaupa voru aðeins tryggð í bréfunum sjálfum.

Hinn góði Íslandsbanki með fínu auglýsingarnar keypti kröfuna með 40 % afföllum af þrotabúi Glitnis og ætlaði sér að innheimta að fullu í aleigu manna, kvenna, ólögráða barna og skilningssljórra gamalmenni,  sem voru göbbuð til að taka  þátt í stofnfjáraukningunni með lygum og prettum starfsmanna Glitnis. Og lentu síðan í purkunarlausum innheimtumönnum Íslandsbanka sem ætluðu að láta kné fylgja kviði og ganga að skuldurunum.

Nú er stundarhlé að minnsta kosti, þar sem héraðsdómur taldi sannað að forsendubrestur fyrir innheimtu hafi átt sér stað. Væntanlega fer nú málið til Hæstaréttar, þar sem Steingrímur J. leggur línurnar að venju með tilliti til hagsmuna bankakerfisins. Svo ekki er öll nótt úti hjá Íslandsbanka með þá fyrirætlan sína að gera þúsundir heimila gjaldþrota.

Þeir sem seldu sín bréf til skúffufyrirtæksins Exeter Holdings,  Ragnar Z. sparisjóðssjóari BYR, Jón Þorsteinn Jónsson, stjórnarformaður BYR og MP banki,  greiddu  MP-banka með peningum sem þeir tveir  fyrrnefndu hrömsuðu úr sjóðum BYR. Þeir verða hugsanlega að borga eitthvað til baka þar sem þeir hafa verið ákærðir fyrir tiltækið.  En  Birgir Ómar Haraldsson, stjórnarmaður í BYR,  náði á sama hátt að selja sín bréf í gegnum MP banka til Exeter Holdings fyrir 200 milljónir í seinni snúningi á málinu,  sleppur hinsvegar við ákæru og lifir líklega einn fárra stofnfjárfesta í BYR-sparisjóði  við hamingju hér eftir.

 Áætlun samsærismanna gekk útá það að gera Exeter Holdings gjaldþrota og þarmeð væri snjóað í sporin. Slitastjórn BYR situr uppi með verkið þannig að þetta heyri brátt  sögunni til og mál þessi gleymist.

Allavega er núna fenginn stundarfriður fyrir þá sem í gær horfðu fram á gjaldþrot sitt. Hinsvegar á svo Steingrímur J. líklega  eftir að koma og heimta tekjuskatt af niðurfellingunni ef að líkindum lætur. Píslum stofnfjáreigenda er langt í frá lokið þó stundarfriður hafi fengist.

 

Er Steingrímur í endurhverfum

viðskiptum einhverskonar með Mávi Seðla?

Þetta stendur í Mogga:

"Fjármögnun á kaupum eins sjóða Stefnis, dótturfélags Arion banka, á meirihluta í tryggingafélaginu Sjóvá, er ekki lokið."

Auðvitað kemur mér ekkert við frekar en öðrum hverjr eiga eða reka Stefni. En vissi ég ekki að Steingrímur "eigi " Arion banka? 

Eru þá viðskiptin með Sjóvá ekki uppá krít með skilarétti?  Eru það ekki kölluð endurhverf viðskipti?