Móralskur réttur ?

Á innsíðum eldri breskra bóka sér maður stundum: "The moral right of the author has been asserted."

Ég er að spá í skuldabréf sem Íslandsbanki, nú alfarið eign ríkisins í skjóli óstaðfestra neyðarlaga, er að rukka venjulegt fólk um.   Eða þá nýja Kaupþing sem er  að rukka sama fólkið sem tók lán hjá gamla Kaupþing, sem er í safnheitinu sem er kallað gömlu bankarnir.

Þetta voru bankarnir okkar gömlu hluthafanna í Straumi, Landsbankanum, Glitni og Kaupþingi. Þessir bankar hafa aldrei verið lýstir gjaldþrota og hlutabréfaeignin þessvegna fullgild í augum skattyfirvalda og verður eignaskattskyld þegar Lilja er öll kveðin.

Skilanefndir svokallaðar, sem ríkisvaldið setti í valinkunna gæðinga sína inn í gömlu bankana með ofbeldi, hafa þær ekki framið þjófnað úr búi þeirra með því að afhenda nýju uppvakningunum skuldabréf úr búi gömlu bankanna á hrakvirði, sem á síðan að mynda hluta af efnahags þeirra á fullu verði? Hver  skyldi  reikningurinn verða fyrir nefndarstörfin ? Lýkur þeim nokkurn tímann meðan maður getur fláð köttinn ?

En var  þessum skuldabréfum ekki bara  einfaldlega stolið úr búi gömlu bankanna og síðan er erlendum kröfuhöfum sagt að allt sé tapað og þeir geti étið það sem úti frýs. Þannig er til dæmis með skuldir stofnfjárkaupenda í BYR, en Íslandsbanki er sagður hafa fengið þær kröfur á 10 % af nafnvirði frá Glitni en ætlar að rukka þær "in full"  hjá skuldurunum úr stofnfjárútboði BYR  í október n.k.

Og þeir stofnfáreigendur í BYR leysast ekki jafn greitt frá hlutafjárloforðum sínum og HvítaBirna bankastjóri Íslandsbanka, sem sagði bara : "Allt í plati" þegar spurt var um hlutafjárskuldbindingar hennar sjálfrar í Glitni sem aðrir þurftu að borga "in full " en ekki hún. Eða þá Bjarni Ármannsson sem þeir afskrifa á 800 milljónir sem maður hefur heyrt. Hafa menn nokkuð gáð að því hvort leynist einhver Bjarni á bak við Magma ?

Hver er raunveruleg staða hluthafa í gömlu bönkunum? Félög í vanskilum eru ekki sjálfkrafa gjaldþrota. Gömlu bankarnir voru í vanskilum en ekki gjaldþrota þegar ríkisstjórnin lokaði þeim með ofbeldi. Síðan hefur verið rænt, stolið og týnt niður af öllum eigum þeirra, föstum og lausum. FIH  í Danmörku hefði getað rukkað fyrir ríkið allan tímann.

Ég spyr: Ber fólki skylda til að borga gömul skuldabréf fullu verði uppi í nýja Íslandsbanka eða Kaupþingi, sem voru hrakvirt um leið og þeim var stolið útúr búi upphaflega bankans ? Hver á að njóta afsláttarins ?Ríkisbankinn ? Gamli bankinn ? Ekki skuldarinn í gjaldborginni sinni, svo mikið er víst.

Af hverju var hægt að ræna gömlu hluthafana öllum eigum gamla bankans með einhverjum neyðarlögum sem svo ekki endilega standast stjórnarskrá ? Ef hún er þá pappírsins virði þegar allt kemur til alls og Óla forseta. 

Ég held eftir því sem ég hugsa meira, að stjórnvöld og Seðlabankinn hafi hrundið hruni bankakerfisins af stað með aðgerðum sínum. Þeir gátu gert þetta öðruvísi en gerðu það ekki. Afleiðingin varð skelfileg fyrir almenning eins og allir vita og sjá og tjónið núna margfalt það sem hefði verið mögulegt. Ef Glitnir hefði ekki verið felldur þá hefði þetta ekki skeð svona eins og það skeði. Nú borgar þjóðin skuldir óreiðumannanna hvað sem Davíð sagði.

Menn hafa  getað keypt kröfur af fallítt  fyrirtækjum og rukkað þær inn.   Helgi Hjörvar, Samfylkingarþingmaður og Hrannar Pétursson, aðstoðarmaður núverandi forsætisráðherra  rukkuðu   útistandandi kröfur tímaritsins Þjóðlífs hjá fólki sem hafði ekki einu sinn pantað ritið. Félag þeirra Arnarson & Hjörvar varð gjaldþrota með nærri 75 milljónir þá 1994.   Nú eru þessir menn í æðstu metorðum, annar á Alþingi og hneykslast á  hruninu en hinn er hægri hönd forsætisráðherra, að leysa fjárhagsvanda þjóðarinnar. Já, Jesús kastar öllum mínum syndum bak við sig, sungu þeir í Hjálpræðishernum. Er ekki Íslandsbanki ekki að leika sama hlutinn með skuldabréfin vegna BYR? Er þetta þjóðlegur stíll eða Þjóðlífsstíll?

Er til móralskt - réttleysi til mótvægis við hið breska hugtak um móralskan rétt ? Þú ert samkvæmt því réttlaus gagnvart ofbeldi stjórnmálamanna. Þeir telja sig eiga hinn móralska rétt á öllum lögum sem þeir setja, án þess að það þurfi að staðreyna hann eins og með höfundarréttinn.

2x10 ráðherravit !

Ég sagði um daginn að Margrét Þorbjörg kona Thors Jensen hefði haft tíu ráðherravit af þeirri tegund sem nú væra í boði. Hún kunni nefnilega að bíða. Þetta var eftir að ég hlustaði á Árna Pál í sjónvarpinu lýsa því sem hann vildi gera til að létta vanda heimilanna.

Í kvöld varð ég vitni að viðtali við Katrínu Júlíusdóttir iðnaðarráðherra.  

Hún var spurð hvort hún ætlaði að virkja neðri Þjórsá. Hún svaraði að hún ætlaði ekki að virkja þar fyrir álver. Hvort hún ætlaði að virkja þar yfirleitt?  Nei hún var ekki reiðubúin að svara því þar sem hún væri í viðræðum við heimamenn fyrir norðaustan hvernig ætti að nota orku þar til atvinnuuppbyggingar í heimabyggð.  Öll orka sem þar væri skyldi fara til framkvæmda í heimabyggð. Atvinnuuppbygging í heimabyggð gæti til dæmis verið  efnalaug sem yrði orkukaupandi  sem hún getur hugsað sér sem orkukaupendur og væntanlega styður Steingrímur það form iðnaðar úr því hann vill ekki álver. 

En orka úr Þjórsá færi ekki í álver, ef hún yrði virkjuð. Katrín vildi ekki svara hvort Þjórsá yrði þá yfirleitt virkjuð. En það væri einhugur í ríkisstjórninni varðandi virkjanir. Hvort hún styddi  álver á Bakka sem Steingrímur er á móti ? Það  fékkst ekki svar við því en það er einhugur í ríkisstjórninni.

En hinsvegar var það upplýst að hún ætlar að taka þátt í markaði ESB árið 2012 með losunarkvóta O2 og það væri ekkert vitað um hvað við þyrftum að kaupa af kvóta ef við ætluðum að byggja álver.

Ég dreg ályktanir fyrir mig varðandi álver á Bakka og virkjanir í neðri Þjórsá:

Steingrímur er á móti álveri á Bakka og það er einhugur í ríkisstjórninni= Katrín Júlíusdóttir er þá líka á móti álveri á Bakka. Það er einhugur í ríkisstjórninni og því gildir sama  með Jóhönnu. Árna Pál, Katrínu hina, og Hóla-Jón og hvað þeir nú heita sem hér eru ótaldir ráðherrar.= ríkisstjórnin er á móti álveri á Bakka. 

Katrín er á móti því að virkja í Neðri Þjórsá fyrir álver. Það er einhugur í ríkisstjórninni= Ríkisstjórnin er á móti því að virkja í neðri Þjórsá fyrir álver=Ríkisstjórnin er á móti álverum.

Og þá er spurningin hvernig verður með rafmagn fyrir  álver í Helguvík og stækkun í Straumsvík?Ríkisstjórn Íslands ætlar ekki að virkja fyrir álver. En hún er í viðræðum og ferli með það mál allt.

Er þetta ekki akkúrat vinstristjórn eins og við hinir eldri munum þær best? Veit nokkur  hvert þær eru að fara?

Ég hugsa til hans Tryggva Ófeigssonar sem sagði: "Kratar eru verstir"

Við erum komin á losunarkvótamarkað ESB án þess að ég  hafi heyrt á það minnst fyrr. Við töpuðum milljarði á kratabröltinu í framboðinu til öryggisráðsins. Utanríkisráuneytiskostnaðurinn hefur nær  tvöfaldast á skömmum tíma undir stjórn krata.  Verðum við ekki komin inn í ESB án þess að vita af því ? Undir stjórn krata.

Stiglitz spyr hvort við þurfum lánin sem Steingrímur krefst af AGS. Mér fannst hann draga það í efa og að krónan okkar væri bara besta skinn.  Ég spyr er ekki líka best að  ganga úr EES og stjórna ferðinni í innflytjendamálum til þess að hefta aðsókn A-Evrópubúa í yfirfulla spítalana okkar? Ögmundur ætlar í stórfelldan niðurskurð þar á næsta ári og þarnæsta. Og það er einhugur í ríkisstjórninni. Er ekki nærtæk sparnaðaraðgerð að fækka sjúklingunum ? Létta á aðsókninni ? Þarf þá ekki að hækka skatta minna?

Þurfum við nokkuð á AGS að halda ?

Vantar okkur ekki aðkallandi svona 2x10 ráðherravit?

Lán eða ólán ?

Fyrirferðamikil í samfélaginu er vaxtaumræðan. Allt bjargast ef hægt er að fá lán á lágum vöxtum. Allt miðast við að skulda og slá lán. Enginn talar um að spara eða varðveita peninginn sinn.Jón Magnússon hrl. til dæmis er búinn með heilan stjórnmálaferil sinn í baráttunni gegn verðtryggingu án þess nokkurntímann að svara grundvallarspurningum um lánskjör,vexti og sparnað.Margir aðrir hamast gegn verðtryggingu Ólafs Jóhannessonar án þess að líta á málið í heild.

Hvort vilja menn verðtryggt lán með lágum vöxtum, bæði hjá íbúðalánasjóði eða myntkörfulán eða þá engin lán ?  Á hvaða vöxtum vilt þú sem lest þetta lána  lána mér þína peninga til tuttuguogfimm ára án verðtryggingar ? Tilboð óskast !

Af hverju má einstaklingurinn og lánveitandinn ekki semja um það sjálfir  hvaða lánsform eru notuð ? Þetta, hitt eða ekki neitt ? Vill enginn ræða muninn á lánskrónu eða eigin krónu ?Margir peningar geta orðið atvinnulausir og lækkað vexti. Fáir peningar skapa eftirspurn og hærri vexti.

Einn vinur minn hafði þetta um vexti að segja: Vextir eiga að vera svo háir sem til eru fífl að borga. Einfalt lögmál frjálsra viðskipta.

 Hver á að mynda sparnaðinn sem er grundvöllur allra útlána  ef engin trygging er í boði? Eða kemur lánsfé af himnum? Lán eru yfirleitt ólán þess sem fær ef ætlunin er að borga til baka. Í gamla daga fengu bara útvaldir lán í ríkisbönkunum og borguðu aldrei neitt til baka eins og SÍS. Verðtryggingin færði lánamarkaðinn að fólkinu og gerði peningasparnað mögulegan i fyrsta sinn í sögu lýðveldisins. Án hennar hrynur allt kerfið. Þetta hefur virkað ágætlega allt fram að hruninu núna.

Núna rukka nýju ríkisbankarnir verðtryggðu lánin inn af hörku og gera fólk gjaldþrota. Og þetta eru lán sem þeir stálu úr gömlu bönkunum á jafnvel 10 % af nafnverði. Við hluthafarnir í gömlu bönkunum töpuðum mismuninum. Þjóðfélagslegt réttlæti Sláum skjaldborg um heimilin sagði heilög Jóhanna !

Það er gert á einni helgi að skipta hér um mynt og taka upp dollar. Við höfum áður skipt um gjaldmiðil á einni helgi. Ég man vel eftir því þegar það var gert. Ekkert mál.  Afnema verðtrygginguna þar með. Loka Seðlabankanum og breyta honum í bílastæðahús. Af hverju ekki ?

En hvar á að taka peninga fyrir óraunhæfum kjarasamningum framtíðarinnar ? Verðum við ekki að gefa út aðra mynt samhliða nýju myntinni. Verkfallakrónur ? Með frjálsu gengi. Kauphækkanir umfram hagvöxt verða greiddar í svoleiðis krónum en ekki dollurum.

Það getur orðið lán í óláni eða öfugt.

 

Samhengi?

Ég hlýddi á Álfheiði Ingadóttur lýsa því hvernig hún ætlaði að láta lífeyrissjóðina kosta byggingu nýs hátæknisjúkrahúss eins og Davíð ætlaði að byggja fyrir símapeningana á sinni tíð.  Þar fengju margir vinnu við að teikna, grafa,smíða og steypa. Allt í rósrauðu hjá Álfheiði.

En til hvers ?

Ögmundur kom skömmu seinna í útvarpið og boðaði mikinn niðurskurð á Landspítalanum næsta ár og þarnæsta líka. Lokun deilda og skurðstofa en ekki eiginlega enga fækkun starfsfólks að sjálfsögðu þar sem það er margt  í hans verkalýðsfélagi. Allt biksvart hjá Ögmundi.

Þarf þá nýjan spítala ? Ef sá gamli stendur tómur, hverjir verða á þeim nýja ? Er ekki bara nóg að fækka þjóðinni sem mest með útflutningi fólksins. Nýr útflutningatvinnuvegur gæti orðið útflutningur ellilífeysiþega á sósíal Norðurlanda. Lífeyrissjóðir landsins gætu keypt íbúðarblokkir fyrir þá í þessum löndum og komið þeim af okkur þannig. Léttum þrýstingnum af heilbrigðiskerfinu.

Get ég komist að einhverri annarri niðurstöðu en þeirri, að jafnvitlausasta lið landsins sé samankomið í ríkisstjórn ? Engin stefna, ekkert samhengi, haltu mér slepptu mér í hverju máli. Atvinnuleysi, fjármálakreppa, fyrirtækjagjaldþrot, ríkisvæðing. Niðurskurður i heilbrigðiskerfinu en vöxtur í öllu öðru. Nýjar spítalaframkvæmdir  fyrir 50 milljarða úr lífeyrissjóðunum. Hvaðan skyldi þá lífeyririnn eiga að koma ?

Allt fyrir Icesave og ESB.

Sjá margir  samhengið ?

Hagfræðingur hryllir sig !

Ég greip inní samtal við Ólaf Ísleifsson á Útvarpi Sögu. Hagfræðingurinn sá allt svo svart að ég held að fyrir hann sé ekki annað að gera en að panta sér fargjald beint til útlanda, aðra leiðina. Mig hryllir við því að svona menn gangi lausir og geri okkar auma lýð hræddan við að vakna á morgun!

Hann sagði okkur engra kosta völ annað en að fara að forskrift AGS um að keyra saman ríkisútgjöldin, stórhækka skatta og vera svo bjartsýn og þrauka. Þeir sem nenna væntanlega. Halda í krónuna sem má fella til að skerða lífskjör eftir því sem þurfa þykir. Keyra allt niður til andskotans og lengra ef það kemst. Þvílíkan talsmann ríkisstjórnarinnar hef ég ekki fyrr heyrt, mikið ef hann slær ekki Steingrím sjálfan út.

Þetta er hagfræði andskotans sem ekki gengur upp ef þjóðin á að lifa af. Það eina sem hægt er að gera til þess að þessi áætlun hagfræðingsins og ríkisstjórnarinnar gangi upp er að fækka fókinu í landinu. Ganga úr EES, reka alla útlendinga úr landi fyrst og styrkja alla Íslendinga sem vilja flytja úr landi til þess líka. Kótagreifarnir afla þá meir gjaldeyris fyrir hræðurnar sem eftir eru. Enga fleiri skóla þarf að byggja, engin fleiri hús, enga fleiri vegi. það er nóg af öllu. Lokum Vegamálaskrifstofunni í núverandi mynd, engin fleiri jarðgöng, engar lóðir, næg sjúkrarými á öllum spítölum. Og lokum  líka þeim Háskóla sem Ólafur Ísleifsson hefur sitt lifibrauð af. Þessi þjóð hefur ekki þörf fyrir bókvit heldur strit á ökrunum, einskonar kambódiskt módel þar sem menntun er óvinur fólksins sem skal una sinni þrælkun.

Annar kostur er að fá erlenda fjárfestingu til landsins og reyna eftir föngum að efla atvinnu með öllum þeim ráðum sem því tengjast.  Það þarf að loka Samkeppniseftirlitinu tafarlaust, þær kárínur sem við erum búnir að fá af starfsemi þeirrar stofnunar eru endalausar . Stofnun sem leyfði samruna Hagkaups og Bónusar og gerði útrás Baugs og fjárglæfra Jóns Ásgeirs að veruleika,  er búin að fyrirgera sjálfri sér og óþarfi að láta hana leggja landið í rúst með því að hindra samruna Orkuveitunnar og Hitaveitu Suðurnesja, bæði opinber fyrirtæki í hagræðingarferli. Koma þá dreissugir embættismenn hjá þessari stofnun og eru með kjaft og eyðileggja nauðsynlega hagræðingu. Leggjum þá niður snarlega og finnum þeim önnur störf enda gersamlega óhæfir og óþarfir með öllu.

Mig hryllir við þegar hagfræðingurinn hryllir sig með þessum hætti. Það er ekkert nema hryllingur framundan ef þessi öfl sem Ólafur og Steingrímur J standa fyrir . Fái þeir að ráða ferðinni þá er greiðsluþrot ríkisins framundan og  óhjákvæmileg  ef þessi hagfræðistefna fær að ráða hér til frambúðar. 

Skrif fyrir Skattfé !

Aftan á Baugstíðindum skrifar Þórhildur Elín mikinn pistil um það hvernig klárarnir leit þangað sem þeir eru kvaldastir. Hún lýsir  því sem hún kallar Stokkhólmsheilkennið sem er einskonar vísindaorð um gamla máltækið okkar.

Hún lýsir því hvernig fólki fór að líka við mann sem hélt því í gíslingu og hótaði að drepa það ef löggan ryddist inn til hans. Fólkið fór auðvitað að elska manninn en hata lögguna sem var vond við manninn.

Þetta verður henni ástæða til að yfirfæra þetta á Sjálfstæðisflokkinn í heild sinni. Hún er yfir sig hneyksluð á því hversvegna fólkið þjappar sér um flokkinn eftir að hann hafði stjórnað því í átján ár sem endaði í hruninu. Sem sagt átján ár í mesta góðæri Íslandssögunnar skipta engu máli hjá þessari kommakellingu. Það er bara hrunið sem skiptir hana máli og svo hatrið á Sjálfstæðisflokknum.

"Góðir hálsar, samkvæmt fréttum nýliðinnar viku mælist Sjálfstæðisflokkurinn nú stærsti stjórnmálaflokkur Íslands. Sá sami flokkur og stýrði landinu undanfarin átján ár og átti drýgstan þátt í að koma okkur í þær efnahagslegu ógöngur sem við nú erum stödd í. Þrátt fyrir að uppkomnum Íslendingum muni ekki endast ævin til að greiða fyrir tjónið, telur næstum þriðjungur kjósenda flokkinn traustsins verðan. Kannski er Stokkhólmsheilkennið útbreiddara mein en nokkur gat ímyndað sér."

Hvað skyldi þessi kona hafa verið að bardúsa þessi átján ár ? Hvenær gerðist hún Baugsþý ?

Skyldi hún ekkert hafa heyrt um aðkomu þess félags og Fréttablaðsins að hruninu ? Skyldi hún ekki geta spurst fyrir um flokksskírteini Sigurðar Einarssonar, Finns Ingólfssonar,Ólafs Ólafssonar, og Jóns Ásgeirs Jóhanessonar  í Sjálfstæðisflokknum ? Ég nenni ekki að eyða frekari orðum á ómerkilegan vaðal þessarar konu og Baugspenna. Hún myndi tæpast geta  ekki skilið meira í stjórnmálum fyrir því.

Það er akkúrat þetta sem Davíð átti við með fjölmiðlafrumvarpinu en peningavald Baugs átti þátt í knésetja´með Óla "forseta". Með peningum er hægt kaupa sér leigupenna til að framleiða róg og lygi endalaust. Fréttablaðið er rekið á kostnað skattgreiðenda til að reka hatursáróður gegn Sjálfstæðisflokknum, fyrir ESB og sakleysi Bónusfeðga. Heilsíðuauglýsingar frá samsteypunni halda því á floti frá degi til dags. Ef við erum vondir þá er Mogginn verri !  

Það virðist þessari konu algerlega  hulið að þessi skrif hennar  er verið að framleiða fyrir mína skattpeninga í  Baugsmiðlinum meðan fréttir eru um neyðarástand á Landspítalanum vegna fjárskorts og forsíðunni. Hún gerir sér ekki grein fyrir því hvað stjórnmálaflokkur er. Skyldu stofnendur Sjálfstæðislfokksins fyrir áttatíuárum hafa séð fyrir fæðingu þessa ritsnillings ríkisfjölmiðilsins ? Ég hef allavega ekki neitt Stokkhólmsheilkenni gagnvart skrifum blaðsins og verð ekki evrópusinni né krati af þeim.

Hvað á þessi ríkisvæðing að halda lengi áfram ? Hvenær á að fara að loka gjaldþrota fyrirtækjum og bönkum í stað þess að gera þau út á kostnað almennings?

 Ef blöð eru komin á hausinn eiga þau þá ekki bara að hverfa eins og Þjóðviljinn, Tíminn, Alþýðublaðið, Þjóðvörn og hvað þau hétu öll áður en pilsfaldakapítalisminn hélt innreið sína og blaðamenn urðu jafn gáfaðir og þeir halda að þeir séu um þessar mundir?

ESBé-vaðir.

Ég fer í smiðju Gunnars Rögnvaldssonar og greinina hans um að Evra hindri atvinnusköpun sem ég hvet alla til að lesa.

 Frðrik I Pedersen er hagfræðingur þeirra ASÍ Í Danmörku. Hann segir:

"Við álítum að seðlabanki ESB eigi að lækka stýrivexti núna til að styðja við vöxt og atvinnu". Ef ekkert er gert þá mun ESB tapa mörgum vinnustundum. Tapið verður stærra en tölur okkar sýna því fjöldi vinnustunda á hvern vinnandi mann hefur fækkað vegna þess að vinnuvikurnar verða styttri og styttri og hlutastörf verða meira og meira algeng. Afleiðingarnar eru stórar, eða sem nemur 11 milljón manns eins og er. Það eru því mikil auðæfi sem fara í súginn," segir Pedersen. (Tillögur Steingrím J:Hærri skatta, samdrátt ríkisútgjalda)

 

"Seðlabanki ESB viðhefur stranga peningapólitík til þess að reyna að halda verðbólgunni niðri á tveimur prósentum, en Pedersen bendir þó á að laun hafa hækkað minna en verðbólgan þegar búið sé að hreinsa framleiðniaukningu út úr tölunum. Launakostnaður fyrirtækja miðað við framleiðsluverðmæti hefur því aðeins hækkað um eitt prósent á síðustu árum. En það eru sérstaklega hin lágu laun í Þýskalandi sem draga allt niður. "Svo það er ekki vinnumarkaðurinn sem er verðbólguskapandi" segir Pedersen.

 

Það er nokkuð sýnilegt að ESB er á hraðri niðurleið til stöðnunar og verðbólgu. Verðlag í Danmörku er 40 % hærra en í Þýzkalandi og helmingi hærra en í Rúmeníu. Hvernig í veröldinni ætla þeir að halda þessum óskapnaði saman?Ð Ef Þjóðverjar fengju að greiða atkvæði um að kasta evrunni og taka upp gamla markið þá yrði það yfirgnæfandi samþykkt. Þeim er bara haldið niðri á gömlu þýzku hlýðninni, þeim þykir vænt um landið sitt, drekka bjór en ekki kaffi á kvöldin vegna þess að Bismark lagði skatta á kaffi því hann sagði að menn brugguðu byltingar á kaffihúsum en ekki á bjórhúsum.

 

Ef Danir skæru á tenginguna við evruna, þá myndi krónan þeirra falla og Danmörk myndi taka við sér og framleiðnin aukast svo mikið að innan fimm ára myndi gengið hafa hækkað aftur. En kratar eru kratar sama hvar þeir eru.

 

Það er íslenzka krónan sem gerir Ísland svona dynamiskt, þessvegna getum við náð okkur útúr þessu kviksyndi. Það eru hinsvegar innlendu skæruliðahóparnir, sem kalla sig stéttarfélög sem eru krónunni hættulegust. Engum þykir nógu vænt um hana til þess að halda  aftur af að hækka hjá sér bara nógu mikið.  Alveg í stíl við það sem Hanna Birna gerir með 55 % hækkun á kaffinu í Sundlaugunum.

 

Inn í þetta batterí ESB, ætla kratarnir og taglhnýtingur þeirra Steingrímur stefnulausi að keyra okkur með illu eða góðu. Spænskt atvinnuleysi er það sem þeir vilja sjá hér. Danska stagflation. ESBé-vaðir kratarnir!

 

Ég hvet alla til að kynna sér rannsóknir Gunnar Rögnvaldssonar á því sem raunverulega er að gerast á Evrusvæðinu. Tengill hér á síðunni.

 

OECD-enn á ferð!

OECD er mér sagt með einhverja íslenzka háskólamenn á launum hérlendis til að skrifa um íslenzk efnahagsmál og gefa þeim vikt með þessum flotta stimpli. Oftar en ekki eru þessi álit  misvísandi. Mig minnir að þeir hafi ekki séð hrunið fyrir frekar en ég.

Nú segja þessir menn: Íslendingar, dragið saman ríkisútgjöld. Hækkið skatta. Gangið i ESB og takið upp evru.

Ef við drögum saman ríkisútgjöld í kreppu og atvinnleysi þá eykst atvinnuleysi og kreppan magnast. Ef við hækkum skatta á sama tíma, þá minnkar skattstofninn og atvinnuleysi vex. Til hvers þarf ríkið aukna skatta ef útgjöldin snarminnka ?

Ef einhver getur fært rök með því að skattahækkanir hafi örvandi áhrif á atvinnustigið og leysi kreppuna, þá væri gaman að heyra í honum.  Ég undanskil Steingrím J. eða nokkurn úr ríkisstjórnarflokkunum. Við þá er ekkert hægt að rökræða um hagfræði.

Fyrir mér er þetta álit OECD, hver sem annars skrifar það, hrein vitleysa, efnahagslegt bull,-jafnvitlaust eins og sú hugmynd að taka upp evru eða ganga í ESB.

 Við þurfum súrefni og aukinn bruna í kötlunum.

Fullan þrýsting!

Áfram Ísland !

Útaf með OECD !

Hanna Birna gegn verðbólgu !

Á liðlega hálfu ári hefur kaffibollinn í Sundlauginni í Laugardal hækkað um 55 % .

Er þetta framlag meirihlutans í Borgarstjórn til að reyna að halda aftur af verðbólgunni, sem er versti óvinur láglaunafólksins ?

Kaffið er ennþá frítt fyrir alla gesti í Kópavogi ef einhver vill vita það.

Megum við gamlingjarnir í Laugardal ekki koma með okkar Neskaffi sjálfir og hita okkur eigin kaffi á morgnana til að drýgja ellistyrkinn. Er ekki hægt að verðjafna kaffið í Laugardal við Ráðhúsikaffið ?

Skyldi þessi kaffihækkun í Sundlaugunum leiða til stýrivaxtalækkunar og gengisstyrkingar?

Hanna Birna, hækkaðu hægar!