Kópavogsbraut?

þvælist fyrir besta fólki að finna sem á erindi í  Sunnuhlíð 1A. Það er eiginlega ekkert götuskilti fyrr en að skilti sem stendur á Kársnesbraut er lengst út á nesi við höfnina. En gatan frá Hafnarfjarðarveginum og þangað held ég að hljóti að heita Kópavogsbraut án þess að ég hafi það skriflegt.

Borgarlínan komin? Ókeypis

fyrir skattgreiðendur.

Rafskúturnar leysa flutningsmálin miklu fljótar og skilvirkara en eitthvað nítjándualdar lestakerfi í miðju gatna eins og ráðgert er með Borgarlínu Dags B.Eggertssonar og hans nóta.

En Borgarstjórnarmeirihlutinn í Reykjavík, jafnvel með mannvitsbrekkuna og Píratann Dóru Björtu innanborðs vill ekki skilja þetta. Þeir bara verða að fá að eyða hundrað milljörðum í skuld.

Jafnvel þó að rafskúturnar blasi allstaðar við á gangstéttunum?

Borgarlínan er samt komin til að vera því fólkið hefur valið.

Viðreisnarfylkingin!

Páll Vilhjálmsson vitnar í Tony Blair og ráðleggingar hans til Verkamannaflokksins hans.

 

"Samfylkingin kom ekki fyrir sjónir eins og turn heldur skopparakringla. Í hrunstjórninni 2007-2008 var fylkingin til hægri við Sjálfstæðisflokkinn, gekk erinda auðmanna af slíkri ákefð að varaformaður flokksins lagði til að enska yrði opinbert tungumál á Íslandi.

Í vinstristjórninni 2009-2013 var Samfylkingin til vinstri við Vinstri græna og efndi til pólitískrar borgarastyrjaldar gegn stjórnarskrá lýðveldisins.

Samfylkingin er flokkur án kjölfestu. Eða, svo notað sé líkingarmál úr verkfræði, turninn var skakkt byggður þegar í upphafi. 

Íslenskuð ráðlegging Blair til Samfylkingar er: leggið þið flokkinn niður. Þá er kannski hægt að byggja lítið sætt kratískt hús á traustum grunni. Nafnið er þegar komið, Viðreisnarfylkingin.

Hættan liðin hjá

í bili að minnsta kosti af því að álverinu í Straumsvik yrði lokað.

Síðan í apríl 2020 hefur álverð á markaði LME hækkað um 75 % og nálgast þá 2600 USD/t Al.  Spár hafa sézt um 3000 USD/t Al árið 2021.

Þeim ískyggilegu tíðindum  þegar álverðið fór langt niður fyrir 2000 dollara að álverinu kynni að verða lokað hefur því svimað frá.

Hugsanlega gerir nýr hagnaður álverinu kleyft að breyta yfir í keramikrafskaut sem losa minna CO2 En á því hef ég ekkert vit.

Hinsvegar hef ég það gripsvit að spyrja um hvort ekki sé hægt að leiða CO2 niður í þann berggrunn sem er undir CO2 framleiðanda í útlöndum og breyta í steindir þar frekar en að flytja það til Straumsvíkur til þess sama?

Af hverju þurfum við bara að borga eftir ETS? 

"Ef íslenzk álver taka þátt í þróun og nýtingu tækni, sem fangar koldíoxíð varanlega, þá þurfa þau engu að síður að greiða milljarða í losunargjöld innan ETS-kerfisins, viðskiptakerfis ESB um losunarheimildir.  Að sögn Péturs Blöndals, framkvæmdastjóra Samáls, samtaka álframleiðenda, vantar hvata í ETS-kerfið til að þróa og tefla fram nýjum lausnum, þrátt fyrir að slíkur hvati hafi verið frumforsendan fyrir því, að kerfinu hafi verið komið á fót."

Hverskonar samningamenn höfum við fyrir okkur ef þetta er allt og sumt?

"Losun gróðurhúsalofttegunda frá álframleiðslu er hvergi minni en á Íslandi [vegna innlendrar þróunar kerstýritækni og árvekni starfsmanna - innsk. BJo]. Þrátt fyrir það bera álverin kostnað af sinni losun, en ekki álver í Kína, sem knúin eru með kolaorku og losa því tífalt meira.  Ástæðan er sú, að ETS-kerfið nær einungis til evrópskra álvera.  Hættan, sem skapast við það, er, að álframleiðslan flytjist út fyrir álfuna, þar sem kolefnisfótsporið er stærra, en ekki þarf að greiða fyrir losunina."

"ETS-kerfið hentar illa iðnaði, sem er færanlegur og stendur í alþjóðlegri samkeppni.  Kerfið hefur unnið gegn upphaflegum stefnumiðum með þessum "kolefnisleka"; það er vanhugsað, af því að gríðarlegar fjárfestingar og tækniþróun þarf til orkuskipta í iðnaði.  Á sama tíma er ETS mikil byrði á fyrirtækjunum, og þau hafa þess vegna ekki bolmagn til orkuskiptanna.  (Meginstarfsemi Rio Tinto og Alcoa er utan EES.) "

(Textar eru ættaðir frá Kollega Bjarna Jónssyni).

Af hverju reynum við Íslendingar ekki að verja okkar hagsmuni? af hverju lyppumst við bara niður að hætti Katrínar Jakobsdóttur og V.Gr.... í öllum loftslagsmálum?

 

 

Er einhver munur?

á stjórnmálaflokkunum Viðreisn og Samfylkingu?

Ef einhver gæti skýrt út fyrir mér hvort hægt sé að sækja um aðild að ESB á svo mismunandi vegu að öllu máli skipti? Kannski að annar flokkurinn geti frekar fengið undanþágu fyrir Íslendinga frá herskyldu í Evrópuhernum en hinn? Hvor flokkanna er líklegri til þess?  

Leiðtogar vorir, Þorgerður Katrín, Benedikt Jóhannesson Zoega og  Óli Bieltvedt þekkja leiðina til sæluríkis Evrunnar og tollabandalags 27 Evrópuríkja gegn þremur fjórðu af heiminum. Eigum við að treysta þeim fyrir framkvæmdinni? Kannski geta þeir fengið hjálp frá litla ljóta flokkgerinu sem er á Alþingi.Var þá bara ekki gamli fjórflokkurinn skárri til allra verka en þessi söfnuður?

En er einhver munur á þessu flokkum?

Langt í kosningar

sem betur fer í Borginni.

Er ekki nógur tími til að láta fenna yfir allt þetta neikvæða og horfa upp á við og hlusta á Dóru Björtu útlista hverjum þetta allt sé að kenna?

 

Í leiðara Mogga stendur m.a.:..

"...Borgarfulltrúar meirihlutans, Samfylkingarinnar, Viðreisnar, Pírata og Vinstrigrænna, bókuðu við afgreiðslu ársreikningsins mikið um áhrifin af kórónuveirufaraldrinum og sögðu svo meðal annars: „Því skiluðu áætlaðar tekjur sér ekki, hvort sem litið er til útsvarstekna eða annarra tekna.“

Með þessu er vitaskuld verið að reyna að blekkja borgarbúa því að tekjur lækkuðu ekki, eins og ætla mætti af bókun meirihlutans, heldur hækkuðu þær. Þegar ársreikningurinn er lesinn – en meirihlutinn treystir því eflaust að kjósendur geri það almennt ekki – sést að tekjur jukust um fimm milljarða króna á milli ára í kórónuveirukreppunni.

Fimm milljarða króna!

Við þessa tölu bætist svo að borgin sparaði sér tap vegna erlendra ferðamanna upp á um átta milljarða króna, samkvæmt tölum sem meirihlutinn hefur kynnt.

Um þetta er ekkert getið í bókun meirihlutans, en í febrúar í fyrra, skömmu áður en faraldurinn skall á af fullum þunga hér á landi, kom út skýrsla sem átti að sýna fram á þetta tap borgarinnar vegna erlendra ferðamanna. Nú er ekkert um þetta meinta tap talað, enda hentar betur nú að nota kreppuna sem afsökun fyrir óráðsíunni en góðærið, sem var afsökunin áður.

Fjárhagsvandi borgarinnar snýst hins vegar ekki um tekjufall nú eða meint tap ári fyrr vegna erlendra ferðamanna. Fjárhagsvandinn er útgjaldavandi eins og bent er á bæði í bókun borgarfulltrúa Sjálfstæðisflokksins og Miðflokksins. Í báðum þessum bókunum er einnig fjallað um skelfilega skuldastöðu borgarinnar, sem vex um 112 milljónir króna á dag, eins og sjálfstæðismenn benda á.

Þetta er ótrúleg tala, en þegar skuldir eru komnar hátt í fjögur hundruð milljarða króna og aukast um tugi milljarða króna á ári, þá er þetta sú hörmung sem blasir við.

Þetta er sérstaklega alvarlegt í ljósi þess að í meirihlutasáttmálann árið 2018 var sett inn eftirfarandi setning: „Skuldir skulu greiddar niður meðan efnahagsástandið er gott.“

Eyþór Arnalds, oddviti sjálfstæðismanna í Reykjavík, vék að þessu á fundi flokksins á laugardag og sagði þetta hafa farið inn í meirihlutasáttmálann fyrir vilja Viðreisnar, en hann benti jafnframt á að skuldavandinn hefði þrátt fyrir þetta rokið upp einmitt frá þessu ári. Það snýr augljóslega ekkert að kórónuveirukreppunni heldur uppsafnaðri og langvinnri óráðsíu með almannafé.

Útgjöldin eru vandinn og skýringu þeirra má til að mynda sjá í þróun fjölda stöðugilda hjá Reykjavíkurborg, en stöðugildum fjölgaði um fjögur hundruð á milli áranna 2019 og 2020.

Sú þróun er með miklum ólíkindum á sama tíma og borgarstjóra og borgarfulltrúum meirihlutans ætti að vera ljóst að grípa þarf hart í handbremsuna og stöðva útgjaldaþensluna og skuldasöfnunina.

En skuldirnar sjást ekki aðeins í ársreikningi borgarinnar. Á fyrrnefndum fundi benti Eyþór einnig á að borgin væri á sama tíma að safna upp miklum viðhaldsvanda. Í því sambandi nefndi hann fasteignir borgarinnar, sem fengju allt of lítið viðhald með tilheyrandi vanda síðar, og strætisvagnana. Á síðustu árum hefðu sárafáir nýir vagnar verið keyptir svo upp hefði hlaðist þörf fyrir tugi nýrra vagna upp á milljarða króna.

Þannig felur borgin skuldirnar, en þessar skuldir eru jafn raunverulegar og hinar sem sjást í ársreikningnum því viðhaldinu og endurnýjuninni verður ekki frestað inn í eilífðina.

Það ótrúlega er svo, að á sama tíma og borgin getur ekki endurnýjað strætisvagnana hefur hún uppi áform, og platar ríkið og önnur sveitarfélög með sér í það verkefni, um að koma upp svokallaðri borgarlínu á höfuðborgarsvæðinu fyrir að minnsta kosti tugi milljarða króna."

Mér finnst ég sjá merki þess að almenningur hefur tekið upp hjá sér að leysa skyndisamgönguþörf á mun skilvirkari hátt en Borgarlína getur nokkru sinni gert. Rafskúturnar eru tiltækar út um allt á gangstéttum. Þú bara stígur á og brunar þangað sem þú vilt fara. Getur erindað og látið skútuna bíða eftir þér. Eða bara kvatt hana eftirmálalaust.

Þessi skútukerfi finnast mér svo stórkostlegt að það hálfa væri nóg.Taka flestu fram sem ég hef séð í almenningssamgöngum nokkurs staðar. Og kostar ekki krónu af opinberu fé sem er víst ekki með Borgarlínuna sem á að byggja með illu eða góðu.

En auðvitað sér Dagur B.og hans fólk  ekki neitt jákvætt við þessa almannalausn og halda sitt strik með öðrum sveitarfélögum og ríkinu.

Enda langt í kosningar til sveitarstjórna.

 

 

 

Ef ekki væru rakettur Hamas?

myndi þá  Ísrael bomba Gaza?

Það er víst bannað að spyrja að þessu bæði á Austurvelli og hjá Torgi þar sem Sigmundur Ernir vinnur.Hamas hefur bara frumstæð stríðstól segir Sigmundur.Margar myndir eru til af Ísraelum að skjóta fjölda af þessum rakettum niður yfir Ísrael. Samt komast einhverjar í gegn og drepa Ísraela.Bera Ísraelar ekki einir fulla ábyrgð á þessu?

Hvað myndi gerast ef þetta Hamas lið léti þetta skytterí eiga sig? Yrði einhver drepinn?

Hjóta menn eki að vilja manndráp úr því að þeir byrja alltaf aftur með þessar rakettur. Eða hvað segir Ísland- Palestína á Austurvelli? Viljum við bara ekki meiri ófrið?

Ef engar væru rakettur Hamas, myndi Ísrael ráðast reglubundið á Gasa?

Enga aðild að ESB

segir Diljá Mist Einarsdóttir sem vill verða þingmaður fyrir Sjálfstæðisflokkinn.

Diljá endar grein sína svofellt:

"... Við erum aðilar því sem hentar en stöndum utan við það sem ekki þjónar okkar hagsmunum.

Því hefur verið linnulaust haldið að íslenskum almenningi að við séum svo gott sem aðilar að ESB á grundvelli EES-samningsins vegna þess að við innleiðum svo mikið af regluverkinu (nefnt hefur verið 80-90%) og því allt eins gott að stíga skrefið til fulls.

Þetta eru blygðunarlausar rangfærslur. Í upphafi kjörtímabilsins lét utanríkisráðherra gera úttekt á þessu og leiddi hún svart á hvítu í ljós að frá gildistöku samningsins árið 1994 og til ársloka 2016 innleiddum við Íslendingar 13,4% þeirra gerða sem Evrópusambandið samþykkti á sama tímabili.

Þetta hlutfall hefur lítið breyst á síðustu fimm árum.

Innganga í ESB myndi þýða að allir 34 málaflokkar ESB ættu við um okkur en ekki einungis þeir sem okkur eru hagfelldastir.

Hagsmunagæsla mikilvæg innan EES

En þótt EES-samningurinn sé góður þá fáum við ekkert gefins. Við þurfum sjálf að búa þannig um hnútana að samningurinn þjóni sem best íslenskum hagsmunum og því miður hefur því mikilvæga verkefni ekki alltaf verið sinnt af nægilegri festu, þótt kúvending hafi orðið í þeim efnum á síðustu árum undir forystu Guðlaugs Þórs Þórðarsonar utanríkisráðherra.

Það er óskandi að Viðreisn og systurflokkur hennar á þingi haldi umræðu um aðild að Evrópusambandinu sem hæst á lofti í kosningabaráttunni sem fram undan er. Því betur sem að er gáð því verri er hugmyndin um aðild að Íslands að Evrópusambandinu."

Kannski er ástæða til að spyrja hvort forysta Sjálfstæðisflokksins deili eindregið þessari skoðun Diljár? Fóru ekki ESB hugmyndirnar með Viðreisnarliðinu úr Sjálfstæðisflokknum og flokkurinn vill enga aðild að ESB?

Carb-Fix bullið

tekur kollege Skúli Jóhannsson fyrir í enn einni Morgunblaðsgrein:

Hann segir:

 

"Um daginn eða 5.5. 2021 birtist grein í Morgunblaðinu þar sem ég skrifaði um áform Hitaveitu Reykjavíkur, Orku náttúrunnar og Carbfix í mengunarmálum, með fyrirhugaða förgunarstöð Coda Terminal við Straumsvík í huga. Hef ég nú í hyggju að bæta um betur.

Kolefnisföngun og -förgun eða KFF, sem er þýðing á hugtakinu CCS Carbon Capture and Storage, gengur út á eftirfarandi þætti:

1. Búnað til föngunar á kolsýringi CO2 í erlendri verksmiðju eða raforkuveri sem notar jarðefnaeldsneyti.

2. Leiðslukerfi til flutnings á kolsýringi frá verksmiðju að vökvagerðarstöð á hafnarsvæði, en sjaldnar með flutningabílum eða lestum, sem er áætlað tvöfalt dýrara.

3. Vökvagerðarstöð sem frystir kolsýringinn og sendir í tanka á hafnarsvæði.

4. Flutningaskip sem tekur við kolsýringi frá tönkunum (-50 °C og 7 bar) og flytur til Íslands. Siglingatími hvorrar leiðar er fjórir dagar með eins sólarhrings dvöl í höfn við löndun og losun. Hringurinn tekur því samtals 10 daga og með þremur skipum er þá landað í Straumsvík á 3,3 daga fresti.

5. Coda Terminal-blöndunarstöð og niðurdælingu í berggrunninn við Straumsvík.

Liðir 3 til 5 voru teknir fyrir í fyrrnefndri Mbl.-grein en nú ætla ég að skoða liði 1 og 2.

Til samanburðar má nefna að með því að taka aðeins tillit til atriða 3 til 5 var það hugsað eins og í safnstöð Sorpu, að þeir sem óska eftir að losna við sorp geta afhent það í greiningarstöð. Hins vegar ef menn losa sitt sorp heima við í öskutunnur þá þarf að sækja það alla leið til neytandans og aka sorpinu til förgunarstöðvar, samanber liði 1 og 2.

Kostnaður við kolefnisföngun

Í tiltækum gögnum var leitað eftir kostnaðarverði fyrir kolsýringsföngun og horft sérstaklega til kolaorkuvera. Áætluð niðurstaða er 40 USD/tCO2 en hafa ber í huga að breytileiki er töluverður og áætlunin í lægra lagi miðað við uppgefið óvissubil. Sjá meðfylgjandi mynd.

Þessi niðurstaða leiðir í ljós að ólíklegt er að KFF muni nokkurn tíma ná flugi á heimsmælikvarða og verði aðeins tekið upp og notað í samræmi við almenna stefnumörkun stjórnvalda í hverju landi fyrir sig, í tengslum við alþjóðlega stefnumörkun og heimsmarkmið og ávallt með hliðsjón af hagkvæmni.

Hér er hvorki tekið tillit til skattlagningar vegna út- eða innflutnings milli landa né sértækra ívilnana t.d. frá stjórnvöldum.

Hliðstæður

Í verkfræðinni í gamla daga lásum við í hljóðfræðinni, að til að losna við hávaða þyrfti eitt af þrennu: Stöðva hávaðann á upprunastað, einangra húsið t.d. með tvöföldu gleri eða halda fyrir eyrun. Ef vandamálið er kolsýrumengun frá kolaraforkuveri þá væri Coda Terminal með þá lausn að urða kolsýringinn hinum megin við hafið á sama hátt og að halda um eyrun í tilviki hljóðmengunar. En í rauninni væri eina vitið að stöðva ósómann á upphafsstað.

Leið í þessum málum væri að iðjuverin á upphafsstað, t.d. í Hollandi, losuðu sinn útblástur út í loftið áfram eins og hingað til, en lofthreinsunarstöð á Íslandi hreinsaði loftið á móti. Andrúmsloftið væri þannig óbeint notað sem flutningsmiðill fyrir kolsýringinn. Þessi aðferð er nú til rannsóknar hjá svissneska fyrirtækinu Climeworks sem er með rannsóknaraðstöðu við hliðina á tilraunaverksmiðju Carbfix á Hellisheiði.

Nokkrar staðreyndir

KFF er afskaplega dýr lausn, og ekki hjálpar að hún er orkufrek.

Til að farga 31 MtCO2/ári hafa verið reistar nokkrar verksmiðjur í ýmsum löndum á undanförnum árum, en hvergi heppnast sem skyldi. Margar verksmiðjur eru fyrirhugaðar.

Fljótlegasta og öruggasta leiðin til að minnka kolefnismengun vegna framleiðslu í raforkuverum sem nota jarðeldsneyti er að loka þeim hið snarasta og virkja í staðinn endurnýjanlegar orkulindir til að framleiða græna raforku. Sú þróun er nú í fullum gangi um allan heim, aðallega með vind- og sólarorkuverum, drifin áfram af miklu ódýrari lausnum en þeim sem nota jarðefnaeldsneyti.

Kostnaður við KKF er vissulega mikill hjá áburðarverksmiðjum og jarðvarmavirkjunum en enn þá meiri eða jafnvel miklu meiri hjá sementsverksmiðjum og kolaorkuverum, svo dæmi séu tekin.

Erlendar reynslutölur hafa leitt í ljós að kostnaður við KFF fyrir kolarafstöð gæti verið allt að sex sinnum meiri en að reisa ný jafnstór vind- og/eða sólarorkuver ásamt rafhlöðum með varaafli til að framleiða raforku þegar skortur er á vindi eða sólskini.

Staðhæft hefur verið að með KFF sé verið að leitast við að lengja að óþörfu endingartíma gamalla og úreltra raforkuvera sem nota jarðefnaeldsneyti og með tilheyrandi sóun á almannafé.

En hvers vegna Straumsvík? Er skortur á aðstöðu í heiminum til að urða kolsýring? Stutta svarið er nei. Það er alls staðar nóg af stöðum, þar sem hver notar sína aðferð við förgun allt eftir staðháttum. Sá kostur að senda kolsýring til Íslands til urðunar er kostnaðarsamari, en kannski betri í sumum tilvikum. Þó ætti helst að urða úrganginn „á staðnum“, að svo miklu leyti sem kostur er.

Niðurstaða

Líklega er eitthvað til í því að kolefnisverð á mörkuðum þyrfti að fara vel yfir 100 USD/tCOv til að Coda Terminal-hugmyndin gengi upp. Kannski er verðið á leiðinni þangað!"

Þjóðfrelsun

Það er þjóðfrelsun í svona mönnum eins og kollega Skúla sem taka svona delluhugmyndir kostnaðarblindra embættismanna eins og þeirra sem settu fram þessar hugmyndir um 600 manna opinberan vinnustað í Straumsvík.

Þau skötuhjúin spurðu ekki um hvort víðar veri berggrunnur til í heiminum eða þar sem CO2 útblásturinn á sér stað? 

Nei þeim dettur í hug að flytja lofttegundina með skipum til Íslands! Sem Skúli hefur nú líklega afgreitt og afhjúpað.

En heimskan heldur yfirleitt áfram að sækja á eins og allt kolefnisbullið hefur hertekið heiminn með. það mun þurfa veðurfarsbreytingar til að opna augu manna um að það sé engin kolefnisvá í heiminum.

Carb-Fix bullið endar líklega ekki fyrr en þá? 

Tryggjum öldruðum áhyggjulaust ævikvöld

er gamalt slagorð sem flokkur fólksins var að stela.

Dettur nokkrum í hug að þessi litli ljóti eiginhagsmunaflokkur formannsins  geti gert nokkuð í þessum málaflokki fyrir almenning?

Ekki mér að minnsta kosti hvaða slagorðum hann svo sem stelur.