Hverjir fá leiðréttingar Framsóknar?

eru spurningar sem Hjörtur Gíslason blaðamaður veltir fyrir sér í Mbl. í dag.

Þeir sem eru búnir að missa allt til dæmis? Þeir sem tóku við lánunum að skuldurum þrotnum á lánum sem tekin voru á leiðréttingarárunum 2004-2008?

Til Sjálfstæðismanna beinir hann einnig spurningunni hverjir eigi að fá skattafsláttinn?

Án þess að ég svari fyrir Sjálfstæðisflokkinn hef ég skilið það þannig að allir í hópnum megi láta séreignarsparnaðinn renna inn á höfuðstól húsnæðsiláns síns og þannig grynnka á skuldinni með skattfé. Það sem ég veit ekki enn er hvort sá sem missti húsið og lánið með því fái eitthvað?  Verða lánin kannski að vera tekin af viðkomandi upphaflega sjálfum?

Mér sýnist tillaga Sjálfstæðisflokksins  ná til fleiri. Enginn sem ekki hefur tekjur getur borgað af húsnæðisláni hvort sem er. Ég vona bara að lyklafrumvarpið gleymist ekki svo að fólk eigi þó von um framhaldslíf í stað skuldafangelsisins sem tíðkast hefur.

En spurningar Hjartar eru beinskeyttar. Framsóknarmenn hljóta að þurfa að svara því hverjir fái leiðréttingarnar.

Mál málanna:

 

 

      LÆGRI GJÖLD 

 

 

 

                                                            X-D 

30 + X

% verður X D  í kosningunum á laugardag.

Vilja einhverjir bæta X-inu við?

Ekki seinna en á föstudag birti ég mitt X eftir vibrasjónum þeim sem mér berast af astralbíoradiofóní-planinu. Þetta síðasta þekkja engir sem ekki þekktu foringjann í Sundlaugunum hann Björgvin af Vaðnesi. Hann hafði alltaf rétt fyrir sér og hefur í rauninni ennþá. 

X-9 var aðalmyndasagan í Mogga þegar ég var strákur.

X D. 30 + X!  

 

 

 

 

 

Ný þjóðarsátt

með aðilum vinnumarkaðarins er það sem algerum sköpum getgur skipt í baráttu Íslendinga við kreppuna.

Ég hjó eftir því að Bjarni Benediktsson nefndi þetta atriði sem eitt af því fyrsta sem biði nýrrar stjórnar. Mér finnst tilfinnanlega skorta að frambjóðendur hafi rætt einmitt þetta mál. Munu  þeir sem missa fylgi vilja fremur stríð en frið á vinnumarkaði?  

Engin hagstjórn stenst við þær aðstæður að kjarabarátta einstakra hópa fari úr böndunum. Einn harðsvíraður hópur  getur auðveldlega talað sig upp í það, að hann þurfi leiðréttingar umfram aðra og knúið þær fram. Allir þekkja afleiðingarnar hvernig slíkt getur blossað upp. Skemmst er að minnast þeirra viðbragða sem af hlutust þegar Guðbjartur Hannesson Samfylkingarráðherra fékk þegar hann vildi hækka laun forstjóra Landspítalans eins starfsmanna.

Þeir sem eru orðnir nógu gamlir geta minnst þeirra Einars Odds(bjargvættsins) og Guðmundar J.(aka)  þegar þeir umfram  aðra menn gengu fram fyrir skjöldu til að leiða fram þjóðarsáttina 1979. Þá endurreistist íslenska krónan til virðingar og mestu raunverulegu kjarabætur almennings hófust þegar þeirri kreppu sem ríkti við gerð samninganna linnti. Íslenska þjóðin hafði aldrei fyrr hegðað sér eins skynsamlega og uppskar að vonum eftir því.

Ef stjórnmálamönnum og forystumönnum vinnumarkaðarins mætti auðnast að taka höndum saman eftir kosningar í gerð þjóðarsáttar, þá væri margt fengið sem nú sýnist torsótt. Verðbólgan myndi hverfa og verðtrygging væri ekki í umræðunni, hvorki afnám né viðhald. Krónan myndi styrkjast og allt verðlag lækka.  

Það sem Bjarni Benediktsson hefur sagt vera meginstefnumál  Sjálfstæðisflokksins, "Kjarabætur fyrir alla", hefði færst nær.

Bjarni Benediktsson hefur ítrekað sagt það fyrir hönd Sjálfstæðisflokksins, að markmið okkar allra eigi að vera : "Að það verði betra að búa á Íslandi í ár en það var síðasta ár!" 

Er þetta ekki markmið sem við gætum sameinast um? Slíðrað sverð og beitt sanngirni í hvers annars garð?

Er nokkur leið að þetta náist fram öðruvísi en í nýrri þjóðarsátt sem afleiðu af samvinnu við vinnumarkaðinn?  

 

 

Stórséníið stingur enn

tólgina þegar Steingrímur J. skrifar svo um landflóttann:

 "Á fyrsta fjórðungi í ár fluttu 520 fleiri til landsins en frá því. Stór hluti (+485) þessa hóps var erlendir ríkisborgarar. Aðfluttir einstaklingar með íslenskt ríkisfang voru þó einnig fleiri (+35) en brottfluttir. Á síðasta ársfjórðungi liðins árs fluttu einnig lítillega fleiri Íslendingar til landsins en frá því Þetta ásamt mun fleiri fæðingum en nemur fjölda þeirra sem falla frá veldur því að þjóðinni fjölgar nú myndarlega á nýjan leik (rúmlega 1.000 manns á fyrsta ársfjórðungi). Vissulega fluttu margir frá Íslandi, einkum á árinu 2009 eins og áður sagði, en þar munaði mest um mikinn fjölda fólks af erlendum uppruna sem hingað hafði komið til vinnu á þenslu- og vitleysistímanum fyrir hrun.

Landsmönnum fækkaði lítillega á árinu 2009 í fyrsta skipti í heila öld, en þegar upp er staðið gerðist það aðeins á því eina ári. Þróunin nú er mjög jákvæð séð í því sögulega ljósi að á löngum árabilum hefur flutningsjöfnuður íslenskra ríkisborgara haft tilhneigingu til að vera neikvæður án þess að nokkuð efnahagshrun kæmi til.  Umtalsvert fleiri fluttu til landsins en frá því á 1. fjórðungi 2013 samkvæmt tölum Hagstofunnar og er það annan ársfjórðunginn í röð. Þetta eru mikil og góð umskipti frá árum fyrst eftir hrun, einkum frá árinu 2009. Að sjálfsögðu gleðitíðindi og staðfesta aukna bjartsýni og trú á framtíðina á Íslandi. Bati á vinnumarkaði á hlut að máli og ríma þessar tölur um jákvæðan flutningsjöfnuð ágætlega við tölur um lækkun atvinnuleysis og fjölgun starfa. Fleira fólk flytur heim því meiri vinnu er að hafa. "

Þenslu og vitleysistíma kallar hann uppgangsárin ? Þegar allir máttu eiga gjaldeyri og atvinna var næg.

 

Nú er fangaráð  samkvæmt Þistilfirðingnum að skipta um þjóð í landinu.

Stórséníið Steingrímur J.

sagði okkur í alvöru og greinilega trúði því sjálfur að hróður hans sem skattleggjanda hefði spurst svo um víða veröld og hann yrði sóttur til Grikklands næst að bjarga málunum þar.

Hver er svo arfleifð mannsins sem þusaði um frumjöfnuð ríkissjóðs sem væri miklu betri hjá honum en hrunstjórninni?

Íbúðalánasjóður er öfugur um minnst 150 milljarða. Uppsafnaður ríkissjóðshalli Jóhönnu-og Steingrímsstjórnarinnar 460 milljarðar. Áfallnar lífeyrissjóðskuldbindingar ríkissjóðs vegna þeirra skötuhjúa  sjálfra og annarra opinberra starfsmanna á kjörtímabilinu 500 milljarðar.

Greiddi einhver  þeirra  auðlegðarskatt  af  þessari eign?  Steingrímur J? Jóhanna ? Svarið er nei enda hefur Nomenklatúran aldrei deilt kjörum með alþýðunni.

Svo býður þessi Þistilfirðingur sig fram aftur. Er þetta ekki bara ósvífni eftir þessa endurskoðuðu niðurstöðu? Til viðbótar við allt hitt sem eftir hann liggur í fjármálaafglöpum?

Hvaða fólk getur kosið VG ef þetta er arleifð stórsénísins við stjórnvölinn? 

 

 

Asparmorðinginn og Ögmundur

gerðu samkomulag um að myrða hundruð grenitrjáa í Öskjuhlíðinni um leið og þeir loka suðaustur brautinni til að þrengja að flugvellinum. An þess að skilyrðin í Keflavík hafi verið uppfyllt.

Asparmorðinginn Jón Gnarr, sem drap aspirnar fögru við Ráðhúsið, er því miður enn við völd i Reykjavík. Ögmundur verður fellur eftir næstu viku og heldur út á ódáinslönd gleymskunnar.

Þeir gátu í dag með köldu blóði samið sín á milli um þennan siðlausa verknað vegna ímyndaðra ástæðna um að tréín trufli aðflug að þremurtveim. 

Það væri lélegur flugmaður sem getur ekki lent á endanum á þremur tveimur og passað sig á trjánum. Það er miklu verra að vera án suðaustur brautarinnar ef þannig viðrar.  Helsta hættan við Öskjuhlíðaraðflugið gætu verið fáklæddar stelpur í sólbaði milli trjánna sem gæti truflað athyglina. Ég er sjálfur búinn að fljúga þarna í bráðum fimmtíu ár.Og ef ég get það þá geta það áreiðanlega flestir aðrir.

 

Omar Kyjam lýsir örlögum genginna dusilmenna í Rubaiayt meðal annars svo:

 

                            "Þeir spekingar og spámenn hér á fold,

                              sem spreyttu sig á deilu um anda og hold,

                              þeir liggja núna dæmdir fyrir ómerk orð,

                              í eyðiþögn með vitin full af mold. "

 

Fólkið mun horfa á grenitréin grænu við flugvöllinn undir Öskjuhliðinni löngu eftir að allir hafa gleymt þessum tveimur kónum og Gísla Marteini líka. 

Ahyggjur af ungum drengjum

hafði Bryndís Loftsdóttir á fundi Sjálfstæðismanna í Kópavogi í morgun, Hún taldi að verið væri að þrengja að þeim atvinnulega séð. Þeir hefðu í færri hús að venda en stúlkur með atvinnu meðfram skóla. Það væri búið að setja reglugerðir sem takmörkuðu þeim til dæmis aðgengi að byggingavinnu, hugsanlega til að vernda þá frá bakmeiðslum. Stúlkur gætu frekar fengið vinnu við afgreiðslustörf og þess háttar en drengir og þeir yrðu jafnvel utanveltu á vinnumarkaði. Hér áður komust allir strákar í byggingavinnu  og tóku á af öllum kröftum.

Bryndís gerði afstöðu Íslendinga til vinnunnar og atvinnurekenda að umtalsefni. Hún sagðist óttast að við værum að ala upp hópa langtímatvinnuleysingja sem vildu ekki lengur vinna.Hún rifjaði upp bóksalaár sín þegar hún var að ráða tugi aðstoðarstúlkna í desember. Ungu stúlkurnar flykktust í störfin hjá henni til að vinna sér inn aura. Svo fór eitthvað að breytast í þjóðfélaginu og fólkinu þótti eitthvað minna til koma að fá vinnu.Hún sagðist hafa fyrst tekið eftir þessu þegar ein liðsaukastúlkan sagði henni að hún vildi auðvitað fá frí á Þorláksmessu og fyrir hádegi á aðfangadag. Þá skynjaði hún að ekki var allt með felldu í þróuninni á vinnumarkaði.

Ég minnist með sjálfum mér ára minna í byggingavinnu. Það var oft þrælapuð að keyra steypuhjólbörur frá Ásta, Kjarra eða Bjössa á lyftibílnum. Það versta sem ég lenti í 19 ára var að hræra sem handlangari á bretti fyrir tvo fíleflda múrara sem voru að hrauna þriggja hæða hús. Það var sama hvað ég djöflaðist þeir geltu mig alltaf. Enga hrærivél, bara skóflu, sand í hrúgu og bretti af pokasementi. Mér þótti fúlt þegar þeir komu niður til að hjálpa mér að hræra. Mér fannst ég aumingi.  Þó var ég það vel á mig kominn þá að ég bar 2 fimmtíu kílóa sementspoka í fanginu upp á þriðju hæð í beit og fékk aldrei í bakið.En mikið var þetta gaman svona eftirá og fjölbreytt hjá honum Halldór Halldórssyni múrarameistara og Snorra trésmíðameistaraí Húsasmiðjunni, þvílíkir öðlingar sem þeir voru og sérstæðir. "Aðeins meira í norður, suður, austur eða lýðræðisátt" kallaði Halldór þegar var verið að steypa. En hann hafði nokkuð frekar dálæti á Rússum en Ameríkönum í kalda stríðinu sem þá geisaði. Karakterarnir sem maður kynntist voru stórfenglegir sem maður man og þekkti alla tíð. Það er brjálað ef hindra á unga drengi frá því að vinna á byggingastöðum, slíkur skóli sem það er.

Jón Gunnarsson þingmaður útlistaði stefnu Sjálfstæðisflokksins í kosningunum. Flokkurinn vildi auka framkvæmdir og fjárfestingu í þjóðfélaginu. Ráðast í gerð Norðlingaölduveitu sem væri ódýrasta orkuframkvæmdin sem skilaði afli Búðarhálsvirkjunar á hálfu verði hennar. Virkja í Neðri Þjórsá sem fyrst. Koma Helguvík gang og skoða álver á Bakka. Ekki seinna heldur strax. Það væri alger rangsnúningur að halda því fram að heimiln  niðurgreiddu orkuna fyrir stóriðjuna, því væri öfugt farið því orkuverð heimilanna væri langlægst á Íslandi miðað við löndin í kring. Landsvirkjun væri þvílíkt gullegg sem væri að skila þjóðarbúinu risaverðmætum og borgaði hratt niður skuldir sínar.

Rætt hefði verið að selja hluta úr Landsvirkjun til að grynnka á skuldum ríkisins. Fram kom á fundinum að Norðmenn hafa selt hlutabréf dreifðum almenningi hlutabréf í Olíusjóðnum sínum þó ríkið eigi áfram 70 % á kauphöll og margaldað virði hans með því. Jón sagði rangt að Sjálfstæðisflokkurinn ætlaði að selja Landsvirkjun heldur hefði Landsfundur ályktað í aðra átt. Sjálfstæðisflokkurinn vildi aðgerðir strax í málefnum eldri borgara sem hefðu ekki tímann fyrir sér að bíða eftir að loforð yrðu efnd eins og verið hefði hér frá stóru skerðingunni 2009 sem sagt var að væri tímabundin en er ennþá.

Elín Hirst sagði að Sjálfstæðisflokkurinn ætlaði að lækka skatta eins og tryggingagjaldið, auðlegðarskattinn, bensíngjaldið, staðgreiðsluskattinn. Lækkun skatt þýddi breikkun skattstofna til lengdar litið. 

Fundurinn var fjölsóttur og mikill hugur í mönnum og umræður líflegar. Misræmið í lífeyrisréttindum landsmanna kom á dagskrá, en Steingrímur og Jóhanna eiga hvort um sig inni 200 milljóna óskerta eftirlaunaskuldbindingu  með ríkisábyrgð sem þau hafa aldrei greitt auðlegðarskatta af. En þau hikuðu ekki við að leggja þennan raunverulega eignaupptökuskatt  á samborgara sína sem hafa flestir þolað jafnvel 30 % skerðingu á lífeyrisréttindum sínum.

Einn fundarmanna líkti Sjálfstæðisflokknum við brimbrettasiglingu fólks  sem þar sem frambjóðendur stæðu núna efst á grængolandi öldunni eins og hún sést flottust í Hawaíþáttunum sem stefndi óðfluga á land og myndi brotna í fjörunni á laugardaginn kemur og þeyta Sjálfstæðisflokknum langt upp á land. Sá sem hér skrifar spáir Sjálfstæðisflokknum ekki minna 35 % fylgi í kosningunum.Það hefur nefnilega ekkert verið talað við okkur gömlu vitleysingana sem eru ekki teknir með í skoðanakönnunum. Við munum ekki kjósa pirata eða einhver önnur skringiframboð svo mikið er víst.

Vonandi þurfum við ekki lengur að hafa áhyggjur af atvinnuleysi ungra drengja eða annarra eða eymd úrræðaleysisins  eftir að núverandi kyrrstöðutimabili lýkur með því að stjórnarflokkarnir verði sendir í það frí sem þeir hafa unnið til. 

Hlustið á Ragnheiði Elínu

skýra skattatillögur Sjálfstæðismanna og tillögur í skuldamálum heimilanna á www.vf.is.

Þar er að finna sjónvarp Víkurfrétta og þar er stuttur þáttur með Ragnheiði Elínu sem skýrir málin á einfaldan og auðskiljanlegan hátt fyrir þeim sem leita svara.

Þeir sem vita svörin þegar og allt um Sjálfstæðisflokkinn þurfa ekki að horfa á þetta. Þeir eru eins og vagnhestarnir hjá Tuborg í Kaupmannahöfn sem hafa speldi fyrir augunum svo þeir geti ekki séð til hliðar.

 Þeir skulu bara gera eitthvað annað en að hlusta á Ragnheiði Elínu.

Sjálfstæðisflokkurinn ætlar

að gera það sem í hans valdi stendur til að draga þjóðlífið upp úr þeim efnahagslega öldudal sem það er í statt.

Sjálfstæðisflokkurinn er ekkert auðvitað annað en fólkið sem er í honum þá stundina. Þetta er allt annað fólk en var fyrir 10árum, 20 árum. Núverandi fólk verður þar ekki í meirihluta eftir 10 ár. Hann er nútíðarflokkur undir núverandi formennsku Bjarna Benediktssonar sem hvarvetna núna vekur á sér athygli fyrir sanngjarnan og einbeittan málflutning. 

Hlustið á Bjarna Benediktsson. Hann segir ykkur á skýru máli hvað flokkurinn ætlar sér. Spyrjið hann og hann svarar á máli sem allir skilja. Hættið að hatast við fortíðina og hyggið að framtíðinni. Það er hún ein sem skiptir máli ef leysa á vandamál þjóðarinnar.

Sjálfstæðisflokkurinn ætlar að lækka skatta og gjöld til þess að afla ríkissjóði meiri tekna.

Sjálfstæðislflokkurinn ætlar að aflétta skerðingum á grunnlífeyrinn hjá eldrafólkinu.

Sjálfstæðisflokkurinn ætlar að efla atvinnulífið eins og hann getur.

Sjálfstæðisflokkurinn ætlar að afnema auðlegðarskattinn.

Sjálfstæðisflokkurinn ætlar að lækka tryggingagjaldið.

Sjálftæðisflokkurinn ætlar að lækka veiðigjaldið.

Sjálfstæðislfokkurinn ætlar raunverulega að bæta stöðu heimilanna. 

Sjálfstæðisflokkurinn ætlar að varðveita gjaldeyrisstöðu þjóðarbússins.

 

Margt fleira er á stefnuskrá flokksins sem menn geta kynnt sér á www.xd.is

Sjálfstæðisflokkurinn ætlar sér áfram.