Hvernig væri að fara að hugsa um sjálfstæði Íslands?

í stað þess að hanga föst í gömlum gjörningum sem hafa aðeins umdeildum árangri skilað? Er ekki óþarfi að tala sífellt um tveggja stoða kerfi samningsins sem er greinilega aðeins að virka í aðra áttina.

Þorir Sjálfstæðisflokkurinn engu lengur í  sjálfstæðri tilveru? Þorir hann ekki lengur að hafa skoðun eða leita eftir henni meðal flokksmanna? Forystan talar bara um tveggja stoða kerfi sem er bara einhliða? En hvaða skoðun hafa flokksmennirnir á EES? Vill forystan ekki spyrja?

Svo segir í Mogga:

"Meiri­hluti þing­manna í neðri deild breska þings­ins hafnaði því í at­kvæðagreiðslu í gær að Bret­land skyldu sækj­ast eft­ir því að vera áfram aðili að Evr­ópska efna­hags­svæðinu (EES) eft­ir að landið hef­ur yf­ir­gefið Evr­ópu­sam­bandið.

Meiri­hluti lá­v­arðadeild­ar þings­ins hafði áður gert breyt­ingu á frum­varpi um út­göng­una þess efn­is að Bret­land yrði aðili að EES-samn­ingn­um eft­ir að hún hefði átt sér stað sem gert er ráð fyr­ir að verði í lok mars á næsta ári. Neðri deild þings­ins hafnaði því hins veg­ar með 327 at­kvæðum gegn 126 sam­kvæmt frétt breska rík­is­út­varps­ins BBC."

Hvernig væri að fara að hugsa um  sjálfstæði Íslands Sjálfstæðisflokkurinn minn? 

Aumingja íhaldið

í Borginni.

Það eru ömurleg örlög fyrir Eyþór Arnalds að hljóta sömu örlög og sá ágæti Halldór Halldórsson á undan honum. Alveg sama hvað sá maður sagði og lagði til af skynsamlegu viti, Dagur og hyski hans hlustuðu ekki á hann, voru á móti öllu sem hann sagði ef hann þá sagði eitthvað, sýndu honum algera fyrirlitningu og tómlæti. merkilegt að hann mætti samt vel og var alltaf að reyna. Sama máli gegndi um Kjartan og Mörtu, gersamlega fryst úti. Þau dóu öll eiginlega niður úr hreinum leiðindum og tilgangsleysi.

Nú bíður þetta hlutskipti 8 manna Borgarstjórnarflokks Eyþór Arnalds. þeir gættu alveg eins myndað tvær tveggja manna Bridge-sveitir  og æft sig á Borgarstjórnarfundum þegar glærusýningar Dags og Hjálmars standa sem hæst. Eyþór gæti kannski tekið sellóið með og spilað einhverja frumsamda róandi Borgarlínukantötu fyrir sig og sitt fólk?

Málið er að ekkert vitrænt kemur á borð Borgarstjórnar næstu 4 ár sem tekur því að vera að fara í pontu og tala á móti af skynsemi. Þeir talar aðeins Seifur sjálfur sem allt veit mærður og hallelújaður af heilaþvegna liðinu í kring um hann.

Það verða aðeins fluttar tillögur um meiri fjandskap við einkabílinn og umhverfi hans, tillögur um aukinn lóðaskort og meiri húsnæðisvanda. Meiri þrengingar að flugumferð, engin flugstöð verður byggð þó að Sigurður Ingi sé með derring við hávelborinheitin.

Það skal stefnt að lokun vallarins á næstu árum með Ríkið byggir nýjan Flugvöll í Hvassahrauni fyrir Dag samkvæmt því sem hann lagði til í Rögnunefndinni á sinni tíð. Þar tókst honum að niðurlægja og prakka til  hið mætasta fólk til þess að ræða flugvallarmál við staðfastan flugböðulinn sjálfan sem var auðvitað mættur með niðurstöðuna áður en fyrstu fundur í nefndinni var haldinn. 

Áframhaldandi fjandskapur við einkaflugið og mannvirki þess á Reykjavíkurflugvelli verður í forgrunni og fram haldið að rukka lóðagjöld af þeim og vatnskatta þó ekkert sé svo látið í té opinberlega, lóðasamningar, frárennsli eða vatn.

Borgarlínan verður Alfa og Ómega alls sem andann dregur.

Er einhver ástæða til að vera að munnhöggvast við þetta lið. Mér er það stórlega til efa eftir að hafa fylgst náið með málflutningi Dags B,. í gegn um árin. Dagur er algerlega rökheldur í hvaða máli sem er. Vi alene vider er hans lyndiseinkunn.

Það er illa farið með mikla starfskrafta Eyþórs Arnalds á sviði stjórnunar sem nú verða ekki nýttir. Er þetta yfirleitt leggjandi á hann og aðra sem í Borgarstjórnarflokki Sjálfstæðismanna sitja?

Ég segi nú bara eins og mér finnst:

Aumingja Íhaldið í Reykjavík!

Breyttist eitthvað?

við fundinn í Singapúr?

Ef eitthvað breyttist, hver átti frumkvæðið?

Angela Merkel? Macron? KimJongUn?

Við vitum ekki enn til fulls hvort eitthvað breyttist eða hvað? En við vonum að það verði eitthvað til farsældar fyrir þær milljónir manna sem lifa í Austur Asíu.Og okkur líka.

Og er það ekki líklegra að eitthvað breytist til batnaðar en að það versni?

Eigum við ekki að vona hið besta með Trump Bandaríkjaforseta? Er hann ekki að reyna að gera eitthvað sem máli skiptir fyrir heimsfriðinn og okkur öll? Hvað sem 101 segir?

Ég vona að eitthvað hafi breyst.

 

Allt í klessu hjá Trump?

Tímakaup hækkaði 2.7 % frá ári til árs í Maí. Vikulaun hækkuðu 3 %. Verðbólgan er 2 % sem þýðir raunhækkun.

259.000 störf bættust við.

Þetta hefur ekki spurst til 101 liðsins og Krateríisins hérna. Þar gildir að allt sé í klessu hjá Trump.

Forkastanleg vinnubrögð

eru Styrmi Gunnarssyni hugleikin varðandi meðferð Alþingis á Persónuverndarlögum ESB sem á að keyra í gegn á síðasta degi þingsins. 

Það ískrar í forstöðumanni Persónuverndar Helgu Þórisdóttur af þrá yfir því að geta sektað og sektað alla þá sem henni eru ekki þóknanlegir. Hún fær að ráða tugi lögfræðinga til að fylgja eftir ofsóknum  á hendur almenningi,Sýnir þessi kona ekki mörg einkenni hættulegs valdafíkils?

Styrmir skrifar svo:

"Svo virðist sem Alþingi ætli að ljúka störfum í dag eða í kvöld og þá m.a. með því að samþykkja persónuverndarlöggjöf ESB.

Verði það gert yrði um að ræða forkastanleg vinnubrögð þingsins.

Nú þegar hafa tveir aðilar lýst þeirri skoðun, að samþykkt umræddrar löggjafar kunni að vera brot á stjórnarskrá íslenska lýðveldisins. Þetta eru Arnaldur Hjartarson, aðjúnkt við lagadeild Háskóla Íslands og laganefnd Lögmannafélags Íslands.

Hvernig stendur á því, að þingið ætlar að afgreiða mál af slíkri léttúð, sem svo alvarlegar athugasemdir hafa verið gerðar við af þar til bærum aðilum?

Þar að auki hafa sveitarfélög, ríkisstofnanir og hagsmunasamtök flestra helstu atvinnuvega landsins gert svo alvarlegar athugasemdir við málsmeðferð þingsins, að með ólíkindum er að þingmenn ætli að hafa þær að engu.

Nú þegar hefur Heimssýn, samtök sjálfstæðissinna, beint tilmælum til forseta Íslands um að hann staðfesti væntanlega lög ekki með undirskrift sinni. Það mundi þýða að málinu yrði vísað til þjóðarinnar til endanlegrar afgreiðslu.

Jafnframt hefur Heimssýn gefið til kynna að samtökin muni hugsanlega fara með málið fyrir dómstóla.

Getur verið að þeir sem nú sitja á Alþingi séu tilbúnir til að gera þetta bráðum 1100 ára gamla þing að eins konar stimpli, sem skrifstofuveldið í Brussel geti notað að vild sinni? "

Er ekki óhætt að leggja eyrun við þessum orðum manns sem er ekki fæddur í gær?

 

Andlit hins illa

 eru pírataþingmennirnir Þórhildur Sunna Ævarsdóttir og Halldóra Mogensen.

Svo ritar Páll Vilhjálmsson um framgöngu Pírataflokksins með Þórhildi Sunnu og Halldóru Mogensen fremstar í flokki gegn æru samviskusams embættismanns Braga Guðbrandssonar sem á áratuga langan farsælan feril að baki :

" Píratar skutu æru Braga Guðbrandssonar í kaf með slúðri úr Stundinni. Hlutlæg rannsókn sýnir það svart á hvítu.

 

Í stað þess að biðja Braga afsökunar á rógburðinum og forsprakkinn, Halldóra Mogensen segi af sér þingmennsku, hefja Píratar árásir á velferðarráðuneytið.

Píratar stunda ekki stjórnmál heldur mannorðsmorð og undirróður."

Fleiri orð þarf ekki að hafa um þennan þingflokk.

Andlit hins illa bak við Pótemkíntjöld makeup og farða nægir hugsanlega til að blekkja einhverja kjósendur einhvern tímann.En ekki alla kjósendur alltaf.

Lýðræðið að verki

í Borginni. Þökk sé litlu sérhagsmunaflokkunum sameinast þau öfl sem eru í andstöðu við vilja meirihluta Borgarbúa í því að semja um alla hluti sem fólk vill ekki. Meiri umferðartafir, meiri lóðaskort,lokun flugvallarins, Borgarlínu og fjandskap við einkabílinn.Fjölgun Borgarfulltrúanna skolaði einum kommúnista inn sem annars hefði verið úti. Fók trúði ekki á að Sjálfstæðisflokkurinn hefði lausnir enda hann flestum í barnsminni sem slíkur.

"Þórdís Lóa Þórhallsdóttir, oddviti Viðreisnar í borginni, segir að viðræður um myndun nýs borgarstjórnarmeirihluta gangi vel. Hópurinn hittist í gær og fundar aftur í dag en morgundagurinn fer að mestu leyti í námskeið fyrir nýja borgarfulltrúa. „Á þann fund fara nánast allir úr þessum hópi nema einn,“ segir Þórdís sem er borgarstjórinn, Dagur B. Eggertsson.

 

Þórdís vildi ekki segja hvenær færi að draga til tíðinda en benti  á að síðasti meirihluti hefði verið kynntur 11. júní.

Þegar tilkynnt var um meirhlutaviðræður Viðreisnar, VG, Samfylkingar og Pírata kom fram að stefnt yrði að því að niðurstaða lægi fyrir nokkru fyrir fyrsta borgarstjórnarfund sem er 19. júní. 

Þórdís segir að viðræður síðustu viku hafi að mestu leyti snúist um málefnin og flokkarnir séu því ekki farnir að ræða verkaskiptingu. „Hún er síðust á dagskránni.“

"Allt sem að helst hann varast vann, varð þó að koma yfir hann," mælti séra Hallgrímur á sinni tíð.

Fjögur ár í forinni til viðbótar.  Svona er lýðræðið að verki. 

 

Ég mótmæli

framhaldi þeirrar utanríkisstefnu Íslendinga sem byggir á refsistefnu Evrópusambandsins gagnvart Rússlandi vegna mála sem eru meirihluta Íslendinga andsnúnar.

Ég get ekki stutt ríkisstjórn sem  heldur þessari stefnu áfram frekar en að heilbrigðisráðherra í þeirri stjórn reki sjálfstæða fjandsamlega stefnu gegn einkarekstri í heilbrigðismálum.

Ég krefst þess að Íslendingar hætti hverskyns efnahagslegum refsiaðgerðum gegn Rússlandi og stuðli að því að Rússar taki að fullu og öllu sæti meðal G8 ríkjanna sem vinveitt ríki.

Íslendingar viðurkenni skilyrðislaust og óafturkræft að Krímskagi sé hluti Rússlands.

Íslendingar viðurkenni að Rússland sé verðugur samstarfsaðili á sviði alþjóðaviðskipta og stjórnmála.

Ég get ekki stutt áframhaldandi utanríkisstefnu ríkisstjórnar Katrínar Jakobsdóttur gagnvart Rússlandi og mótmæli henni sem Sjálfstæðismaður.

Bara fegurð

í myndbandi Finns Árnasonar.

https://www.youtube.com/watch?v=OgXiMgor5hA

 

Gaman að sjá eitthvað svona ómengað um bara fegurðina.

Popúlistar

eru þeir innantómu Plattenslagerar kallaðir sem eins og Pírataþingmenn bjóðast til að frelsa lýðinn og gera Fróðafrið með gullhringjum á Gnitaheiði frjálsa fyrir alla, bara ef fólk er svo vitlaust að kjósa þá út á andlitið, án þess að skoða hvaða möguleika þessi lýður hefur til efnda.

Það er nefnilega ekki ætlast til þess að stjórnmálamenn efni nokkurn skapaðan hlut af því sem þeir eru að fimbulfamba um á Íslandi eins og Inga Sæland að útrýma skuli fátækt á Íslandi. Fólk gín við flugum án þess að rukka um efndir loforða.

Nema ef stjórnmálamaður heitir Donald Trump úti í löndum. Þá verða menn krossbit ef hann ætlar að standa við það sem hann lofaði.

Á íslandi veður uppi alsskyns lýður sem heimtar að Lífeyrissjóðir komi að hinum og þessum delluhugmyndum sínum.

Vilhjálmur Bjarnason , Villi Bjarna, tekur þetta mál fyrir í Morgunblaðinu í dag. Hann segir:

"Það er ávallt áleitin spurning hve lítið er hægt að komast af með til að lifa. Þarfir manna eru misjafnar þannig að til eru þeir sem varðar ekkert um neyslusamfélagið og geta lifað á skyri og harðfiski einu saman. Samt er það svo að það sem kallast „einingar tengdar almannahagsmunum“ er ekki mjólkurbú og harðfiskhjallar. Einingar tengdar almannahagsmunum eru fyrst og fremst fyrirtæki sem tengjast fjármálum. Kerfislega mikilvægir bankar, lífeyrissjóðir og tryggingafélög tengjast öll almannahagsmunum.

Fjármál og almannahagsmunir

 Hagsmunir almennings að þessu leyti eru þeir að almenningur hefur falið þessum einingum að takast á við framtíðarskuldbindingar sínar. Þetta er augljósast með lífeyrissjóði því lífeyrissjóðir hafa það hlutverk að tryggja fjármögnun einstaklinga eftir að starfsaldri lýkur.

Þannig er lífeyriseign einstaklings oftar en ekki hans einasta fjárhagslega eign eftir að starfsaldri lýkur, því ekki snæða einstaklingar fasteignina sem þeir búa í á lífstíma sínum.

Þegar lýðskrumarar vilja ráðskast með eignir lífeyrissjóða, þá er verið að ráðskast með fjöregg framtíðar þeirra sem eldri eru. Lífeyrissjóðir hafa aðeins eina skyldu; hún er að tryggja lífeyri hinna lífeyristryggðu. Lífeyrissjóðir hafa ekki skyldu til að standa undir hagvexti framtíðar, eins og komið hefur fram í skrumskælingu lýðskrumara. Lífeyrisþegar greiða til baka fyrir þjónustu sem þeir þurfa á að halda með skattgreiðslum þegar lífeyristaka hefst. Það er nokkuð víst að einstaklingar geta orðið fyrir tjóni.

Til að takmarka tjón sitt semja einstaklingar við vátryggingafélög um að bæta tjón gegn ákveðnu gjaldi. Það gjald byggist á áhættu og tjónareynslu. Þá fyrst var hægt að reka iðnaðarsamfélag á Íslandi þegar Brunabótafélagið og Sjóvátryggingafélagið voru stofnuð á öðrum áratug síðustu aldar.

Brunatrygging fasteigna dregur úr áhættu lánveitanda í fasteignalánum. Svo er einnig um vátryggingar skipa. Báta- ábyrgðafélögin og annars konar samábyrgð var í raun of mikil áhætta fyrir samlagsaðila. En hvað á svo til bragðs að taka ef sú staða kemur upp að einstök fyrirtæki á fjármálamörkuðum verða of stór til að falla? Á almenningur að bjarga þeim?

Eða á að vernda almenning fyrir falli þeirra eins og gert var með neyðarlögum í kjölfar hruns íslensku bankanna? Lítum á nokkur fleiri dæmi.

Veitur og almannahagsmunir

 Aðrar einingar sem geta haft veruleg áhrif á líf almennings og valdið truflunum ef bilun eða skerðing á starfsgetu kemur upp. Þá er meðal annars átt við veitufyrirtæki fyrir heitt og kalt vatn, og rafmagn. Frárennsli fellur einnig þar undir því enginn vill ganga í opnu frárennsli frá íbúðabyggð eða iðnaðarsvæði.

Ef truflun verður á raforkuframleiðslu leggst atvinnulíf í dvala fyrir utan þau óþægindi, sem verða á heimilislífi. Þegar atvinnulíf leggst í dvala geta heimili ekki greitt fyrir neyslu sína og aðrar skuldbindingar.

Þó var það svo að það er aðeins ein öld frá því rafmagn varð almenningseign og almenningur varð háður þessu náttúrufyrirbirgði, sem náðist að beisla til nota, en var þá ekki aðeins ógn eins og rafmagnið í eldingunni.

Þessar einingar tengdar almannahagsmunum voru í verulegri hættu í fjármálahruni fyrir áratug. Ekki vegna þess að hinir tæknilegu þættir voru í hættu. Hættan var sú að greiðslufall yrði á einhverjum lánum þessara fyrirtækja en það hefði getað leitt til uppsagnar annarra lánasamninga. Samningskjör í lánasamningum Landsvirkjunar og Orkuveitu Reykjavíkur voru auðlind, sem nauðsyn bar til að vernda. Þess vegna eru orkufyrirtæki einingar tengdar almannahagsmunum.

Samgöngur og almannahagsmunir

 Samfélag tuttugustu og fyrstu aldar er háð samgöngum. Herstjórn er reyndar birgðaflutningar og fólksflutningar. Orrustan er tæknileg útfærsla.

Aukin alþjóðaviðskipti krefjast skilvirkra samgangna. Skilvirkar samgöngur leiða af sér nokkrar atvinnugreinar sem til samans heita ferða- þjónusta. Sá maður sem kemur aftur er annar maður en sá sem fór. Svo er einnig um landið sem ferðast er til. Það land er annað en áður en ferðalangurinn kom.

Erfiðleikar eins fyrirtækis í ferðaþjónustu geta leitt til keðjuverkunar í öðrum þáttum ferðaþjónustu. Þá er staðan ekki ósvipuð og sú staða sem kemur upp þegar rafmagnsbilun hefur í för með sér truflun á lífi manns.

Hvenær verður þátttaka ríkis í uppbyggingu innviða áhættusöm? Er Flugstöð Leifs Eiríkssonar í Keflavík of áhættusöm fyrir íslenska ríkið, sem er þó ekki í eigendaábyrgð fyrir lánum fyrirtækisins?

Tekið skal fram að íslenska ríkið hefur sennilega aldrei lagt neitt fram til uppbyggingar flugstöðvar í Keflavík. Getur eitt flugfélag orðið of stórt til að þjóðríki verði að bjarga því? Áhætta þjóðríkisins er fólgin í röskun á störfum á vinnumarkaði.

Áhætta farþega er fólgin í því að fá ekki þá þjónustu sem greitt var fyrir en á eftir að veita. Áhætta fjármálafyrirtækis er sú að missa af leigutekjum vegna flugvélaleigu eða á að hafa innt af hendi greiðslur vegna greiðslukorta fyrir þjónustu sem ekki var búið að veita en á eftir að veita.

Það eru nýlegt dæmi um að greiðslukortafyrirtæki hafi í raun þurrkast út vegna viðskipta við flugfélag.

Eftirlit og skyldur í þágu almannahagsmuna

Það er eðlilegt að einingar tengdar almannahagsmunum séu háðar eftirliti ef þær geta verið skaðlegar þegar þær fara út af spori og úr böndum. Dæmin hér að framan sýna að hrakfarir fjármálafyrirtækja geta að líkindum haft meiri bein og óbein áhrif á þjóðfélagið en hrakfarir ýmissa annarra eininga þótt tengdar séu almannahagsmunum. Eftirlitskostnaður er hluti af rekstri slíkra fyrirtækja og þau eiga að bera þann kostnað.

Ekki má gleyma samkeppniseftirliti. Flest þessara fyrirtækja búa við náttúrulega einokun. Almenningur þarfnast sérstakrar verndar vegna þeirrar einokunar. Þeir sem eftirlitið rækja þurfa að vera til þess bærir og til þess hæfir. Það brást í eftirliti með fjármálastofnunum.

Opinberir eftirlitsaðilar, stjórnir, stjórnendur og endurskoðendur fjármálafyrirtækja brugðust, vitandi um hlutverk sitt.

Í skrifum mínum að undanförnu hef ég lagt mikla áherslu á hlutverk og upplýsingagjöf stjórna og endurskoðenda. Í raun varðar mig ekkert um það hvernig mjólkurbúi, sem framleiðir skyr, eða húsgagnaframleiðanda reiðir af. Bóndann kann að varða það hvernig afurðastöðvum reiðir af.

Svo er og um harðfiskframleiðandann. Það verður alltaf annar til sem framleiðir ætan harðfisk. Það á aldrei að bregðast trúnaði með þjónkun við þrjóta. Enginn orðaði þetta betur en góða frúin, hún sagði: „Hvers vegna vill maður endilega halda framhjá með einhverju bölvuðu kvikindi þó að maðurinn manns sé bæði glæsimenni og hetja?“

 

Hvernig væri að reyna að skilja hvert Villi er að fara?

 

Lífeyrissjóðir eru til að tryggja þeim tekjur við starfslok sem enga aðra fyrirhyggju sýndu í sínu lífi heldur en að éta eða drekka eða þá komu sér í aðstæður sem bönnuðu þeim allar bjargir úr fátækt, kröm eða kvöl.

Því miður er svo um allt of marga sem trúa lygaþvælu stjórnmálamanna sem bjóða fyrir kosningar að búa öldruðum mannsæmandi kjör.

Allt saman kosningalygi sem þeim sömu hefur aldrei dottið í huga að reyna að uppfylla enda auðvelt að sleppa frá lygum á Íslandi þar sem maður heitir ekki Donald Trump sem gerir það sem hann segist ætla að gera.

Hvenær skyldu gamlingjar hætta að vera þau fífl að halda að þetta loforðalið meini eitthvað með þessum frösum sínum um eldri borgara sem þeir elski svo heitt?

Þeim er nefnilega skítsama um allt nema eigin endaþarm, endurkjör og góð laun fyrir þægilega innivinnu eins og Jón Gnarr sagði okkur svo einlæglega frá sinni einu pólitísku hugsjón.

Ef vantar félagslega aðkomu að einhverjum gæluverkefnum þá verður að stofna nýja sjóði um það með nýjum tekjustofnum. Lífeyrissjóðirnir hafa bara eitt hlutverk eins og Villi bendir á.

Pópúlistar á Íslandi virðast komast upp með næstum  hvað sem er mótsett við Donald Trump.