Ætla þau bara að horfa á ?

Ætlar þessi skjaldborgarvinstrinorrænavelferðarríkisstjórn bara að horfa á þegar upplausn samfélagsins hellist yfir ?

Maður horfir á sýslumennina hampa bláleitum bunkunum með hundruðin nauðungarsöluskjalanna. Hafa menn hugleitt hvaða afleiðingar það muni hafa ef þetta gengur fram ?

Millistétt Íslands verður útrýmt. Þúsundir fólks missir aleiguna og verður sett á vergang í umboði fjármagnseigendanna. Hvað eru þeir að hugsa í lífeyrissjóðunum, nýju bönkunum, og íbúðalánasjóði. Er kreppan og atvinnuleysið bara búið af því að það er búið að hækka skattana og brennivínið? Og vístöluna til þess að lánin hækki í takt. Vístalan er heilög stærð og ekkert fær breytt útreikningi hennar hvað sem þjóðfélagsástæðum líður.

Getur sama fólkið bara borgað núna sem gat það ekki eftir hrunið og uppsagnirnar ?  Var bara nóg að koma Sjálfstæðisflokknum frá völdum og Davíð úr Seðlabankanum ? Átti þá allt að lagast af sjálfu sér eins og mannvitsbrekkurnar Hörður Torfason, Sturla lúðurþeytari og Hallgrímur Helgason boðuðu sem ákafast í stjórnarbyltingunni? En gerði það það?

Ég hefði haldið að skuldbreytingar, frysting uppboða,  og frestun afborgana séu ennþá nauðsynlegri núna en nokkru sinni fyrr. Hvað ætla bankar eða lífeyrissjóðir að gera með þúsund íbúðir ofan á þær sem þeir eiga fyrir ? Það eru takmörk fyrir því hvað alþigismenn og frændur þeirra komast yfir að kaupa af bankaeignum, jafnvel þó vel sé slegið af. Það er huggulegt að hugsa til þess að lífeyrissjóðurinn þinn hirði ofan af þér íbúðina þín núna með huggunarorðum um að hann muni hugsanlega seinna geta látið þér líða skár í ellinni. Það er nú aldeilis munur að hugga sig við það.

Árið í ár verður núll ár. Það gerist ekkert sem breytir neinu. Ástandið bara versnar. Atvinnuleysið og vandræðin vaxa. Alveg þangað til að fólkið áttar sig á því hvaða ráðleysislið það er búið að leiða til valda og lemur stjórnina út eins og köttinn úr tunnunni.

Ætla þau í ríkisstjórninni bara að horfa á uppboðin fara fram ? 

 

Íslendingar í uppbyggingu til Haiti ?

Ég var að tala við einn gamlan samstarfsmann í byggingabransanum. Hann á helling af kerfismótum.Ég á tölvur og forrit til að hanna allt frá hundakofum í háhýsi.Og hellingur af tæknimönnum kann þetta betur en ég. Íslendingar eiga allan fjandan og geta allt.Hér eru Ístak og Aðalverktakar. Hellingur af smáverktökum, byggingafélögum og bröskurum.

Við fórum að spá í af hverju íslenskur byggingariðnaður sem er að mestu  lagstur banaleguna tekur sig ekki saman og býður þjónustu sína. Förum með alla hektarana af vinnuvélunum og vörubílum úr Hafnarfjarðarhöfn til að byggja á Haiti ? Þeir vilja hús úr steypu vegna fellibyljanna. Það má bara ekki gleyma að setja járn í steypuna sem við Íslendingar kunnum.

Af hverju komum við byggingamenn ekki saman til fundar og reynum að kanna málið ?

Ísland og Haiti.

Læknirinn Gunnar Skúli Ármannsson skrifar athyglisverða grein í Moggann í dag. Þar dregur hann fram hliðstæðu við það hvað AGS og okkar svokölluðu vinaþjóðir okkar  eru að gera á hluta okkar Íslendinga.

Grípum niður í greinina fyrir þá em ekki lesa Mogga :

"Þegar varað er við því að heil þjóð lendi í skuldafangelsi hafa menn í huga m.a. land eins og Haítí. Árið 1804 brutust þeir undan yfirráðum Frakka. Frakkland hafði áður auðgast vel á auðlind landsins, »svarta gullinu«, þ.e. þrælunum, íbúum Haítí. Frakkar voru að vonum ekki sáttir. Þess vegna settu þeir, ásamt vinum sínum Bandaríkjamönnum, Spánverjum og Bretum verslunarbann á Haítí. Í dag er slíkt ástand kallað »að vera ekki hluti af alþjóðasamfélaginu«. Þess vegna neyddist Haítí til að skrifa undir samning við Frakka árið 1825. Þeir samþykktu að borga bætur til franskra þrælaeigenda, þ.e. þrælarnir sem brutust undan þrældómnum voru neyddir til að greiða bætur til þrælahaldaranna! Upphæðin var risastór, 150 milljónir franka í gulli, sem tekin var að láni hjá bönkum í Frakklandi, Þýskalandi og Bandaríkjunum. Þeir samþykktu að borga kröfuna í þeirri von að verða gjaldgengir á mörkuðum heimsins. Það tók þá 122 ár að borga skuldina. Um aldamótin 1900 fór um 80% af ráðstöfunarfé þeirra í afborgun af þessari skuld.

 

Síðan frönsku skuldinni lauk, 1947, hafa vesturveldin, alþjóðasamfélagið, haldið áfram að kúga Haítí. Skuldsetning Haítís er gífurleg. Alþjóðagjaldeyrissjóðurinn stjórnar endurheimtum skuldanna. AGS krafðist afnáms verndartolla á hrísgrjónum og þar með flæddu bandarísk ríkisstyrkt hrísgrjón yfir Haítí. Hrísgrjónabændur á Haítí fóru þá á hausinn og landið er ekki sjálfbært með mat lengur. Atvinnuleysi er um 75%. Laun duga varla fyrir mat. Einræðisfeðgarnir Papa Doc og Baby Doc stofnuðu til 45% af skuldum Haítís og megnið lenti í einkabankabókum þeirra, með góðfúslegu leyfi alþjóðasamfélagsins. Í þessu tilfelli er alþjóðasamfélagið sammála um að skuldir sem vanhæfir stjórnendur Haítís stofnuðu til skuli greiddar af skattgreiðendum.

 

Íslendingar, sem hluti alþjóðasamfélagsins, ennþá, bera ábyrgð á neyð Haítís. Við getum sjálfsagt samþykkt að við höfum ekki farið vel með Haítí. Sjálfsagt fórnarkostnaðurinn af því að vera þjóð meðal þjóða. Núna er röðin komin að Íslandi, okkur er boðið inn í sama klefa og Haítí hefur verið í frá 1825. Sömu lönd hóta okkur verslunarbanni og einangrun. Er uppgjöf valmöguleiki þrátt fyrir ofurefli? Ekki ef örlög Haítís verða okkar. "

Sjá menn ekki samlíkinguna ? Hvernig menn eru kúgaðir til að undirgangast jarðarmen með nauðungarsamningum ? Nauðungarsamninga er engin skyldur til að halda, fremur en Gizur Þorvaldsson við eiða sína við Sturlu Sighvatsson á Apavatni.

Mér finnst þetta meistaraleg samlíking hjá lækninum. Alveg eins og Versalasamningarnir hleyptu Hitler til valda og heimsstríðinu seinna, þá mun Icesave snúa Íslendingum frá samstarfi við kúgarana í AGS og Evrópubandalaginu.

Það er ástæða til þess að við látum okkur Haiti meira varða. Mína virðingu og þakkir sendi ég þeim íslensku hetjum okkar sem fóru á staðinn til að rétta Haitibúum hjálparhönd svo og öllum sem létu eitthvað rakna við þá í neyðinni. 

 

Gleðibanki VG á Akureyri.

Ég hérumbil hló upphátt yfir tíðindunum af flokksráðstefnunni hjá VG á Akureyri.

Sitjum í ríkisstjórn sem er að sækja um inngöngu í EB en erum alfarið á móti inngöngu ! Gagnsæi í stjórnsýslunni !

Minnumst ekki á  Icesave !Ekki minnst á að einstaka þingmenn séu ósammála formanni !

Óþolandi af Mogganum  að ráða Davíð til að skrifa !

Öfundum Samfylkinguna af RÚV og 365 miðlum. 

Héraðsljósmæðrahugsjónin sameinar flokkinn !

Enga einkaspítala !Sjálfbært kvenfrelsi ! Banna vændiskaup!5% atkvæðisréttur í sparisjóðum !

Ísland úr NATO herinn burt !

Enga stóriðju !Landbúnaður og fiskveiðar fyrir Íslendinga !Friðum mýrarnar !

Kaupa grunnnet Símans. Öflugra heilbrigðiskerfi !

Sautjánþúsund atvinnuleysingjar skiptist jafnt milli kynja !

Góðir hlutir gerast hægt ! Samhentur einhuga flokkur að baki formanni sínum !

 Verndum afríska vaðfugla !

Stjórnum loftslaginu!

Friðarstefna, kvenfrelsi og umhverfisvernd!

Ekki er minn flokkur nærri svona fyndinn.

Gleðibanki VG á Akureyri léttir okkur sannarlega  lundina og eflir okkur trú á að þjóðin eigi framtíð í landinu !

Ein Volk, ein Reich, ein Führer !

 

Ég næ engu sambandi við neinn lengur sem ofbýður ástandið.

Það hlýtur allt að vera á uppleið í þjóðfélaginu. Engin vandamál.  Þessar hundruð uppboðsauglýsingar hljóta að vera misskilningur. Fólkið er ánægt. Fundur VG á Akueyri endaði með kærleiksfullri sameiningu um að stefna inní Evrópubandalagið þó flokkurinn sé á móti því. Hvaða máli skiptir það ef Steingrímur getur verið í ríkisstjórn ?

 Icesave er ekki til lengur hjá VG. Það kemur ekki einu sinni á dagskrá. Félagar  Svavar og Indriði eru búnir með það mál þannig að flokkurinn ræðir það ekki meira.  Aðalatriðið er að VG er sameinað að baki Steingríms. Innan flokksins ríkir eining um eininguna eingarinnar vegna.

Ég held að ég hætti að blogga um þetta bull  og taki framvegis þjóðlegt mið af einhug VG á Akureyri. Þetta er það sem þjóðin vill.

Ein Volk, ein Reich, ein Führer !

St.Eva enn á ferð.

 

Eva Joly er enn á ferð að tala okkar máli seftir því sem Mbl. greinir frá.  

"NORÐMENN skulda Íslendingum í sögulegu samhengi og þeim ber að lána þeim án skilyrða. Þetta segir Eva Joly, ráðgjafi embættis sérstaks saksóknara, í grein sem hún ritaði í norska dagblaðið Morgenbladetí gær. Joly segir að sér virðist sem norskir fjölmiðlar viti ekki fyllilega um hvað málið snúist.

 

Icesave sé fyrst og fremst evrópskt mál en ekki ágreiningur milli Íslendinga, Breta og Hollendinga líkt og margir telji. Joly segir hik Norðmanna gagnvart Íslendingum óskiljanlegt, ekki síst í ljósi þess sem sagt hefur verið víða í erlendum fjölmiðlum síðustu daga, um að krafa Breta og Hollendinga sé ósanngjörn og miklar byrðar séu lagðar á íslensku þjóðina.

 

Þá segir hún að Norðmenn virðist gleyma landfræðilegri stöðu landsins og þeim náttúruauðlindum sem hér séu. Ísland sé í lykilstöðu á Norðurlöndunum og mikilvægur bandamaður Noregs. Í ljósi sögunnar sé eðlilegt að Norðmenn styðji Íslendinga, sem hafi varðveitt tungu þeirra og bókmenntir. "

Hvar fáum við yfirlit yfir það hvað ríkisstjórnin er að gera til að dreifa upplýsingum í erlend blöð. Er ekki búið að ráða Jón Hákon til að dreifa áróðri fyrir Ísland ? Er þetta allt leyndarmál ?

Gott að við fáum þó fréttir af starfi St.Evu.

Ljósið við enda gangnanna ?

 

Vorið er framundan. Það lengist dagurinn um 6 mínútur á dag. Brumin á öspinni roðna í garðinum hjá mér. Það verða fræin og brumin sem kveikja lífsneistann þegar  fannferginu annarsstaðar á landinu léttir. Það vorar aftur á Íslandi eins og hefur venjulega gerst í þúsund ár. Þó hafa komið hér ár þegar ekki voraði. Þá var sólvirknin í lágmarki þó að gróðapungurinn Al Gore væri ekki fæddur og engin CO2 aukning væri í lofti þá fremur en núna.

En hvort það vorar í hjörtunum í landinu veit ég ekki. Ég er að kynnast svo mikilli neyð þessa dagana hjá venjulegu fyrrum  vinnandi fólki sem ríkisbankarnir eru um það bil að taka af lífi að það hálfa væri nóg. Ríkisstjórnin sem við kusum hefur að ég fæ séð ekkert gert og er ekkert að gera í málefnum fólksins eða skuldaranna. Hún hugsar bara um fjármagnseigendurna sem er Alþýðusambandið og Lífeyrissjóðirnir sem beygja Samtök atvinnulífsins undir sig því þá þyrstir svo í ódýr lán og eftirgjöf skulda. Lífeyrissjóðirnir eru að mínu viti núverandi óvinir fólksins, sem eru að taka heimilin af fólkinu með yfirlýsingum um að þeir muni hugsanlega geta látið sama fólkinu líða betur einhverntíman seinna þegar ellin hefur sótt það heim. Varðhundar vístölunnar! 

Útgerðarmenn hóta að fara í land ef ríkisstjórnin hróflar við kvótakerfinu. Þeir halda á gjaldeyrisöfluninni og hika ekki við að hóta okkur öllum. Flugumferðarstjórar hóta verkfalli. Atvinnulausum fjölgar á hverjum degi. Læknar eru að flykkjast úr landi. Allir sem vettlingi valda fara því að skattaparadís Steingríms J. býður ekki uppá neitt nema skiptingu á skorti næstu árin. Vístöluguðinn er óskeikull á þeim bæ og honum sungið hósíanna á Akureyrarfundi VG í dag.  

Til hvers erum við þessar hræður sem eftir erum að halda úti Háskólum ef afurðirnar flýja land hver í kapp við annan ? Mér er sagt að verkfræðistofurnar okkar hanni  virkjanir alla daga sem eiga  að byggjast allar á sama árinu eftir 2013 þannig að þá verði fyrirsjáanlega að flytja inn þúsundir af Kínverjum svo hægt verði að manna störfin.

 Alveg endurtekning á Kárahnjúkavirkjuninni.  Hvað græddu Íslendingar raunverulega á þeirri framkvæmd og æðibunuganginum þar þegar allt verður talið ? Til hvers var allur sá hávaði ?

Vístalan rýkur upp við hverja skattahækkun ríkisstjórnarinnar og skuldir heimilanna hækka. Atvinnutækin hrúgast upp í Hafnarfjarðarhöfn og bíða þess að seljast úr landi. Þeir sem keyptu þau gjalda nú mismuninn með aleigu sinni  og fjölskyldu sinnar.Missa allt sem þau höfðu stritað  fyrir í áratugi. Á altari gengisfellinga og vísitölunnar.

  Brennivínshækkunin síðasta hækkaði skuldir heimilanna um hálfan eða heilan milljarð vegna óbreytanlegrar vísitölunnar sem Alþýðusambandið stendur vörð um. Bensínhækkunin líka. Virðisaukaskattshækkunin líka. Dýrð sé Steingrími J og Indriða í upphæðum-Amen.

 Skjaldborgin hennar Jóhönnu sem átti að vera um um heimilin er því  miður skjaldaröð  rukkaralegíónanna sem eru að  ráðast til atlögu við heimilin í landinu.

Er ljósið við enda gangnanna framljósið á hraðlestinni sem nálgast á fullri ferð ?

Barnaskapur.

Þeir sem halda að Fréttablaðið sé frjálst og óháð geta lesið þetta á öftustu síðu:

"Einn á báti?

Fregnir af endurkomu Gunnars I. Birgissonar í stjórnmálin í Kópavogi hafa vakið athygli. Hrist hefur verið upp í prófkjöri sjálfstæðismanna og bæjarstjórinn hyggst ekki gefa kost á sér á ný. Menn hafa velt því fyrir sér hvernig flokknum muni ganga í samstarfi við aðra. Almælt er að Ómar Stefánsson framsóknarmaður og Gunnar ræðist lítið við og óvíst hvernig þeim mun ganga að vinna saman. Þá er grunnt á því góða á milli Gunnars og helstu forkólfa Samfylkingarinnar, Guðríðar Arnardóttur og Hafsteins Karlssonar. Þau verja nú hendur sínar fyrir dómstólum, en dóttir Gunnars hefur stefnt þeim fyrir meiðyrði í kjölfar fregna um störf hennar fyrir bæjarfélagið. Sjálfstæðismenn horfa því fram á að flokkurinn gæti einangrast verði Gunnar leiðtogi hans."

Þessum boðskap er nú dreift skipulega í Kópavogi af andstæðingum Gunnars innan Sjálfstæðisflokksins. Auðvitað til að fæla menn frá því að kjósa Gunnar í 1. sæti listans í prófkjörinu. Ég man eftir svona brögðum frá því í gamla daga, þegar reynt var að persónugera Sjálfstæðisflokkinn með því að þessi eða hinn myndi eyðileggja flokkinn.

Ég er sallarólegur yfir svona málflutningi. Það er nefnilega flokksfólkið sem velur á listann. Og það hefur alveg vit fyrir sér.

Auðvitað geta fáein atkvæði ráðið úrslitum í prófkjöri. En það er yfirleitt ekki hægt að blekkja allt fólk alltaf. Trúa menn því til dæmis að VG myndi setja það sem skilyrði fyrir meirihlutamyndun með Sjálfstæðisflokknum í Kópavogi að dóttir Gunnars drægi mál sitt gegn Guðríði og Hafsteini til baka ? Að það sé ófrávíkjanlegt skilyrði af hálfu Framsóknarmanna að Gunnar sé ekki á lista Sjálfstæðismanna ? Að Gunnsteinn hafi ekki boðið sig fram í prófkjöri af því að ég sé á móti því að bæjarstarfsmenn séu í pólitík og Gunnar vilji halda ball fyrir bæjarstarfsmenn ?

Pólitík er ekki sandkassaleikur heldur þörf fólks til að láta gott af sér leiða.

Sjá menn ekki hvílíkur barnaskapur svona málflutningur er?

Siðgæði-Gegnsæi !

Ég rakst á grein eftir Gunnar I.Birgisson, hinn brottrekna bæjarstjóra Kópavogs á Pressunni. Gunnar bíður enn eftir að mál hans komist á hreint. Í dag er þriðji fresturinn liðinn sem yfirvöld lofuðu til að klára málið. En það snérist um hvort Lífeyrissjóður Starfsmanna Kópavogs hefði lánað ábyrgðarmanni sínum nokkur prósent umfram heimilað hámark til eins aðila. Framkvæmdin var gerð í þágu beggja aðila til hagsbóta fyrir lífeyrisþega sjóðsins.

Steingrímur J. Sigfússon rak stjórnina frá klukkan hálfellefu að kvöldi og skipaði Elínu Jónsdóttur yfir sjóðinn. Gunnar var formaður sjóðsins og Ómar Stefánsson notaði tækifærið og rak rýtinginn í bak bandamanns síns og velgjörðamanns, Gunnars Birgissonar og krafðist brottrekstrar hans úr bæjarstjórastóli og allra nefnda í Kópavogi. Maður sem á þvílíka vini sem Ómar þurfa ekki óvini. Þessa gersimi sem Ómar er ætla Framsóknarmenn að fara að endurkjósa sem leiðtoga fyrir sig sem treyst verður fyrir því  að byggja brýr yfir til annarra flokka í bæjarstjórn Kópavogs að afloknum kosningum í maí n.k.

Gefum Gunnari orðið:

"Kúlulánadrottning Steingríms J.

Hún vekur undrun, síðasta ráðning vinstri stjórnarinnar í mikilvæg embætti, þ.e. ráðning Elínar Jónsdóttur í stöðu forstjóra Bankasýslu ríkisins.

Elín er greinilega í miklu uppáhaldi hjá fjármálaráðherranum. Hann lét skipa hana sem tilsjónarmann þegar ráðuneyti hans tók yfir Lífeyrissjóð starfsmanna Kópavogsbæjar vegna þess að við, sem sátum í sjóðsstjórninni, vildum ekki tefla fjármunum sjóðsfélaga í tvísýnu í miðju efnahagshruni. Við björguðum fjármunum sjóðsins og tókst vel til.

Óvenjulegar aðstæður kalla á óvenjulegar aðgerðir. Það hefði verið óráð að geyma peningana í bönkunum eins og ástatt var. Þá hefði mátt gagnrýna stjórnina fyrir að taka óþarfa áhættu. Við geymdum þá í staðinn í öruggu skjóli bæjarsjóðs. Það var ekki bannað heldur er talið að lánveitingin hafi hugsanlega verið umfram hámark sem ákveðið var í útrásaræðinu.

Tilsjónarmaðurinn gerði ekki miklar rósir á skrifstofu Lífeyrissjóðs starfsmanna Kópavogsbæjar utan lélegar mætingar og ólund. Þá rak hún framkvæmdastjóra sjóðsins, sem ekkert hafði til saka unnið, nema að skrifa bréf í umboði stjórnar. Þetta mál er líka óskiljanlegt í ljósi þess að Kópavogsbær ber 100% ábyrgð á lífeyrissjóðnum.

Í fjölmiðlum undanfarið hafa komið fram þær fréttir að Elín þessi stundaði hlutabréfabrask og fékk til þess lánað fé, svonefnt kúlulán á annað hundrað milljónir króna, hjá bönkunum fyrir hrun. Þegar syrti í álinn og braskið gekk ekki upp, þá seldi hún fyrirtækið með einskis verðum hlutabréfum en kúlulánið stóð eftir ógreitt!

Löglegt en siðlaust – eða hvað?

Af þessum sökum er tilsjónarmaðurinn góði, yfirmaður Bankasýslunnar og sérlegur eftirlitsmaður fjármálaráðherra með bankaviðskiptum í landinu kölluð kúlulánadrottningin.

Siðaumvandanir vinstri manna eiga alltaf við alla aðra en þá sjálfa. "

Þarna  hafa menn siðgæði og gegnsæi stjórnsýslunnara hjá vinstristjórn Steingríms J. Sigfússonar fyrir augunum .

Hefur nokkuð breyst ?

 Í Mogga er þessi frétt:

"SAMKVÆMT heimildum Morgunblaðsins mun Pálmi Haraldsson leggja 800 milljónir inn í rekstur Ferðaskrifstofu Íslands (FÍ) í kjölfar endurskipulagningar félagsins.......

 FÍ lenti í miklum rekstrarvandræðum í september 2008 og fékk tæplega hálfan milljarð króna lánaðan hjá Landsbankanum, sem varð NBI eftir bankahrun, fram að áramótum til að halda rekstrinum áfram......

Skuldir FÍ gagnvart NBI í ársbyrjun 2009 eru taldar hafa numið um 1,3 milljörðum króna. Ríflega þriðjungi þeirrar skuldar var síðar breytt yfir í hlutafé, sem verður fært niður í endurskipulagningunni. Ávinningur bankans af endurskipulagningunni verður því sá að einhver hluti eiginfjárframlags Pálma inn í FÍ mun renna til bankans, og tap af viðskiptum við ferðaskrifstofuna því einhverju minna. Haft var eftir Pálma Haraldssyni í Morgunblaðinu í gær að hann teldi sig njóta trausts og væri þar af leiðandi fær um að útvega fé til að setja inn í rekstur FÍ.Það er þó ekki hluti af samkomulagi við Feng um endurskipulagningu að félagið fái lán frá NBI til að leggja inn í rekstur ferðaskrifstofunnar, heldur að féð komi annars staðar frá........

 Í nóvember 2008 var hlutafé Iceland Express aukið um 300 milljónir, en þar að auki lánaði Fengur félaginu 300 milljónir. Þriðjungur þess láns hefur verið borgaður til baka, en samkvæmt verðmatinu voru 200 milljóna króna vaxtaberandi skuldir inni í Iceland Express á þeim tíma sem verðmatið var unnið. Var þar tekið mið af ársreikningi félagsins fyrir árið 2008, sem hefur þó ekki borist Ársreikningaskrá. Í þeim ársreikningnum kemur fram að Iceland Express tapaði hundruðum milljóna á árinu."

Hefur nokkuð breyst? Pálmi útrásarvíkingur, sem varð gjaldþrota með Fons uppá marga milljarða getur núna reddað 800 milljónum til að rétta af Iceland Express sem hann á og stjórnar. Hann nýtur nægs trausts til að einhver láti hann fá 800 milljónir.

Fyrrum óskabörn Íslands og útrásarvíkingar njóta fyllsta trausts hvort sem þeir heita Jón Ásgeir eða Pálmi. Hefur nokkuð breyst ?