Formaður óskast

fyrir stjórnmálaflokk sem er á mikilli siglingu til bjartrar framtíðar. "Háseti óskast á línu og net".

Greint var frá því um helgina að Guðmundur Steingrímsson þingmaður muni hætta sem formaður Bjartrar framtíðar þann 5. september næstkomandi þegar landsfundur flokksins verður haldinn. Róbert Marskálkur mun þá einnig segja af sér sem formaður þingflokks. Er þetta sameiginleg ákvörðun þeirra og vilja þeir með þessu veita hvor öðrum svigrúm til að stýra flokknum. Nú er eftir að vita hvað flokkurinn segir um þetta.

Svigrúm til að stýra flokknum? Hvert? Skyldi það vera hreint aukaatriði þegar allt er bara bjart?

Síðastliðinn fimmtudag hélt flokkurinn fund þar sem staða flokksins var rædd. Innan við hundrað manns mættu á fundinn og þar tilkynnti Guðmundur að hann myndi ekki bjóða fram krafta sína áfram sem formaður flokksins. 4,4 prósent fylgi nær varla mellanöl þannig að það vantar allan legg í flokkinn og ekki að búast við að neinn kveiki á því.

Af viðtölum við önnur stórstirni flokksins má ráða að þar séu margir kallaðir. Þar bara bíði eftir að það verði kallað á þá.

Einhvernvegin vorkennir maður þessu fólki svolítið. Kannast maður ekki við það í kosningum að kjósendur láti sig vanta?En þetta hlýtur að vera svekkjandi eftir svo langan þingferil Guðmundar Steingrímssonar að sitja uppi með svona lítið fylgi við þær brennandi hugsjónir sem hann hafði fyrir kosningar. Og nú að það þurfi einskonar boðhlaup forystumanna til að elta þetta fylgi uppi?

Margt illa upplýst fólk eins og ég til dæmis hef alls ekki fylgst nógu vel með til að geta dæmt um gæði eða birtustig framtíðar Guðmundar Steingrímssonar sem vegna erfðamengis síns hlýtur að hafa eitthvað mjög merkilegt að segja. En Guðmundur mun áreiðanlega snúa aftur inn á vettvang stjórnmálanna eins og Marteinn Mosdal og Gunnar á Hlíðarenda og koma með óvæntan vinkil á þjóðmálin.

Stundum virðist það best í pólitík að segja sem minnst eins og Píratar. Stundum virðast menn segja of mikið eins og Sjálfstæðisflokkurinn því ekkert virðist stoða að tala fallega við kjósendur.Fylgið er pikkfast og hreyfist ekki. Svo er þjóðinni á Útvarpi Sögu skelfing illa við eitthvað sem þeir kalla fjórflokk, sem manni skilst að sé samstæð heild með það hlutverk að svíða öll efnisleg gæði af venjulegu fólki auk hrekkja aldraða og öryrkja af ýmsu tagi. Allt vandlega falið undir guðrækilegu yfirvarpi.

Ég er búinn að hlusta á það sem formaður Sjálfstæðisflokksins er búinn að segja um makrílbannið. Ég hlusta og hlusta en heyri ekkert nema blæinn í laufi frá Pírötunum. Þeir kannski leysa þetta fyrir okkur með þögninni? 

Það eru líklega komnir aðrir tímar í pólitík en verið hafa. menn eru minna ginkeyptir fyrir loforðum og ræðuhöldum. Menn vilja bara sjá aðgerðir eins og vörugjaldalækkunina. Þakka svo fyrir með því að kjósa eitthvað annað. Sem er ágætt því hvað hefur maður að gera við einhverjar framtíðarsýnir á einskonar miðilsfundum flokkanna?

En það vantar formann eða formenn. Líst mér á og líst mér á sagði hásetinn fyrir talninguna í brimróðurinn á Stokkseyri, fimm formennirnir?

Þó að formennska sé alltaf sérstakt fyrirbrigði þá er ekki víst hversu fer með brimróðurinn ef formennskan er sett í nefnd. Þuríður formaður hefði sjálfsagt lagt kollhúfur við slíkum tillögum enda var framtíð hennar ekki alltaf björt.

Flóttamannaframleiðsla

er stóriðja í Sýrlandi og Lybíu þökk sé Rússum annarsvegar og Vesturlöndum hinsvegar.Þolendur framleiðslunnar eru þó ekki Rússar heldur Vesturlönd.

Í gær gerðist það að flóttamenn gerðu áhlaup við landamæri Makedoníu og létu þau ekki trufla sig. Ef flóttamenn fara með þessum hætti fram þá verða vandamálin fljótt óleysanleg.

Er þessu svonefnda alþjóðasamfélagi stætt á því lengur að láta þessi lönd afskiptalaus?  Annað hvort með því að loka landamærum þeirra eða svipta þau sjálfstæði sínu til viðbótar. Að reyna að hjálpa íbúunum innanlands án þessa er líklega óframkvæmanlegt við ríkjandi aðstæður.

Ekki veit ég hvað innrás í Lybíu til dæmis myndi kosta. Hinsvegar má reikna það út hvað það kostar að gera ekkert. Eða þá Sýrland? Flóttamenn eru búnir að tapa öllu og leggja líf sitt undir í örvæntingu. Hvað ætla Vesturveldin að gera gagnvart einbeittum fjöldainnrásum óvopnaðs fólks eins og í Makedóníu?

Geta Vesturlönd haldið áfram að sofa? Getur Evrópusambandið yfirleitt leyst nokkur mál sjálft sem fjalla um annað en vexti? Getur Evrópa yfirleitt leyst sín mál sjálf sé litið yfir síðustu hundrað ár?

 

Menningarnótt

er afstaðin. Ég verð að viðurkenna að þetta var glæsilegt framtak. Það var stórkostlegt að líta yfir áheyrendafjöldann fyrir framan sviðið og sjá stuðið sem ríkti.

Auðvitað takmarkast mín upplifun af sjónavarpinu her austur í Tungum. En þetta var megaviðburður

Frammistaða Stuðmanna er eitthvað sem ég hef ekki séð lengi. Egill, Jakob og Guðjón, trymbillinn og hinir sem ég þekki ekki nöfnin á  eru einstakir listamenn þó Egill hafi stolið senunni af og til sem von er með þessa frábæru rödd. Samanlagt eru þeir Stuðmenn í orðsins dýpsta skilningi.

Og svo hún Sylvía Nótt, hún kom sko á óvart. Hún er sko "real trooper" eins og Kaninn myndi segja. Mikið frábærlega stóð hún sig vel innanum þessa rútíneruðu og sviðsvönu stórkalla. Hún hefur bara heilmikla rödd sem hún beitir af kunnáttu. Mér fannst hún stundum bara einum of hógvær að gefa í með trukkinu. Og svo er hún líka engilfríð og stórglæsileg á sviðinu. Allt var eins og þetta væri þaulæft, bakraddir, blásarar og stuðið stigmagnaðist með fjöldasöng  þar til að það sprakk út í rakettusýningunni. Ljósasjóið í gluggunum á Hörpunni kom líka vel út þarna svo hún fái nú smá hrós.

Ég hef sjaldan notið fjöldaskemmtunar eins og þessarar.Þó aldrei skuli það henda mig að hrósa þeim Degi Bé og EssBirni pólitískt þá var þetta Reykjavíkurborg til sóma.

Takk fyrir mig Stuðmenn og Ágústa Eva, þið slóguð svo sannarlega í gegn á Menningarnótt Reykjavíkurborgar.

Slá í gegn

slá í gegn

þú veist að ég ^Aþrái 

^F#mað slá í ^Bmgegn ^E

af ^Aeinhverjum ^F#mvöldum

^Bmhefur það ^Dmreynst ^Gmér um ^Amegn

þessar línur komu í hugann þegar ég leit Guðmund Steingrímsson vonsvikinn á fundi með Jón Gnarr á fundi Bjartrar Framtíðar. Það eru víst komin ský á himni hugsjónanna.

Hvaða gagn hafði nú þjóðin af því að ráða Guðmund Steingrímsson  til að ráða málum sínum? Eða þetta bjarta fólk allt saman sem er orðið svona leitt á þessum fjórflokki að það þarf að leita nýrra stranda.

Á furðuströndum velkjast sprekin í fjörunni og verða að kringlóttum keflum í fjörunni sem henta vel í forystuboðhlaup

Á eyjunni Shangríla eru allir vinir og græðgin er útlæg. Þar ríkir jöfnuður og vandamál eru óþekkt. Mikið vildi ég að ég vissi leiðina þangað. En úr því að Guðmundur Steingrímsson, EssBjörn og sjálfur Jón Gnarr hafa ekki sagt hana fyrir samankomnir á nýjum stefnumörkunarfundi , þá mun vesalingur minn trauðla finna þann veginn.

En í næstu kosningum mun einhver bjóðast til að slá í gegn og í alvöru. Og þá hlaupum við til og trúum og fögnum því að allt sé betra en Íhaldið eins og hann sagði hann afi hans Guðmundar Steingrímssonar.

Þá sláum við í gegn svo um munar. 

Fleiri vísbendingar

í Vísbendingu. Þar rekur Leifur Magnússon verkfræðingur sögu leitarinnar að betri flugvelli en Reykjavíkurflugvelli.

Þegar menn létu Dag Bergþóruson fífla sig til að setja saman Rögnunefndina svokölluðu, sem hann eyðilagði sjálfur með nærveru sinni frá fyrsta degi, þá yfirsást öllum að það var margbúið að framkvæma þetta verkefni eins og kemur fram í grein Leifs. En nefndarskipunin var herbragð Dags B. til þess að komast hjá því að Reykjavíkurflugvöllur yrði stærsta kosningamálið eins og í stefndi.

 

"

Leifur Magnússon

verkfræðingur :

 

Í Visbendingu 3. ágúst s.l. birti ritstjóri í pistli sínum, undir fyrirsögninni „Ekkert er nýtt ...“, 57 ára gamlagrein eftir Valdimar heitinn Kristinsson hagfræðing, þar sem hann ræðir framtíð Reykjavíkurflugvallar. Valdimar var sérstakur áhugamaður um íslensk samgöngumál, og ritaði fjölda áhugaverðra greina um þau.Í greininni sagði m.a.: „Allt flug vallarsvæðið er um 300 ha. að stærð, og er það ekki svo lítið þegar haft er í huga að Reykjavík innan Hringbrautar er um 200 ha.“ Hér er um einhvern misskilning að ræða því það heildarsvæði, sem Reykjavíkurflugvöllur nær yfir, og er innan núverandi flugvallargirðingar, er aðeins 120,8 ha., samsvarandi 0,44% af öllu landsvæði Reykjavíkur, sem er 274,5 km2. Í greininni birti Valdimar þá tillögu sína til stjórnvalda „að hafa frátekið land svæði (fyrir nýjan flugvöll), sem hægt væri að hverfa til, þegar hagsmunir flugsins og Reykjavíkurborgar krefjast þess.“

Á þessum árum var það samdóma álit þeirra, sem sinntu flugmálum Íslands, að yrði Reykjavíkurflugvöllur lagður niður, komi aðeins eitt annað svæði raunhæft til álita fyrir nýjan flugvöll, Álftanes. Eftir farandi er stutt yfirlit um þróun þessara mála og málalyktir.

Nefnd árið 1960

 

Þann 11. júlí 1960 skipaði Ingólfur Jónsson samgönguráðherra fimm manna nefnd undir formennsku Árna Snævarrs verkfræðings „til að gera tillögur um framtíðarskipan flugvallarmála Reykjavíkur.“ Auk Árna voru í nefndinni fulltrúar Flugráðs, Flugfélags Íslands,Loftleiða og Félags Íslenskra atvinnuflugmanna. Nefndin skilaði skýrslu sinni 27. feb. 1962. Hún taldi eftirfarandi þrjá kosti vera mögulega:„1. Að flytja alla flugstarfsemi frá Reykjavík til Keflavíkuflugvallar og gera hann að miðstöð íslenskrar flugstarfsemi. 

2. Að nota Keflavíkurflugvöll fyrir utanlandsflug en Reykjavíkurflugvöll áfram fyrir innanlandsflug.

3. Að reikna ekki með í þessu sambandi neinum notum af Keflavíkurflugvelli í framtíðinni að öðru leyti en sem varaflugvöll fyrir flugvöll við sunnanverðan Faxaflóa.“

Nefndin hafnaði alveg fyrsta kostinum, og taldi jafnframt „mikið óhagræði“ af kosti nr. 2. Hún lagði síðan alla áherslu á þriðja kostinn, að byggja ætti stóran alhliða flugvöll á Álftanesi. Aðalflugbraut hans yrði til að byrja með 2.200m löng,en síðar lengd í 3.100m. Þverbrautin yrði fyrst 2.000m, en síðar lengd í 2.800m.Stjórnvöld tóku aldrei neina afstöðu til þessara hugmynda nefndarinnar.

Nefnd árið 1965

Þann 29. maí 1965 skipaði Ingólfur Jónsson aðra fimm manna flugvallarnefnd, en nú undir formennsku Brynjólfs Ingólfssonar ráðuneytisstjóra. Aðrir í nefndinni voru Baldvin Jónsson hrl., Guðlaugur Þorvaldsson ráðuneytisstjóri, Gústaf E.Pálsson borgarverkfræðingur og Sigurgeir Jónsson hagfræðingur. Nefndin skilaði skýrslu sinni 18. maí 1967, og var þar algjörlega sammála um að ekki kæmi til álita að flytja miðstöð innanlandsflugsins til Keflavíkurflugvallar. Hún klofnaði hins vegar í öðrum niðurstöðum sínum. Þriggja manna meirihluti (BI, GÞ og SJ töldu „hagkvæmustu framtíðarskipan flugvallarmála Reykjavíkur vera í megindráttum þá, að stuðst verði við tvo flugvelli, Keflavíkurflugvöll annars vegar, og Reykjavíkurflugvöll, og sennilega síðar nýjan flugvöll á Bessastaðanesi hins vegar.Á Keflavíkurflugvelli fari fram sú flugstarfsemi, sem krefst lengri flugbrauta en hægt er að sjá fyrir með hóflegum kostnaði inniá höfuðborgarsvæðinu eða veldur verulegri truflun á umhverfi sínu af hávaða, einkum að næturlagi.“ Þessi meirihluti studdi síðan svonefnda „X-tilhögun“, sem fól í sér flugvöll á Bessastaðanesi með tveimur flugbrautum, 1.800m og 1.400m að lengd. Tveggja manna minnihluti (BJ og GEP) töldu hins vegar æskilegra að byggja mun stærri flugvöll á Álftanesi, svonefnda „L-tilhögun“ með tveimur flugbrautum, 2.700m og 2.300m að lengd, og ætlaðan fyrir bæði innanlands- og millilandaflug.

Hannibal útilokar Álftanes

Stjórnvöld tóku enga afstöðu til tillagna Flugvallarnefndar 1965-1967 fyrr en Hannibal Valdimarsson félagsmálaráðherra skrifaði bréf til Skipulagsstjórnar ríkisins, dags. 1. júní 1973. Bréf hans endar á eftirfarandi: „Á l y k t a r o r ð: Í aðalskipulagi Bessa staðahrepps skal ekki gera ráð fyrir að flugvöllur kunni að vera staðsettur í landi Bessastaða, Breiðabólsstaða og Akrakots.“ Í framhaldi af þessu bréfi ráðherra ritaði Zóphónías Pálsson skipulagsstjóri bréf til samgönguráðuneytis, dags. 28. júní 1973,þar sem þessi „úrskurður félagsmálaráðherra“ var formlega kynntur. (Þess er hér að geta, að á þessum árum var Hannibal Valdimarsson bæði félagsmálaráðherra og samgönguráðherra). Að fenginni þessari niðurstöðu gat sveitarstjórn Álftaness aflétt öllum áður settum hömlum á byggð,sem í gildi höfðu verið vegna hugsanlegs nýs flugvallar á svæðinu. Áður en sveitarstjórn Álftaness var sameinuð bæjarstjórn Garðabæjar ályktaði hún ítrekað og afgerandi gegn öllum hugmyndum um flugvöll á Álftanesi. Þegar Loftleiðir hófu rekstur CL-44 skrúfuþotna í maí 1964 flutti félagið mið stöð flugrekstrar síns til Keflavíkurflugvallar. Hið sama gilti varðandi millilandaflug Flugfélags Íslands, þegar félagið hóf rekstur fyrstu Boeing 727 þotu nnar í júní 1967. Á undanförnum fimm áratug um hefur því þróun og skipan flugvallamála höfuðborgarinnar alfarið miðast við framangreindan kost nr. 2 í skýrslu Flugvallarnefndar 1960-1962. Á sama tímabili hefur gífurlega háum upphæðum verið varið í fjárfestingar á Keflavíkurflugvelli, bæði í flugvöllinn sjálfan og búnað hans,æog í flugstöðina og tilheyrandi þjónustubyggingar flugrekenda."

 

Hann er orðinn dýr hráskinnaleikur Dags B. með Reykjavíkurflugvöll. Tók hann þar við verki Ingibjargar Sólrúnar Gísladóttur sem leynt og ljóst gerði allt sem í hennar valdi stóð til að þrengja að flugvellinum og rýra möguleika hans á allan hátt. Samfylkingin er því óvinur Reykjavíkurflugvallar númer eitt og beitir öllum brögðum til að eyðileggja fyrir vellinum.

Píratinn sem heldur þessum meirihluta Dags B. og EssBjarnar sem var NB kosinn frá í kosningunum,  við völd án sýnilegrar greiðslu ber þyngri ábyrgð heldur en honum er greinilega ljóst sjálfum. En frá þessum fulltrúa hefur ekki heyrst hósti né stuna síðan hann tók við þessu hlutverki. Er það hugsanlega í stíl við aðra pólitík Pírata að sitja eins og uglur á kvisti og láta fólk halda að þeir séu að hugsa eitthvað merkilegt. En líklega er það lítið annað en að kinka kolli til þeirra Dags.B. bindislausa og EssBjarnar sem halda ótrauðir áfram niðurrifi sínu á Borgargildum sem einu sinni þótti við hæfi að hampa.

Og til viðbótar má upplýsa, að Reykjavíkurborg hefur ekki getað sannað eignarrétt sinn á neinu landi sem undir Reykjavíkurflugvelli er. Enda tólk Ólafur Thors við vellinum fyrir hönd íslensku þjóðarinnar úr hendi Breska heimsveldisins við hátíðalega athöfn 1947 þar sem ég var sjálfur vitni að og get því staðfest.

Reykjavíkurflugvöllur er því þjóðargersimi eins og 200 mílna landhelgin og Geysir í Haukadal. Þeir Dagur B. og EssBjörn ættu að halda krumlum sínum víðs fjarri vellinum því þeir eiga ekkert í honum eins og myndin sýnir.

Auk þess væri þeim hollt að fara að hugleiða að nútíma samfélag gengur ekki án samgangna. Hestvagnar sem samgöngutæki heyra sögunni til og hjólhestar leysa fátt annað en hreyfingarþörf fólks.  Borgarlíf gengur á skjótum samgöngum í lofti, á láði og legi. Gegn því tjóar ekki að snúa hjóli sögunnar aftur á bak eins og vinstrimanna er tíðum háttur.

Vísbending

er málgagn Benedikts Jóhannessonar verkfræðings sem hann hefur haldið úti af miklum myndarskap í aldarþriðjung.

Benedikt hefur sterka sannfæringu fyrir Evrópumálum og hefur verið að stofna nýjan flokk, "Viðreisn", sem á að koma Íslandi í Evrópusambandið. Benedikt á bandamenn á víð og dreif. Einn þeirra er Þorsteinn Pálsson sem eitt sinn var formaður í Sjálfstæðisflokknum. Í Vísbendingu hinn 10. ágúst 2015 tekur Benedikt upp klausu eftir Þorsteinn sem hann skrifaði á Hringbraut:

: „Hagsældin á Íslandi ræðst mest af

því að við létum hugsjónir um lýðræði og

viðskiptafrelsi ráða því hvar við skipuðum

okkur í sveit.

Aðild okkar að innri markaði Evrópusambandsins

og Atlantshafs-bandalaginu eru kjarnaatriði

í þeim efnum. Þar hafa fléttast saman hugsjónir og

hagsmunir. Trúlega hefur engin atvinnu-

grein notið ávaxta utanríkisstefnunnar í

ríkari mæli en sjávarútvegurinn.“

Þá hafa menn það á hreinu hvernig Þorsteinn Pálsson sér framtíð Íslands. Innan innri markaðar Evrópusambandsins sem er grannt skoðað tollabandalag sem stefnt er gegn afganginum af heiminum.

Falla mönnum utan Samfylkingarinnar almennt svona sjónarmið? Sér ekki meirihluti Íslendinga þá fyrir sér Ísland sem frjálst og fullvalda ríki, sem velur sér viðskiptavini eftir hagsmunum beggja. Fyrir mitt leyti er himinn og haf á milli mín og slíkra sjónarmiða sem auðvitað skiptir engu máli lengur.

En Vísbending er fyrirtaks rit og afrek í sjálfu sér hjá Benedikt að hafa gefið það út svona lengi. 

 

2.8 % kauphækkun

handa öllum landsmönnum ef fyrirtækin fylgja forystu IKEA.

Ekkert verkfall, ekkert tap.

Ef fyrirtækin gera þetta öll, hvaða áhrif myndi það ekki hafa ef allir samþykktu að lækka kaupið sitt um 0.3%? Sömu styrkingaráhrif og höfuðstólslækkun skulda. Og svo gætu bankar, ÍLS og lífeyrissjóðir ákveðið að lækka verðtrygginguna á húsnæðisskuldum um 0.3 %.VISA myndi lækka kortagjöldin um 0.3 %.Ríkið myndi lækka stimpilgjöld um sama. Margt smátt gerir eitt stórt.

Lán heimilanna  myndu fljótlega lækka um allt að 3.5 % í stað þess að hækka. 

Lækkun kostnaðar um er ígildi kauphækkunar.

 

Heja Sverige,Heja IKEA!

það er ólýsanlega glæsilegt það sem IKEA gerir í morgun. Lækkar verð um leið og Már hækkar stýrivextina vegna verðbólgunnar.

Og IKEA skorar á aðrara verslanir að lækka líka. Gylfi Arnbjörnsson tekur undir áskorunina. Megum við heyra í Þorsteini Víglundssyni líka?

Þetta er þvílíkt framtak sem getur lyft Grettistaki af þessari þjökuðu verðbólguþjóð.

Ef ASÍ myndi nú í samvinnu við SA útbúa vandað flagg sem megi hengja upp á verslunarglugga þeirra verslana sem taka áskoruninni. Einskonar heiðursmerki. Svo að viðskiptavinir geti valið, ekki bara anað áfram eins og við erum vanir.

         

                 HÉR HEFUR VERÐIÐ VERIÐ LÆKKAÐ X%

                  Á ALLRI INNFLUTTRI VÖRU     

Tökum á með þessu átaki og spyrjum hreinlega öll í verslununum hvort hér eigi ekki að lækka? Heimtum svör en ekki útúrsnúninga. Gerum þetta strax svo þetta gleymist ekki.

Má ég sjá bensín-og olíulækkun takk? Einhverja lækkun allstaðar. Það er besta kjarabót sem nokkur mannsbarn á ÍSlandi getur fengið. Og þetta gæti verið bara byrjunin á lækkun verðtryggðra lána, gengishækkun krónunnar júneimit!

Heja Sverige, heja IKEA!

 

Út með Ólaf?

til að ræða málamiðlun í makrílnum. Er það ekki það sem okkur vantar núna?

Er ekki ráð að Forseti Íslands komi sér í opinbera heimsókn til Rússlands? Þar mætti ræða fleira en heimsmálin? Þar mætti reyna að sjattla þessa viðskiptadeilu alla saman?

Er það ekki ósköp lélegt fyrir Íslendinga að leggjast á hnéin fyrir kommisörum ESB og grátbiðja um einhverjar tollalækkanir eða þá styrki því ég hélt að tollar hefðu nú horfið með EES? En það er hugsanlega eitt af því sem maður veit ekki um ESB?

Ég trúi því að Forseti Íslands, dr.Ólafur Ragnar Grímsson, sé rétti maðurinn til að tala við Pútín mikla af Krímskaga. Þeir geta farið út að skokka saman og spjallað það sem aðrir meira hægfara mega ekki heyra.

Út með Ólaf?

 

Nýtt skip í flotann

er Fafnir Viking, Reykjavík, sjósettur í Istanbul á dögunum.

 

  Þetta er annað skip Fafnir Offshore sem er í eigu íslenskra og erlendra fjárfesta. Fyrra skipið sem nefnist Polarsyssel, er í langtímasamningi hjá sýslumanningum á Svalbarða eina 9 mánuði á ári. Það er með risastórum þyrlupalli og útbúið sem flugstöð, lúxushótel,slökkvilið,björgunarskip og flutningaskip.

Bæði skipin eru með svokallað DPS kerfi, dynamic positioning system  sem gerir þeim kleyft að halda staðsetningu í sjó. En slíkt er nauðsynlegt þegar þau leggja að olíuborpöllum þar sem engu má skeika.  Flókinn skrúfu-og tölvubunaður sér til þess. Bæði skipin eru sérstaklega styrkt til starfsemi á hafísslóðum í Norðurhöfum. Hefur Polarsyssel þegar farið í slíkan leiðangur við erfið skilyrði og staðist allar raunir.

Fafnir Viking, Reykjavík, er svo önnur kynslóð skipa. Það gengur fyrir rafmagni að hluta, og er því svonefnt hybrid skip. Það getur siglt lengi fyrir rafkraftinum einum. Skipið er því hagkvæmara í rekstri en mörg önnur. Skipið fer nú til Leirhafnar í Noregi þar sem smíðinni verður lokið á næsta ári í skípasmíðastöð Íslandsvinarins Per Sævik, Havyard, sem hannar þessi skip.

Vonandi fer eitthvað að gerast í skipaskráningamálum Íslendinga. Það er ekki vansalaust að ekkert flutningaskip er skráð hérlendis vegna ósveigjanleika íslenskra stéttarfélaga að manni skilst. Gamli Freyfaxi varð að hafa eina þrettán menn um borð þegar hann var hér. Nú siglir hann um heimsins höf með sjö manns. Annað eftir þessu.

Þó að nafnið Reykjavík standi á Fafnir Viking þýðir það ekki endilega að skipið verði skráð þar. Það veltur á Alþingi hvort það gerir eitthvað í skráningarmálum kaupskipa sem gerir flöggun mögulega. En íslensku eigendur Fafnis Offshore  hafa allir metnað fyrir Íslands hönd og vilja skrá sín skip hérlendis eins og Færeyingar frændur vorir geta gert við sín olíuskip. Alþingi gæti þessvegna spurt þá ráða ef þetta þvælist fyrir því.

Það er auðvitað ekki sami dansinn á rósum nú í olíuiðnaðinum og var þegar gerður var smíðasamningurinn um Fafnir Viking.Það gefur auga leið að allt gengur hægar þegar verð á olíu hefur fallið um meira en helming. 

Fafnir Offshore og frumkvöðlinum Steingrími Erlingssyni er óskað heilla með þessa útgerð. Það er ekki ónýtt fyrir hið unga félag að fyrra skipið er í traustum samningi við norska ríkið og í góðum rekstri. Tæknilegir yfirburðir seinna skipsins munu gera margan gamlan dallinn úreltan og því er engin ástæða til svartsýni. 

Framtíðin er rétt að byrja hjá Fáfni Offshore með nýju skipi!

 

 

 

 

Hér er myndband af viðburðinum. Má sjá að Tyrkir faðmast yfir því að allt gengur vel.

 

https://www.youtube.com/watch?v=SG-DXMRJF7U&feature=youtu.be