Veiðistjórn í ESB

Joe Borg ,yfirmaður sjávarútvegsmála hjá ESB, lýsir stjórnkerfi fiskveiðimála hjá bandalaginu í grein í Baugstíðindum á uppstigningardag. Hann segir m.a. ;

"Blákaldur veruleikinn er ansi langt frá því að vera sá sem mig dreymir um. Níu af tíu fiskistofnum eru ofveiddir og þriðjungur þeirra er talinn vera i mjög lélegu ástandi......

Stjórnmálamenn hafa látið undan þrýstingi frá sjávarútveginum og látið skammsýn sjónarmið ráða för og jafnvel látið sjónarmið um sjálfbæra nýtingu sem vind um eyru þjóta........ Staðan er því grafalvarleg ... Ef horft er til þess hve eldsneytisverð hefur hækkað mikið í kjölfar óróa á  fjármálamörkuðum má jafnvel gera ráð fyrir að sumir muni freistast til að halda áfram að láta undan þrýstingi og taka ákvarðanir sem munu reynast skammgóður vermir. ......"

Greinin enda á neyðarkalli um breytingar á sjávarútvegsstefnu bandalagsins og hann ákallar Íslendinga um að koma með góð ráð.

Það blasir nokkuð við hvernig okkur muni ganga að láta rödd okkar heyrast við hið stóra borð hrossakaupanna í ESB. Ég held að við getum treyst Jóa þessum Borg til að lýsa því hvernig hreppapólitíkin þar muni reynast okkur til að stýra okkar fiskimiðum eftir að við erum komnir undir sjávarútvegsstefnu bandalagsins. Okkur  hefur nú gengið svona og svona með stjórnun fiskveiða hér heima þó að við séum einir um hituna.

Trúa menn  boðskap kratanna um það,  hvernig okkar rödd muni duga  til þess að breyta gangi sjávarútvegsmála í ESB ? Mér finnst heldur ólíklegt að að þeir fái inngönguna samþykkta í þjóðaratkvæðagreiðslu þó svo að bitlingatækifæri í Brüssel blasi við óðfúsum kratabossum héðan að heiman. En opinberar sporslur hafa ávallt verið á uppáhaldsmatseðli krataflokka allra landa og mótað stjórnmálastefnur þeirra umfram annað. Slík eru þeirra trúarbrögð og við því er ekkert að segja.

Hitt veldur mér furðu hvernig heilög Jóhanna er orðin mikill Evrópubandalagssinni í seinni tíð. Ég held að þessar skoðanir séu henni  frekar áþvingaðar af evrópufanatíkerum í flokknum hennar heldur en eigin sannfæring.  Ég hef á tilfinningunni að það sé hálfgerður holhljómur í þessu hjá henni og evróputrú hennar sé minni en margan grunar. 

Og þá veltir maður fyrir sér sinnaskiptum Steingríms J. Hvernig hann reynir að koma því að inná milli, að Evrópumálin séu ekki þau mest aðkallandi. Án þess að maður sannfærist um það að hvaða afstöðu hann hefur til væntanlegrar þingsályktunartillögu um aðildarviðræður. 

Ég hitti skemmtilegan kall í Sundlauginni   í dag. Hann sagðist hafa kosið VG, en sæi eftir því núna. Hann hefði aldrei ætlað með þeim til Brüssel.  Ég held að Steingrímur megi nú passa uppá nýju fylgismennina sína betur en hann gerir ef hann ætlar að halda í þá.    

 

Núllið berji bara pottana !

Þá erum við búin að sjá núllflokkinn í ræðustól Alþingis.

Þeir burðuðust við að lesa upp stílana sína ,sem ég náði nú ekki meira en svo um hvað voru. Nema helst að þeir hefði barið sig og brennt inn á Alþingi á indjánahátíðunum á Austurvelli  í vetur.

Ég held að það sé bara best fyrir mig og árangursríkast fyrir þá, að þeir berji bara pottana sína með reglulegu millibili í Alþingispontunni en tali sem minnst. Þannig mun ég skilja  best hversvegna þeir eru þarna og hverra fulltrúar þeir eru og fyrir hvað þeir standa.

 Enda hyggja þeir víst ekki á framhaldsvist á staðnum hvort sem er.

 

Is it true ?

Leigupenninn Guðmundur Andri Thorsson túlkar Júróvisjónsigur Jóhönnu Guðrúnar á sinn hátt í Baugstíðindum dagsins. Með mikilli lyrik og orðsnilld sér hann Jóhönnu syngja útfararstef yfir Sjálfstæðisárunum átján sem þjóðin liggur í móral yfir meðan Jóhanna eldri reynir að bjarga þjóðmálunum.

Orðkynngi rithöfundarins um atburðinn þar sem fjarskablái kjóllinn með fjöðrunum minnir á flug til ævintýrahallanna þar sem höfrungarnir kátu leika sér allan daginn og þangað sem seglskipin sigla þöndum seglum, er beinlínis hrífandi. Skilaboð lagsins og flutningurinn eru  skýr frá laginu eins og skáldið sér  það fyrir sér.   Þetta lag og flutningur þess er iðrunarbæn niðurlægðrar þjóðar sem ber ábyrgð á helför Sjálfstæðisflokksins. Gjaldeyrishallaþjóð sem er rúin  trausti veraldarinnar í gjörgæslu AGS.  Söngkonan stóð þarna í bláum og fiðruðum kjól og opnaði faðminn til að hleypa út sorgunum í auðmjúkri afsökunarbeiðni fyrir glæpum  Sjálfstæðisflokksins og sök okkar þjóðar gufaði upp með hverju orði sem rann fram af hennar munni , sveif burt með seglskipunum stóru í bláan fjarskann þar sem höfrungarnir dansa við kátar öldur...

Og þjóðinni var fyrirgefið vegna þessarar auðmjúku bænar og er nú með lófafylli af fyrirheitum frá Jóhönnu eldri sem er að greiða úr óreiðunni.

 Is it true ? Klúðruðum við  öllu ? 

Hvar varst þú í átján ár  fagra og yndislega Jóhanna  ? Þú varst dásamleg í bláa kjólnum að  syngja þig inní hjarta veraldarinnar. 

Is it true ? 

Blátt er líka litur Sjálfstæðisflokksins. 

 

Braskað í BYR !

Nú er ljóst að stofnfjárbraskararnir  í fyrri stjórn BYRs héldu stjórnarmeirihlutanum með  brögðum. Greiddu fulltrúum sínum atkvæði með hlutum Kaupþings í Luxembourg sem þeir voru réttlausir til.

Þegar ríður á að ná almennri sátt um fyrirtækið og fá stofnfjáreigendur til að reyna að bjarga því frá yfirtöku ríkisins verða þeir að geta borið traust til stjórnarinnar. Er nokkur von til þess eftir þessi tíðindi ? 

Ég hef ekki traust á stjórn sem er kjörin með þessum vinnubrögðum. Mér finnst að hún eigi að segja af sér og láta kjósa aftur að afloknum veðköllum til þeirra sem eiga ekki stofnféð sitt lengur. Í stjórninni má enginn sitja sem tengist fortíðinni með einhverjum hætti.

Það myndu áreiðanleg einhverjir finnast  sem vilja fylgja Helga í Góu og leggja fram nýtt stofnfé í  endurreistan BYR. En það gerir auðvitað enginn ef hann veit ekki nema því  verði stolið jafnharðan aftur af  sama genginu.  

Sefur hún fastar en Þyrnirós ?

Það er á flestra vitorði að vanskil á vörslufé ríkisins varðar fangelsi.

Nú liggur nokkurn vegin fyrir að útrásarvíkingarnir eru búnir að stela skattfrjálsum bótasjóðum tryggingafélaganna.

Sjóða sem voru myndaðir með því að ríkið frestaði skattlagningu teknanna sem mynduðu þá. Er þá ekki óbeint búið að stela skattfé frá ríkinu ?

Er ekki nokkur leið að vekja réttvísi þessa lands ?

Sefur hún fastar en Þyrnirós ?

"Það er ósiðlegt að láta fífl halda fé sínu" !

Hreiðar Már og Sigurður Einarsson lánuðu Robert Tenghuis minnst helming af öllum innlánum Kaupþings án fullnægjandi trygginga. Hvað gekk þeim til ? a. Vankunátta í bankafræðum  ?b. Eigin gróðafíkn ? Hafi einhver aðrar skýringar þá væri fróðlegt að heyra þær. Á meðan spóka þessir mestu og hæstlaunuðu bankamenn Íslands, fyrr og síðar, sig fríir og frjálsir í London.. Erum við ekki með einhverja Evu Joly á launum. Eða er hún yfirleitt  líka í London ?  Við gömlu hluthafarnir í Kaupþing  étum  það sem úti frýs.  

" It is immoral to allow suckers to keep their money."

Þannig hljóðar eitt af lögmálum Murphy´s.

Annað lögmál hans, "the Golden Rule"  er svona:

 " He who has the gold makes the rules "

Nú vantar gúddvill !

Fréttir af því að Bakkavör sé búin að vera og geti ekki borgað tuttugu stórkúlur af skuldabréfum hljóta að vekja söknuð um gamla daga þegar Davíð réði ríkjum í Seðlabankanum.

Þá hefði málið verið leyst af snillingunum í Kaupþingi með því að selja Existu til Fons og svo til til baka svona þrisvar sinnum og auka með því eigið féið um nokkrar stórkúlur og útvega svo lán og yfirdrætti útá það.  

Það er áreiðanlega rétt eins og sagt er að Jón Ásgeir hafi alltaf sagt;  Maður verður að eiga banka til að meika það !

Allt Davíð að kenna.

Lausn á kvótamálinu.

Jón fiskur vinur minn kom með einfalda lausn á þessum eilífu kvótadeilum:

Gefum bara þorskveiðar frjálsar á morgun. Leyfum öllum að veiða eins og þeir vilja þetta árið. Ekkert kvótagjald, ekkert til að veðsetja.

Einfalt ?

Má ekki fresta kvótakerfinu á þennan hátt Jóns til þess að losna við þetta stöðuga röfl ? 

Ef það sýnir sig að vera verra þá getum við tekið það upp aftur. En þá er kvótinn í eigu þjóðarinnar.Eða eigum við ekki að segja stjórnmálamannanna og hreppapólitíkurinnar.

30 ár í Evruna ?

Jón Valur Jensson tíndi saman eftirfarandi 5 skilyrði Mastricht sáttmálans sem Ísland þarf að uppfylla til að fá að taka upp evruna: 

• 1. Halli á rekstri hins opinbera má ekki vera 3% af landsframleiðslu.
• 2. Skuldir hins opinbera mega ekki vera yfir 60% af landsframleiðslu.
• 3. Verðbólga sé ekki meiri en 1,5% umfram meðaltal í þeim þremur ESB-ríkjum sem hafa minnsta verðbólgu undangengið ár.
• 4. Langtímanafnvextir (á mælikvarða skuldabréfa ríkisins til 10 ára) séu ekki meiri en 2% umfram samsvarandi vexti í þeim þremur aðildarríkjum ESB sem hafa minnsta verðbólgu.
• 5. Að gengi gjaldmiðils umsóknarríkisins hafi ekki sveiflast umfram 15% vikmörk í kringum tiltekið viðmiðunargengi undangengin tvö ár."

Skuldir Ísland eru meira en ein landsframleiðsla. Skv. niðurgreiðsluáætlun ríkisstjórnarinnar verður marki nr. 2 náð um 2040. (Ég sleppi  því hér að reyna að tímasetja hvenær hin 5 markmiðin muni nást hjá okkar nýju og fersku ríkisstjórn.)

Vill þá einhver útskýra fyrir mér hvað það hjálpar þessari ríkisstjórn í núverandi gjaldmiðilsþrengingum að drífa í að sækja um aðild núna til þess að fá evruna eftir 30 ár ?

(Það er sjálfsagt lummó að minnast á það að þessi skilyrði voru uppfyllt á Davíðstímanum. Þá datt bara hérumbil engum í hug að sækja um aðild )

Vaxtaflón.

ÉG man alltaf eftir því þegar Sverrir Hermannsson  kallaði Finn Ingólfsson vaxtaflónið. Nú Finnur var ekki meira flón en það að hann náði að verða milljarðamæringur á því að ná Samvinnutryggingum af Landsbankanum og slapp billega með það og hefur vit á að láta lítið fara fyrir sér.  Sverrir var hinsvegar rekinn fyrir kjaftinn og að reyna að passa aurana fyrir Finni og Ólafi í Samskip.

Hálft þjóðfélagið  stendur á öndinni útaf því hvort einhverjir stýrivextir séu þetta eða hitt. Hvort vextir séu of háir. Ég veit að þeir fórnarlömb breytilegra vaxta eiga bágt þegar bankarnir keyra upp vextina án ástæðu.  En svona er að vera flón, maður verður alltaf látinn gjalda þess.

En almennt eiga menn ekki að hugsa svona mikið um vexti. Vextir lamennt  eiga að fara eftir vaxtalögmáli Sveins heitins B. Valfells. En það hljóðaði  svo:

"Vextir eiga að vera svo háir sem til eru fífl að borga."

Einfalt og skiljanlegt. Þetta nefnilega gildir um ótalmargt annað í lífinu. 'i rauninni lífsspeki eins og margt annað sem hann sagði sá mikli maður. 

Einstaklingurinn verður að eiga val. Ef hann á ekki val þá er hann uppá náð og miskunn bófans kominn. Og bófinn lætur alltaf kné fylgja kviði. Þess vegna verða menn alltaf að hugsa fyrst og fremst um það, að leggjast ekki uppá náð og miskunn bófans. Og hann er að finna í flestum musterum Mammons.  Flærðarlegur og smjaðrandi meðan fíflið gengur í gildruna en tekur svo niður grímuna þegar kaupin eru gerð.  Þá er oft of seint að iðrast.

Því flestir eru bara flón. Vaxtaflón eða bara venjuleg flón.