Lífið á Línunni!

verður þaulskipulagt. Öllu verður fyrirkomið svo að menn geti lifað og dáið á beinni línu eða í besta falli á hliðarlínu frá aðallínu.

Það er líklega að fólk geti lifað heila ævi, farið í Borgarlínuna og keyrt með henni í vinnuna sína og síðan með línunni til baka og heim.Fara aldrei útfyrir þennan öxul.Barnið fer í leikskólann, grunnskólann, menntaskólann,Háskólann, kirkjuna til að gifta sig, á vinnustaðinn, svo spítalann til að deyja og svo i kirkjugarðinn sem allt liggur á þessari línu og kvíslum hennar.

Hvernig fer maður í berjamó með fjölskylduna?

Hvernig fer fjölskyldan í sunnudagstúrinn sinn? Hvernig fer hún í Bláfjöll á skíði?

Ef hún bara sleppir þessu þá minnkar kolefnisfótsporið greinileg mest. Ekki þarf að leggja nýjar akreinar sem þá ekki fyllast af bílum? Ekki þarf öll þessi bílaumboð sem eru að auglýsa bíla á öllum miðlum alla daga?

Ég velti fyrir mér hvernig verði hægt að koma þessari stefnubreytingu við hér í Orlando. Hvað megi byggja margar blokkir á öllum þeim akreinum sem losna við það að allir keyri á blökkustrætóunum Lynx? Hvað verður um alla skólabílana? Hvert fara allar þessar flugvélar þegar komin er skiptistöð borgarlínunnar og svo blokkir á McCoy flugvöll? Hvar lenda Flugleiðir þá?

Hvað verður gert við allar stóru brýrnar sem liggja 4 í hæð þvers og kruss í beygjum og beint þegar enginn þarf að fara neitt því að sósíalisminn sem kannski verður kenndur við ÁrDag eftir höfundunum uppi á Íslandi(maður verður að gera kröfur fyrir sinn heimanbæ) hefur tekið völdin hér í bæjarstjórn Orlando?

Er ekki rétt að senda þá Ármann og Dag hingað út til þessa að þeir geti hagrætt í samgöngumálum og minnkað útblásturinn hjá sér hérna í Orlando? Það er samt vissara að gæta þess aðð þeir verði ekki settir á geðveikrahæli í misgripum þegar sýningin þeirra byrjar. 

Það gætu orðið spennandi kosningar hérna í Florida þegar þeir fatta hvað Íslendingar eru sniðugir.

Lífið á Línunni er auðvitað það sem koma skal! 

Takk fyrir mig

og ánægjulega dvöl í Sjálfstæðisflokknum í sveitarstjórnarmálum.

Mér sýnist sá flokkur ekki þarfnast mín lengur til sveitarstjórnarkosninganna á vori komanda. Ég skil líklega ekki pólitík lengur og verð því að segja pass.

 

"Samkomulagið

Sveitarfélögin á höfuðborgarsvæðinu skrifuðu fyrir helgi undir samkomulag um innleiðingu hágæða almenningssamgangna. Hluti af því samkomulagi er að farið verði í viðræður við innanríkisráðuneyti og fjármálaráðuneyti ásamt Vegagerðinni um formlegt samstarf um fjármögnun og nauðsynlegar lagabreytingar.

Það er því mat okkar, borgarstjóra og bæjarstjóranna á höfuðborgarsvæðinu, að ný ríkisstjórn verði að koma að uppbyggingu hágæða almenningssamgöngukerfis á höfuðborgarsvæðinu í samstarfi við sveitarfélögin og eftir atvikum einkaaðila.

Um borgarlínuna ríkir algjör samstaða meðal sveitarfélaga á höfuðborgarsvæðinu. Með samstilltu átaki getum við aukið þjónustu við íbúana á svæðinu og lífsgæði þeirra um leið. Við getum dregið úr útblæstri gróðurhúsalofttegunda, fækkað slysum, stóraukið flutningsgetu samgöngukerfisins og minnkað fjárþörf til viðhalds vegakerfisins. Með tilkomu borgarlínu fæst hvatning til íbúa til að breyta ferðavenjum sínum – enda mun forgangsakstur hraðvagna eða léttlesta með hárri tíðni gera mörgum kleift að ferðast hraðar á milli staða en á einkabílnum.

Ármann Kr. Ólafsson, bæjarstjóri Kópavogs
Ásgerður Halldórsdóttir, bæjarstjóri Seltjarnarness
Dagur B. Eggertsson, borgarstjóri Reykjavíkur
Gunnar Einarsson, bæjarstjóri Garðabæjar
Haraldur Líndal, bæjarstjóri Hafnarfjarðar
Haraldur Sverrisson, bæjarstjóri Mosfellsbæjar "

 

Miklir hljóta hæfileikar Dags B. Eggertssonar á stjórnmálasviðinu að vera þegar  Sjálfstæðismenn í sveitarstjórnum láta hann hafa slíka forystu fyrir sér í Borgarlínu-, léttlestakerfinu og flugvallarmálinu  í stríðinu við nútímann og einkabílinn.

Eru þeir bæjarstjórar allir núna sameinaðir í að tryggja Degi B. og hans fólki áframhaldandi völd í Reykjavík?

Hafa þau Ármann Kr. Ólafsson bæjarstjóri í Kópavogi, Ásgerður Halldórsdóttir á Seltjarnarnesi og Gunnar Einarsson í Garðabæ tekið sæti í endurkjörsnefnd Dags B. Eggertssonar og vinstri meirihlutans í Reykjavík? 

Sjálfstæðisflokkurinn þarf greinilega ekki á mínu atkvæði að halda að vori þar sem upprunnir virðast nýir tímar.Ég á ekki samleið með Degi B. Eggertssyni og hans stefnumálum.

 

Lifi þetta góða Sjálfstæðisfólk marga góða Daga og takk fyrir mig.

Íslensk hagspeki:

Íslensk hagspeki

Ef fólkið er duglegt og allt gengur vel og krónan styrkist

Þá verður að fella gengið og lækka laun

Þannig skilgreinir Guðmundur Ólafsson, hagfræðngur í íslenska hagfræði.Og verður hann seint ásakaður um hægrimennsku. 

Þegar íslenskir ferðaþjónustaðilar eru staðnir að heimsmeti í okri á hverju sem er miðað við önnur lönd, þá segja þeir að það megi ekki leggja venjulegan virðisaukaskatt á þjónustuna. Þá hætti fólk bara alveg að koma.

Íslensk hagspeki í hástigi.

Er ekkert að marka?

hvað fólki finnst um Reykjavíkurflugvöll?

Dagur B. og Hjálmar eru búnir að teikna lestarstöð Borgarlínu og fluglestarinnar til keflavíkur á miðjan völlinn sem þeir ætla að loka.

A bloggsíðu minni hef ég beðið um að taka þátt í skoðanakönnun um tilvist flugvallarins.

Viltu loka Reykjavíkurflugvelli ?

Já 26.8%

 

Nei 73.2%

 

15058 hafa svarað.

 

Þetta hefur engin áhrif á Dag B.?

 

Eru fimmtánþúsund manns ómarktækur hópur?

 

Er ekkert að marka að 73.2 % aðspurðra vilja hafa Reykjavíkurflugvöll á sínum stað áfram?

 

Er það ekki svipaður hundraðshluti og í undirskriftalista landsmanna allra um sama efni sem þeir Friðrik Pálsson söfnuðu?

 

Er Dagur B. ónæmur fyrir vilja landsmanna eða kjósenda yfirleitt? Veit hann allt best sjálfur?

 

Er bara ekkert að marka okkur hina?

 

Afvegaleiddur

er hann gamli vinur minn Einar Benediktsson þegar kemur að Evrópusambandinu og stöðu Íslands gagnvart því.

Einar hefur ritað margt um alþjóðamál af mikilli yfirsýn og þekkingu. En það er eins og að hann geti aldrei séð heiminn nema innafrá úr ESB.

Í Mogga í dag ritar hann enn eins greinina í þeim hefðbundna stíl:

Þar segir m.a.:

".... Þetta kallar á stöðuga vinnu þýðingarmiðstöðvar utanríkisráðuneytisins, sem auk starfsliðs í Reykjavík rekur litlar starfsstöðvar á Akureyri, Seyðisfirði og Ísafirði.

Fullur skilningur verður að vera á því, að ekki getur verið um það að ræða að Ísland velji sér eitthvað úr þessu viðskiptafrelsi en hafni öðru.

Á sínum tíma varð Ísland þátttakandi í allri fríversluninni í EFTA til að geta notið tollfrelsis fyrir sjávarafurðir, sem var lítill hluti alls samningsins þótt mikill væri fyrir okkur. Það sama á vissulega við um EESsamninginn.

 

Þátttaka í Evrópusamstarfinu kostar sitt en skilar sér margfalt í viðskiptalegum ávinningi.

Þá hlýtur Ísland sem fullvalda ríki í samfélagi þjóðanna ávallt að vera öðrum jafningi. Látum ekki eitthvert holtaþokuvæl um smæð og einangrun hrekja okkur af þeirri leið...."

Hversvegna getur Einar ekki útskýrt fyrir okkur hversvegna við getum ekki sagt upp EES samningnum sem er okkur verulega íþyngjandi á ýmsum sviðum? Af hverju getum við ekki staðið á eigin fótum og verslað við þá sem við okkur vilja versla? Halda menn að enginn vilji kaupa af okkur fisk? Halda menn að enginn vilji selja okkur neitt?

Fyrir mitt leyti er ég sannfærður um að við þurfum ekkert á því að halda að vera að þýða gerðir og og tilskipanir ESB. Okkur varðar bara ekkert um þær í flestum tilvikum.

Ef þær verða áfram gefnar út á ensku, sem er ekkert sjálfgefið eftir Brexit, þá getum við haft fólk í að lesa þær. Þó færri skilji frönsku og þýsku þá er hægt að fá þær líka á dönsku.

Við getum tekið það upp sem til almenningsheilla horfir en sleppa hinu ruglinu sem okkur varðar ekkert um.

Hversu sem Einari finnst það fúlt þá erum við ekki á leið inn í Evrópusambandið. Við verðum sjálfstæð þjóð og gefum aldrei frá okkur landið okkar og auðlindir þess.

Krateríið um alþjóðavæðinguna á ekki hljómgrunn meðal Íslendinga. Við höfum aldrei haft neitt gagn af Evrópumálum meginlandsins nema til að græða á illdeilum þjóðanna þar.Í einstaka tilfellum hafa þó áhrif frá ESB náð að minnka skaðann af heimsku, heimóttarskap og einangrunarhyggju okkar embættismanna og kjörinna fulltrúa óupplýstra kjósenda. En það er orðið mun minna en það var og fer minnkandi með auknum ferðalögum til umheimsins og fróðskaparöflun internetsins. Einangrun og átthagafjötrar Íslands hafa verið rofnir og koma ekki aftur. 

Einar ætti að reyna að fara að gera sér þessi grunnatriði ljós í stað þess að reyna að afvegaleiða bæði sjálfan sig og aðra í úreltri kreddufestu eins og strangtrúarmenn ríghalda í Kóraninn og Biflíuna.

 

Til hvers?

í veröldinni er verið að svona skrípaleikjum:

Svo segir í Mogga:

"Alþingismenn hafa lagt fram fjölda fyrirspurna til ráðherra fyrstu tvo daga vikunnar.

Píratarnir Jón Þór Ólafsson og Björn Leví Gunnarsson hafa lagt fram 11 samhljóða fyrirspurnir til hvers ráðherra fyrir sig. Fyrirspurnin er svohljóðandi:

„Hverjar eru tekjur og gjöld ráðuneytisins og þeirra stofnana sem heyra undir málefnasvið ráðherra og hver er áætluð þróun útgjalda samkvæmt fjármálaáætlun 2018– 2022? Óskað er eftir sundurliðun eftir málefnasviðum og hagrænni flokkun, sundurliðað í launakostnað og rekstrarkostnað, skipt eftir lögbundnum verkefnum, þ.m.t. tímabundnum verkefnum, yfirstandandi og fyrirhuguðum, og öðrum kostnaðarliðum.“

Það verður því nóg að gera í ráðuneytunum.."

Af hverju senda þessir vesalings þingmenn ekki tölvupóst sem getur svalað forvitni þeirra og greinilegri almennri fáfræði um ríkisfjármál. Jón gæti sem best verið í malbikinu á meðan og hinn hjálpað honum jafnvel?.

Er einhver sem getur sé einhvern tilgang í þessu annan en sprellikúnstir og það að eyða tíma og fjármunum landsmanna í auglýsingamennsku fyrir sjálfa sig, fá nafnið prentað í Mogga við þetta tækifæri? Halda þeir að þetta afli þeim atkvæða? Halda þeir að þetta sé sniðugt?

Til hvers er þessi heimska sem kemur hart niður á virðingu Alþingis sem er ekki beysin fyrir?

Allar þessar auglýsingar

frá bílasölum í öllum fjölmiðlum! Það er ekki þverfótað fyrir því að ´bílakaupum er haldið stíft að almenningi. Bílainnflutningut er sem aldrei fyrr. Allir virðast keppast við að selja og  kaupa bíla. Lánastofnanir og lífeyrissjóðir lána fyrir bílakaupum. allt er gert til að fjölga bílum.

Er þetta af því að fólkið vill eiga bíla?

Hjálmar Sveinsson segir tilgangslaust að fjölga akreinum því þær fyllist bara af bílum. Dagur B. segir að ekki eigi að byggja umferðarmannvirki í borginni til að þjóna bílum. Þessvegna sé tími mislægra gatnamóta liðinn og byggja skuli Borgarlínu og lestir þar sem fólk eigi að ferðast með sé það ekki á hjólhestum. Það eigi að grafa Miklubrautina niður í stokk.Svo hún sjáist ekki líklega og þá er það vandamál leyst.

Enga Sundabraut eða ný byggingasvæði í Geldinganesi eins og Marta Guðjónsdóttir vill.Enda er hún úr litla Sjálfstæðisflokknum sem Dagur tekur ekki mark á.  Heldur skal þétta byggðina í Kvosinni og á Flugvellinum sem skal hverfa en nýr byggður einhversstaðar langleiðina til Keflavíkur. Þetta fann Dagur B. út með því að búa til Rögnunefndina og finna nýtt flugvallarstæði ofan á virku eldfjalli í Hvassahrauni.Hvaða máli skipta 150 milljarðar ef maður borgar þá ekki sjálfur?

Merkilegar allar þessar auglýsingar um nýja bíla, opnunarhátíðir vegan nýrra bíla og áherslur á fréttir af bílum og nýjungum þeim tengdum. Sérstaklega þegar það er athugað að kjósendur vilja ekki bíla heldur almenningssamgöngur og Borgarlínur og hjólhesta frekar en einkabíla. 

Það er erfitt að koma auga á samhengið í þessu öllu. Auglýstar breytingar á Aðalskipulagi þar sem Reykjavíkurflugvöllur verður skiptistöð fyrir Borgarlínu og fluglest til Keflavíkur.

Allar þessar bílaauglýsingar og umræða um bíla þegar það er þvert á stefnu kjósenda Dags B. Eggertssonar og Borgarstjórnarmeirihlutans í Reykjavík. Sveitarstjórnir í nágrenninu virðast hafa samþykkt þessi áform höfuðborgarinnar og taka þátt í uppbyggingu Borgarlínu.

Til hverra höfða allar þessar auglýsingar um bíla ef ekki á að byggja götur?.

Það er að vora!

og það kemur í mann fiðringur að lesa grein Kjartans Magnússonar í Mogga í dag. Kjartan segir:

"Tæplega þrjú hundruð manns sóttu vel heppnað Reykjavíkurþing Varðar, Fulltrúaráðs sjálfstæðisfélaganna í Reykjavík, sem haldið var um helgina. Þingið sótti sjálfstæðisfólk á öllum aldri og úr öllum hverfum borgarinnar til að ræða borgarmál, vinna að stefnumótun og styrkja tengslin sín á milli.

Á þinginu komu fram fjölmargar hugmyndir, stórar sem smáar, sem allar miða að því að bæta mannlíf í Reykjavík með einhverjum hætti. Einnig var farið yfir stöðuna í hinum ýmsu málaflokkum borgarinnar og rætt um hvernig standa megi betur að rekstri þeirra.

Málefnanefndir unnu að ályktunum sem síðan voru bornar upp og samþykktar á þinginu. Var ómetanlegt fyrir okkur borgarfulltrúa að taka þátt í störfum Reykjavíkurþingsins og skiptast þar á skoðunum við fjölda fólks sem gjörþekkir aðstæður í sínum hverfum og veit hvernig bæta má þjónustu og rekstur Reykjavíkurborgar. Vil ég þakka öllum þeim sem sóttu Reykjavíkurþingið og tóku þátt í störfum þess. Sérstaklega vil ég þakka hinum stóra hópi sjálfboðaliða úr sjálfstæðisfélögunum sem lögðu af mörkum mikið starf í sjálfboðavinnu til að gera þetta glæsilega þing að veruleika.

Reykjavíkurþingið var glæsileg byrjun á baráttu Sjálfstæðisflokksins fyrir borgarstjórnarkosningar, sem fara fram eftir eitt ár, 26. maí 2018. Nú verður fjallað um nokkrar ályktanir þingsins en með þeim hafa línur verið lagðar að stefnuskrá flokksins fyrir kosningarnar. Reykjavík á að vera fyrsti kostur fyrir alla þá sem vilja búa á höfuðborgarsvæðinu.

Sjálfstæðisflokkurinn vill að útsvar verði lækkað í áföngum og verði komið niður fyrir meðalútsvar á landsvísu á næsta kjörtímabili.

Reykjavíkurborg skal tryggja nægjanlegt framboð af lóðum til sölu.

Sjálfstæðisflokkurinn vill að byggingarréttargjald verði fellt niður. Lóðir í nýbyggingarhverfum skal selja á kostnaðarverði. Með auknum íbúafjölda aukast útsvarstekjur sem gerir borgina betur í stakk búna til að sinna grunnþjónustu.

Lagt er til að öllum leigulóðum íbúðarhúsnæðis verði afsalað til eigenda húsnæðis þess sem á lóðunum stendur.

Sjálfstæðisflokkurinn er fylgjandi því að afnumin verði sú lagakvöð sem síðasta vinstri stjórn setti á Reykjavíkurborg að fjölga borgarfulltrúum úr 15 í a.m.k. 23 við næstu borgarstjórnarkosningar, í maí 2018.

Sjálfstæðisflokkurinn vill tafarlaust endurskoða núgildandi aðalskipulag Reykjavíkur. Að alskipulagið þarfnast betra jafnvægis í þéttingu byggðar og nýrra byggingarsvæða.

Samfara áframhaldandi þéttingu byggðar skal leggja áherslu á nýtingu byggingarlands austan Elliðaáa.

Fullt tillit skal tekið til lífsgæða íbúa og umhverfis.

Sjálfstæðisflokkurinn telur mikilvægt að standa vörð um græn og opin svæði í borginni og hlúa að náttúruperlum, svo sem Elliðaárdal, Laugardal, Öskjuhlíð og svæðinu í kringum Reynisvatn.

Reykjavíkurflugvöllur verði í Vatnsmýrinni í aðalskipulagi í óskertri mynd. Staðsetningu flugvallarins verði ekki breytt nema annar betri kostur bjóðist. Sjálfstæðisflokkurinn hefur lengi lagt áherslu á mikilvægi góðra samgangna í borginni, hvort heldur sem um er að ræða hjólreiðar, gangandi vegfarendur, almenningssamgöngur, leigubíla eða einkabíla.

Góðar samgöngur eru undirstaða nútíma lífshátta. Undanfarna áratugi hefur þessum málum hins vegar ekki verið sinnt sem skyldi í Reykjavík. Öryggi í umferðarmálum hefur vikið fyrir gæluverkefnum. Nauðsynlegt er að forgangsraða í þágu viðhalds og uppbyggingar á vegakerfi höfuðborgarinnar með öryggi að leiðarljósi. Meðal brýnna samgönguverkefna má nefna Sundabraut, bætt umferðarflæði Miklubrautar og tengingar við önnur sveitarfélög. Örar tæknibreytingar munu setja mark sitt á samgöngur framtíðarinnar og þarf skipulag að taka tillit til þess.

Stefna Sjálfstæðisflokksins í skólamálum byggist á því að allir nemendur hafi aðgang að námi sem hentar hverjum og einum. Hagsmunir nemenda skulu ávallt vera miðpunktur stefnumörkunar og framkvæmda í skólum borgarinnar. Lögð verði áhersla á að auka fjölbreytni í skólastarfi og fjölga valkostum í námsleiðum og rekstrarformi skóla.

Áhersla verði færð frá miðstýringu í átt að auknu sjálfstæði og sveigjanleika í skólastarfi. Efla þarf tengsl skóla og atvinnulífs. Lögð verði áhersla á að kynna tækni- og iðngreinar fyrir börnum til að fleiri nemendur skili sér í iðnog tækninám.

Meginviðfangsefni skólastarfs er aukinn námsárangur og framfarir í námi og kennslu. Til að meta þann árangur þarf reglubundnar mælingar og viðmið sem öllum eiga að vera aðgengileg. Auka þarf gagnsæi í árangursmælingum. Tryggja þarf aðgengi allra skóla að viðeigandi og stöðluðum skimunar- og mælitækjum.

Gera þarf átak í endurbótum og viðhaldi á skólahúsnæði, sem víða er í slæmu ásigkomulagi vegna langrar vanhirðu. Sömuleiðis þarf að lagfæra og bæta skólalóðir og skólaumhverfi.

Hér hefur einungis verið tæpt á nokkrum atriðum en í framhaldinu verður gerð grein fyrir fleiri góðum ályktunum sem samþykktar voru á hinu glæsilega Reykjavíkurþingi um helgina."

Þegar maður ekur hér um í Orlando og sér umferðarmannvirkin þar sem hnútapunktar hraðbrautanna liggja á mörgum hæðum á forsteyptum gulum brúarmannvirkjum með grænum burðarbitum þá hljóma fyrir eyrunum yfirlýsing stjórnmálamanns uppi Íslandi:

"Tími mislægra gatnamóta er liðinn"

Hvernig geta menn látið svona út úr sér? Hvernig getur fólk kosið menn til ábyrgðarstarfa sem þannig hugsa?

Einkabíllinn er það samgöngutæki sem allir kjósa sér ef þeir mögulega geta. Það þarf þvi að vinna að því að greiða fyrir þeim lífskjarabótum almennings sem gera bílaeign mögulega.Einstæðar mæður geta ekki notað strætóa eða hjólhesta til að skutlast með börnin í leikskóla, fara í tvær vinnur, skjóta börnum í íþróttir aða á bíó. Hvaðan er það fólk sem heldur að þetta sé nútíminn?

Flugsamngöngur þurfa að vera almenningseign. Reykjavíkur- flugvöll þarf að fara að nýta betur og stórauka þaðan millilandaflug. Þannig geti menn skroppið til London fyrir hádegi og komið til baka að kvöldi án þess að leggja á sig margra klukkustunda ferðalag suður til Keflavíkur og til baka fyrir einn skreppitúr.

Reykjavíkurflugvöllur er vannýtt auðlind  Borgarbúa sem þarf að hlúa að. Hugsanlega þarf að lengja einhverjar brautir út í sjó en ekki að loka þeim.

Hvernig getur fólk kosið fólk til starfa sem vill loka þeirri perlu höfuðborgarsvæðisins sem  Reykjavíkurflugvöllur er  og setja þar upp strætóstoppistöð á Aðalskipulagi? Leggur til í alvöru að byggja annan flugvöll í túnfæti Keflavíkur  fyrir 150 milljarða ofan á virku eldfjalli? 

Það mun vora að ári þegar Sjálfstæðisflokkurinn mun taka við áhrifum í Borginni og núverandi vinstra afturhaldi og óstjórn þess, umferðarfíflagangi og Borgarlínufabúleringum verður komið frá völdum út á öskuhauga stjórnmálasögunnar. 

 

"All will be well!"

Dauðans óvissi tími sem sr. Hallgrimur talar um er eitthvað sem stundum læðist að manni þegar mann síst varir. Að tími reikningskilanna geti verið í nánd er ný hugsun sem maður hefur aldrei hugleitt en er samt eilífur áhrifavaldur í þessum heimi í huga skálda og stórmenna. Samt deyja þeir ekkert öðruvísi en Pétur eða Páll.

 

Maður sjálfur er auðvitað eilífur lengst af ævinni og hefur plentí að gera. Má ekki vera að því að sinna sínnum nánustu eða að vanda sig.

Svo kemur allt i einu læknir sem maður hefur aldrei séð fyrr og segir við mann sisona: Þú ert með krabbamein í kjaftinum. Þú ert ekki að fara neitt í frí til Ameríku. Þú ert ekki að fara neitt annað en í 35 geisla sem hefur kannski  85 % sjans að lukkast. Annars líklega er þetta tvísýnt.

Ertu ekki að djóka?

Meðferðin klikkar svo þannig að hluti meinsins þolir geislana og skýtur upp kollinum aftur.  Hvað er þá næst? Jæja,  maður hættir að hugsa um það og snýr sér að öðru. Á maður að leggjast á bæn eða að reyna að standa í lappirnar? Þykjast vera maður? Það er hafin chemo sem hrífur ótrúlega snöggt og meinið nærri hverfur og ég verð sem nýr.

Maður er búinn að vera hálft ár á placitaxól og erbitux eða cetuximab meðferð á 14 daga fresti. Þar hittir maður fjöldann af dásamlegu fólki sem maður þekkir og er í sömu erindagerðum og svo þessa engla sem þarna starfa. Og maður  er í fullu fjöri með kjaftinn á fullu. Skrifast á og er í útgáfustarfsemi með Sám fóstra.https://issuu.com/radandi_auglysingastofa/docs/samur_fostri_1_tbl_april_2017_280x4

Jón Valur skrifar svo í athugasemd á blogginu þar sem mér varð á að vanda mig ekki í orðum um trúmálin:

 " "Um Guð sem skapara talaði Páll postuli skynsamlega til heimspekinga Grikkja á Aresarhæð í Aþenuborg: Postulasagan, 17.24-29.)"

 

Ég skrifaði honum á móti:

 

 "Þú virðist efast stundum líka eins og Matthias gerði sem orti ódauðleg ljóð af þvílíku afli sem hann gerði..."

Jón segist hvergi hvika í trúnni enda sannkristinn maður.

En ég þarf kannski að skrifa eitthvað um trúmálin sem ég er ekki vanur að gera af tillitsemi við annað fólk. Ég vil ekki meiða tilfinningar  neins viljandi sem vill hafa þær fyrir sig. Islam er hinsvegar annar hlutur en kristnin sem ég stend jákvæður til þjóðkirkjunnar vegna siðaboðskaparins og kærleikans og góðra áhrifa hennar á þjóðlífið. En ég stend öndverður vegna pólitíkurinnar,öfganna og illskunnar í Islam og vil ekki sjá það drasl neinsstaðar nálægt mér og alls ekki á Íslandinu mína góða ef kostur er á öðru.

.

Mér dettur í hug að halda hérna samt dálítið áfram með trúmálin mín  til þess að gera grein fyrir minni afstöðu,skilja sjálfan mig örlítið betur kannski og ef einhver vill forvitnast um mína afstöðu til trúar.

Ég er ekki fermdur að eigin vali en ég var skírður vegna ákvörðunar móður minnar hennar Karenar Elísabetar.Eg les ekki biflíuna nema sem sagnfræði og gef lítið fyrir særingar. 

Faðir minn Jón Á Bjarnason, sem var lítill kirkjunnar maður en stilltur vel, talaði stundum á stórhátíðum um það að nú skyldum við ganga á Aresarhæð sem Jón Valur nefndi hér að framan. Hann  náði þá gjarnan í Hákon bróður sinn og við gengum ógleymanlega túra saman á Öskjuhlíð upp að  tömkunum og gengum þá steyptan  hitaveitustokkinn.

Þar hittum við marga skemmtilega karaktéra eins og til dæmis hann Harald Guðmundsson fasteignasala sem pabbi spurði á kjördegi hvort hann væri búinn að kjósa?. "Jón minn,ég er löngu hættur að kjósa því þetta eru allt organiséraðir bófaflokkar sem eru að bjóða fram."

Ég var þá ungur og skildi þetta tal ekki alveg. En ég hef oft hugsað um þetta síðan og af því að ég gekk síðar til liðs við Sjálfstæðisflokkinn  af trúfestu  þá er ég ekki alveg dús við hann Harald hvað minn flokk varðar.Ég vil fylgja sjálfstæðisstefnunni  í þjóðmálum enda er hún mjög einföld í sínum tveimur liðum um frelsi einstaklingsins til orðs og æðis og sjálfstæði þjóðarinnar.

 En ég  skil margt núna af af því sem hann þarna í ljósi sögunnar á mínum bráðum 80 árum. Vonbrigði og sigrar skiptast á í pólitíks en fyrir mér tengjast alltaf krateríinu og vinstrimennskunni. 

Það var hún Mæsa föðursystir mín sem á þetta hugtak um hann Gussa á loftinu sem kom upp þegar ég var að tala við hann Jón Val vin minn á blogginu.

Mér finnst fólk oft treysta um of á handleiðslu  frekar en á sig sjálft. Leiðir til þess að fólk reynir ekki?

En þetta með trúmálin kemur oft  allt af gerð hvers og eins og uppeldinu ekki síður.

Börn Ágústar H. Bjarnason prófessors voru lítið kirkjunnar fólk. En það hafði sínar hugmyndir um annað líf.

Pabbi minn Jón Ólafur  var í það minnsta mjög  blendinn í trúnni ef ekki alveg laus við trú en lét mömmu eftir að skíra og ferma börnin ef þau vildu slíkt sjálf.

Helga föðursystir og hún Mæsa systir hennar  voru miklu harðari í kirkjufjandmennskunni  en pabbi. Og hann Hákon var líkari pabba í hversdagslegu hófstilltu tali. En ég held að hann hafi alls ekki verið hið minnsta trúaður maður held ég. Ég veit ekki svo glöggt um Halla föðurbróður þar sem við ræddum ekki saman um trúmál. En okkur var vel til vina okkur Halla og hann var hjálpsamur og góður maður. 

Mamma mín Karen Elísabet Halldórsdóttir Skaptson Hedvigardóttir Wathne var sannkristin kona og hennar fólk allt.

Amma mín Sigríður, dóttir Jóns Ólafssonar ritstjóra, eitthvert mesta andlega ofurmenni sem ég hef kynnst nokkru sinni, sagði við mig:

"Það er til annað líf".

Af hverju segirðu þetta amma mín sagði ég? "Ég bara veit það"  sagði hún. "Ég skal láta þig vita eg ég get ef þetta er rétt hjá mér." Ekki var fleira sagt á þessum fundi okkar af mörgum.

Mörgum árum eftir að hún kvaddi bauð Guðmundur Einarsson verkfræðingur mér á skyggnilýsingu hjá Hafsteini miðli.Guðmundur var feykilega skemmtilegur maður og fjölfróður. Hann trúði á annað líf og leitaði svara.

Þar lýsti Hafsteinn meðal annars aragrúa fólks,  sem aðrir könnuðust við en ég,  "skínandi bjartri veru sem aldrei hafði gengið á íslenskum búningi en alltaf á dönskum búningi." "Hún kveðst heita Sigríður og vera Jónsdóttir."

Ég þóttist kenna ömmu mína Sigríði því hún lýsti hérna megin  með fleiri wöttum en aðrir sem ég hef síðan hitt. Ég spurði því samstundis eins og maður átti að gera ef maður kannaðist við eitthvað: "Hvað segir hún amma mín um framhaldslífið?" Svarið kom leiftursnöggt: "Hún segist aldrei hafa neitað staðreyndum." Og meira var það ekki.

Mér datt í huga að Hafsteinn gæti lesið hugsanir fundarmanna þegar hann lýsti Jóni Valfells sem ég þekkti vel. Ég spurði sem einasti fundarmannanna sem hann þekkti og  spurði hvernig honum liði. " Hann segist stundum hafa getað verið kurteis" kom svarið eldsnöggt. Enginn annar vissi um það atvik sem þarna tengdist mér og átti upptök í gengnum gleðifundi þar sem lá vel á Jóni og öllum öðrum  En Jón var afburðaskemmtilegur maður og margvís.

Ég hef ekki sannfærst um annað líf eða trúmál þrátt fyrir þetta og trúi ekki mikið á þetta en frekar á sérgáfu Hafsteins Björnssonar sem ég þekkti aldrei neitt frekar.

Dauðinn er fyrir mér eiginlega sá mikli rukkari sem réttir oss reikinginn yfir það sem skrifað var hjá oss eins og hann Tómas segir.

Ég þarf eiginlega ekkert meira og reyni að sætta mig við það nú í auðmýkt þegar ég sem gamli grínistinn horfi framan í dauðans alvöruna í fyrsta sinn á ævinni og verð að gera mér ljóst að ég er hugsanlega ekki eilífur eins og mér hefur samt líklega alltaf fundist ég vera það sem af er þessu lífi. Merkilegt að ég skyldi aldrei trúa því raunverulega innst inni að ég myndi ekki lifa forever og að framtíðin væri ekki óendanleg?

Ég horfi mikið á myndir Hubble sem ná aragrúa ljósára út í geiminn. Mér finnst trúlegt að hann Guð almáttugur hefði um meira að hugsa en hvernig mér líður eða hvað ég er að bardúsa í ljósi þeirra rámu regindjúpa sem þar við blasa. Mikill væri sá máttur ef svo væri ekki?

Nú er framundan óræð sigling hjá mér og ég veit ekki alveg hvert stefnir. Ég er samt bjartsýnn, blessunarlega kvíðalítill enda þéttheimskur en fullur af lífsvilja og gríni því mér finnst svo gaman að vera til og margt eftir að gera sem ég vil koma í framkvæmd.

Núna er ég einkennalaus á platinum lyfjum sem hafa minnkað meinið stórkostlega niður í næstum ekkert. En líklegt er að þessi lyf hætti að verka og krabbinn komi aftur og þá er víst alvara á ferðum.

En það er hinsvegar nýkomið nýtt lyf Nivolumab eða Opdivo hér í Ameríku og er víst líka leyft í Evrópu, hvort sem það er fáanlegt á Íslandi eða ekki vegna fjárhagsstöðuvanda heilbrigðismálanna. Þetta lyf brýtur blekkingarvarnarmúr krabbafrumanna þannig að T-frumurnar sjá þær í réttu ljósi og ráðast á þær og reyna að drepa þær eða drepa þær alveg.Gera fyrst gat á þær með proteini sem eir kalla perforin og sprauta svo cytotoxin-eitri inn í þær. Eða þannig er það  þegar bæunar eru til CAR-T cellur við hvítblæðilækningar.Einhvernveginn þannig er þessi mekanismi án þess að ég hafi hundsvit á neinu.

Makalaust hvað vísindamenn vita mikið um svona örsmáa hluti? Allaveg eru raddir farnar að heyrast að miklar framfarir í lækningum geti verið framundan.

Þeir eru jafnvel farnir að tala um að krabbinn geti orðið sigraður sem nú drepur meira en hálfa milljón manns á ári í USA. Nixon boðaði sigur árið 1971 en hann hefur aðeins dregist.

Það er rosaleg grein í Popular Mechanics um krabbarannsóknir sem ég er að lesa sem fer um víðan völl og rannsóknir. Mjög áhugaverð en knúsuð.Leiðarinn er hinsvegar óhugnanlegur að lesa.

Lífslíkur fólks í sömu stöðu og ég hafa aukist mikið við þetta lyf Opdivo og dánartíðni  fallið talsvert.

Þetta getur hugsanlega breytt miklu fyrir mig. En sem sagt veit ég ekki neitt um þetta né hvað minn læknir hann Örvar  hyggst fyrir. En óneitanlega hressist maður við slík tíðindi. Kannski kemst maður bara yfir þetta?

Mér líður hinsvegar núna prýðilega og finn ekkert fyrir neinum óþægindum og hef fulla lyst á whisky, bjór og mat. 

En nú minnist ég ftur orða Winstons Churchills og skil þau eilítið öðruvísi en ég gerði á fyrri tíð:

"For the rest live dangerously, take life as it comes, one day at a time.

Dread nought!

All will be well"

 

Svona hugsa þeir

 félagshyggjumenn. Enginn þúfa má vera annarri hærri.

Óli Björn Kárason veltir þessu fyrir sér með þessum orðum:

"

"Í þingsal er alið á fjandskap í garð einkarekstrar í heilbrigðiskerfinu.  Margir fjölmiðlungar eru duglegir við að sá fræjum tortryggni og óvildar í garð þeirra, sem hafa haslað sér sjálfstæðan völl í heilbrigðisþjónustu.  Góð reynsla af einkarekstri skiptir litlu, fjölbreyttari og betri þjónusta er aukaatriði, lægri kostnaður ríkisins (skattgreiðenda) er léttvægur.  Stytting biðlista eftir aðgerðum er ekki aðalatriðið, heldur, að komið sé í veg fyrir einkarekstur, jafnvel þótt það leiði til þjóðhagslegrar sóunar og lakari lífskjara einstaklinga, sem þurfa að bíða mánuðum saman eftir úrlausn sinna mála.  Fjandmenn einkarekstrar vilja miklu fremur senda sjúklinga til annarra landa en tryggja aðgengi almennings að nauðsynlegri þjónustu hér á landi.  Í stað þess að tryggja öllum landsmönnum góða og trausta heilbrigðisþjónustu er rekstrarformið mikilvægast - trúaratriði.  Hinir "sanntrúuðu" leiða aldrei hugann að mikilvægi einkarekstrar s.s. á sviði heilsugæzlu, sérfræðiþjónustu, endurhæfingar og hjúkrunarheimila. 

Óvild í garð einkarekinna skóla er sama markinu brennd, og afleiðingar eru minni samkeppni og fábreyttari valkostir.  Kostnaðinn bera nemendur, kennarar og samfélagið allt."

Og fellur ekki íslenski basarinn, hann Bjartur í Sumarhúsum undir þessa skilgreiningu Óla Björns?

""Framtaksmaðurinn er og hefur alltaf verið drifkraftur framfara og þar með bættra lífskjara. Hann er aflvaki breytinga - kemur auga á tækifærin, býður nýja vöru og þjónustu, skapar störf og eykur lífsgæði samferðamanna sinna.  Með nýrri hugsun og nýjum aðferðum ógnar framtaksmaðurinn hinum stóru og knýr hjól samkeppninnar." 

Þetta er samt eitur í beinum félagshyggjunnar sem vilja að enginn kollur sé öðrum hærri og allir hafði það jafn skítt svo þeir geti fengið að stjórna þeim og skattleggja.

Svona hugsa þær Svandís og Katrín til dæmis og fleiri þarna úti.