Landstólpar

eru þeir ungkratar. Þessir sömu sem vilja fyrir hvern mun fela landið í hendur ESB.

"Ungir jafnaðarmenn sendu í kvöld frá sér ályktun þar sem þeir gagnrýna Ástu Ragnheiði Jóhannesdóttur forseta Alþingis fyrir að taka tillögu sjálfstæðismanna um að draga málshöfðun gegn Geir H. Haarde á dagskrá. Þeir telja tímabært að kjósa nýjan forseta. "

Sök Ástu gamalkrata og samkrata þeirra ungu: Vildi að Sigmundur Ernir bæði sjálfur um að varamaður tæki sæti hans á þinginu til að taka þátt í atkvæðagreiðslunni um frávísunartillöguna. (Tillagan hefði fallið á jöfnu ef varamaðurinn hefði komið inn.)Sigmundur Ernir reyndist ófáanlegur til þessa.

Heift og hatur er aðalsmerki vinstrimanna á Alþingi Íslendinga um þessar mundir.Klekkt skal á öllum sem hafa sjálfstæðar skoðanir og hlýða ekki eins og hundar.

Ungir kratar eru hinir nýju landstólpar sem fólkið fær að velja í næstu kosningum.

Tæknilegt rothögg

þekkja áhugamenn um hnefaleika. Þð var verið að sýna mynd í sjónvarpinu af viðureign þeirra Muhameðs Ali og George Foreman í Zaire 1974. En þar gat maður séð vankaðan Foreman skjögra  um hringinn gersamlega þrotinn af kröftum reyna að lumbra á Ali sem var líka þrotinn að kröftum og hékk í köðlunum en ekki vankaður eins og Georg sem datt loks í gólfið í 8.lotu eftir eitt gott högg frá Ali.

Ríkisstjórn Íslands er eins og Georg Foreman í 8.lotu. Hún heldur að hún sé að gera eitthvað en getur ekki neitt. Hún slagar um hringinn og slæst máttlaus  við forynjur og vindmyllur, tæknilega  rotuð,  og það er bara tímaspursmál hvenær hún dettur í gólfið. Það vantar einhvern Ali til að gefa henni lokastuðið.

Eina atkvæðið sem hún hékk á er gengið úr vistinni með Þráni Bertelssyni. Þeir einu utan Samfylkingarinnar og VG sem eru  líklegir til að styðja við hana ennþá eru flækingsþingmenn sem óttast að missa vinnuna ef kosið verður á næstunni. Þessir þingmenn eru hugsjónalega löngu tæknilega rotaðir og eru bara að spá í aurana fyrir sjálfa sig með þessu lítilmótlega athæfi. Því þeir svara aðspurðir að ríkisstjórnin sé auðvitað tæknilega rotuð og heillum horfin og geti ekki neitt en þeir verði nú samt að styðja við hana af því að Sjálfstæðisflokkurinn sé svo hræðilegur.  Það væri auðvitað margfalt ódýrara fyrir þjóðina að borga þessu liði út kjörtímabilið og eftirlaun ofan á það heldur en að láta hlutina dröslast áfram með þessum samviskulausa hætti.  En það er bannað að múta fólki og sérstaklega þingmönnum og því er þetta með þessum hætti.

Það er auðvitað  þjóðin sem þjáist fyrir þetta lið. Það er hún sem er með blóðnasirnar  meðan ríkisstjórnin skjögrar um hringinn tæknilega rotuð og allir þrá það heitast að hún detti í gólfið sem fyrst.

 

Höfum við nokkuð lært?

af hruninu per se?

 Er hrunið í sjálfu sér orðið að nokkru nema einu viðskiptastórslysi? Að mestu í boði örfárra manna þar sem einn var hugsanlega sýnu mestur meðal jafningja. Tapaði 1000 milljörðum af lánsfé sínu. Aðrir fylgdu fast á hæla honum. Þetta voru kallaðir viðskiptajöfrar og athafnaskáld á meðan móðurinn var á mönnum. En núna eigum við að trúa því að allt þetta fé hafi bara gufað upp, tapast í mislukkuðum viðskiptum?  Jafnt íbúðaturnar í Macau, íbúðir í Soho og New York sem hlutabréf í stórfyrirtækjum heimsins. Bísenssarnir gegnu bara ekki upp. Sorry Stína segja þeir núna, allt farið við eigum ekkert eftir. Tap á öllu. Jolly Joly ?

Þeir voru þá bara ekki sniðugri en þetta. Heiðar Már sem varð að fá 80 millur á mánuði til þess að hann færi ekki til einhvers annars banka í útlöndum. Var hann  þá bara ekkert sniðugri en þetta? Og Siggi Einars, Pálmi og Jói í Fons, Óli í Samskip, Finnur Ingólfsson, Jón Ásgeir,  Rassmusenarnir,Gulli í Kögun, Wessmann  Björgólfarnir og allir hinir, voru bara ekkert sniðugir að græða. Kunnu bara að tapa?

Við hinir horfum bara á þegar næsti fjármálasnillingurinn, ástmögur þjóðarinnar, Steingrímur J. Sigfússon, endurreisir bankana og fullfjármagnar að eigni sögn. Að vísu veit hann ekki hverjum hann gaf tvo þeirra em skiptir svo sem engu máli lengur. Við bara steytum hnefana að Sjálfstæðisflokknum og heimtum að taka upp Evruna og burt með verðtrygginguna, samningana í gildi og þetta nokkuð sem við kunnum best. 

En höfum við annars nokkuð annað  lært í bankafræðum?  Hefur nokkur banki aðskilið viðskiptabankastarfsemi sína frá fjárfestingarbankastarfsemi? Hefur Kauphöllin eitthvað lært? Til hvers erum við núna með 120 manns í Fjármálaeftirlitinu þegar enginn veit hverju er meira eftir að  líta?  Allt komið á hausinn í landinu hvort sem er?

Höfum við nokkuð lært þegar á botninn er hvolft?

Bragð er að

þá barnið finnur.

Þráinn Bertelsson, þingmaður VG, segir að Alþingi hafi brugðist í þessu máli.

»Oft hefur það verið reiknað út að þessi stjórn hangi á einu atkvæði og ég ætla ekki að bera ábyrgð á því að halda Ögmundi Jónassyni og Össuri Skarphéðinssyni í embætti,« segir Þráinn.

Þá telur hann fýsilegt að boðað verði til alþingiskosninga. »Mér er efst í huga núna að fá kosningar þannig að það komi í ljós hvort þjóðin kjósi yfir sig samtryggingu eða þá hugsun sem ríkir hjá okkur sem viljum draga lærdóm af hruninu.«

Það væri gott að það rynni upp fyrir listamanninum að það er eiginlega hann sem er ábyrgur fyrir áframhaldandi píslum þjóðarinnar eftir hrunið. Hún slysaðist til að berja þennan þingmann inn á bumbum Baugsliða. Þjóðin er sjálf búin að iðrast beisklega og það versnar með hverjum degi sem líður þar sem landflóttinn heldur áfram og vandræðin vaxa. Það er hugsanlega kominn tími til að þingmaðurinn fari einnig að iðrast verka sinna?

Ef þingmaðurinn myndi hugsa um þjóð sína sem borgar honum bæði þingfararkaupið og listamannalaunin er ekki að vita nema barnið fyndi bragðið fyrr en seinna.

Þvílíkt álit!

sem kommaþingmenn hafa á okkur sauðsvörtum kjósendum.

Á þinginu í gær var eftirfarandi sagt:

"Frú forseti, mér sýnist á atkvæðatöflunni að þessi frávísunartillaga sé fallin á jöfnu og því er þetta dökkur dagur í sögu þingsins,« sagði Ólína Þorvarðardóttir, þingmaður Samfylkingarinnar, þegar hún gerði grein fyrir atkvæði sínu. Bætti hún við að með þessu hefði hið pólitíska vald seilst inn á svið dómsvaldsins.

»Þessi svokallaða meginstoð í þrískiptingu valdsins er augljóslega svo maðksmogin og fúin af pólitískum vélráðum að hún er eiginlega orðin ónýt eftir þessa atburði,« sagði Ólína um þingheim.

Helgi Hjörvar, þingmaður Samfylkingarinnar, varaði við því að fólk léti tilfinningar sínar ráða ferðinni.

»Tilfinningar gefa alþingismönnum ekki leyfi til að stöðva framgang laga og reglna, Alþingi var stofnað til að tryggja framgang laganna, ekki stöðva hann. Verði sá siður útbreiddur í samfélagi okkar að fólk almennt telji tilfinningar sínar vega þyngra en framgang laganna þá er í óefni komið,« sagði Helgi þegar hann gerði grein fyrir atkvæði sínu.

»Sjálfstæðisflokkurinn sem annars hefur haft það eina stefnumið að komast aftur til valda til að deila og drottna eins og hann gerði samfellt í 18 ár vill nú að Alþingi beiti sér, eða öllu heldur blandi sér, inn í dómsmál sem hafið er fyrir rétti. Það stangast á við grundvöll stjórnskipunarinnar - þrískiptingu valdsins,« sagði Valgerður Bjarnadóttir, þingmaður Samfylkingarinnar.

Er ekki morgunljóst að Geir Haarde er fyrir Lansdómi vegna að þessir þingmenn ákærðu hann. Alþingi er ákæruvaldið í þessu tillviki.Ákæruvaldið ákærir engann nema yfirgnæfandi líkur séu á sakfellingu. Nú telur Alþingi að þær aðstæður séu ekki fyrir hendi lengur.Það hafi verið gerð mistökþ Ákærandi getur því einn blásið málið af. Þá er það ekki dómsmál lengur þar sem ákæruna vantar. Því dómsmáli verður ekki haldið áfram ef Alþingi svo ákveður.

Er þetta fólk með þá lágmarksgreind sem þarf til þess að forsvaranlegt sé að það sé yfirleitt á þingi?

Verða kjósendur þess ekki að gefa út álit á þessu atriði varðandi þetta fólk í næstu kosningum ?

Besserwissers

finnast mér þeir vera sem standa að nýjum tillögum til skotvopnalaga. Af því tilefni setti ég skrifelsi í Morgunblaðinu:

"Til umsagnar eru nú hjá innanríkisráðuneytinu drög að frumvarpi að nýjum lögum um vopn, sprengiefni og skotelda sem koma eiga í stað vopnalaga nr. 16/1998. Reynslan af gildandi lögum hefur ekki verið að öllu leyti góð en af þeim hefur hlotist nokkur óvissa og ágreiningur.«

Þessi fullyrðing er sett fram sem almenn yfirlýsing af hálfu ríkisvaldsins án þess að rökstuðningur fylgi. Af hvaða mannanna lögum er að öllu leyti góð reynsla? Hvaða slæma reynsla liggur fyrir af núgildandi lögum? Hvað er að öllu leyti gott?

»Sjálfvirk og hálfsjálfvirk skotvopn, að undanskildum hálfsjálfvirkum eða handhlöðnum fjölskota haglabyssum með skothylkjahólfum fyrir aðeins tvö skothylki, verða með öllu bönnuð.«

Hvað reynsla af núgildandi lögum verður þess valdandi að þetta ákvæði er sett inn?

Er þetta vegna þess að í Noregi voru framin skelfileg voðaverk með hálfsjálfvirkum vopnum? Var ekki líka áburður notaður í sprengjur? Er þetta vegna þess að fréttir berast af því að útlend glæpagengi, sem eiga hingað greiðan aðgang vegna EES- og Schengen-samningsins, eru sögð vera farin að bera vopn? Er það næg ástæða til að banna öllum heiðarlegum Íslendingum sem ekkert hafa af sér brotið að eignast slík vopn með þeim skilyrðum sem gilt hafa?

Það eru hundruð af byssuáhugamönnum, skotíþróttamönnum og söfnurum á Íslandi sem fara með byssur eins og sjáaldur auga síns. Byssusmíði er listgrein sem menn hafa áhuga á af sömu ástæðum og öðrum fögrum listum. Menn eru að skjóta úr þessum gripum sínum í íþróttaskyni, á hátíðarstundum í skotfélögum sér til ánægju og til veiða. Sumar byssur eru sjaldnar eða aldrei notaðar. Aðrar eru oft á íþróttaæfingum skotfélaga. Við Íslendingar eigum afburða íþróttamenn í skotfimi. Eigum við að leggja stein í þeirra götu? Treystum við þeim ekki?

Dettur einhverjum í hug að banna olíuliti þó að í þeim sé svo mikið blý að það geti verið hættulegt. Á sérsveit lögreglunnar eða Landhelgisgæslan að takmarkast við aðrar vopnategundir en hálfsjálfvirkar? Hvað hefur breyst allt í einu sem fær innanríkisráðherra til að ryðjast fram með úrelt mál sem þetta frumvarp til nýrra vopnalaga?

Hvert er verið að fara með þessari tillögu? Er hún unnin af þekkingu á skotvopnum? Álítur semjandinn hálfsjálfvirka 22 cal byssu, riffil eða hlaupstutta skammbyssu, jafngilda 45 calibera byssu? Er ekki tvíhleypt haglabyssa mun hættulegri í návígi en skammbyssa? Hvers vegna koma svona tillögur upp með reglulegu millibili hér á Íslandi? Hvers vegna eiga svona tillögur svona auðvelda og órökstudda leið upp í efstu lög stjórnsýslunnar? Hverjir er höfundar að þessum endurteknu tillögum?

Hérlendis stundar fjöldi manna Ólympíuskotfimi með skammbyssum. Allar keppnisbyssur þeirra íþróttamanna verða að vera hálfsjálfvirkar þar sem keppandi tekur ekki alltaf niður byssuna þegar hann er búinn að miða af ýtrustu einbeitingu. Þetta eru oft sérsmíðuð tæki og svo klunnaleg að það yrði hlegið að þeim í hasarmynd eftir Baltasar. Skotíþróttamenn stunda keppnir með margvíslegum byssum. Ekki er mér kunnugt um vandræði vegna þessa og hef þó verið viðriðinn skotíþróttir í áratugi. Og kynnst mörgu úrvalsfólki og íþróttamönnum og konum innan þeirra raða.

»Skotvopn og sprengiefni eru hættuleg og almenningur verður að geta treyst því að óhæfir einstaklingar fái ekki leyfi skv. frumvarpinu.«

Hvaðan kemur svona almennt slagorð? Hvaða rök liggja að baki? Er þetta ástand eitthvað öðruvísi núna en verið hefur?

Hefur orðið tjón af byssusöfnurum eða skráðum hálfsjálfvirkum vopnum? Í mínu næsta nágrenni var eitt sinn framið óhugnanlegt morð með skrúfjárni. Á að banna skrúfjárn? Var ekki líka klaufhamar notaður sem morðvopn? Á að banna þá? Því miður er illskan ekki alltaf vönd að meðölum. Því miður eru til vondir menn. En þeir góðu eru sem betur fer mun fleiri.

Glæpamenn verða alltaf til. Meðal okkar er í dag því miður núna fólk sem á eftir að fremja morð. Við vitum ekki hvaða aðstæður munu leiða til þess. En því miður getum við ekki afstýrt framtíðinni. Þaðan af síður breytt fortíðinni. Flest verða þessi morð ekki framin nema í hita augnabliksins. Menn afla sér yfirleitt ekki sérstakra vopna í þeim tilgangi að fremja morð. Og ef einhver vill ná sér ólöglega í hálfsjálfvirkt skotvopn, þá er er það ekki óleysanlegt mál og hefur aldrei verið. Líka eiga Íslendingar góða smiði sem geta smíðað næstum hvað sem er. Sumir þeirra hafa sérstakt yndi af því að smíða byssur.

Hvort er betra að byssur séu skráðar á ábyrga einstaklinga og litið sé eftir geymslu þeirra og meðferð eða að byssueign verði neðanjarðar? Hvaðan kemur þessi trú á höft og bönn?

Er eitthvað sérstakt annað sem réttlætir þessar tillögur hæstvirts innanríkisráðherra?"

ER þetta ekki enn eitt dæmi hvernig lög verða til fyrir það eitt að einhverjum "útí bæ" finnst eitthvað og segir það í almemnnum orðum að eins og að reynslan "sé ekki að öllu leyti góð". Og Alþingi skrifar undir í hugsunarleysi vegna sjálfvirkarar trúar sinnar á þessa "Besserwissara"

Ögmundur og eftirá séð

hugsanir hans sem fram koma í hreinskilinni grein hana í Morgunblaðinu í gær neyddu mig til að hugsa til baka og velta fyrir mér hvaða ábyrgð ég sjálfur beri vegna þess að hafa þagað of mikið um sumt og veitt þvi þannig þegjandi samþykki.

Ég var ákaflega andvígur sölu Símans og Póstþjónustunnar á sínum tíma. Ég taldi þá og tel enn að vissir þættir samfélagsins eigi að vera í opinberri eigu.Dómsvaldið, fjarskipti að grunngildi, vegagerð, hafnarstjórn, flugvallastjórn, menntakerfið, póstþjónusta, löggæsla, fangelsismál,vegabréfaútgáfa, bifreiðastjórnun, auðlindastjórnun. Ég lét þetta í ljós opinberlega en rödd mín var mjóróma og féll ekki í tíðarandann.Ég veitti ekki næga andspyrnu. Ég hefði getað gert betur þó það hefði sjálfsagt ekki breytt neinu svona eftirá séð.

Ögmundur rekur hvert einkavæðing grnnþátta leiddi okkur. Nú til baka litið vildi ég auðvitað segja mér til upphafningar;" Ég sagði ykkur það líka en þið hlustuðuð ekki." Nú er Sjálfstæðisflokkurinn sem slíkur dæmdur af þessu og allir félagar í flokknum stimplaðir óalandi og óferjandi vegna þess sem af vissum grunnmistökum leiddi. En það er ekki svo í mínum huga að Sjálfstæðisstefnan hafi breyst eða brugðist, þó að í stjórnartíð okkar flokks hafi verið gerð viss mistök sem allir flokksmenn voru síður en svo ánægðir með.

Nú erum við biturri reynslunni ríkari. Væntanlega höfum við öll lært eitthvað eftirá séð.En við Sjálfstæðismenn höfum ekki fengið frekari trú á sósíalismann eða hafta-og ofstjórnarkenningum vinstri manna. Ég hef ekki tapað trúnni á nauðsyn verðtryggingar sparifjár á verðbólgutímum þó það sé ekki í móð lengur. Ég hef heldur ekki tapað áttum á eðli verðtryggðra langtímalána og samhengi við hið fyrra þó að skoða megi aðferðir betur.

Ég hafði gott af því að lesa grein Ögmundar um það liðna svona eftirá séð.

Evran og krónan

var til umræðu hjá Helga Hjörvar og Tryggva Þór Herbertssyni á Bylgjunni rétt áðan.

Helgi lofaði mönnum 3.5 % vöxtum á húsnæðislánum ef menn tækju up Evru.Tryggvi sagði hinsvegar að góð hagstjórn væri forsenda fyrir hvaða gjaldmiðli sem er. Hann minnti á reynslu Grikkja sem hefðu kastað drökmunni sem var þá elsti gjaldmiðill í heimi með 2500 ára sögu. Á tíu árum væri Grikkland komið í öngþveiti með Evrunni. Helgi vísaði þessu vanda Grikkja alveg á bug sem tengjast okkar vanda og sagði að við ættum ekki að bera okkur saman við Grikkland heldur þróaðri þjóðir. Tryggvi benti á að andstaða við upptöku Evru væri aldrei meiri í Danmörku en núna. Norðurlönd hefðu verið búin að ganga í gegnum bankakreppur áður en við lentum í okkar.

Tryggvi sagði að Helgi og hann væru nú í nefnd til að kanna með hvaða ætti menn gætu komist út úr verðtryggingunni íslensku. En góð hagstjórn væri forsenda alls árangurs í efnahagsmálum. En Helgi einblíndi á Evruna sem fyrr sem lausnina á öllum vandamálum vaxta og verðtryggingar.

3.5 % lán Í Evrum á Íslandi er ólöglegt. Enda er það verðtryggt í þeim skilningi þar sem það miðar við gengi erlends gjaldmiðils.Verðtryggt lán er löglegt lánsform. Hefur þá Evran aðeins eitt gengi að mati Helga? Tryggvi var ekki ekki í vafa að Evran væri ekki öðruvísi en aðrir gjaldmiðlar. Þeir gætu aldrei orðið öðruvisi en hegðun þjóðar. Tryggvi kallar þjóðarhegðun hagstjórn en Helgi vék ekki að þessu. En auðvitað er Tryggvi í ábyrgum stjórnmálum og verður því að fara í kringum staðreyndir málsins þó að hann viti betur. Helgi Hjörvar gefur færri hagfræðilegar skýringar aðrar en að krónunni sé kastað og evran leysi allan vanda allra og er þar með trúr eina stefnumáli síns flokks.

Setjum sem svo að við værum komnir með Evru og 3.5 % húsnæðisvexti.Við völd er hægri stjórn sem nýtur ekki stuðnings ASÍ. Segjum að olíuverð hækki, og matvara líka. Virðisaukaskattur á matvæli sé hækkaður til viðbótar þannig að framfærslukostnaður hafi stórhækkað. Verkalýðshreyfingin vill fá leiðréttingar. Verkfall knýr fram taxtahækkanir. Þá kemur væntanlega til kasta hagstjórnarinnar sem Tryggvi talar um. Hvernig hún fer fram er líklega betra að Tryggvi skýri sjálfur. Sjálfsagt spila stýrivextir Seðlabanka hér inní í hugarheimi hagfræðinga og fleiri hliðarráðstafanir og bandormar á Alþingi.

Við höfum öll upplifað þessa hluti áður. Verkalýðsbaráttu, verðbólgu og hagstjórnartilraunir Seðlabankans í framhaldi af því.Stilla hitastillirinn á kulda eftir að hitinn er orðinn óbærilegur. Við getum reynt að víxla röðinni á þessu politískt en þá verðum við að fá Tryggva og Helga saman í stjórn til að sætta fólkið við kjaraskerðingar, sem voru kallaðar gengisfellingar í Den.

Þjóðverjar hafa ekki fundið leið til að framkvæmda almennar kauphækkanir í Evrum svo að það verður vandaverk fyrir Helga Hjörvar að koma með aðferðir til þess. Það verður líka erfitt fyrir Tryggva Þór að útskýra hverskonar hagstjórn þarf til við þær aðstæður.

Það er sama hvort við höfum Evru eða krónu. Þær æxlast ekki kynlaust frekar en spendýr.

Misnotkun atvinnuleysisbóta

er orðin að meinsemd í þjóðfélaginu.

Hver einasti maður þekkir til misferlis í sambandi við töku atvinnuleysisbóta. Menn komast upp með það að tilkynna fyrir hvern annan með mikilli hugkvæmni. Menn vinna svart á kvöldin en eru atvinnulausir á daginn. Eftirlitsmennirnir segjast ekki mega vinna yfirvinnu þannig að þeir geta ekki litið eftir því að heilu verkstæðin opni ekki fyrr en eftir kvöldmat.

Á kreppuárunum hræðilegu voru klæðlitlir menn sendir austur í Flóa til að grafa skurði í frostum í atvinnubótavinnu eins og það hét þá. Enginn vill endurtaka slíkt. En að finna engin úrræði fyrir atvinnulausa önnur en að afhenda þeim ölmusur og vísa þeim svo á Guð og gaddinn er heldur ekki gott. Með því lagi erum við líka að koma hópum fólks uppá það að lifa með atvinnuleysi sem lífsstíl. Þessi lífstíll mun auðveldlega ganga í erfðir í heilu fjölskyldunum. Börnin alast upp til að verða "kerfisfræðingar" í þeim skilningi.

Það er hræðilegt fyrir marga að fá engin verkefni til að vinna að. Að finna það að maður sé ekki gjaldgengur lengur, ekki matvinnungur eins og maður var alinn upp til að vera.

Af hverju eru fullfrískir atvinnulausir ekki látnir vinna gagnleg störf fyrir samfélagið. Gæta að hegðun fólks í úniformeðaðri almannagæslu? Berjast gegn veggjakroti, og hreinsa? Fylgjast með innbrotsþjófum um nætur? Verða að viðurkenndri stærð í þjóðfélaginu með stolti yfir því að gera gagn. Allt annað en bara að lifa á ölmusum.

Við gamlingjarnir getum auðvitað áfram étið það sem úti frýs því við erum úrrhrök samfélagsins sem enginn vill nýta til neins. Við erum yfirleitt álitnir vitleysingar eftir 67 ára aldurs og er bannað að vinna þrátt fyrir ákvæði jafnréttislaga.Það er helst talað við okkur eins og ketti. Viiill hann eeeeeki tvíböööku?. Ef við gamlingjar getum ekki fundið okkur viðfangsefni sjálfir er öllum fjandas sama um okkur. Þess heldur getum við skilið vandmál hinna yngri sem lenda í stöðu þess að verða nokkurskonar óþegnar í samfélaginu, óhreinu börnin hennar Evu, hinir "líkþráu" sem enginn vill snerta.

Tilgangsleysi í lífinu er hroðaleg tilfinning fyrir margan manninn. Misnotkun atvinnuleysisbóta er því miður hvati á þeirri vegferð.

Vaðlaheiðargöng auðvitað

strax til að bæta atvinnuástandið. Það er komið gott boð í verkið og sjálfsagt að drífa í þessu.

Það er verið að deila um það hvaða ár framkvæmdafélagið afhendi þjóðinni verkið til fullrar eignar. Hvaða máli skiptir það fyrir okkur sauðsvarta? Mér verður alveg sama hver á þessi göng eða hversu lengi. Alveg eins og Hvalfjarðargöngin. ég keyri þau ef mér sýnist svo. Aðalatriðið er að ég geti keyrt undir Vaðlaheiðina og borgað vegatollinn. Ef tollurinn er of hár þá fer ég Víkurskarðið. Svo einfalt er það.

Vegatolla á öll göng í landinu á jafnræðisgrundvelli! Vaðlaheiðargöng auðvitað strax!