Hvað segja kommarnir?

við þessari frétt? Ætla þeir að leyfa þetta?

"Stjórn Don­alds Trump Banda­ríkja­for­seta er sögð hafa áhuga á gerð fríversl­un­ar­samn­ings við Ísland. Sam­kvæmt um­fjöll­un Ax­i­os hefði samn­ing­ur­inn lítið viðskipta­fræðilegt gildi fyr­ir Banda­rík­in og skipt­ir land­fræðileg staðsetn­ing Íslands höfuðmáli.

Viðskipta­samn­ing­ur við Ísland þykir fýsi­leg­ur kost­ur fyr­ir Banda­rík­in í ljósi viðskipta­stríðs þeirra við Kína og vax­andi spennu við önn­ur Evr­ópu­lönd."

Hvað segja kommarnir við þessu?

Hvað ætlar Katrín að gera?

til að minnka útblásturinn á þessu banvæna CO2?

Hvað ætlar hún að skattleggja okkur Íslendinga mikið vegna kolefnisútblásturs okkar þegar 6000 kolakynt raforkuver blása út hvert fyrir sig miklu meira af brennisteini, vatnsgufu  og CO2 en við Íslendingar komumst yfir?

Getur hún afstýrt hamfarahlýnun jarðar með henni Grétu Thunberg og hennar vísindum?

Er Bjarni Benediktsson og Sigurður Ingi henni algerlega samstíga?

Hvað ætlar Katrín að gera í þessu máli?

Loftslagsváin

fór eins og logi yfir akur 1998 þegar Michael Mann birti línuritið um hokkí-kylfuna.

Þetta línurit varð tilefni málaferla við Mann og kom í ljós að línuritið var falsað þar sem það sleppti gögnum um hitafar og bjó til kylfuna með fölsunum.

Allt kom fyrir ekki og hin fatlaða Gréta Thunberg hefur síðan hrundið af stað heimsdellu sem byggir á þessum gervivísindum.

 

Það sést á seinni myndinni hvernig fölsunin var framkvæmd.Hlýskeiðinu í fornöld var sleppt en þá var loftslag mun hlýrra en það er núna. 

En trúarsöfnuðurinn með Katrínu Jakobsdóttur forsætisráðherra okkar  innanborðs gefur ekkert fyrir staðreyndir. Það skal vera hamfarahlýnun í gangi og Íslendingar skulu greiða kolefnisskatta bara af því bara og VG bara.

Og aðrir stjórnmálamenn láta toga sig til að fylgja bullinu í forsætisráðherranum af augljósum ástæðum.

https://www.youtube.com/watch?v=8455KEDitpU

Það er loftslagsvá og hamfarahlýnun af því að ég segi það og því skuluð þið borga.

Óhugnaður

birtist í fréttum af Samgönguáætlun.

Svo segir í Mogga:

"Ný samgönguáætlun Næsta fimmtudag verður kynnt samgönguáætlun fyrir höfuðborgarsvæðið til næstu 15 ára.

Að sögn Rósu Guðbjartsdóttur, formanns Samtaka sveitarfélaga á höfuðborgarsvæðinu, SSH, felur áætlunin í sér framkvæmdir við stofnbrautir, almenningssamgöngur, borgarlínuna, hjóla- og göngustíga og umferðarstýringu.

Þær hefjist þegar á næsta ári og muni bæta flæði umferðar innan fárra ára.

Rætt hefur verið um að uppbyggingin geti kostað 120 milljarða og borgarlínan þar af 50 milljarða.

Áformin um Sundabraut sæta tíðindum en borgin hefur samkvæmt heimildum blaðsins ekki gert ráð fyrir Sundabraut. Samkvæmt áætlun starfshóps kosta jarðgöng 74 milljarða en lágbrúin, eða lágbrýrnar, 60 milljarða. Þannig hafa verið unnin drög að tveimur lágbrúm sem tengjast landfyllingu á miðri leið. Síðan taka við göng í gegnum Gufuneshöfða. Lágbrúin og áðurnefnd áætlun kosta alls 180 milljarða"

Það er hryllilegt að sjá að fáránleiki hugmynda Dags B. Eggertssonar og hans nóta skuli eiga að setja meginmark á þessa áætlun.

Ekki ein einustu mislæg gatnamót heldur á helmingur alls fjár að fara í Borgarlínu sem allir vita að er galin framkvæmd og della frá upphafi til enda. Sömuleiðis gerð jarðgangna í Miklubraut sem engan vanda leysa heldur auka svo galnar sem þær hugmyndir eru.

Að bæjarstjórar nágrannabæjanna skuli spila með vitleysunni í stað þess að spyrna við fótum eins og Seltjarnarnes gerir yfirgengur mig.

Fólkið hefur valið fjölskyldubílinn til að leysa sín mál.

Jafnvel þó að hlutdeild almenningssamgangna ykist úr 4 % sem hún hefur verið nú í 7 ár og eftir 7 milljarða sukk,í 12 % eins og Dagur sér fyrir sér, þá stendur eftir að 88 % íbúa höfuðborgarsvæðisins sér ekki aðra leið til að leysa sitt daglega fjölskyldulíf heldur en að eiga helst tvo bíla. Annað er hreinlega ekki tæknilega mögulegt og það sér hver heilvita maður utan Borgarstjórnar Reykjavíkur. 

Samgönguáætlunin er hreinn óhugnaður um sóun á milljörðum af fé skattborgaranna sem ekkert leysir af fyrirliggjandi vandamálum.

Píratasiðferðið

er fyrirsögn á athyglisverðri grein Sirrýar Hallgrímsdóttur í Fréttablaðinu í dag.

Hún segir:

"Flestir telja sig hafa góð prinsipp en þeir eru kannski færri sem standa við þau þegar á reynir. Og það er einmitt þá sem prinsippin skipta máli, hverju við erum tilbúin að fórna til vegna þeirra.

Á þetta reyndi á Alþingi nú í vikunni. Píratarnir hafa farið fremstir í f lokki þeirra sem telja Alþingi siðlaust og vonlaust. Þeir voru því fullir vandlætingar yfir því að tiltekinn Miðflokksmaður, sem hafði orðið sér til skammar á Klaustri og fengið ávítur frá siðanefnd Alþingis, yrði formaður í nefnd.

En þeir ákváðu að greiða ekki atkvæði gegn honum og hafa borið fram óvenju hreinskipta skýringu á þeirri ákvörðun.

Ástæðan fyrir því að þau láta Bergþór yfir sig ganga segja þau vera að meirihlutinn á þinginu hafi hótað því að ef stjórnarandstaðan leysti ekki sjálf úr sínum málum myndi hún ekki fá formennsku í tveimur öðrum nefndum.

Það hefði þýtt að Þórhildur Sunna, sem fyrst íslenskra þingmanna var ávítuð af siðanefnd, fengi ekki nefndarformennsku.

Það var því úr vöndu að ráða fyrir Píratana. Annars vegar prinsipp um að vondir menn eins og Klaustursmenn ættu ekki að stýra nefndum Alþingis og hins vegar valdastaða í þinginu.

Niðurstaðan liggur nú fyrir. Í stað þess að standa á prinsippinu og neita að bera ábyrgð á nefndarformennsku Bergþórs og gefa þar með eftir nefndarformennskur þá völdu Píratarnir stólana og stöðutáknin.

Auðvitað er það síðan sérstakt umhugsunarefni að Píratar telji eðlilegt að Þórhildur Sunna sé heppileg til að stýra þingnefnd.

En þá verða menn að muna að Píratasiðferðið nær ekki til Píratanna sjálfra, bara allra annarra."

Er þetta eitthvað sérstakt við Pírataflokkinn? Er þetta nokkuð annað en sönnun þess að Píratar eru ekki hótinu betri eða flekklausari en aðrir stjórnmálaskúmar sem eru oft boðnir og  búnir til að að selja ömmu sína fyrir eigin hag og vegtyllur.

Er Þórhildur Sunna eitthvað betri eða heilagri en hinir?

 

Söfnum fyrir Sunnuhlíð

og endurtökum leikin frá fyrri tíð þegar Sunnuhlíðarafrekið var unnið.

"Þann 17. mars 1979 var sjálfseignarstofnunin “Hjúkrunarheimili aldraða í Kópavogi” stofnuð. Að stofnuninni stóðu 11 félög: Kvenfélag Kópavogs, Rauðakrossdeild Kópavogs, Lionsklúbburinn Muninn, Lionsklúbbur Kópavogs, Rotaryklúbbur Kópavogs, Kirkjufélag Digranessafnaðar, Kiwanisklúbburinn Eldey, Junior Chamber, Kópavogi, Soroptimistaklúbbur Kópavogs. Árið 1987 bættist Lionsklúbburinn Ýr í hópinn, en Junior Chamber gekk út árið 1998. Á árinu 2001 gerðust Félag eldri borgara í Kópavogi og Rotaryklúbburinn Borgir aðilar að sjálfseignarstofnuninni. Samstarfsvettvangur félaganna hefur gengið undir nafninu Sunnuhlíðarsamtökin.

Í apríl 1978 hafði Soroptimistaklúbbur Kópavogs boðað formenn og fulltrúa frá öllum þjónustuklúbbum og félögum í Kópavogi til fundar, þar sem til umræðu voru málefni aldraðra Kópavogsbúa. Aðkallandi var að fá lausn á málefnum sjúkra, aldraðra í Kópavogi, en ekkert hjúkrunarrými var til í bænum, og miklum erfiðleikum bundið að koma öldruðum sjúklingum inn á sjúkrahús í Reykjavík. Samþykkt var tillaga frá fulltrúa Rauðakrossdeildar Kópavogs um að stofna sjálfseignarstofnun um byggingu hjúkrunarheimilis fyrir aldraða með aðild hinna ýmsu félaga í Kópavogi.

Byggt var upp fjársöfnunarkerfi, sem náði til allra Kópavogsbúa. Söfnunarbaukar (niðursuðudósir, með rauf, merktar söfnuninni) voru bornir inn á hvert heimili í Kópavogi með tilmælum um að hver og einn legði til hliðar sem svaraði hálfu strætisvagnafargjaldi á dag. Drjúgur hluti byggingakostnaðar safnaðist á þennan hátt. Þá færðu einstaklingar, félög, fyrirtæki og stofnanir stærri gjafir, ríkið lét af hendi byggingarlóð og endurgreiddi tolla og söluskatt af byggingarefni, en Kópavogsbær lagði fram fé sem nam um 15 af hundraði af útlögðum byggingarkostnaði.

Hinn 26. janúar 1980 tók Ragnhildur Guðbrandsdóttir fyrstu skóflustungu að hjúkrunarheimilinu. Ragnhildur var þá elsti íbúi Kópavogs, 101 árs gömul, og var afrek hennar skráð í heimsmetabók Guinness, þar sem hún var elst allra í heiminum, sem slíkt verk hafa unnið. Reisugildi var síðan haldið 23. maí 1981 og sóttu það á þriðja þúsund gestir. Mun þetta vera fjölmennasta reisugildi, sem haldið hafði verið á Íslandi og sýnir vel þá miklu samstöðu, sem ríkti um þetta verkefni meðal Kópavogsbúa. Tæpu ári seinna, eða 20 maí 1982 var haldin vígsluhátíð þar sem heimilinu var gefið nafnið “Sunnuhlíð”. Fimm dögum seinna kom svo inn fyrsti íbúinn, en það var sjálfur Þórður Þorsteinsson á Sæbóli, fyrrverandi hreppstjóri Kópavogshrepps. Sunnuhlíð var fyrsta sérhannaða hjúkrunarheimili fyrir aldraða á Íslandi. 

Skömmu eftir að byggingu hjúkrunarheimilisins lauk, ákvað fulltrúaráð Sunnuhlíðar að byggja þjónustuíbúðir fyrir aldraða í tengslum við hjúkrunarheimilið. Á sama tíma var byggður þjónustukjarni vestan við hjúkrunarheimilið og var hann formlega opnaður við hátíðlega athöfn 17. nóvember 1989. Um leið tók til starfa dagvist fyrir aldraða, Dagdvöl. 

Á aðalfundi Sunnuhlíðar 17. mars 1999 var samþykkt að fela stjórninni að hefja undirbúning að stækkun hjúkrunarheimilisins. Í Sunnuhlíð eru nú rekin 66 almenn hjúkrunarrými, 4 rými fyrir skammtímainnlögn með endurhæfingu og dagdvöl fyrir 20 einstaklinga. 

Frá 1. janúar 2014 hefur Vigdísarholti ehf, sem er í eigu ríkisins, séð um rekstur hjúkrunarheimilisins og dagdvalar, en Sunnuhlíðarsamtökin sjá um rekstur íbúðarhlutans."

Þörfin fyrir hjúkrunarrými hefur ekki minnkað frá því sem var og stefnir heldur ekki þangað með hækkandi lífaldri fólks.

Mér hefur skilist að bygging nýs hjúkrunarheimils við Boðaþing hafi frestast vegna deilna um minniháttar mál. Einnig þar þarf að taka til hendinni.

Hjúkrunarheimili þurfa að rísa um allt land. Það vantar snjallræði til að hrinda þeim úr vör eins og Kópavogsbár fundu upp fyrir fjórum áratugum.

Söfnum fyrir Sunnuhlíð aftur.

Trúarvakning

á kostnað skattborgara var kynnt í Sjónvarpi í kvöld.

Raunalegt var að horfa á stofnfund trúarsamtaka Katrínar Jakobsdóttur um stofnun samráðsvettvangs um loftslagsmál.

Hvernig málsmetandi menn létu hafa sig í að sýna hlutleysi í skoðunum á þessum hjávísindum,með semingi þó sýndist mér, innan um hina trúuðu og sannfærðu heimsendatrúarmenn.

Allt verður þetta drifið með sköttum og gjöldum sem almenningur fær að greiða vegna einkaskoðana forsætisráðherra og söfnuðar bókstafstrúarmanna sem telja að 400 ppm af CO2 í andrúmsloftinu sé að kollvarpa heiminum er yfirþyrmandi óvísindaleg ályktun.

Upp úr Kötlu streyma ein 20 þúsund tonn af CO2 á dag. Jafngildi árslosunar hvers þúsund Íslendinga. Jafnmikið og öll þjóðin er sögð losa á ári.

Varla eru aðrar eldstöðvar landsins sem nýlega hafa gosið fríar af slíku. Hvernig ætlar ríkisstjórnin að kolefnisjafna þetta? Moka ofan í Flóaáveituna? Hvað halda menn að streymi af CO2 upp úr Mið-Atlantshafshryggnum sem er þúsunda kílómetra löng gígaröð neðansjávar?

Þeir efnameiri geta keypt sér dýra rafbíla og greiða ekkert fyrir afnot af vegunum né fyrir orkunotkunina meðan hinn efnaminni almenningur verður að sætta sig við mengandi bíla og greiða skatta af orkunni sem á þá fer.Það er við hæfi að forystu í slíkum ójöfnuði skuli koma frá Vinstri grænum.

Trúarvakning Katrínar Jakobsdóttur um yfirvofandi loftslagsvá byggir ekki á vísindalegum grunni hverjar sem yfirlýsingar hennar eru um hið gagnstæða.

Borgarstjórnarblús

var á dagskrá á Útvarpi Sögu þar sem Pétur fékk Mörtu Guðjónsdóttur úr Sjálfstæðisflokknum og Baldur Borgþórsson úr Miðflokknum til sín.

Málflutningur beggja var mjög skýr. Það er eins og að Borgarstjórnarmeirihlutinn sé einbeittur í því að hlusta ekki neitt á raddir Borgarbúa varðandi framkvæmdir á sínum draumsýnum sem eru að flæma 45  fyrirtæki úr Miðborginni og þrengja að umferð einkabíla um alla Borg með óheyrilegum umferðatöfum. En Baldur sagði einkabíla nú frekar ættu að heita fjölskyldubílar miðað við þá nauðsynlegu notkun sem ekki verður gerð öðruvísi af augljósum ástæðum veðurfars og aðstæðna sem allir sjá nema fulltrúar meirihlutans sem hafa þessa einbeittu stefnu að framkvæma allt án samráðs við íbúa.

Baldur minntist á nýja sorpmusterið í Álfsnesi þar sem áður voru framleiddar einhverjar 5000 einingar af Methani án þess að ég skildi hvað við var átt. Þar var brennt einhverjum 4000 einingum af þeim af því að  ekki var hægt að selja þær. Nú á stöðin á að framleiða 19.0000 einingar en  þá verður væntanlega að brenna að mestu sem ekki selst. Þessi bruni er víst ekki beislaður til nytja á neinn hátt.

Þarf ekki að spyrja þeirrar grundvallarspurningar hvort þessi lausn í gasi og jarðgerð sem Sorpa er að byggja sé sú rétta þegar sorporkustöð sem myndi þjóna öllu landinu hefði mátt reisa á þessum stað svipað og Danir hafa gert í Amager? Þarf ekki að ræða þetta grundvallarmál á hagrænum grunni?

Á sama tíma kaupir Reykjavík rafmagnsstrætóa sem sýna sig að kalla á 2 stöðugildi bara til að þjóna hleðslu á þessum vögnum sem eru sífellt orkulausir um allan bæ. Af hverju voru ekki keyptir metanbílar spyr Baldur?

Marta benti á að miklar framkvæmdir standi nú yfir á Óðinstorgi, sem er heimavöllur Dags B. Eggertssonar Borgarstjóra. Á sama tíma er ekki hægt að fá fé í að gera við mygluvandmálin í skólum Borgarinnar. Fágangsröðun virðist ekki upp á marga fiska hjá meirihlutanum segir Marta.

Allar framkvæmdir fari líka yfirleitt langt fram úr áætlunum eins og Bragginn og  Breiðholtsblokkin. Er hægt að búast við öðru með Borgarlínuna? Álfsnesframkvæmdirnar í Sorpu eru komnar milljarða fram úr áætlunum. 

Baldur og Marta rifjuði upp samninginn frá 2012 milli Reykjavíkurborgar og sveitarfélaganna og Vegagerðar Ríkisins þar sem ákveðið var að leggja ekki krónu í auknar vegaframkvæmdir innan Reykjavíkur heldur að taka milljarð á ári í auknar almenningssamgöngur. Undanskildar voru þá mislæg gatnamót við Bústaðaveg og Reykjanesbraut vegna sérstakra hættulegra aðstæðna sem voru þá. Nú hefur umferð vaxið mikið en ekkert hefur verið gert þarna. 

Þá var hlutfall almenningssamgangna í samgöngum 4  %.  Nú 2019, eftir 7 milljarða inndælingu  er þetta hlutfall enn 4  %. Degi B. finnst þetta frábær styrkur að fá í Borgarsjóð en finnst annað litlu skipta. Öllum tillögum til úrbóta eins og snjallstýringu umferðarljósa er umsvifalaust vísað frá.

Þennan Borgarstjórnblús kjósa Borgarbúar yfir sig kjörtímabil eftir kjörtímabil og á þessu verður engin breyting fyrr en í fyrsta lagi eftir nýjar kosningar.

 

 

Hvað vill unga fólkið?

Sá margvísi Sjálfstæðismaður Styrmir Gunnarsson veltir fyrir sér hvernig Sjálfstæðisflokkurinn eigi að sækja í sig veðrið.

Hann skrifar m.a.svo í dag:

"...

En jafnframt er ljóst að fylgi flokksins meðal ungs fólks hefur hrapað. Það er af sem áður var í þeim efnum. Sjálfstæðisflokkurinn þarf að fara í skipulega vinnu við að sækja fram meðal nýrra kjósenda. Það verður bezt gert með því að beina athyglinni að hagsmunamálum unga fólksins. 

Hagsmunir þess snúast augljóslega öðru fremur að því að auðvelda ungu fólki að eignast húsnæði. Það er ekkert nýtt en hefur sjaldan verið jafn erfitt og nú. Húsnæði er dýrt og lán eru dýr. Þess vegna væri æskilegt að umræður innan flokks og þá ekki sízt meðal ungs fólks á þeim vettvangi snúist um betri lausnir í þeim efnum en nú eru til staðar.

Loks eru vísbendingar um að eldri kjósendur séu að yfirgefa sinn gamla flokk m.a. vegna kæruleysislegrar afstöðu þingflokksins til fullveldismála. 

Það er kominn tími á skipulegar og markvissar umræður um þessi málefni."

Spurning er hvort við eldri erum ekki of fastir í hinni gömlu hugmyndafræði um eigið húsnæði. Kynslóðir Dana á liðinni öld þekktu ekki annað en að búa í leiguhúsnæði kratanna.

Er ævilöng þrælatilvera í vaxtabúri fjármagnsaflanna það sem unga fólkið vill? Vill að ekki frekar eiga jafnan kost á ódýru leiguhúsnæði sem getur verið í lægra gæðaflokki en atómsprengjuheld hús verktakanna lóðasælu?

Geta ódýr einingahús úr timbri eins og verið er að byggja núna verið hluti af þeirri lausn?

Er ekki komið annað gildismat hjá unga fólkinu en var þegar við Styrmir vorum ungir og Sjálfstæðisflokkurinn var og hét?

 

Pútín stakk títuprjóni

í Trump þann 16. september. Hann sagði að Rússar gætu selt Saudi Aröbum loftvarnakerfi, S300 og S400 sem þeir hefðu selt Iran. sem gæfu mannvirkjum þeirra fullkomna vernd.

Varla gat hann ekki strítt Trump meira en þetta sem ekki getur verndað bandamenn sína betur en þarna varð á raunin.

Verður ekki að láta á það reyna hversu góð þessi kerfi eru?

Hvernig tekur Trump svona lævísri títuprjónsstungu frá Pútín?