Hörpuljóð haustins

Þessi grein kom í Mogga í gær. Fyrir þá sem ekki lesa það blað af einhverjum ástæðum þá kemur hún hér:

on

 

"Kári Stefánsson skrifaði beitta grein í Morgunblaðið 10.9. 2013.

Hann veltir fyrir sér meðferð stjórnmálamanna okkar á opinberu fé. Hann byrjar á vísu eftir Stein Steinar sem lýsir vel þeim skattgreiðanda sem vill spyrja um kostnað af uppátækjum stjórnmálamanna. »Það var eitt sinn hundur svo horaður, ljótur og húsbóndalaus að flækjast í borginni og enginn sem vild'ann og allir sem hædd'ann og ekkert sem veitti honum huggun í sorginni.«

Ég vil benda Kára á að um kostnað af uppfinningum og gæluverkefnum stjórnmálamanna hefur yfirleitt gilt pí-lögmál Halldórs: Áætlun sinnum pí=lágmarks heildarkostnaður. Getur orðið sinnum tvö pí.

En snúum okkur aftur að Kára klára sem heldur áfram skrifum sínum:

"»... Næsta spurning er þá hvort við höfum verið svo fátæk að fráfarandi ríkisstjórn hefði ekki getað spornað gegn þessu ef hún hefði haft til þess vilja? Svarið við henni felst í þeim verkum sem ríkisstjórnin réðst í á sama tíma og hún horfði á heilbrigðiskerfið brenna: 

1. Hún lauk við Hörpuna hina fögru og eyddi í það ótöldum milljörðum. Nú sitjum við líka uppi með kostnaðinn af rekstrinum, sem er töluvert meiri en menn óraði fyrir og það er hvergi minnst á nauðsyn þess að spara í honum. Þegar menn gagnrýndu þá ákvörðun að ljúka við Hörpuna áður en ráðist var í framkvæmdina og lögðu til að peningum sem færu í hana yrði frekar varið til heilbrigðis- og menntamála var þeim svarað því til að peningar sem færu í svona byggingu væru einhvern veginn ekki nýtanlegir til rekstrar velferðarkerfisins.

Það hefði mátt tækjumvæða allt heilbrigðiskerfið upp á nýtt og reka það af fyrirhrunsárakrafti um aldur og ævi fyrir það fé sem fór í að ljúka byggingu Hörpunnar og fer nú í að reka hana ...

...Ég hef hins vegar þungar áhyggjur af því hvort núverandi ríkisstjórn sem er að skakklappast af stað ætli sér að gera eitthvað til þess að bæta heilbrigðiskerfið. Mér virðist eins og hún sé að reyna að komast hjá því vegna þess að það kostar mikla peninga og henni er greinilega mikilvægara að lækka skatta á mönnum eins og mér en að hlúa vel að sjúkum og særðum ...«"

Kári kemur að þeim hlutum sem sárast brenna á samvisku þjóðarinnar hvað sem flottræfilshætti þeirra stjórnmálamanna líður sem farið hafa með himinskautum síðustu ár:

" Umönnun sjúkra."

 Og hvað fengum við þá fyrir peningana sem ekki fóru í heilbrigðiskerfið? Stjórnmálamenn og keyptir sérfræðingar þeirra þegja yfirleitt og tala út í loftið þegar spurt er um kostnaðinn af Hörpu. Hún er auðvitað aldeilis flott til að sjá. Hún er komin þarna og verður. Einhvern tímann gleyma menn hvað hún kostaði eins og varð með Arnarhreiðrið sem Bormann byggði handa Hitler.Hitler gat ekki verið þar nema einu sinni vegna loftveiki og hneykslun á eyðslusemi Bormanns í þessa fimmtugsafmælisgjöf. Og sama er um Perluna hans Davíðs hjá okkur sem þótti dýr á sínum tíma en er borgarprýði núna.Allir búnir að gleyma hvað hún kostaði.

En nú er talið að byggingarkostnaður Hörpu sé um það bil pí-sinnum meiri en tvöfölduð upphafleg kostnaðaráætlun eða tvö pí sinnum 6 milljarðar. Ég vil því spyrja sem einn af Hörpuskuldurum þessa lands, sem fæ aðallega reglulegar lífeyrisskerðingar í minn hlut frá ríkinu vegna fjárskorts meðan opinberir starfsmenn halda öllu sínu óskertu og borga ekki auðlegðarskatt af sínum eignum, Steingrímur J. meðtalinn:

A. Hver er heildarbyggingarkostnaður við Hörpu og tengd mannvirki á verðlagi í dag?

B. Sundurliðun á þessum kostnaðarliðum:

1) Hvað kostar lóðin öll og það að gera hana byggingarhæfa. (Nú er búið að selja hótelspilduna á       1,8 ma sem var metin á 2,5-3,0 ma.)

2) Hvað kostaði jarðvinnan?

3) Hvað kostuðu sjófyllingarnar og hvað kostaði að fjarlægja þær?

4) Hvað kostaði uppsteypan?

5) Hvað kostaði glerhjúpurinn einn og sér með allri endursmíði og öllum viðgerðum (Sem er greinilega viðvarandi kostnaður því þetta kolryðgar allt og lekur)

5a. Hvað fékk Ólafur Elíasson mikið fyrir hönnunina? Hvað fengu verkfræðingar og hvað fengu arkitektar?

6) Hvað kostuðu gatnatengingarnar?

7) Hvað kostaði torggerðin?

8) Hvað kostar lóðafrágangurinn?

9) Hvað kostaði bílastæðahúsið?

10) Hvað kosta þær framkvæmdir sem eftir eru eða yfir standa eða eru búnar (t.d. Elítuloftssvalir:         Nú »Björtu loft« sem eru lokuð almenningi).

11) Hver er fjármagnskostnaður frá 2009 til dagsins í dag?

12) Hver er árlegur fjármagnskostnaður 

 

13) Hverjar verða rekstrartekjur Hörpu á næsta ári?

14) Hver verður rekstrarkostnaður Hörpu á næsta ári?

15) Hver á túristabúð sem hefur verið sett upp og lokar neyðardyrum? Hver er húsaleigan á fermetrann?

Ef ekki er hægt að fá hverri einustu spurningu svarað af þessum tölusettu spurningum, þá dreg ég bókhaldshæfi stjórnsýslunnar, ríkisendurskoðunar, Alþingis og Reykjavíkurborgar stórlega í efa. Eða á ég hugsanlega ekki bara að sætta mig við þetta eins og Arnarhreiðrið og Perluna og þegja? 

Dettur einhverjum í hug að nokkur svari þessum spurningum? Nomenklaturan talar ekki við seglskip sem ekki geta pípt eins og strákarnir sögðu í gamla daga. Þetta verður þaggað og þagað og þvælt og spunnið þangað til að það gleymist.

Þetta er mitt Hörpuljóð sungið á hausti.

Veljum okkur innflytjendur

en látum þá ekki velja okkur.

Langt að rekið slæðufólk  frá múslímalöndum er ólíklegt til að aðlagast íslensku samfélagi. Það er fast í fornum háttum sínum og breytir þeim ekki.

Fólk sem ekki aðlagast okkur vantar okkur ekki sem innflytjendur. Það mun eiga í erfiðleikum og einangrast. Hvorki því né okkur er gerður greiði með því að heimila því landvist.

Það erum við sem eigum þetta land en ekki þeir.  Við eigum að handvelja þá flóttamenn sem við tökum við en ekki láta þá velja okkur.

Er ég með þjóðrembu?

Er það eitthvað slæmt? Eitthvað einstakt? Þekkist hvergi meðal siðaðra þjóða?

 Kona heiti Pia Kjærsgård og er dönsk. Eins og Danir eru nú léttlyndir með Sengekants-myndunum og allt það þá er hún formaður DP, Dansk Folkeparti eða eitthvað svoleiðis. Hún hefur meiningar um innflytjendastefnu Dana. Sem hefur verið eins svona álíka  frjálslynd og áðurnefndar myndir Óla Söltoft.

Dansk Folkeparti vill:

"Vi skal adskille asylpolitik og indvandringspolitik. Asylansøgere skal hjælpes – helst i nærområder. Gøres klar til at vende tilbage for at opbygge deres egne lande. Indvandrere skal under bestemte forudsætninger kunne komme til Danmark. Men helst indvandrere, som kan være en hjælp til det danske samfund, så indvandringen ikke øger vores økonomiske udfordringer.

Kort fortalt skal vi føre en udlændingepolitik, som er til gavn for så mange mennesker som muligt – og som også er til at leve med for det danske samfund. Det giver ingen mening, at vi sætter vores egen velfærd under pres med den forkerte politik. For hvem vil vi så overhovedet kunne hjælpe i fremtiden? Vi skal som politikere leve op til vore forpligtelser: Dels at hjælpe mennesker i nød, dels at værne om Danmark. "

Ég reyni ekki að þýða þetta enda er danskan skyldunámsgrein í skólunum. Allir skildu líka Andrésblöðin áður en farið var að þýða þau á íslensku illu heilli. 

 

Þetta stendur svo á Evrópuvaktinni:

"...... Kjærsgaard telur þó að mestu hættuna sé að finna innan lands hjá elítu pólitískrar rétthugsunar sem megi þekkja af ást hennar á café-latte, tískuhönnun og húsgögnum að forsögn arkitekta. Hún sagði:

„Þessi hópur á marga fulltrúa í ríkisstjórninni sem vinnur að því að umbylta dönsku samfélagi og fara á svig við hefðir okkar. Þetta birtist í því að þau neita að rísa á fætur í virðingarskyni við drottninguna við þingsetningu. Þetta birtist í því að þau grafa undan hugtakinu hjónaband í dönsku þjóðkirkjunni og þau draga taum höfuðborgarinnar við mótun og framkvæmd menningarstefnu sinnar.

Elítan vill fjölmenningarlegt þjóðfélag þar sem leggja ber allan menningararf að jöfnu. Þau vilja að við tökum útlendingum opnum örmum þótt í því felist að við verðum að kveðja jólatré og svínakjöt. Í besta falli hefur ríkisstjórnin ekki sett sér nein gildi. Í versta falli fylgir hún af ásetningi stefnu sem er þjóðhættuleg og grefur undan samfélagsgerðinni.“

Hin þjóðhættulega stefna felst einnig í blindri ást á ESB-verkefninu sem að mati Piu Kjærsgaard hefur meðal annars leitt til þess að erlendir glæpamenn streyma yfir opin landamæri inn í Danmörku.

„Hugmyndafræði ESB er alveg skýr: Án landamæra, engar þjóðir. Í því felst að við megum ekki verjast glæpum. Við ætlum hins vegar að blása á ESB. Landamæraeftirlit verður tekið upp að nýju. Krafan um það er réttmæt og við höldum henni fram af festu án tillits til þess hver situr í ríkisstjórn,“ segir Pia Kjærsgaard.

DF krefst vitneskju um hvað koma innflytjenda kostar danska skattgreiðendur. Þessar upplýsingar hafi verið birtar í Noregi. Pia Kjærsgaard segir að danska ríkisstjórnin þori ekki að sýna almenningi hve mikill kostnaður sé af komu innflytjenda. Hún sagði:

„Danski þjóðarflokkurinn hefur ekkert á móti innflytjendum sem eru samfélaginu til gagns. Áður fyrr komu þeir frá vestrænum löndum, þeir voru í fámennum hópum, lærðu dönsku og sýndu gistilandi sínu hollustu. Ungverjarnrir sem flýðu til Danmerkur 1956 fengu hvorki kennslu í eigin móðurmáli né gúllas í dagheimilum.

Nú verðum við að lúta kröfum innflytjenda. DR [Danmarks Radio] segir betur frá ramadan og eid-hátíðinni [trúarhátíð múslíma] en guðsþjónustum í [dönsku] þjóðkirkjunni.“

Pia Kjærsgaard segir að stjórnarskipti gefi síðasta tækifærið til að stöðva árásina á dönsk gildi:

„Ég vona innilega að þessi ríkisstjórn verði sett innan sviga í sögu Danmerkur og við fáum nýja ríkisstjórn að loknum kosningum. Á þingi ber að sitja fólk í meirihluta sem vill berjast fyrir dönskum gildum áður en það er orðið of seint.“ 

 

Er eitthvað til  sem heitir Íslensk Gildi eftir 4 ára valdasetu Össurar á ráðherrastóli með Jóhönnu? Þó hann sé sagður lepja stundum eitthvað annað en Latte? Höfum við einhverja þjóðernistilfinningu Íslendingar yfirleitt?

Þorum við yfirleitt að viðurkenna þjóðernistilfiningu upphátt af því að við erum svo hræddir um að verða þá kallaðir rasistar sem skilji ekki alþjóðahyggjuna sem krötum þykir svo vænt um? Rasisimi sé eitthvað sem við ekki skiljum almennilega en er fyllilega búið að innræta okkur að sé fýbjakk og tengt Hitler og helförinni. Enginn millivegur þar.

Ætli rasisimi sé það sama og þjóðremba?

Kólnandi veðurfar

er framundan samkvæmt speglunarkenningu Páls Berþórssonar.  Allt talið um gróðurhúsaáhrifin var þá til lítils nema að mengunin eftir 40 ár héðan í frá dragi úr hlýninni sem Páll býst við að þá komi.

 

Ágúst frændi minn H. Bjarnason verkfræðingur hefur ritað flestum Íslendingum meira   um tengsl sólarinnar við veðurfar heimsins. Núna virðast mér kenningar Páls renna stoðum undir þessar athuganir og sýnir Ágústar sem hefur velt þeirri spurningu upp hvort ekki væri fremur hnattræn kólnun en hlýnun framundan?  

 

Nokkuð snögg kæling er þetta á þeim hugmyndum að Ísland sé að verða umskipunarhöfn fyrir Kínverja í norðurslóðasiglingum. Eins og raunar sást á fyrstu fragtarasiglingu þeirra um þær slóðir án viðkomu á Íslandi.

 

Mér finnst full ástæða til að hlusta eftir því sem hann Páll okkar Berþórsson segir um kólnandi veðurfarshorfur á landinu. 

Hvaða mynt?

hentar okkur Íslendingum?

Er það króna sem við prentum sjálf og bankarnir framleiða stjórnlaust? Eða eitthvað annað?

Af hverju ekki bara hvaða mynt sem er  og fólk vill versla í?

Dollari væri að sönnu góð mynt fyrir okkur. Enn betra væri að hér væri frjáls fjölmynt, menn gætu valið. Það heimskulegasta af öllu heimskulegau er að banna mönnum að taka lán í þeirri mynt sem menn kjósa.

Ofstjórnaráráttan ætlar seint að renna af þessari þjóð. Af hverju eru hér ekki íbúðalán í evrum á ca. 2 % vöxtum til 40 ára? Nú eða þá dollar, USD eða CAD. Þeir dollarafrændur eru vel til þess fallnir að treysta tengslin vestur um haf og fjarlægja okkur þessari kratavellu sem öll Evrópa er undirlögð af og við hálfveikir líka. Vesturheimur á betur við okkur Íslendinga sem eru miklu meiri Ameríkumenn en Evrópusveitamenn. Aðalatriðið er að við séum frjáls þjóð í frjálsu landi og engum háð. 

Burt með landsöluhugmyndir kratismans. Frjálst Ísland utan  tollabandalaga umheimsins og án eignar Kínverja á landinu eða miðunum. Það er það sem skiptir máli. Ekki hvaða mynt við notum daglega.

"Rúm 72 % þjóðarinnar

 vilja að flugvöllurinn í Reykjavík verði áfram í Vatnsmýri, ef marka má könnun rannsóknarfyrirtækisins Maskínu. Af 847 svarendum sögðust 60,4% mjög hlynnt því að framtíðarstaðsetning flugvallarins yrði í Vatnsmýrinni en 11,8% sögðust fremur hlynnt því. 9% sögðust mjög andvíg því að völlurinn yrði áfram á sama stað, 8,4% fremur andvíg en 10,3% sögðust í meðallagi hlynnt eða andvíg.

 

Af 328 íbúum Reykjavíkur sem tóku þátt í könnuninni sögðust 63,7% hlynnt flugvelli í Vatnsmýrinni, 24,7% sögðust á móti og 11,6% í meðallagi hlynnt eða andvíg. 66,4% af 211 íbúum nágrannasveitarfélaga höfuðborgarinnar sögðust hlynnt flugvelli í Vatnsmýri, 19% andvíg og 14,7% í meðallagi hlynnt eða andvíg. Af íbúum annarra sveitarfélaga vildu enn fleiri að völlurinn yrði áfram í Vatnsmýri, eða 85,1% af 308 svarendum, á móti voru 8,8% og 6,2% í meðallagi hlynnt eða andvíg.

 

Svarhlutfall í könnuninni var tæplega 60% af upphaflegu úrtaki. Konur voru hlynntari flugvelli í Vatnsmýrinni en karlar en þeir sem lokið höfðu háskólaprófi voru andvígari framtíðarstaðsetningu í Vatnsmýri en þeir sem höfðu lokið styttra námi. Ekki reyndist marktækur munur á svörum þegar þau voru greind eftir aldri og fjölskyldutekjum.

 

Í gærkvöldi höfðu 66.800 manns lýst yfir stuðningi við flugvöll í Vatnsmýrinni á síðunni lending.is."

Þannig hljóðar frétt Mogga um vilja þjóðarinnar skv. einhverju apparati sem kallar sig Maskínu. Þegar það spyr 847 manns um afstöðu til flugvallar í Vatnsmýrinni. Af 328 Reykvíkingum eru 63.7 % hlynnt vellinum (sem táknar  tvær jafnstórar fylkingar í máli Gísla Marteins). Þannig metur Moggi þessa könnun greinilega mjög merka og hossar eftir því.

Að ég hafi verið árum saman með könnun á þessari bloggsíðu, sem hefur fengið hátt í milljón heimsóknir þar sem 8169 hafi svarað spurningunni um hvort fólk vilji loka Reykjavíkurflugvelli þykir ekki frétt. Stigin hafa í gegnum tíðina hreyfst frá minnir mig einhverjum 78 % á móti lokun þangað til að þau hafa staðfest sig í 82.1%  á móti lokun og 17.9 % með lokun. Hafa þessar tölur lítið hreyfst lengi þó alltaf bætist við tölu greiddra atkvæða.

Það er alveg sama hvað þetta úrtak, sem er það stærsta á landsvísu, segir. Úr því að það kemur frá Halldóri Jónssyni þá er það ómarktækt. Ætli það tengist spurningu um traust á einstökum stjórnmálamönnum sem er á sömu síðu. Þar kemur nefnilega í ljós að náungi að nafni Davíð Oddsson nýtur meira en þrefalds trausts 8240 manna á við næsta íslenska fyrirmenni sem eru þó vel kunn úr fréttum. Það er ekkert að marka þennan Halldór Jónsson, hann er bara flugvallarsinni, íhald, Davíðssinni og fleira fýbjakk. Þegjum hann í hel.

Þessi sami Halldór hefur sagt það sama og stendur í McKinney skýrslunni að bankakerfið íslenska sé allt of stórt. Hann hefur sagt þetta í áratugi eftir að Guðjón heitinn Ólafsson í SÍS benti honum á að bera saman fjölda bankamanna á Íslandi og í Bandaríkjunum. Þar munaði hérumbil helmingi minnir mig löngu áður en þessi McKinney kom til og hefur versnað síðan. Þessi Halldór segir líka margoft að það eigi að loka Landsbankanum bæði gamla og nýja. Þeim sé gersamlega ofaukið og defakto báðir gjaldþrota. Tekur einhver af nýja blóðinu á Alþingi undir það? Nei, allt sem þessi Halldór segir er þagað í hel.

Hvað er þessi Halldór þá alltaf að rövla. Af hverju heldur hann sér ekki saman? Ljóta áráttan að vera alltaf að hafa ómerkar meiningar.

Meira en tveggja áratuga blaðaskrif til framdráttar Reykjavíkurflugvallar snertu engan mann. En Gísli Marteinn með tvær jafnstórar fylkingar? Á hann hlustar þjóðin sem og á þriggja manna samtökin um Betri Byggð(Örn, Gunnar og Jói eru þeir einu félagsmenn sem ég hef heyrt í)

Æ þegiðu greyið mitt Halldór þó svo að þjóðin sé þér kannski sammála um flugvöllinn og Davíð Oddsson.

 

Norður Kóreskur hryllingur

birtist heiminum þegar" fyrrverandi unnusta Kim Jong-uns, einræðisherra Norður-Kóreu, var á meðal tólf þekktra einstaklinga úr popptónlistargeira landsins sem teknir voru af lífi fyrir níu dögum samkvæmt frétt suður-kóreska dagblaðsins Chosun Ilbo.

Fram kemur á fréttavef breska dagblaðsins Daily Telegraph að unnustan fyrrverandi, Hyon Song-wol sem var poppsöngkona, hafi ásamt öðrum sem teknir voru af lífi af aftökusveit vopnaðri vélbyssum verið sökuð um að brjóta gegn lögum um klám. Fleiri einstaklingar í popptónlistargeira Norður-Kóreu og ættingjar fólksins voru neyddir til þess að horfa á aftökuna samkvæmt fréttinni. Að henni lokinni voru þeir fluttir í fangabúðir.

Fólkið sem tekið var af lífi var allt í hljómsveit Hyon og voru söngvarar, hljóðfæraleikarar og dansarar. Það var sakað um að setja saman tónlistarmyndbönd af sér í kynferðislegum stellingum og dreifa þeim."

Að heimurinn skuli fjalla um Kom Jong Uns sem stjórnanda ríkis er mér ofviða að  skilja. Hvernig Obama getur horft uppá svona hluti án þess að hugleiða að senda þessum stjórnendum  gúmmoren á latínu  er mér erfitt að skilja í samhengi við allt hugarangur hans með Sýrland. Er Kim aðeins betri en Assad af því hann á atómbombu?

Hvernig er hægt að líða þetta? Finnst Kinverjum þetta í lagi? Hvað eru aðrar þjóðir heims að hugsa? Sjá þær ekkert athugavert við kúgunina og illskuna sem ræður ríkjum í Norður Kóreu en hossa Kínverjum?  

Ferðamannaklósett fyrst

áður en fleiri eiga að flæða yfir landið og skilja eftir sig fótatraðk og fremur fáar krónur af skemmtiferðaskipum.

Það er sprenghlægilegt, fyrir aðra en leiðsögumanninn,  að horfa á margar ósamhæfðar ferðaskrifstofur lenda rútubílum sínum með hálft þúsund manns innanborðs á stöðum þar sem annaðhvort er ekkert klósett eins og á neðraplani við Gullfoss eða örfá einkaklósett(Sigríðarstofa er höfð læst) eins og á efraplani þar, Hveragerði eða Dimmuborgum og engin á Goðafossi og víðar svo eitthvað sé nefnt.Biðraðir af tvístígandi kvenfólki langt út á götu og leiðsögumaðurinn á að halda áætlun. Örugglega ekki hlægilegt fyrir fólkið í biðröðinni.

Það verður að fara að gera átak í ferðamannaklósettum og selja inn á staðina. Jafnvel við Hakið  á Þingvöllum þar sem byggð hefur verið stór drithöll sem selt er inná  myndast biðraðir þegar búið er að stífla allt með rútufjöldanum, myndast langar raðir við klósettin. 

Fyrst koma ferðamannaklósettin áður en ferðamannaiðnaðurinn leysir fjárhagsvanda Íslendinga eins og nú er boðað. 

 

 

 

"Flugvöllurinn varðveitir Vatnsmýrina"

segir dr. Sturla Friðriksson í skarpri grein í  Morgunblaðiðinu í dag með næmu auga náttúrufræðingsins og nábúa flugvallarins um áratugaskeið:

"Borgarstjóri okkar hefur látið þess getið, að ákveðið sé að flytja flugvöllinn í Reykjavík úr Vatnsmýrinni. Eins og kunnugt er af fréttum er stór hópur manna andvígur þessari fyrirætlun og hafa þúsundir manna skrifað nöfn sín á lista til að mótmæla þessari áætlun. Einnig hafa verið ritaðar fróðlegar greinar í dagblöð um þýðingu þess að hafa flugvöll í nágrenni við Landspítala til þess að geta komið slösuðu og sjúku fólki þangað sem bráðast utan af landsbyggðinni. Þetta eru rétt sjónarmið, en fleira má nefna þessu til stuðnings.

 

Geta má þess að Vatnsmýrin er autt svæði í framhaldi af Hljómskálagarðinum. Margar stórborgir eiga sína víðlendu lystigarða í miðjum bæjum. Nægt land er í nágrenni Reykjavíkur til þess að stækka byggðina. Er því engin ástæða til þess að fara að þétta byggð á þessu opna svæði, sem er í nágrenni flugvallarins.

Væri farið að reisa þarna stórt byggðarhverfi myndi það hafa skaðleg áhrif á næsta nágrenni. Úr Vatnsmýrinni kemur vatn. Það vatn rennur eftir litlum læk í Tjörnina, sem er prýði borgarinnar. Úr Tjörninni streymir vatnið síðan til sjávar um rör er liggur undir Lækjargötu. Verði farið að byggja á öllu þessu svæði myndi lækurinn hverfa og Tjörnin þorna upp.

Illu heilli hafa nokkrar stórar byggingar verið reistar á þessu svæði, svo sem Umferðarmiðstöðin, Náttúrufræðihúsið Askja og fleiri. Þetta auða svæði á að gera að lystigarði, sem má tengja Hljómskálagarðinum og jafnvel Öskjuhlíðinni. Garðinn á að skreyta trjám og blómum, styttum og leikvöllum, sem allir borgarbúar eiga að njóta. Þarna er enn autt svæði í hjarta Reykjavíkur, sem ætti að varðveita til útivistar.

Flugvöllinn á ekki að flytja. Hann varðveitir Vatnsmýrina. "

Einmitt þetta sjónarmið heyrist of sjaldan í umræðunni um Reykjavíkurflugvöll. Víddin og kyrðin sem hann skapar með nærveru sinni á þessu fagra svæði gróðurs og fugla. það er að vonum að dr. Sturla, sem er eitt fremsta ljóðskáld Íslendinga án þess að hann flíki því mikið, árétti þetta sjónarmið. Hugsanlega deilir Sturla því með skáldfrænda sínum Einari Benediktssyni að "ljóðabullið" muni halda nafni hans á lofti er tímar líða.

" En Wurst ist alle Poesi" sagði Goethe. Flugvöllurinn er raunveruleg náttúruperla. Hann og umhverfið er Central Park höfuðborgarsvæðisins sem við eigum að hlúa að.

Farið að Reykjavíkurflugvelli og hlustið á kyrrðina sem þar ríkir og njótið fegurðarinnar. Flugvöllurinn varðveitir Vatnsmýrina segir dr.Sturla og hefur rétt fyrir sér.

 

Frábær grein

hjá Mörtu Guðjónsdóttur í Morgunblaðinu í dag um hvílk firring ríkir í Borgarstjórn Reykjavíkur gagnvart flugmálum Íslendinga. Þar dettur skipulagsfræðingum Borgarinnar í hug að strika yfir tugmilljarða starfsemi eins og ekkert væri og eru þeir studdir til verksins af meirihlutanum og þeim borgarfulltrúum Sjálfstæðismanna sem berja höfðinu við steininn og vilja fluggvöllinn burt hvað sem það kostar.

Fyrir þá sem ekki lesa Morgunblaðið er grein Mörtu hér:

"Um áratuga skeið hafa Íslendingar sinnt flugleiðsögn á Norður-Atlantshafi. Sú þjónusta verður stöðugt umsvifameiri en íslenska flugstjórnarsvæðið er 5,4 milljónir ferkílómetra að stærð og eitt það stærsta í heimi. Á síðasta ári fóru 108 þúsund flugvélar um svæðið. Gjaldeyristekjur af þjónustunni nema nú rúmum þremur milljörðum króna á ári og hundrað manns hafa vel launaða atvinnu af henni hér á landi.

 

Þessi störf og þessar tekjur eru nú í alvarlegu uppnámi vegna þeirrar ósveigjanlegu stefnu borgaryfirvalda að leggja niður Reykjavíkurflugvöll á næstu árum og reisa blokkabyggð í Vatnsmýrinni.

 

ISAVIA, sem sér um fyrrnefnda flugleiðsögu, getur ekki sinnt henni í náinni framtíð, nema stofnunin hafi tök á því að bæta við starfsemina tölvubúnaði og tækjum vegna sívaxandi flugumferðar og fyllri öryggiskrafna.

 

ISAVIA eða Graema Massie?

 

Alþjóðaflugmálastofnunin hefur nú farið fram á aukinn tækjabúnað fyrir þjónustuna, en þeirri kröfu verður ekki sinnt nema ráðist verði fyrst í stækkun á því húnsæði ISAVIA sem hýsir starfsemina við Reykjavíkurflugvöll. Þar standa borgaryfirvöld hins vegar í veginum því slík stækkun myndi raska fyrirhuguðu skipulagi í Vatnsmýrinni, samkvæmt hugmyndum skosku arkitektanna, Graeme Massie Architects. Þær skipulagshugmyndir Skotanna hafa þó enn ekki verið samþykktar sem hluti deili- eða aðalskipulags.

 

Flutningur ekki inni í myndinni

 

Rétt er að hafa í huga að ekki er hægt að flytja starfsemi ISAVIA úr núverandi húsnæði nema með ærnum tilkostnaði. Aldrei má gera hlé á, né raska á annan hátt þjónustunni, sem er sífelld og stöðug allan sólarhringinn, alla daga ársins. Flutningur á starfseminni, þó ekki væri nema yfir í næsta hús, myndi hafa í för með sér tvöfaldan tækja- og tölvubúnað sem þyrfti að starfrækja samtímis, mánuðum saman. Kostnaður við slíkar ráðstafanir er áætlaður um 15 milljarðar króna. Alþjóðaflugmálastofnunin mun að öllum líkindum ekki leggja í slíkan kostnað, nema færa þá jafnframt þjónustuna úr landi, til Skotlands eða Kanada, enda hefur slíkt þráfaldlega komið til tals að undanförnu.

 

Borgaryfirvöld hafa í hótunum

 

Stækkunin á húsnæði ISAVIA hefur fyrir löngu verið teiknuð, en skipulagsyfirvöld Reykjavíkurborgar hafa nú hundsað beiðni um byggingarleyfi í meira en eitt og hálft ár, þrátt fyrir margítrekaða málaleitan ISAVIA. Ef byggingarleyfið fæst ekki nú innan örfárra vikna er fyrirsjánlegt að Alþjóðaflugmálastofnunin flytji starfsemina úr landi. Þetta hefur borgaryfirvöldum verið fullkunnugt um.

 

Þegar arkitektinn að stækkuninni og forráðamenn ISAVIA gerðu skipulagsyfirvöldum það ljóst að frestur ISAVIA til að stækka við sig og auka tækjabúnaðinn væri að renna út ákvað skipulagsráð borgarinnar loksins að setja stækkunina í auglýsingu, nú í sumar. Af því tilefni sáu fulltrúar borgarstjórnarmeirihlutans í skipulagsráði ástæðu til að bóka, að slík auglýsing af hálfu ráðsins yrði háð því skilyrði að ríki og flugmálayfirvöld staðfestu, að NA-SV-braut Reykjavíkurflugvallar yrði lögð af innan þriggja ára.

 

Með þessari bókun er haft í eftirfarandi hótunum: Ef þið ekki samþykkið að Reykjavíkurflugvöllur verði lagður niður mun samfélagið verða af hundrað vel launuðum störfum og þriggja milljarða gjaldeyristekjum á ári.

 

Lifandi borg - LEGO-kubbar?

 

Reykjavíkurborg er ekki LEGO-kubbar. Hún er rammi um gróskumikið mannlíf lifandi einstaklinga. Skipulag hennar á ekki að snúast um upphafna og fagurfræðilega sérvisku borgaryfirvalda. Það á samkvæmt eðli sínu að snúast um samvinnu, samhæfingu og tillitssemi gagnvart margbreytileika mannlífsins - gagnvart ólíkum einstaklingum, fyrirtækjum og stofnunum, og gagnvart mismunandi þörfum, hagsmunum og hugmyndum.

 

Þetta er borgaryfirvöldum ekki ljóst, sem standa nú í hatrömmu stríði við samfélag sitt. "

Setjið svo nöfn Gísla Marteins, Þorbjargar Helgu og Áslaugar Friðriksdóttur með borgaryfirvöldum og þá sjá menn fljótt að Marta Guðjónsdóttir á ekki heima í 10. sæti lista Sjálfstæðismanna heldur mun ofar.

Ég heiti á reykvíska Sjálfstæðismenn að minnast Mörtu Guðjónsdóttur þegar kemur að prófkjöri.